໓. ຫສຘມ຺ມສິກ຺ຂາປທໍ

໓໓໕. ຕຕິເຍ ປກາເຣນ ກຣີຍຕິ ຐປີຍຕີຕິ ປກຕໍ ປຎ຺ຎຕ຺ຕນ຺ຕິ ທສ຺ເສນ຺ໂຕ ອາຫ ‘‘ຍໍ ຠຄວຕາ’’ຕິອາທິ. ຍນ຺ຕິ ສິກ຺ຂາປທໍ.

໓໓໖. ຫສສງ຺ຂາໂຕ ຘມ຺ໂມ ສຠາໂວ ຫສຘມ຺ໂມຕິ ວຸຕ຺ເຕ ອຕ຺ຖໂຕ ກີຬິກາເຍວາຕິ ອາຫ ‘‘ກີຬິກາ ວຸຈ຺ຈຕີ’’ຕິ.

໓໓໗. ໂຄປ຺ຜການນ຺ຕິ ຈຣຓຄຓ຺ຐິການໍ. ເຕ ຫິ ປາເທ ປາທໍ ຐປນກາເລ ອຎ຺ຎມຎ຺ຎູປຣິ ຐປນໂຕ ໂຄປີຍນ຺ຕີຕິ ໂຄປ຺ຜາ, ເຕ ເອວ ໂຄປ຺ຜກາຕິ ວຸຈ຺ຈນ຺ຕິ. ປາທສ຺ສ ຫິ ອຸປຣິ ປາທໍ ຐປນກາເລ ເອກສ຺ສ ອຸປຣິ ເອໂກ ນ ຐເປຕພ຺ໂພ. ເຕນາຫ ຠຄວາ ‘‘ປາເທ ປາທໍ ອຈ຺ຈາຘາຍາ’’ຕິ (ທີ. ນິ. ໒.໑໙໖; ມ. ນິ. ໑.໔໒໓; ອ. ນິ. ໓.໑໖). ໂອຏ຺ຐໂຊ ທຸຕິໂຍ. ໂອໂຣຫນ຺ຕສ຺ສ ຠິກ຺ຂຸໂນຕິ ສມ຺ພນ຺ໂຘ.

໓໓໘. ຜິຍາຣິຕ຺ຕາທີຫີຕິ ອາທິສທ຺ເທນ ລງ຺ກາຣາທໂຍ ສງ຺ຄຓ຺ຫາຕິ. ເກຈິ ວທນ຺ຕີຕິ ສມ຺ພນ຺ໂຘ. ປຕນຸປ຺ປຕນວາເຣສູຕິ ປຕນວາຣ ອຸປ຺ປຕນວາເຣສຸ. ຕຕ຺ຖາຕິ ຕສ຺ສໍ ຂິຕ຺ຕກຖລາຍໍ. ຫີຕິ ສຈ຺ຈໍ, ຍສ຺ມາ ວາ. ຐເປຕ຺ວາ ກີຬນ຺ຕສ຺ສາຕິ ສມ຺ພນ຺ໂຘ. ລິຂິຕຸໍ ວຏ຺ຏຕິ ກີຬາຘິປ຺ປາຍສ຺ສ ວິຣຫິຕຕ຺ຕາຕິ ອຘິປ຺ປາໂຍ. ກີຬາຘິປ຺ປາເຍນ ອຕ຺ຖໂຊຕກໍ ອກ຺ຂຣໍ ລິຂນ຺ຕສ຺ສາປິ ອາປຕ຺ຕິເຍວາຕິ ວທນ຺ຕິ. ເອຕ຺ຖາຕິ ອິມສ຺ມິໍ ສິກ຺ຂາປເທຕິ. ຕຕິຍໍ.