໑. ຈນ຺ທິມສສຸຕ຺ຕວຓ຺ຓນາ

໙໒. ປພ຺ພຕຕຏາ ສນ຺ທມາໂນ ຕຖາຣູໂປ ນທີນິວຕ຺ຕນປເທໂສປິ ສມ຺ພາຘຏ຺ຐານຕາຍ ກຈ຺ໂຉ ວິຍາຕິ ອາຫ ‘‘ປພ຺ພຕກຈ຺ເຉປີ’’ຕິ. ປຏິປກ຺ຂທູຣີຠາເວນ ເສຏ຺ຐຏ຺ເຐນ ຈ ເອໂກ ອຸເທຕີຕິ ເອໂກທິ, ເອກຄ຺ຄຕາ. ຕສ຺ມິໍ ໂຍຄໂຕ ເອກຄ຺ຄຈິຕ຺ຕາ ອິຘ ເອໂກທີ. ປຏິປກ຺ຂໂຕ ອຕ຺ຕານໍ ນິປຍນ຺ຕິ ວິໂສເຘນ຺ຕີຕິ ນິປກາ, ປຎ຺ຎວນ຺ໂຕ. ເຕນາຫ ‘‘ເອກຄ຺ຄຈິຕ຺ຕາ ເຈວາ’’ຕິອາທິ. ກາຍາທິເຠທໍ ອາຣມ຺ມຓໍ ສາຕິສຍາຍ ສຕິຍາ ສຣນ຺ຕີຕິ ສຕາ. ເຕນາຫ ‘‘ສຕິມນ຺ໂຕ’’ຕິ. ໂສຕ຺ຖິໍ ຄມິສ຺ສນ຺ຕີຕິ ຍຖາວຸຕ຺ຕປເທເສ ມຄາ ໂສຕ຺ຖິມນຸປທ຺ທເວນ ວຕ຺ຕິສ຺ສນ຺ຕິ, ເອວໍ ຌານລາຠິໂນ ໂສຕ຺ຖິໍ ກິເລເສຫິ ອນຸປທ຺ທຸຕາ ວຕ຺ຕິສ຺ສນ຺ຕິ. ອຍໍ ກິຣ ເທວປຸຕ຺ໂຕ ພ຺ຣຫ຺ມໂລເກ ນິພ຺ພານສຎ຺ຎີ, ຕສ຺ມາ ເອວມາຫ. ຠຄວາ ‘‘ອຍໍ ເທວປຸຕ຺ໂຕ ອນິພ຺ພານຄາມີ ສມາໂນ ນິພ຺ພານຄາມິສຎ຺ຎີ, ຫນ຺ທສ຺ສ ນິພ຺ພານຄາມິໂນ ທສ຺ເສມີ’’ຕິ ທຸຕິຍໍ ຄາຖມາຫ. ຈຕຸນ຺ນໍ ໂອຆານໍ, ສໍສາຣມໂຫຆສ຺ເສວ ວາ ປຣຕີຣຠາວໂຕ ປຣຕີຣນ຺ຕິ ນິພ຺ພານໍ. ອມ຺ພຸນິ ຊາໂຕ ອມ຺ພຸໂຊ, ມຈ຺ໂຉ. ສຸຕ຺ຕຊາລໍ ຉິນ຺ທິຕ຺ວາ ມຈ຺ຉາ ວິຍ ກິເລສຊາລໍ ຠິນ຺ທິຕ຺ວາ ຄມິສ຺ສນ຺ຕີຕິ.

ຈນ຺ທິມສສຸຕ຺ຕວຓ຺ຓນາ ນິຏ຺ຐິຕາ.