໑໐. ອຣຎ຺ຎສຸຕ຺ຕວຓ຺ຓນາ

໑໐. ສນ຺ຕກິເລສານນ຺ຕິ ວູປສນ຺ຕກິເລສປຣິຬາຫານໍ. ຍສ຺ມາ ສີລາທິຄຸຓສມ຺ຠວໍ ຕໂຕ ເອວ ຠຍສນ຺ຕຎ຺ຈ ອຸປາທາຍ ປຓ຺ຑິຕາ ‘‘ສນ຺ໂຕ’’ຕິ ວຸຈ຺ຈນ຺ຕິ, ຕສ຺ມາ ວຸຕ຺ຕໍ ‘‘ປຓ຺ຑິຕານໍ ວາ’’ຕິ. ເຕນາຫ ‘‘ສນ຺ໂຕ ຫເວ’’ຕິອາທິ. ເສຏ຺ຐຈາຣີນນ຺ຕິ ເສຏ຺ຐຈຣິຍໍ ຈຣນ຺ຕານໍ. ຍສ຺ມາ ປຸຖຸຊ຺ຊນກລ຺ຍາຓໂຕ ປຏ຺ຐາຍ ຠິກ຺ຂຸ ມຄ຺ຄພ຺ຣຫ຺ມຈຣິຍວາສໍ ວສຕິ ນາມ, ຕສ຺ມາ ອາຫ ‘‘ມຄ຺ຄພ຺ຣຫ຺ມຈຣິຍວາສໍ ວສນ຺ຕານ’’ນ຺ຕິ. ອຣິຍານໍ ປນ ມຸຂວຓ຺ຓສ຺ສ ປສີທເນ ວຕ຺ຕພ຺ພເມວ ນຕ຺ຖິ. ມູລກມ຺ມຏ຺ຐານນ຺ຕິ ປາຣິຫາຣິຍກມ຺ມຏ຺ຐານໍ. ວິສຠາຄສນ຺ຕຕີຕິ ນານາຣມ຺ມເຓສຸ ປວຕ຺ຕຈິຕ຺ຕສນ຺ຕຕິ. ສາ ຫິ ວິກ຺ເຂປພ຺ຍາກຸລຕາຍ ອປ຺ປສນ຺ນາ ສມາຫິຕຈິຕ຺ຕສນ຺ຕຕິຍາ ວິສຠາຄສນ຺ຕຕິ. ໂອກ຺ກມຕີຕິ ສມາຘິສຠາຄາ ຈິຕ຺ຕສນ຺ຕຕິ ສມຖວີຖິໍ ອນຸປວິສຕິ. ຈິຕ຺ຕໍ ປສີທຕີຕິ ກມ຺ມຏ຺ຐານນິຣຕໍ ຠາວນາຈິຕ຺ຕໍ ສນ຺ຘາຍາຫ, ຕໍ ປສນ຺ນໍ ຫຸຕ຺ວາ ປວຕ຺ຕຕິ. ໂລຫິຕໍ ປສີທຕີຕິ ຈິຕ຺ຕກາລຸສ຺ສິຍສ຺ສາຠາວໂຕ ໂລຫິຕໍ ອນາວິລໍ ໂຫຕິ. ປຣິສຸທ຺ຘານິ ໂຫນ຺ຕິ ກາຣຓສ຺ສ ປຣິສຸທ຺ຘຠາວໂຕ. ຕາລຜລມຸຂສ຺ສ ວິຍ ມຸຂສ຺ສ ວຓ຺ໂຓ ໂຫຕີຕິ ມຸຂ-ສທ຺ທສ຺ສ ອາທິມ຺ຫິ ປມຸຕ຺ຕປເທນ ໂຍເຊຕພ຺ໂພ. ເອວຎ຺ຫິ ຈສ຺ສ ປມຸຕ຺ຕຄ຺ຄຫຓໍ ສມຕ຺ຖິຕໍ ໂຫຕິ ຕາລຜລມຸຂສ຺ສ ວຓ຺ຓສມ຺ປທາສທິສຕ຺ຕາ. ຕິຠູມໂກ ເອວ ເຕຠູມໂກ.

ອຕີຕໍ ນານຸໂສຈນ຺ຕິ ອຕີຕໍ ປຈ຺ຈຍລາຠໍ ລກ຺ຂຓໍ ກຕ຺ວາ ນ ໂສຈນ຺ຕິ ນ ອນຸຕ຺ຖຸນນ຺ຕິ. ຊປ຺ປນຕຓ຺ຫາຍ ວເສນ ນ ປຣິກປ຺ປນ຺ຕີຕິ ອາຫ ‘‘ນ ປຕ຺ເຖນ຺ຕີ’’ຕິ. ເຍນ ເກນຈີຕິ ອິຕຣີຕເຣນ. ຕງ຺ຂເຓ ລທ຺ເຘນາຕິ ສນ຺ນິຘິກາຣປຣິໂຠຄາຠາວມາຫ. ຕິວິເຘນປິ ກາຣເຓນາຕິ ຕິປ຺ປກາເຣນ ເຫຕຸນາ, ຕິລກ຺ຂຓສນ຺ໂຕສນິມິຕ຺ຕນ຺ຕິ ອຕ຺ໂຖ.

ວິນາສນ຺ຕິ ວິນາສນເຫຕຸໍ. ວິນສ຺ສນ຺ຕິ ເອເຕຫີຕິ ວິນາໂສ, ໂລຠໂທສາ ຕເທກຏ຺ຐາ ຈ ປາປຘມ຺ມາ. ອຣູປກາຍສ຺ສ ວິຍ ຣູປກາຍສ຺ສປິ ວິເສສໂຕ ສຸກ຺ຂຠາວກາຣຓນ຺ຕິ ອາຫ ‘‘ເອເຕນ ກາຣຓທ຺ວເຍນາ’’ຕິ. ລຸໂຕຕິ ລູໂນ.

ອຣຎ຺ຎສຸຕ຺ຕວຓ຺ຓນາ ນິຏ຺ຐິຕາ.

ນຬວຄ຺ຄວຓ຺ຓນາ ນິຏ຺ຐິຕາ.