໘. ກາມສຸຕ຺ຕວຓ຺ຓນາ

໗໘. ‘‘ອຕ຺ຕກາໂມ’’ຕິ ປາຬິຍໍ ວຸຕ຺ຕຕ຺ຕາ ອາຫ ‘‘ຐເປຕ຺ວາ ສພ຺ພໂພຘິສຕ຺ເຕ’’ຕິ. ເຕ ຫິ ສພ຺ພໂສ ປຣຕ຺ຖາຍ ເອວ ປຏິປຊ຺ຊມານາ ມຫາກາຣຸຓິກາ ປຣຕ຺ຖກາມາ, ອຕ຺ຖກາມາ ນາມ ນ ໂຫນ຺ຕິ, ຍາ ຈ ເຕສໍ ອຕ຺ຕຕ຺ຖາວຫາ ປຏິປຕ຺ຕິ, ສາປິ ຍາວເທວ ປຣຕ຺ຖາ ເອວາຕິ. ວຸຕ຺ຕໍ ໂປຣາຓຏ຺ຐກຖາຍໍ. ຍສ຺ມາ ໂພຘິສຕ຺ຕາ ປຣຫິຕປຏິປຕ຺ຕິຍາ ປາຣມິໂຍ ປູເຣນ຺ຕາ ຕຖາຣູປໍ ກາຣຓໍ ປຕ຺ວາ ອຕ຺ຕານໍ ປເຣສໍ ປຣິຈ຺ຈຊນ຺ຕິ ປຎ຺ຎາປາຣມິຍາ ປຣິປູຣຓໂຕ, ຕສ຺ມາ ອິຘາປິ ‘‘ສພ຺ພໂພຘິສຕ຺ເຕ ຐເປຕ຺ວາເຍວາຕິ ວຸຕ຺ຕ’’ນ຺ຕິ ອາຫ. ກລ຺ຍາຓນ຺ຕິ ຠທ຺ທກໍ. ວາຈາຍ ອຘິປ຺ເປຕຕ຺ຕາ ອາຫ ‘‘ສຓ຺ຫໍ ມຸທຸກ’’ນ຺ຕິ. ປາປິກນ຺ຕິ ລາມກໍ ນິຫີນໍ. ຕໍ ປນ ຜຣຸສໍ ວາຈນ຺ຕິ ສຣູປໂຕ ທສ຺ເສຕິ.

ກາມສຸຕ຺ຕວຓ຺ຓນາ ນິຏ຺ຐິຕາ.