໙. ຣຕນວຄ຺ໂຄ

໑. ອນ຺ເຕປຸຣສິກ຺ຂາປທ-ອຕ຺ຖໂຍຊນາ

໔໙໔. ຣາຊວຄ຺ຄສ຺ສ ປຐເມ ປຣິຕ຺ຕໂກຕິ ຄຸເຓນ ຂຸທ຺ທໂກ. ປາສາທວຣສທ຺ທສ຺ສ ອຸປຣິສທ຺ເທນ ສມ຺ພນ຺ຘິຕພ຺ພຠາວໍ ທສ຺ເສຕຸໍ ວຸຕ຺ຕໍ ‘‘ປາສາທວຣສ຺ສ ອຸປຣິ ຄໂຕ’’ຕິ. ອິມິນາ ປາສາທວຣສ຺ສ ອຸປຣິ ອຸປຣິປາສາທວຣໍ, ຕໍ ຄໂຕ ອຸປຄໂຕຕິ ອຸປຣິປາສາທວຣຄໂຕຕິ ວຈນຕ຺ຖໍ ທສ຺ເສຕິ. ອຍ຺ຍານນ຺ຕິ ຠິກ຺ຂູນໍ. ‘‘ກາຣຓາ’’ຕິ ອິມິນາ ‘‘ວາຫສາ’’ຕິ ປທສ຺ສຕ຺ຖໍ ທສ຺ເສຕິ. ເຕຫີຕິ ອຍ຺ເຍຫິ.

໔໙໗. ອນ຺ຕຣນ຺ຕິ ຂຓໍ, ໂອກາສໍ ວາ ວິວຣໍ ວາ. ຆາເຕຕຸນ຺ຕິ ຫນິຕຸໍ. ອິຈ຺ຉຕີຕິ ອິມິນາ ປຕ຺ຖຘາຕຸຍາ ຍາຈນຕ຺ຖໍ ທສ຺ເສຕິ. ‘‘ຣາຊນ຺ເຕປຸຣໍ ຫຕ຺ຖິສມ຺ມທ຺ທ’’ນ຺ຕິອາທີສຸ ວຈນຕ຺ໂຖ ເອວໍ ເວທິຕພ຺ໂພຕິ ໂຍຊນາ. ຫຕ຺ຖິສມ຺ມທ຺ທນ຺ຕິ ຫຕ຺ຖິສມ຺ພາຘຏ຺ຐານໍ. ອສ຺ເສຫິ ສມ຺ມທ຺ໂທ ເອຕ຺ຖາຕິ ອສ຺ສສມ຺ມທ຺ໂທ. ຣເຖຫິ ສມ຺ມທ຺ໂທ ເອຕ຺ຖາຕິ ຣຖສມ຺ມທ຺ໂທຕິ ວຈນຕ຺ຖໍ ອຕິທິສນ຺ໂຕ ອາຫ ‘‘ເອເສວ ນໂຍ’’ຕິ. ‘‘ສມ຺ມຕ຺ຕ’’ນ຺ຕິ ປຐມກ຺ຂເຣນ ປາຐສ຺ສ ສມ຺ພາຘສ຺ສ ອວາຈກຕ຺ຕາ ວຸຕ຺ຕໍ ‘‘ຕໍ ນ ຄເຫຕພ຺ພ’’ນ຺ຕິ. ຕຕ຺ຖາຕິ ປາເຐ. ‘‘ຫຕ຺ຖີນໍ ສມ຺ມທ຺ທ’’ນ຺ຕິ ອິມິນາ ອຸຕ຺ຕຣປທສ຺ສ ສມ຺ມທ຺ທນໍ ສມ຺ມທ຺ທນ຺ຕິ ຠາວຕ຺ຖໍ ທສ຺ເສຕິ, ປຸຣິມປເທນ ຉຏ຺ຐີສມາສຎ຺ຈ. ປຸຣິມປາເຐ ປນ ອຸຕ຺ຕຣປທສ຺ສ ອຘິກຣຓຕ຺ຖຎ຺ຈ ປຸພ຺ພປເທນ ຕຕິຍາສມາສຎ຺ຈ ທສ຺ເສຕິ. ພາຫິຣຕ຺ຖສມາໂສຕິປິ ວຸຈ຺ຈຕິ. ປຈ຺ຉິມປາເຐ ‘‘ຫຕ຺ຖິສມ຺ມທ຺ທ’’ນ຺ຕິອາທິປທສ຺ສ ລິງ຺ຄວິປລ຺ລາສຎ຺ຈ ‘‘ອຕ຺ຖີ’’ຕິ ປາຐເສເສນ ໂຍເຊຕພ຺ພຕຎ຺ຈ ທສ຺ເສຕຸໍ ວຸຕ຺ຕໍ ‘‘ຫຕ຺ຖິສມ຺ມທ຺ໂທ ອຕ຺ຖີ’’ຕິ. ຣຊິຕພ຺ພານີຕິ ຣຊນີຍານິ, ຣຊິຕຸໍ ອຣຫານີຕິ ອຕ຺ໂຖ. ອິມິນາ ສມ຺ພນ຺ຘກາເລ ປຸຣິມປາເຐ ຣຎ຺ໂຎ ອນ຺ເຕປຸເຣຕິ ວິຠຕ຺ຕິວິປລ຺ລາໂສ ກາຕພ຺ໂພຕິ. ປຈ຺ຉິມປາເຐ ປນ ມຸຂ຺ຍໂຕວ ຍຸຊ຺ຊຕິ. ເຕນ ວຸຕ຺ຕໍ ‘‘ຕສ຺ມິໍ ອນ຺ເຕປຸເຣ’’ຕິ.

໔໙໘. ອວສິຕ຺ຕສ຺ສາຕິ ຂຕ຺ຕິຍາຠິເສເກນ ອຠິສິຕ຺ຕສ຺ສ. ອິໂຕຕິ ສຍນິຆຣໂຕ. ອິມິນາ ປຎ຺ຈມີພາຫິຣສມາສໍ ທສ຺ເສຕິ. ຣຎ຺ໂຎ ຣຕິຊນນຏ຺ເຐນ ຣຕນໍ ວຸຈ຺ຈຕິ ມເຫສີ. ມເຫສີຕິ ຈ ສາຠິເສກາ ເທວີ. ນິປຸພ຺ພ ຄມຸຘາຕຸສ຺ສ ນິປຸພ຺ພກມຸຘາຕຸຍາ ປຣິຍາຍຠາວໍ ທສ຺ເສຕຸໍ ວຸຕ຺ຕໍ ‘‘ນິຄ຺ຄຕນ຺ຕິ ນິກ຺ຂນ຺ຕ’’ນ຺ຕິ. ປຐມໍ.

໒. ຣຕນສິກ຺ຂາປທໍ

໕໐໒. ທຸຕິເຍ ປມຸສ຺ສິຕ຺ວາຕິ ສຕິວິປ຺ປວາເສນ ປມຸສ຺ສິຕ຺ວາ. ປຸຓ຺ຓປຕ຺ຕນ຺ຕິ ຕຸຏ຺ຐິທາຍໍ. ຕຎ຺ຫິ ມໂນຣຖປຸຓ຺ເຓນ ປຕ຺ຕພ຺ພຠາຄຕ຺ຕາ ‘‘ປຸຓ຺ຓປຕ຺ຕ’’ນ຺ຕິ ວຸຈ຺ຈຕິ. ຕສ຺ສ ສຣູປໍ ທສ຺ເສຕຸໍ ວຸຕ຺ຕໍ ‘‘ສຕໂຕ ປຎ຺ຈ ກຫາປຓາ’’ຕິ. ອິຘ ປນ ກຫາປຓານໍ ປຎ຺ຈສຕຕ຺ຕາ ປຎ຺ຈວີສກຫາປຓາ ອຘິປ຺ເປຕາ. ອາຠຣຓສທ຺ທສ຺ສ ອລງ຺ກາຣສທ຺ເທນ ປຣິຍາຍຠາວໍ ທສ຺ເສຕຸໍ ວຸຕ຺ຕໍ ‘‘ອລງ຺ກາຣ’’ນ຺ຕິ. ‘‘ມຫາລຕໍ ນາມາ’’ຕິ ອິມິນາ ນ ໂຍ ວາ ໂສ ວາ ອລງ຺ກາໂຣ, ອຖ ໂຂ ວິເສສາລງ຺ກາໂຣຕິ ທສ຺ເສຕິ. ມຫນ຺ຕານິ ມາລາກມ຺ມລຕາກມ຺ມານິ ເອຕ຺ຖາຕິ ມຫາລຕາ. ລຕາຄຫເຓນ ຫິ ມາລາປິ ຄຫິຕາ. ນວຫິ ໂກຏີຫິ ອຄ຺ຆໍ ອິມສ຺ສາຕິ ນວໂກຏິອຄ຺ຆນກໍ, ນວໂກຏິສງ຺ຂາຕໍ ອຄ຺ຆໍ ອຣຫຕີຕິ ວາ ນວໂກຏິອຄ຺ຆນກໍ.

໕໐໔. ອນ຺ເຕ ສມີເປ ວສນສີລຕ຺ຕາ ປຣິຈາຣິໂກ ‘‘ອນ຺ເຕວາສີ’’ຕິ ວຸຈ຺ຈຕີຕິ ອາຫ ‘‘ປຣິຈາຣິໂກ’’ຕິ.

໕໐໖. ທ຺ເວ ເລຑ຺ຑຸປາຕາຕິ ຖາມມຊ຺ຌິມສ຺ສ ປຸຣິສສ຺ສ ທ຺ເວ ເລຑ຺ຑຸປາຕາ. ສງ຺ຆ…ເປ… ນວກມ຺ມານໍ ອຕ຺ຖາຍ ອຸຄ຺ຄຓ຺ຫນ຺ຕສ຺ສ ວາ ອຸຄ຺ຄຓ຺ຫາເປນ຺ຕສ຺ສ ວາ ທຸກ຺ກຏນ຺ຕິ ໂຍຊນາ. ອວເສສນ຺ຕິ ຊາຕຣູປຣຊຕໂຕ ອວເສສໍ. ມາຕຸກຓ຺ຓປິຬນ຺ຘນຕາລປຓ຺ຓມ຺ປີຕິ ມາຕຸຍາ ກຓ຺ເຓ ປິຬນ຺ຘິຕຕາລປຓ຺ຓມ຺ປິ, ປຏິສາເມນ຺ຕສ຺ສາຕິ ສມ຺ພນ຺ໂຘ.

‘‘ກປ຺ປິຍຠຓ຺ຑໍ ໂຫຕີ’’ຕິ ອິມິນາ ອກປ຺ປິຍຠຓ຺ຑໍ ນ ວຏ຺ຏຕີຕິ ທສ຺ເສຕິ. ອິທນ຺ຕິ ຠຓ຺ຑໍ. ປລິໂພໂຘ ນາມາຕິ ອຕ຺ຕໂນ ປລິໂພໂຘ ນາມ. ຉນ຺ເທນປີຕິ ວຑ຺ຒກີອາທີນໍ ຉນ຺ທເຫຕຸນາປິ. ຠເຍນປີຕິ ຣາຊວລ຺ລຠານໍ ຠຍເຫຕຸນາປິ. ພລກ຺ກາເຣນາຕິ ກຣຓໍ ກາໂຣ, ພເລນ ກາໂຣ ພລກ຺ກາໂຣ, ເຕນ, ພລກ຺ກາໂຣ ຫຸຕ຺ວາ ປາເຕຕ຺ວາຕິ ອຕ຺ໂຖ.

ຕຕ຺ຖາຕິ ມຫາຣາເມ. ຍຕ຺ຖາຕິ ຍສ຺ມິໍ ຐາເນ, ສງ຺ກາ ອຸປ຺ປຊ຺ຊຕີຕິ ສມ຺ພນ຺ໂຘ. ມຫາຊນສຎ຺ຈຣຓຏ຺ຐາເນສູຕິ ພຫູນໍ ຊນານໍ ສຎ຺ຈຣຓສງ຺ຂາເຕສຸ ຐາເນສຸ. ນຄເຫຕພ຺ພສ຺ສ ເຫຕຸໍ ທສ຺ເສຕຸໍ ວຸຕ຺ຕໍ ‘‘ປລິໂພໂຘ ນ ໂຫຕີ’’ຕິ. ຍສ຺ມາ ປລິໂພໂຘ ນ ໂຫຕິ, ຕສ຺ມາ ນ ຄເຫຕພ຺ພນ຺ຕິ ອຘິປ຺ປາໂຍ. ເອໂກຕິ ເອໂກ ຠິກ຺ຂຸ ປສ຺ສຕີຕິ ສມ຺ພນ຺ໂຘ. ໂອກ຺ກມ຺ມາຕິ ໂອກ຺ກມິຕ຺ວາ.

ຣູປສທ຺ໂທ ຠຓ຺ຑປຣິຍາໂຍຕິ ອາຫ ‘‘ຠຓ຺ຑ’’ນ຺ຕິ. ຠຓ຺ຑໍ ຣູປໍ ນາມາຕິ ໂຍຊນາ. ຠຓ຺ຑິກນ຺ຕິ ຠຓ຺ເຑນ ນິຍຸຕ຺ຕໍ ປຸຏກໍ. ຄເຓຕ຺ວາຕິ ຄຓນໍ ກຕ຺ວາ. ນິມິຕ຺ຕນ຺ຕີຕິ ເອຕ຺ຖ ອິຕິສທ຺ໂທ ນາມປຣິຍາໂຍ. ລຎ຺ຉນາທິ ນິມິຕ຺ຕໍ ນາມາຕິ ຫິ ໂຍຊນາ. ລຎ຺ຉນາທີຕິ ອາທິສທ຺ເທນ ນີລປິໂລຕິກາທໂຍ ສງ຺ຄຓ຺ຫາຕິ. ລາຂາຍາຕິ ຊຕຸນາ.

ປຕິຣູປາ ນາມ ອິຘ ລຊ຺ຊິກຸກ຺ກຸຈ຺ຈກາຕິ ອາຫ ‘‘ລຊ຺ຊິໂນ ກຸກ຺ກຸຈ຺ຈກາ’’ຕິ. ຖາວຣນ຺ຕິ ຊງ຺ຄມາ ອຎ຺ຎໍ ຖາວຣໍ. ອທ຺ຘຸໂນຕິ ກາລສ຺ສ. ສມາທເປຕ຺ວາຕິ ອຎ຺ເຎ ສມາທເປຕ຺ວາ. ອຸທ຺ທິສ຺ສ ອຣິຍາ ຕິຏ຺ຐນ຺ຕິ, ເອສາ ອຣິຍານ ຍາຈນາ’’ຕິ (ຊາ. ໑.໗.໕໙) ວຸຕ຺ຕນເຍນ ຍາຈິຕ຺ວາຕິ ອຕ຺ໂຖ.

໕໐໗. ຣຕນສມ຺ມຕນ຺ຕິ ມນຸສ຺ສານໍ ອຸປໂຠຄປຣິໂຠຄນ຺ຕິ. ທຸຕິຍໍ.

໓. ວິກາລຄາມປ຺ປວິສນສິກ຺ຂາປທໍ

໕໐໘. ຕຕິເຍ ‘‘ຕິຣຈ຺ຉານຠູຕໍ ກຖ’’ນ຺ຕິ ອິມິນາ ‘‘ຕິຣຈ຺ຉານກຖ’’ນ຺ຕິ ປທສ຺ສ ຕຸລ຺ຍນິສ຺ສິຕສມາສໍ ທສ຺ເສຕິ. ຣາຊປຏິສໍຍຸຕ຺ຕນ຺ຕິ ຣາຊູຫິ ປຏິສໍຍຸຕ຺ຕໍ.

໕໑໒. ສມ຺ພຫຸລາ ຠິກ຺ຂູຕິ ສມ຺ພນ຺ໂຘ. ຕສ຺ມິໍ ຄາເມຕິ ຕສ຺ມິໍ ປຐມປວິສນຄາເມ. ຕໍ ກມ຺ມນ຺ຕິ ຕໍ ອິຈ຺ຉິຕກມ຺ມໍ. ອນ຺ຕຣາຕິ ຄາມວິຫາຣານມນ຺ຕເຣ. ຠຸມ຺ມຕ຺ເຖ ເຈຕໍ ນິສ຺ສກ຺ກວຈນໍ.

ກຸລຆເຣ ວາຕິ ຎາຕິກຸລອຸປຏ຺ຐາກກຸລຆເຣ ວາ. ເຕລຠິກ຺ຂາຍ ວາຕິ ເຕລຍາຈນຕ຺ຖາຍ ວາ. ປສ຺ເສຕິ ອຕ຺ຕໂນ ປສ຺ເສ ສມີເປຕິ ວຸຕ຺ຕໍ ໂຫຕິ. ເຕນາຕິ ຄາມມຊ຺ຌມຄ຺ເຄນ. ອໂນກ຺ກມ຺ມາຕິ ອໂນກ຺ກມິຕ຺ວາ, ອປກ຺ກມິຕ຺ວາຕິ ອຕ຺ໂຖຕິ. ຕຕິຍໍ.

໔. ສູຈິຆຣສິກ຺ຂາປທໍ

໕໑໗. ຈຕຸຕ຺ເຖ ກກາຣສ຺ສ ປທປູຣຓຠາວໍ ທສ຺ເສຕຸໍ ວຸຕ຺ຕໍ ‘‘ເຠທນເມວ ເຠທນກ’’ນ຺ຕິ. ອສ຺ສຕ຺ຖິອຕ຺ເຖ ອປຈ຺ຈໂຍຕິ ອາຫ ‘‘ຕໍ ອສ຺ສ ອຕ຺ຖີ’’ຕິ. ອສ຺ສາຕິ ປາຈິຕ຺ຕິຍສ຺ສ. ປຐມໍ ສູຈິຆຣໍ ຠິນ຺ທິຕ຺ວາ ປຈ຺ຉາ ປາຈິຕ຺ຕິຍໍ ເທເສຕພ຺ພນ຺ຕິ ອຕ຺ໂຖ. ອຣຓິຘນຸເກຕິ ອຣຓິຍາ ຘນຸເກ. ເວຘເກຕິ ກາຍພນ຺ຘນເວຘເກຕິ. ຈຕຸຕ຺ຖໍ.

໕. ມຎ຺ຈສິກ຺ຂາປທໍ

໕໒໒. ປຎ຺ຈເມ ເຉທນເມວ ເຉທນກໍ, ຕມສ຺ສຕ຺ຖີຕິ ເຉທນກນ຺ຕິ ອຕ຺ຖໍ ສນ຺ຘາຍ ວຸຕ຺ຕໍ ‘‘ວຸຕ຺ຕນຍເມວາ’’ຕິ.

ນິຂຓິຕ຺ວາຕິ ປມາຓາຕິເຣກໍ ນິຂຓິຕ຺ວາ. ອຸຕ຺ຕານໍ ວາ ກຕ຺ວາຕິ ເຫຏ຺ຐຸປຣິ ປຣິວຕ຺ຕນໍ ວາ ກຕ຺ວາ. ຐເປຕ຺ວາຕິ ລມ຺ພຓວເສນ ຐເປຕ຺ວາຕິ. ປຎ຺ຈມໍ.

໖. ຕູໂລນທ຺ຘສິກ຺ຂາປທໍ

໕໒໖. ຉຏ຺ເຐ ເອຕ຺ຖາຕິ ມຎ຺ຈປີເຐ. ອວນຫິຕພ຺ພນ຺ຕິ ໂອນທ຺ຘໍ, ຕູເລນ ໂອນທ຺ຘໍ ຕູໂລນທ຺ຘນ຺ຕິ ອຕ຺ໂຖປິ ຍຸຊ຺ຊຕິ. ຕູລໍ ປກ຺ຂິປິຕ຺ວາຕິ ມຎ຺ຈປີເຐ ຈິມິລິກໍ ປຕ຺ຖຣິຕ຺ວາ ຕສ຺ສຸປຣິ ຕູລໍ ປກ຺ຂິປິຕ຺ວາຕິ ອຕ຺ໂຖຕິ. ຉຏ຺ຐໍ.

໗. ນິສີທນສິກ຺ຂາປທໍ

໕໓໑. ສຕ຺ຕເມ ກຕ຺ຖາຕິ ກິສ຺ມິໍ ຂນ຺ຘເກ, ກິສ຺ມິໍ ວຕ຺ຖຸສ຺ມິໍ ວາ. ຫີຕິ ສຈ຺ຈໍ. ຕຕ຺ຖາຕິ ຈີວຣກ຺ຂນ຺ຘເກ, ປຓີຕໂຠຊນວຕ຺ຖຸສ຺ມິໍ ວາ. ‘‘ຍຖາ ນາມາ’’ຕິ ອິມິນາ ‘‘ເສຍ຺ຍຖາປີ’’ຕິ ປທສ຺ສ ອຕ຺ຖໍ ທສ຺ເສຕິ, ‘‘ປຸຣາໂຓ ຈມ຺ມກາໂຣ’’ຕິ ອິມິນາ ‘‘ປຸຣາຓາສິໂກຏ຺ໂຐ’’ຕິ ປທສ຺ສ. ຈມ຺ມກາໂຣ ຫິ ອສິນາ ຈມ຺ມໍ ກຸຏຕິ ຉິນ຺ທຕີຕິ ‘‘ອສິໂກຏ຺ໂຐ’’ຕິ ວຸຈ຺ຈຕິ. ວຕ຺ຖຸປ຺ປນ຺ນກາລມຸປນິຘາຍ ວຸຕ຺ຕໍ ‘‘ປຸຣາໂຓ’’ຕິ. ຕເມວູປມໍ ປາກຏໍ ກໂຣນ຺ໂຕ ອາຫ ‘‘ຍຖາ ຫີ’’ຕິ. ຫີຕິ ຕປ຺ປາກຏີກຣຓໍ, ຕໍ ປາກຏໍ ກຣິສ຺ສາມີຕິ ຫິ ອຕ຺ໂຖ. ຈມ຺ມກາໂຣ ກຑ຺ຒຕີຕິ ສມ຺ພນ຺ໂຘ. ວິຕ຺ຖຕນ຺ຕິ ວິສາລໍ. ໂສປີຕິ ອຸທາຍີປິ. ຕໍ ນິສີທນໍ ກຑ຺ຒຕີຕິ ໂຍຊນາ. ເຕນາຕິ ກຑ຺ຒນເຫຕຸນາ. ຕນ຺ຕິ ອຸທາຍິໍ. ສນ຺ຖຕສທິສນ຺ຕິ ສນ຺ຖເຕນ ສທິສໍ. ເອກສ຺ມິໍ ອນ຺ເຕຕິ ເອກສ຺ມິໍ ໂກຏ຺ຐາເສ, ຜາເລຕ຺ວາຕິ ສມ຺ພນ຺ໂຘຕິ. ສຕ຺ຕມໍ.

໘. ກຓ຺ຑຸປຏິຈ຺ຉາທິສິກ຺ຂາປທໍ

໕໓໗. ອຏ຺ຐເມ ‘‘ກຕ຺ຖາ’’ຕິອາທີນິ ວຸຕ຺ຕນຍາເນວ.

໕໓໙. ‘‘ຍສ຺ສາ’’ຕິ ປທສ຺ສ ວິສຍໍ ທສ຺ເສຕຸໍ ວຸຕ຺ຕໍ ‘‘ຠິກ຺ຂຸໂນ’’ຕິ. ‘‘ນາຠິຍາ ເຫຏ຺ຐາ’’ຕິ ອິມິນາ ນາຠິຍາ ອໂຘ ອໂຘນາຠີຕິ ວຈນຕ຺ຖໍ ທສ຺ເສຕິ, ‘‘ຊາຓຸມຓ຺ຑລານໍ ອຸປຣີ’’ຕິ ອິມິນາ ຊາຓຸມຓ຺ຑລານໍ ອຸພ຺ຠ ອຸພ຺ຠຊາຓຸມຓ຺ຑລນ຺ຕິ. ອຸພ຺ຠສທ຺ໂທ ຫິ ອຸປຣິປຣິຍາໂຍ ສຕ຺ຕມ຺ຍນ຺ຕນິປາໂຕ. ກຓ຺ຑຸຂຊ຺ຊຸສທ຺ທານໍ ເວວຈນຕ຺ຕາ ວຸຕ຺ຕໍ ‘‘ກຓ຺ຑູຕິ ຂຊ຺ຊູ’’ຕິ. ກຓ຺ຑຕິ ເຠທນໍ ກໂຣຕີຕິ ກຓ຺ຑຸ. ຂຊ຺ຊຕິ ພ຺ຍຘນໍ ກໂຣຕີຕິ ຂຊ຺ຊຸ. ເກສຸຈິ ໂປຕ຺ຖເກສຸ ‘‘ກຈ຺ຉູ’’ຕິ ປາໂຐ ອຕ຺ຖິ, ໂສ ອຍຸຕ຺ໂຕ.

ໂລຫິຕໍ ຕຸຓ຺ຑໍ ເອຕິສ຺ສາຕິ ໂລຫິຕຕຸຓ຺ຑິກາ. ປິຬຍຕິ ວິພາຘຍຕີຕິ ປິຬກາ. ອາ ຠຸໂສ ອສຸຈິໍ ສວຕິ ປຄ຺ຆຣາເປຕີຕິ ອສ຺ສາໂວຕິ ວຈນຕ຺ຖໍ ທສ຺ເສນ຺ໂຕ ອາຫ ‘‘ອສຸຈິປຄ຺ຆຣຓ’’ນ຺ຕິ. ອຣິສຎ຺ຈ ຠຄນ຺ທຣາ ຈ ມຘຸເມໂຫ ຈ. ອາທິສທ຺ເທນ ທຸນ຺ນາມກາທໂຍ ສງ຺ຄຓ຺ຫາຕິ. ຕຕ຺ຖ ອຣິ ວິຍ ອີສຕິ ອຠິຠວຕີຕິ ອຣິສໍ. ຠຄໍ ວຸຈ຺ຈຕິ ວຈ຺ຈມຄ຺ຄໍ, ຕໍ ທຣຕິ ຜາເລຕີຕິ ຠຄນ຺ທຣາ, ຄູຖສມີເປ ຊາໂຕ ວຓວິເສໂສ. ມຘຸ ວິຍ ມຸຕ຺ຕາທິໍ ມິຫຕິ ເສຈຕີຕິ ມຘຸເມໂຫ, ໂສ ອາພາໂຘ ມຸຕ຺ຕເມໂຫ ສຸກ຺ກເມໂຫ ຣຕ຺ຕເມໂຫຕິ ອເນກວິໂຘ. ຖຸລ຺ລສທ຺ໂທ ມຫນ຺ຕປຣິຍາໂຍຕິ ອາຫ ‘‘ມຫາ’’ຕິ. ອຏ຺ຐມໍ.

໙. ວສ຺ສິກສາຏິກສິກ຺ຂາປທໍ

໕໔໒. ນວເມ ວສ຺ເສ ວສ຺ສກາເລ ອຘິຏ຺ຐາຕພ຺ພາຕິ ວສ຺ສິກາ, ວສ຺ສິກາ ຈ ສາ ສາຏິກາ ເຈຕິ ວສ຺ສິກສາຏິກາຕິ. ນວມໍ.

໑໐. ນນ຺ທຕ຺ເຖຣສິກ຺ຂາປທໍ

໕໔໗. ທສເມ ‘‘ຈຕູຫິ ອງ຺ຄຸເລຫີ’’ຕິ ອິມິນາ ຈຕຸໂຣ ອງ຺ຄຸລາ ຈຕຸຣງ຺ຄຸລາຕິ ອສມາຫາຣທິຄຸໍ ທສ຺ເສຕິ. ອູນກປ຺ປມາໂຓຕິ ຠຄວໂຕ ລາມກປມາໂຓ. ອິມິນາ ໂອມກສທ຺ທສ຺ສ ລາມກຕ຺ຖໍ ທສ຺ເສຕີຕິ ທຏ຺ຐພ຺ພນ຺ຕິ. ທສມໍ.

ຣຕນວຄ຺ໂຄ ນວໂມ.

ອິຕິ ສມນ຺ຕປາສາທິກາຍ ວິນຍສໍວຓ຺ຓນາຍ

ຂຸທ຺ທກວຓ຺ຓນາຍ ໂຍຊນາ ສມຕ຺ຕາ.