໙. ມານກາມສຸຕ຺ຕວຓ຺ຓນາ

໙. ເສຍ຺ຍາທິເຠທໍ ມານໍ ອປ຺ປຫາຍ ຕໍ ປຄ຺ຄຍ຺ຫ ວິຈຣນ຺ໂຕ ກາເມນ຺ໂຕ ນາມ ໂຫຕີຕິ ອາຫ ‘‘ມານໍ ກາເມນ຺ຕສ຺ສ ອິຈ຺ຉນ຺ຕສ຺ສາ’’ຕິ. ທມຕິ ຈິຕ຺ຕໍ ເອເຕນາຕິ ທໂມ, ສຕິສມ຺ໂພຊ຺ຌງ຺ຄາທິໂກ ສມາຘິປກ຺ຂິໂກ ທໂມ. ມນຈ຺ຉຏ຺ຐານິ ອິນ຺ທ຺ຣິຍານິ ທເມຕີຕິ ທໂມ, ອິນ຺ທ຺ຣິຍສໍວໂຣ. ກິເລເສ ທເມຕິ ປຊຫຕີຕິ ທໂມ, ປຎ຺ຎາ. ອຸປວສນວເສນ ກາຍກມ຺ມາທິໍ ທເມຕີຕິ ທໂມ, ອຸໂປສຖກມ຺ມໍ. ໂກຘູປນາຫມກ຺ຂມານາທິເກ ທເມຕິ ວິເນຕີຕິ ທໂມ, ອຘິວາສນຂນ຺ຕິ. ເຕເນວາຕິ ‘‘ທໂມ’’ຕິ ສມາຘິປກ຺ຂິກຘມ຺ມານໍ ເອວ ອຘິປ຺ເປຕຕ຺ຕາ. ‘‘ນ ໂມນໍ ອຕ຺ຖີ’’ຕິ ຈ ປາໂຐ. ອສມາຫິຕສ຺ສາຕິ ສມາຘິປຏິກ຺ເຂໂປ ໂຊຕິໂຕ.

ມຈ຺ຈຸເຘຍ຺ຍສ຺ສ ປາຣຕຣຓສ຺ສ ວຸຈ຺ຈມານຕ຺ຕາ ‘‘ໂມນນ຺ຕິ ຈຕຸມຄ຺ຄຎາຓ’’ນ຺ຕິ ວຸຕ຺ຕໍ. ນ ຫິ ຕໂຕ ອຎ຺ເຎນ ຕໍ ສມ຺ຠວຕິ. ຊານາຕິ ອສມ຺ໂມຫປຏິເວຘວເສນ ປຏິວິຊ຺ຌຕີຕິ ອຕ຺ໂຖ. ມຈ຺ຈຸ ຘີຍຕິ ເອຕ຺ຖາຕິ ມຈ຺ຈຸເຘຍ຺ຍໍ, ຂນ຺ຘປຎ຺ຈກໍ ມຣຓຘມ຺ມຕ຺ຕາ. ຕສ຺ເສວາຕິ ມຈ຺ຈຸເຘຍ຺ຍສ຺ເສວ. ປາຣໍ ປຣຕີຣຠູຕໍ ນິພ຺ພານໍ. ຕເຣຍ຺ຍາຕິ ເອຕ຺ຖ ຕຣຓໍ ນາມ ອຣິຍມຄ຺ຄພ຺ຍາປາໂຣຕິ ອາຫ ‘‘ປຏິວິຊ຺ເຌຍ຺ຍ ປາປຸເຓຍ຺ຍາ’’ຕິ. ຕຖາ ຫິ ວກ຺ຂຕິ ‘‘ປຏິເວຘຕຣຓໍ ນາມ ວຸຕ຺ຕ’’ນ຺ຕິ. ‘‘ນ ຕເຣຍ຺ຍ ນ ປຏິວິຊ຺ເຌຍ຺ຍ ນ ປາປຸເຓຍ຺ຍ ວາ’’ຕິ ອຍເມຕ຺ຖ ປາໂຐ ຍຸຕ຺ໂຕ. ອຎ຺ຎຖາ ‘‘ອິທໍ ວຸຕ຺ຕໍ ໂຫຕີ’’ຕິອາທິວຈນໍ ວິຣຸຊ຺ເຌຍ຺ຍ. ເອໂກ ອຣຎ຺ເຎ ວິຫຣນ຺ໂຕຕິ ເອກາກີ ຫຸຕ຺ວາ ອຣຎ຺ເຎ ວິຫຣນ຺ໂຕຕິ ອຕ຺ໂຖ.

ກາມໍ ເຫຏ຺ຐິມມຄ຺ເຄຫິປິ ເອກຈ຺ຈສ຺ສ ມານສ຺ສ ປຫານໍ ລພ຺ຠຕິ. ອຄ຺ຄມຄ຺ເຄເນວ ປນ ຕສ຺ສ ອນວເສສໂຕ ປຫານນ຺ຕິ ອາຫ – ‘‘ອຣຫຕ຺ຕມຄ຺ເຄນ ນວວິຘມານໍ ປຊຫິຕ຺ວາ’’ຕິ. ອຸປຈາຣສມາຘິປຸພ຺ພໂກ ອປ຺ປນາສມາຘີຕິ ວຸຕ຺ຕໍ ‘‘ອຸປຈາຣປ຺ປນາສມາຘີຫີ’’ຕິ, ນ ອຸປຈາຣສມາຘິມຕ຺ເຕນ ສມາຘິມຕ຺ຕໍ ສນ຺ຘາຍ ປຈ຺ເຈກໍ ວາກ຺ຍປຣິສມາປນສ຺ສ ອຍຸຊ຺ຊນໂຕ. ນ ຫິ ອປ຺ປນໍ ອປ຺ປຕ຺ຕໍ ໂລກຸຕ຺ຕຣຊ຺ຌານໍ ອຕ຺ຖິ. ‘‘ສຸເຈຕໂສ’’ຕິ ຈິຕ຺ຕສ຺ສ ຎາຓສຫິຕຕາຍ ລກ຺ຂຓວຈນນ຺ຕິ ອາຫ ‘‘ຎາຓສມ຺ປຍຸຕ຺ຕຕາຍາ’’ຕິອາທິ. ຕຖາ ຫິ ວກ຺ຂຕິ ‘‘ສຸເຈຕໂສຕິ ເອຕ຺ຖ ຈິຕ຺ເຕນ ປຎ຺ຎາ ທສ຺ສິຕາ’’ຕິ. ‘‘ສພ຺ພຘິ ວິປ຺ປມຸຕ຺ໂຕ’’ຕິ ສພ຺ເພສຸ ຠວາທີສຸ ວິສໍສຏ຺ຐຈິຕ຺ໂຕ ສພ຺ພໂສ ຂນ຺ຘາທີຫິ ວິສໍຍຸຕ຺ໂຕ ໂຫຕີຕິ ວຸຕ຺ຕໍ ‘‘ສພ຺ເພສຸ ຂນ຺ຘາຍຕນາທີສຸ ວິປ຺ປມຸຕ຺ໂຕ ຫຸຕ຺ວາ’’ຕິ. ປຣິຎ຺ຎາປຏິເວໂຘ ສຈ຺ຉິກິຣິຍປຏິເວເຘນ ວິນາ ນຕ຺ຖີຕິ ອາຫ ‘‘ເຕຠູມກ…ເປ… ວຸຕ຺ຕ’’ນ຺ຕິ.

ມານໍ ນິສ຺ສາຍ ທຸຈ຺ຈຣິຕຈຣຓໂຕ ມາໂນ ນາມາຍໍ ສີລເຠທໂນ. ຕສ຺ມາຕິ ມານສ຺ສ ສີລປຏິປກ຺ຂຠາວໂຕ. ອິມິນາ ປຏິປກ຺ຂປ຺ປຫານກິຕ຺ຕເນນ. ອຘິຈິຕ຺ຕສິກ຺ຂາ ກຖິຕາ ສຣູປໂຕ ເອວາຕິ ອຘິປ຺ປາໂຍ. ເອຕ຺ຖ ຈິຕ຺ເຕນາຕິ ສຸ-ສທ຺ເທນ ວິເສສິຕຈິຕ຺ເຕນ. ຕສ຺ມາຕິ ປຎ຺ຎາຍ ທສ຺ສິຕຕ຺ຕາ. ອິມິນາຕິ ‘‘ສຸເຈຕໂສ’’ຕິ ອິມິນາ ປເທນ. ອຘິສີລສິກ຺ຂາ ອຘິຈິຕ຺ຕສິກ຺ຂາ ອຘິປຎ຺ຎາສິກ຺ຂາຕິ ສີລາທີນິປິ ວິເສເສຕ຺ວາ ວຸຕ຺ຕານິ. ສມ຺ຠເວ ພ຺ຍຠິຈາເຣ ຈ ວິເສສນວິເສສິຕພ຺ພຕາຕິ ຕໍ ທສ຺ເສນ຺ໂຕ ‘‘ອຘິສີລຎ຺ຈ ນາມ ສີເລ ສຕິ ໂຫຕີ’’ຕິອາທິໍ ວຕ຺ວາ ຕທຸຠຍໍ ວິຠາເຄນ ທສ຺ເສຕຸໍ ‘‘ຕສ຺ມາ’’ຕິອາທິ ວຸຕ຺ຕໍ. ປຐມນໂຍ ສງ຺ກຣວເສນ ປວຕ຺ໂຕຕິ ອສງ຺ກຣວເສນ ທສ຺ເສຕຸໍ ‘‘ອປິຈາ’’ຕິອາທິນາ ທຸຕິຍນໂຍ ວຸຕ຺ໂຕ. ‘‘ສມາປນ຺ນາ’’ຕິ ເອຕ຺ຖາປິ ‘‘ນິພ຺ພານໍ ປຕ຺ຖຍນ຺ເຕນາ’’ຕິ ອາເນຕ຺ວາ ສມ຺ພນ຺ໂຘ. ວິປສ຺ສນາຍ ປາທກຠາວໍ ອນຸປຄຕາປິ ຕທຕ຺ຖໍ ນິພ຺ພຕ຺ຕນາທິວເສນ ສມາປນ຺ນາຕິ ອຍມຕ຺ໂຖ ປຸຣິມນຍໂຕ ວິເສໂສ. ອຘິປຎ຺ຎາຍ ປເນຕ຺ຖ ປຸຣິມນຍໂຕ ວິເສໂສ ນຕ຺ຖີຕິ ສາ ອນຸທ຺ຘຏາ. ສໂມຘາເນຕ຺ວາຕິ ປຣິຍາຍໂຕ ສຣູປໂຕ ຈ ສງ຺ຄເຫຕ຺ວາ. ສກລສາສນນ຺ຕິ ຕິສ຺ສນ຺ນໍ ກຖິຕຕ຺ຕາ ເອວ ສິກ຺ຂຕ຺ຕຍສງ຺ຄຫໍ ສກລສາສນໍ ກຖິຕໍ ໂຫຕີຕິ.

ມານກາມສຸຕ຺ຕວຓ຺ຓນາ ນິຏ຺ຐິຕາ.