໖. ຊຣາວຄ຺ໂຄ

໑. ຊຣາສຸຕ຺ຕວຓ຺ຓນາ

໕໑. ຫິຕສ຺ສ ສາຘນໂຕ ສາຘຸ, ຍໍ ກິຎ຺ຈິ ອຕ຺ຖຊາຕໍ. ຕໍ ປນ ອຕ຺ຖກາເມນ ລຠິຕພ຺ພໂຕ ອຸປເສວິຕພ຺ພໂຕ ລທ຺ຘກໍ, ກລ຺ຍາຓຏ຺ເຐນ ຠທ຺ທກນ຺ຕິ ວຸຈ຺ຈຕີຕິ ອາຫ ‘‘ສາຘູຕິ ລທ຺ຘກໍ ຠທ຺ທກ’’ນ຺ຕິ. ‘‘ສີລໍ ຍາວ ຊຣາ ສາຘູ’’ຕິ ວຸຕ຺ຕມຕ຺ຖໍ ພ຺ຍຕິເຣກໂຕ ວິຠາເວຕຸໍ ‘‘ອິມິນາ ອິທໍ ທສ຺ເສຕີ’’ຕິ ວຸຕ຺ຕໍ. ອິທນ຺ຕິ ອິທໍ ອຕ຺ຖຊາຕໍ.

ປຕິຏ຺ຐິຕາຕິ ຈິຕ຺ຕສນ຺ຕາເນ ລທ຺ຘປຕິຏ຺ຐາ, ເກນຈິ ອສໍຫາຣິຍາ. ເຕນາຫ ‘‘ມຄ຺ເຄນ ອາຄຕາ’’ຕິ. ຈິຕ຺ຕີກຕຏ຺ຐາທີຫີຕິ ປູຊນີຍຠາວາທີຫິ. ວຸຕ຺ຕໍ ເຫຕໍ ໂປຣາຓຏ຺ຐກຖາຍໍ. ຈິຕ຺ຕີກຕນ຺ຕິ ຣຕນນ຺ຕິ ອິທໍ ຣຕນໍ ນາມ ໂລເກ ຈິຕ຺ຕີກຕໍ ວຕ຺ຖູນໍ ສຫສ຺ສຄ຺ຆນຕາທິວເສນ. ເຍປິ ໂລເກ ຈິຕ຺ຕີກຕາ ຂຕ຺ຕິຍປຓ຺ຑິຕ-ຈຕຸມຫາຣາຊ-ສກ຺ກ-ສຸຍາມ-ມຫາພ຺ຣຫ຺ມາທໂຍ, ເຕສໍ ຈິຕ຺ຕີກໂຕ ເຕຫິ ສຣຓນ຺ຕິ ອຸປຄນ຺ຕພ຺ພຕາທິວເສນ. ຣຕິກຣນ຺ຕິ ປີຕິສຸຂາວຫໍ. ຌານຣຕິສຸເຂນາຕິ ທຸວິເຘນປິ ຌານຣຕິສຸເຂນ. ຕຸເລຕຸນ຺ຕິ ປຣິຈ຺ຉິນ຺ທິຕຸໍ. ຄຸຓປາຣມິນ຺ຕິ ຄຸຓານໍ ອຸກ຺ກໍສປາຣມິໍ. ທຸລ຺ລໂຠ ອເນການິ ອສງ຺ຂ຺ເຍຍ຺ຍານິ ອຕິຘາວິຕ຺ວາປິ ລທ຺ຘຸໍ ອສກ຺ກຸເຓຍ຺ຍຕ຺ຕາ. ອໂນໂມຕິ ອນູໂນ ປຣິປຸຓ຺ໂຓ. ຕຕ຺ຖ ວິເສສໂຕ ອໂນມສຕ຺ຕປຣິໂຠຄໂຕ ເຕຫິ ‘‘ສມ຺ມາສມ຺ພຸທ຺ໂຘ ຠຄວາ’’ຕິ ອນຸສ຺ສຣິຕພ຺ພໂຕຕິ ອາຫ ‘‘ຠຄວາ ອໂນໂມ ສີເລນາ’’ຕິອາທິ.

ອຣິຍມຄ຺ຄປຎ຺ຎາເຍວ ອິຘ ອຘິປ຺ເປຕາຕິ ‘‘ອິຘ ປນ ທຸລ຺ລຠປາຕຸຠາວຏ຺ເຐນ ປຎ຺ຎາ ‘ຣຕນ’ນ຺ຕິ ວຸຕ຺ຕ’’ນ຺ຕິ ອາຫ. ປຸຊ຺ຊຜລນິພ຺ພຕ຺ຕນໂຕ, ອຕ຺ຕໂນ ສນ຺ຕານໍ ປຸນາຕີຕິ ຈ ປຸຎ຺ຎເຈຕນາ ປຸຎ຺ຎໍ, ສາ ປນ ຍສ຺ສ ອຸປ຺ປນ຺ນາ, ຕສ຺ເສວ ອາເວຓິກຕາຍ ອນຎ຺ຎສາຘາຣຓຕ຺ຕາ ເກນຈິປິ ອນາຫຏາ, ອຏ຺ຐກຖາຍໍ ປນ ‘‘ອຣູປຕ຺ຕາ’’ຕິ ວຸຕ຺ຕໍ.

ຊຣາສຸຕ຺ຕວຓ຺ຓນາ ນິຏ຺ຐິຕາ.

໒. ອຊຣສາສຸຕ຺ຕວຓ຺ຓນາ

໕໒. ອຊີຣເຓນາຕິ ຊິຓ຺ຓຠາວານາປຊ຺ຊເນນ. ລກ຺ຂຓວຈນຎ຺ເຈຕໍ ອວິນາສປ຺ປຕ຺ຕິຍາ. ເຕນາຫ ‘‘ອວິປຕ຺ຕິຍາຕິ ອຕ຺ໂຖ’’ຕິ. ນິທ຺ຘມິຕພ຺ໂພຕິ ນີຫຣິຕພ຺ໂພ.

ອຊຣສາສຸຕ຺ຕວຓ຺ຓນາ ນິຏ຺ຐິຕາ.

໓. ມິຕ຺ຕສຸຕ຺ຕວຓ຺ຓນາ

໕໓. ສຫ ອຕ຺ເຖນ ວຕ຺ຕຕີຕິ ສຕ຺ໂຖ, ຠຓ຺ຑມູລໍ ຄເຫຕ຺ວາ ວາຓິຊ຺ຊວເສນ ເທສນ຺ຕຣາທີສຸ ວິຈຣຓກຊນສມູໂຫ. ເຕນາຫ ‘‘ສທ຺ຘິໍຈໂຣ’’ຕິ, ສຫຈຣຓໂກຕິ ອຕ຺ໂຖ. ມິຕ຺ຕນ຺ຕິ ສິເນຫໂຍເຄນ ມິຕ຺ຕກິຈ຺ຈຍຸຕ຺ຕໍ. ອິຘາຘິປ຺ເປຕປ຺ປກາຣໍ ທສ຺ເສຕຸໍ ‘‘ໂຣເຄ ອຸປ຺ປນ຺ເນ’’ຕິອາທິ ວຸຕ຺ຕໍ. ຕຖາຣູເປຕິ ຊິຄຸຈ຺ຉນີເຍ, ທຸຕ຺ຕິກິຈ຺ເຉ ວາ. ຍຖາ ອສຓ຺ຐິຕານໍ ສຓ຺ຐາປນວເສນ ປວສໂຕ ປຸຣິສສ຺ສ ໂຠຄພ຺ຍສເນ ນາຖຕາ, ເອວໍ ປຸຕ຺ຕສິເນຫວເສນ ປຸຕ຺ຕສ຺ສ ມາຕຸຍາ ອນ຺ໂຕເຄເຫ ນາຖຕາຕິ ວຸຕ຺ຕໍ ‘‘ມາຕາ ມິຕ຺ຕໍ ສເກ ຆເຣ’’ຕິ. ອຕ຺ຖຊາຕສ຺ສາຕິ ອຸປຏ຺ຐິຕປໂຍຊນສ຺ສາຕິ ອຕ຺ໂຖຕິ ອາຫ ‘‘ອຸປ຺ປນ຺ນກິຈ຺ຈສ຺ສາ’’ຕິ. ສມ຺ປຣາຍຫິຕນ຺ຕິ ສມ຺ປຣາເຍ ຫິຕາວຫໍ.

ມິຕ຺ຕສຸຕ຺ຕວຓ຺ຓນາ ນິຏ຺ຐິຕາ.

໔. ວຕ຺ຖຸສຸຕ຺ຕວຓ຺ຓນາ

໕໔. ປຕິຏ຺ຐາຕິ ອວສ຺ສໂຍ. ຄຸຍ຺ຫສ຺ສາຕິ ຄຸຫິຕພ຺ພສ຺ສ ຣຫສ຺ສສ຺ສ. ປຣໂມ ສຂາ ນາມ ອຕິປິຍຏ຺ຐານຕາຍ.

ວຕ຺ຖຸສຸຕ຺ຕວຓ຺ຓນາ ນິຏ຺ຐິຕາ.

໕. ປຐມຊນສຸຕ຺ຕວຓ຺ຓນາ

໕໕. ວິຘາວຕີຕິ ວິວິຘໍ ຣູປໍ ປຘາວຕິ, ຍຖາກາມໍ ປວຕ຺ຕຕີຕິ ອຕ຺ໂຖ.

ປຐມຊນສຸຕ຺ຕວຓ຺ຓນາ ນິຏ຺ຐິຕາ.

໖. ທຸຕິຍຊນສຸຕ຺ຕວຓ຺ຓນາ

໕໖. ວຏ຺ຏທຸກ຺ຂໂຕຕິ ສໍສາຣທຸກ຺ຂໂຕ. ສໍສາໂຣ ຫິ ກິເລສກມ຺ມວິປາການໍ ອປຣາປຣຸປ຺ປຕ຺ຕິຕາຍ ວິຘາວຕິ. ຕຎ຺ຈ ທຸກ຺ຂໍ ທຸກ຺ຂມຕ຺ຕາຍ ນານາວິຘທຸກ຺ຂຣາສິຠາວໂຕ.

ທຸຕິຍຊນສຸຕ຺ຕວຓ຺ຓນາ ນິຏ຺ຐິຕາ.

໗. ຕຕິຍຊນສຸຕ຺ຕວຓ຺ຓນາ

໕໗. ນິປ຺ຜຕ຺ຕີຕິ ອິຏ຺ຐານິຏ຺ຐວິປາການໍ ນິປ຺ຜຊ຺ຊນໂຕ ນິປ຺ຜຕ຺ຕິ. ຕໂຕ ເອວ ອວສ຺ສໂຍ, ນິປ຺ຜຕ຺ຕິຕວິປາກສ຺ສ ອວສ຺ສໂຍ ອຘິຏ຺ຐານໍ ກາຣຓນ຺ຕິ ອຕ຺ໂຖ.

ຕຕິຍຊນສຸຕ຺ຕວຓ຺ຓນາ ນິຏ຺ຐິຕາ.

໘. ອຸປ຺ປຖສຸຕ຺ຕວຓ຺ຓນາ

໕໘. ອມຄ຺ໂຄຕິ ນ ມຄ຺ໂຄ ອນຸປາໂຍ. ຣຕ຺ຕິນ຺ທິວກ຺ຂໂຍຕິ ຕຕ຺ຖ ວຍກ຺ຂຓສ຺ສ ປາກຏຠາວໂຕ. ວຸຕ຺ຕກ຺ຂໂຓປິ ຫິ ສຍໍ ຂີຍເຕວ. ເສສໍ ພາຫິຣມລໍ ວຕ຺ຖສຣີຣາທິຠູຕໍ. ຕຖາ ຫິ ‘‘ຠສ຺ມຂາຣາທີຫິ ໂຘວິຕ຺ວາ ສກ຺ກາ ໂສເຘຕຸ’’ນ຺ຕິ ວຸຕ຺ຕໍ. ທຸຏ຺ໂຐຕິ ທູສິໂຕ ສຕ຺ຕສນ຺ຕາໂນ ນ ສກ຺ກາ ສຸທ຺ໂຘ ນາມ ກາຕຸໍ ອພ຺ຠນ຺ຕຣມລີນຠາວາປາທນໂຕ. ອິຕ຺ຖິຍນ຺ຕິ ພ຺ຣຫ຺ມຈຣິຍສ຺ສ ອນ຺ຕຣາຍກຣາຍປິ. ປຊາຕິ ສຕ຺ຕກາໂຍ ສຊ຺ຊຕິ ສງ຺ຄໍ ກໂຣຕິ ຍາຖາວໂຕ ອາທີນວໍ ອປສ຺ສນ຺ໂຕ. ອິນ຺ທ຺ຣິຍສໍວຣາທິ ກິເລສານໍ ຕາປນໂຕ ຕໂປ, ເຕນາຫ ‘‘ສພ຺ພາປີ’’ຕິອາທິ.

ອຸປ຺ປຖສຸຕ຺ຕວຓ຺ຓນາ ນິຏ຺ຐິຕາ.

໙. ທຸຕິຍສຸຕ຺ຕວຓ຺ຓນາ

໕໙. ກິສ຺ສາຕິ ຠຸມ຺ມຕ຺ເຖ ສາມິວຈນນ຺ຕິ ອາຫ ‘‘ກິສ຺ມິໍ ອຠິຣໂຕ’’ຕິ. ສທ຺ຘາ ນາມ ອນວຊ຺ຊສຠາວາ, ຕສ຺ມາ ໂລກິຍໂລກຸຕ຺ຕຣຫິຕສຸຂາວຫາຕິ ອາຫ ‘‘ສຸຄຕິຎ຺ເຈວ ນິພ຺ພານຎ຺ຈ ຄຈ຺ຉນ຺ຕສ຺ສ ທຸຕິຍິກາ’’ຕິ. ອນຸສາສຕິ ຫິຕຈຣິຍາຍ ປຣິຓາຍິກຠາວໂຕ.

ທຸຕິຍສຸຕ຺ຕວຓ຺ຓນາ ນິຏ຺ຐິຕາ.

໑໐. ກວິສຸຕ຺ຕວຓ຺ຓນາ

໖໐. ຄາຍຕ຺ຕິອາທິໂກຕິ ຉພ຺ພີສຕິຍາ ຉນ຺ເທສຸ ຄາຍຕ຺ຕິອາທິໂກ ອຸກ຺ກຕິປຣິໂຍສາໂນ ຉນ຺ໂທ ຄາຖານໍ ນິທານໍ ສມຸຏ຺ຐານໍ ‘‘ສມຸຏ຺ຐຫຕິ ເອເຕນາ’’ຕິ ກຕ຺ວາ. ເຕຫິ ປນ ອນຸຏ຺ຐຸຠາທິໂກ ໂຫຕີຕິ ອາຫ ‘‘ຉນ຺ໂທ ຄາຖານໍ ນິທານ’’ນ຺ຕິ. ປຸພ຺ພປຏ຺ຐາປນຄາຖາຕິ ຘມ຺ມກຖາຍ ອາທິໂຕ ອາໂຣຈນຠາວຊານນຕ຺ຖໍ ສຕິຊນນໍ ວິຍ ປວຕ຺ຕິຕຄາຖາ. ອກ຺ຂຣຎ຺ຫິ ປທໍ ຊເນຕີຕິ ຍສ຺ມາ ອກ຺ຂຣສມຸທາໂຍ ປທໍ, ປທສມຸທາໂຍ ຄາຖາ, ສມຸທາໂຍ ຈ ສມຸທາຍີຫິ ພ຺ຍຎ຺ຊີຍຕິ ຕໍປວຕ຺ຕນໂຕ, ຕສ຺ມາ ພ຺ຍຎ຺ຊນຠາເວ ຐິຕໍ ອກ຺ຂຣໍ, ຕໍສມຸທາໂຍ ປທໍ, ປທໍ ຕໍ ວິຍຎ຺ເຊຕາ ຊເນຕາ ວິຍ ໂຫຕີຕິ ‘‘ອກ຺ຂຣຎ຺ຫິ ປທໍ ຊເນຕີ’’ຕິ ວຸຕ຺ຕໍ. ອກ຺ຂຣໍ ຫິ ອຸຈ຺ຈາຣິຕວິທ຺ຘໍສິຕາຍ ຕໍຕໍຂຓມຕ຺ຕາວຏ຺ຐາຍີປິ ປຣໂຕ ປວຕ຺ຕິຍາ ມໂນວິຎ຺ຎາຓວີຖິຍາ ສງ຺ກລນວເສນ ເອກຊ຺ຌໍ ກຕ຺ວາ ປທຠາເວນ ຄຍ຺ຫມານໍ ຍຖາສງ຺ເກຕມຕ຺ຖໍ ພ຺ຍຎ຺ເຊຕິ. ປທໍ ຄາຖໍ ຊເນຕີຕິ ເອຕ຺ຖາປິ ເອເສວ ນໂຍ. ຄາຖາ ອຕ຺ຖໍ ປກາເສຕີຕິ ຄາຖາສຎ຺ຎິໂຕ ປທສມຸທາໂຍ ກິຣິຍາກາຣກສມ຺ພນ຺ຘວເສນ ສມ຺ພນ຺ຘິໂຕ ກຕ຺ຕຸອຘິປ຺ປາຍານຸຣູປໍ ອາໂລຈິຕວິໂລຈິຕໍ ສໍຫິຕໍ ອຕ຺ຖໍ ວິຠາເວຕິ. ສມຸທ຺ທາທິປຓ຺ຓຕ຺ຕິນິສ຺ສິຕາ ໂວຫາຣສນ຺ນິສ຺ສເຍເນວ ປວຕ຺ຕຕີຕິ ກຕ຺ວາ. ເຕນາຫ ‘‘ຄາຖາ ອາຣຠນ຺ໂຕ’’ຕິອາທິ. ອາສໂຍຕິ ອວສ຺ສໂຍຕິ ອາຫ ‘‘ປຕິຏ຺ຐາ’’ຕິ ກວິໂຕຕິ ວິຈິຕ຺ຕກຖີອາທິໂຕ.

ກວິສຸຕ຺ຕວຓ຺ຓນາ ນິຏ຺ຐິຕາ.

ຊຣາວຄ຺ຄວຓ຺ຓນາ ນິຏ຺ຐິຕາ.