໑໐. ປຊ຺ໂຊຕສຸຕ຺ຕວຓ຺ຓນາ

໘໐. ຕໍ ຕໍ ສມວິສມໍ ປຊ຺ໂຊຕຕີຕິ ປຊ຺ໂຊໂຕ. ປທີໂປ ອນ຺ຘກາຣໍ ວິຘມິຕ຺ວາ ປຈ຺ຈກ຺ຂໂຕ ຣູປຄຕໍ ທສ຺ເສຕິ, ເອວໍ ປຎ຺ຎາປຊ຺ໂຊໂຕ ອວິຊ຺ຊນ຺ຘກາຣໍ ວິຘມິຕ຺ວາ ຘມ຺ມານໍ ປຣມຕ຺ຖຠູຕໍ ຣູປໍ ທສ຺ເສຕິ. ຊາຄຣພ຺ຣາຫ຺ມໂຓ ວິຍາຕິ ຊາຄຣຂີຓາສວພ຺ຣາຫ຺ມໂຓ ວິຍ. ໂສ ຫິ ສຕິປຎ຺ຎາເວປຸລ຺ລປ຺ປຕ຺ຕິຍາ ສພ຺ພທາປິ ຊາຄໂຣ ໂຫຕິ. ຄາໂວຕິ ໂຄຊາຕິໂຍ. ອິທໍ ຄຸນ຺ນໍ ໂຄຓານຎ຺ຈ ສາມຎ຺ຎໂຕ ຄຫຓໍ. ກມ຺ເມຕິ ກຣຓຕ຺ເຖ ຠຸມ຺ມວຈນໍ. ຊີວນໍ ຊີໂວ, ສຫ ຊີເວນາຕິ ສຊີວິໂນ. ເຕນາຫ ‘‘ກມ຺ເມນ ສຫ ຊີວນ຺ຕານ’’ນ຺ຕິ, ກສິວາຓິຊ຺ຊາທິກມ຺ມໍ ກຕ຺ວາ ຊີວນ຺ຕານນ຺ຕິ ອຕ຺ໂຖ. ໂຄມຓ຺ຑເລຫິ ສທ຺ຘິນ຺ຕິ ໂຄຄເຓນ ສຫ. ນ ເຕນ ວິນາ ກສິກມ຺ມາທີນິ ອຸປ຺ປຊ຺ຊນ຺ຕິ, ໂຄຣສສິທ຺ຘິຍາ ເຈວ ກສນຠາຣວຫນສິທ຺ຘິຍາ ຈ ກສິກມ຺ມເອກຈ຺ຈວາຓິຊ຺ຊກມ຺ມາທີນິ ອິຊ຺ຌນ຺ຕິ. ສຕ຺ຕກາຍສ຺ສາຕິ ອາຫາຣຸປຊີວິໂນ ສຕ຺ຕກາຍສ຺ສ ກສິໂຕ ອຎ຺ຎຖາ ຊີວິກໍ ກປ຺ເປນ຺ຕສ຺ສປິ ກສິຊີວິຕວຸຕ຺ຕິຍາ ມູລກາຣຓໍ ຜລນິປ຺ຜຕ຺ຕິນິມິຕ຺ຕຕ຺ຕາ ຕສ຺ສ. ອິຣິຍາປໂຖ ຈ ອິຣິຍນກິຣິຍານໍ ປວຕ຺ຕນຸປາໂຍ. ‘‘ສີຕນ຺ຕິ ນງ຺ຄລສີຕກມ຺ມ’’ນ຺ຕິ ວທນ຺ຕິ.

ປຊ຺ໂຊຕສຸຕ຺ຕວຓ຺ຓນາ ນິຏ຺ຐິຕາ.