໗. ອທ຺ຘວຄ຺ໂຄ

໑. ນາມສຸຕ຺ຕວຓ຺ຓນາ

໖໑. ນາມນ຺ຕິ ສາມຎ຺ຎນາມາທິເຠທໍ ນາມໍ. ສພ຺ພນ຺ຕິ ສພ຺ພໍ ປຎ຺ຎຕ຺ຕິປຖໍ ສພ຺ພໍ ເຎຍ຺ຍປວຕ຺ຕິປຖໍ. ອທ຺ຘຠວີຕິ ກາມໍ ປາຬິຍໍ ອຕີຕກາລນິທ຺ເທໂສ ກໂຕ, ຕໍ ປນ ລກ຺ຂຓມຕ຺ຕໍ. ອຠິຠວຕິ ອນຸປຕຕີຕິ ເອເຕນ ອຠິຠໂວ ອນຸປຕນໍ ປວຕ຺ຕິ ເອວາຕິ ທສ຺ເສຕິ. ຕໍ ປນສ຺ສ ອຠິຠວນໍ ອປ຺ປວິສເຍ ອນາມສິຕ຺ວາ ມຫາວິສຍານໍ ວເສນ ທສ຺ເສນ຺ໂຕ ‘‘ໂອປປາຕິເກນ ວາ’’ຕິອາທິມາຫ. ຕສ຺ສ ນາມໍ ໂຫຕີຕິ ຕສ຺ສ ຣຸກ຺ຂປາສາຓາທິກສ຺ສ ອນາມໂກອິຈ຺ເຈວ ສມຎ຺ຎາ ໂຫຕິ, ຕຖາ ນໍ ສຎ຺ຊານນ຺ຕີຕິ ອຕ຺ໂຖ.

ນາມສຸຕ຺ຕວຓ຺ຓນາ ນິຏ຺ຐິຕາ.

໒. ຈິຕ຺ຕສຸຕ຺ຕວຓ຺ຓນາ

໖໒. ເຍ ຈິຕ຺ຕສ຺ສ ວສໍ ຄຈ຺ຉນ຺ຕີຕິ ເຍ ອປຣິຎ຺ຎາຕວຕ຺ຖຸກາ, ເຕສໍເຍວ. ອນວເສສປຣິຍາທານນ຺ຕິ ອນວເສສຄ຺ຄຫຓໍ. ນ ຫິ ປຣິຎ຺ຎາຕກ຺ຂນ຺ຘາ ປຫີນກິເລສາ ຈິຕ຺ຕສ຺ສ ວສໍ ຄຈ຺ຉນ຺ຕິ, ຕໍ ອຕ຺ຕໂນ ວເສ ວຕ຺ເຕນ຺ຕິ.

ຈິຕ຺ຕສຸຕ຺ຕວຓ຺ຓນາ ນິຏ຺ຐິຕາ.

໓. ຕຓ຺ຫາສຸຕ຺ຕວຓ຺ຓນາ

໖໓. ຕຕິເຍ ‘‘ສພ຺ເພວ ວສມນ຺ວຄູ’’ຕິ ເຍ ຕຓ຺ຫາຍ ວສໍ ຄຈ຺ຉນ຺ຕິ, ເຕສໍ ເອວ ອນວເສສປຣິຍາທານນ຺ຕິ ອິມມຕ຺ຖໍ ‘‘ເອເສວ ນໂຍ’’ຕິ ອິມິນາ ອຕິທິສ຺ສຕິ.

ຕຓ຺ຫາສຸຕ຺ຕວຓ຺ຓນາ ນິຏ຺ຐິຕາ.

໔. ສໍໂຍຊນສຸຕ຺ຕວຓ຺ຓນາ

໖໔. ກິໍ ສຸ ສໍໂຍຊໂນຕິ ສູຕິ ນິປາຕມຕ຺ຕນ຺ຕິ ອາຫ ‘‘ກິໍ-ສໍໂຍຊໂນ’’ຕິ? ວິຈຣນ຺ຕິ ເອເຕຫີຕິ ວິຈາຣຓາ, ປາທາ. ພຫຸວຈເນ ຫິ ວຕ຺ຕພ຺ເພ ເອກວຈນໍ ກຕໍ. ຕສ຺ສາຕິ ໂລກສ຺ສ.

ສໍໂຍຊນສຸຕ຺ຕວຓ຺ຓນາ ນິຏ຺ຐິຕາ.

໕. ພນ຺ຘນສຸຕ຺ຕວຓ຺ຓນາ

໖໕. ຈຕຸຕ຺ເຖ ອາຄຕອຕ຺ໂຖ ເອວ ອນນ຺ຕເຣປິ ວຸຕ຺ໂຕ, ພ຺ຍຎ຺ຊນເມວ ນານນ຺ຕິ ອາຫ ‘‘ປຎ຺ຈເມປິ ເອເສວ ນໂຍ’’ຕິ.

ພນ຺ຘນສຸຕ຺ຕວຓ຺ຓນາ ນິຏ຺ຐິຕາ.

໖. ອຕ຺ຕຫຕສຸຕ຺ຕວຓ຺ຓນາ

໖໖. ‘‘ເກນສ຺ສຸພ຺ຠາຫໂຕ’’ຕິ ປາໂຐຕິ ອຘິປ຺ປາເຍນ ‘‘ສຸ-ກາໂຣ ນິປາຕມຕ຺ຕ’’ນ຺ຕິ ອາຫ, ‘‘ເກນສ຺ສພ຺ຠາຫໂຕ’’ຕິ ປນ ປາເຐ ອຸ-ກາຣໂລເປນ ປທສນ຺ຘິ. ອິຈ຺ຉາຘູປາຍິໂຕຕິ ອສມ຺ປຕ຺ຕວິສຍິຈ຺ຉາລກ຺ຂຓາຍ ຕຓ຺ຫາຍ ສນ຺ຕາປິໂຕ ທຑ຺ໂຒ. ເຕນາຫ ‘‘ອິຈ຺ຉາຍ ອາທິຕ຺ໂຕ’’ຕິ.

ອຕ຺ຕຫຕສຸຕ຺ຕວຓ຺ຓນາ ນິຏ຺ຐິຕາ.

໗. ອຸຑ຺ຑິຕສຸຕ຺ຕວຓ຺ຓນາ

໖໗. ອຸລ຺ລງ຺ຆິໂຕຕິ ອຸພ຺ພນ຺ຘິຕ຺ວາ ລງ຺ຆິໂຕ. ສທ຺ທາທີສູຕິ ສທ຺ທາທິນາຄທນ຺ເຕສຸ ໂສຕາທີນິ ອຸຑ຺ຑິຕານິ ຕຓ຺ຫາຣຊ຺ຊຸນາ ທຬ຺ຫພນ຺ຘເນນ ພທ຺ຘຕ຺ຕາ ຕທນຕິວຕ຺ຕນໂຕ. ໂລໂກຕິ ອາຍຕນໂລໂກ. ຕຖາ ອຕ຺ຖໂຍຊນາຍ ກຕຕ຺ຕາ ຂນ຺ຘາທິໂລກວເສນປິ ໂຍຊນາ ກາຕພ຺ພາ. ນ ທູຣໍ ອນນ຺ຕຣຠວກຕ຺ຕາ. ຈຸຕິຈິຕ຺ຕອນ຺ຕຣິຕຕ຺ຕາ ເອກຈິຕ຺ຕນ຺ຕຣຠວສ຺ສ ກມ຺ມສ຺ສ ອພຸຊ຺ຌນໍ, ເອວໍ ສນ຺ເຕ ກສ຺ມາ ສຕ຺ຕາ ນ ພຸຊ຺ຌນ຺ຕີຕິ ອາຫ ‘‘ພລວຕິຍາ’’ຕິອາທິ.

ອຸຑ຺ຑິຕສຸຕ຺ຕວຓ຺ຓນາ ນິຏ຺ຐິຕາ.

໘. ປິຫິຕສຸຕ຺ຕວຓ຺ຓນາ

໖໘. ປຎ຺ໂຫຕິ ຎາຕຸໍ ອິຈ຺ຉິໂຕ ອຕ຺ໂຖ. ປຸຈ຺ຉິໂຕຕິ ສຕ຺ຕມສຸຕ຺ເຕ ຄາຖາຍ ປຸຣິມທ຺ຘໍ ປຈ຺ຉິມທ຺ຘໍ, ປຈ຺ຉິມໍ ປຸຣິມໍ ກຕ຺ວາ ອຏ຺ຐມສຸຕ຺ເຕ ເທວຕາຍ ປຸຈ຺ຉິຕຕ຺ຕາ ວຸຕ຺ຕໍ ‘‘ເຫຏ຺ຐຸປຣິຍາຍວເສນ ປຸຈ຺ຉິໂຕ’’ຕິ. ປຸຈ຺ຉານຸຣູປໍ ວິສ຺ສຊ຺ຊນນ຺ຕິ ອວຸຕ຺ຕມ຺ປິ ສິທ຺ຘເມຕນ຺ຕິ ອນາຫຏໍ.

ປິຫິຕສຸຕ຺ຕວຓ຺ຓນາ ນິຏ຺ຐິຕາ.

໙. ອິຈ຺ຉາສຸຕ຺ຕວຓ຺ຓນາ

໖໙. ນວເມ ວິນຍາຍາຕິ ວິນເຍນ. ກຣຓຕ຺ເຖ ຫິ ອິທໍ ສມ຺ປທານວຈນໍ. ກິສ຺ສສ຺ສູຕິ ກິສ຺ສ, ສຸ-ກາໂຣ ນິປາຕມຕ຺ຕໍ. ສພ຺ພໍ ຉິນ຺ທຕິ ພນ຺ຘນນ຺ຕິ ສພ຺ພໍ ທສວິຘມ຺ປິ ສໍໂຍຊນໍ ສມຸຈ຺ຉິນ຺ທຕິ. ນ ຫິ ຕໍ ກິຎ຺ຈິ ກິເລສພນ຺ຘນໍ ອຕ຺ຖິ, ຍໍ ອສມຸຈ຺ຉິນ຺ນໍ ຫຸຕ຺ວາ ຐິຕໍ ອສ຺ສາ ຕຓ຺ຫາຍ ສມຸຈ຺ຉິນ຺ນາຍ. ສ຺ວາຍມຕ຺ໂຖ ສຸວິຎ຺ເຎຍ຺ໂຍຕິ ອາຫ ‘‘ສພ຺ພໍ ອຸຕ຺ຕານເມວາ’’ຕິ.

ອິຈ຺ຉາສຸຕ຺ຕວຓ຺ຓນາ ນິຏ຺ຐິຕາ.

໑໐. ໂລກສຸຕ຺ຕວຓ຺ຓນາ

໗໐. ກິສ຺ມິນ຺ຕິ ກິສ຺ມິໍ ສຕິ? ຕສ຺ສ ປນ ສນ຺ຕຠາໂວ ອຸປ຺ປຕ຺ຕິວເສເນວາຕິ ອາຫ ‘‘ກິສ຺ມິໍ ອຸປ຺ປນ຺ເນ’’ຕິ? ໂລໂກ ອຸປ຺ປນ຺ໂນຕິ ວຸຈ຺ຈຕິ ອນຸປາທານຕ຺ຕາ ໂລກສມຎ຺ຎາຍ. ຉສູຕິ ເອຕ຺ຖາປິ ເອເສວ ນໂຍ ສນ຺ຖວນ຺ຕິ ອຘິກສິເນຫໍ ກໂຣຕິ ອຘິກສິເນຫວຕ຺ຖຸຠາວໂຕ ອຊ຺ຌຕ຺ຕິກາຍຕນານໍ. ອຸປາທາຍາຕິ ປຸພ຺ພກາລກິຣິຍາ ອປຣກາລກິຣິຍໍ ອເປກ຺ຂຕີຕິ ວຈນເສສວເສນ ກິຣິຍາປທໍ ຄຫິຕໍ ‘‘ປວຕ຺ຕຕີ’’ຕິ. ກິໍ ປນ ປວຕ຺ຕຕິ? ໂລໂກ, ໂລກສມຎ຺ຎາຕິ ອຕ຺ໂຖ. ຉສູຕິ ອິທໍ ນິມິຕ຺ຕຕ຺ເຖ ຠຸມ຺ມໍ. ຉຬາຍຕນນິມິຕ຺ຕຎ຺ຫິ ສພ຺ພທຸກ຺ຂໍ. ອຍນ຺ຕິ ສຕ຺ຕໂລໂກ. ອຸປ຺ປນ຺ໂນ ນາມ ໂຫຕິ ຉຬາຍຕນໍ ນາມ ມູລໍ ສພ຺ພທຸກ຺ຂານນ຺ຕິ ກຕ຺ວາ. ພາຫິເຣສຸ ອາຍຕເນສຸ ສນ຺ຖວໍ ກໂຣຕິ ວິເສສໂຕ ຣູປາທີນໍ ຕຓ຺ຫາວຕ຺ຖຸກຕ຺ຕາ. ຍສ຺ມາ ຈກ຺ຂາທີນໍ ສນ຺ຕປ຺ປນວເສນ ຣູປາທີນໍ ປຣິຄ຺ຄຫິຕຕ຺ຕາ ໂລກສ຺ສ ນິເສວິຕາຍ ສໍວຕ຺ຕຕິ, ຕສ຺ມາ ວຸຕ຺ຕໍ ‘‘ຉນ຺ນໍ…ເປ… ວິຫຎ຺ຎຕີ’’ຕິ.

ໂລກສຸຕ຺ຕວຓ຺ຓນາ ນິຏ຺ຐິຕາ.

ອທ຺ຘວຄ຺ຄວຓ຺ຓນາ ນິຏ຺ຐິຕາ.