໑. ສຸຣາປານສິກ຺ຂາປທ-ອຕ຺ຖໂຍຊນາ

໓໒໖. ສຸຣາປານວຄ຺ຄສ຺ສ ປຐເມ ຠທ຺ທາ ວຕິ ເອຕ຺ຖາຕິ ຠທ຺ທວຕິກາຕິ ຈ, ຠທ຺ທາ ວຕິ ຠທ຺ທວຕິ, ສາ ເອຕ຺ຖ ອຕ຺ຖີຕິ ຠທ຺ທວຕິກາຕິ ຈ ອຕ຺ຖໍ ທສ຺ເສນ຺ໂຕ ອາຫ ‘‘ໂສ’’ຕິອາທິ. ໂສຕິ ຄາໂມ ລຠີຕິ ສມ຺ພນ຺ໂຘ. ປຖໍ ຄຈ຺ຉນ຺ຕີຕິ ປຖາວິໂນຕິ ກເຕ ອທ຺ຘິກາເຍວາຕິ ອາຫ ‘‘ອທ຺ຘິກາ’’ຕິ. ອທ຺ຘໍ ຄຈ຺ຉນ຺ຕີຕິ ອທ຺ຘິກາ. ‘‘ປຖິກາ’’ຕິປິ ປາໂຐ, ອຍເມວຕ຺ໂຖ. ‘‘ເຕຊສາ ເຕຊ’’ນ຺ຕິປທານິ ສມ຺ພນ຺ຘາເປກ຺ຂານິ ຈ ໂຫນ຺ຕິ, ປທານໍ ສມານຕ຺ຕາ ສມ຺ພນ຺ໂຘ ຈ ສມາໂນຕິ ມຎ຺ຎິຕຸໍ ສກ຺ກຸເຓຍ຺ຍາ ຈ ໂຫນ຺ຕິ, ຕສ຺ມາ ເຕສໍ ສມ຺ພນ຺ຘຎ຺ຈ ຕສ຺ສ ອສມານຕຎ຺ຈ ທສ຺ເສຕຸໍ ວຸຕ຺ຕໍ ‘‘ອຕ຺ຕໂນ ເຕຊສາ ນາຄສ຺ສ ເຕຊ’’ນ຺ຕິ. ‘‘ອານຸຠາເວນາ’’ຕິອິມິນາ ປນ ເຕຊສທ຺ທສ຺ສ ອຕ຺ຖໍ ທສ຺ເສຕິ. ກໂປຕສ຺ສ ປາໂທ ກໂປໂຕ ອຸປຈາເຣນ, ຕສ຺ສ ເອໂສ ກາໂປໂຕ, ວຓ຺ໂຓ. ກາໂປໂຕ ວິຍ ວຓ຺ໂຓ ອສ຺ສາຕິ ກາໂປຕິກາຕິ ທສ຺ເສນ຺ໂຕ ອາຫ ‘‘ກໂປຕປາທສມວຓ຺ຓຣຕ຺ໂຕຠາສາ’’ຕິ. ປສນ຺ນສທ຺ທສ຺ສ ປສາທສທ຺ຘາທໂຍ ນິວຕ຺ເຕຕຸໍ ‘‘ສຸຣາມຓ຺ຑສ຺ເສຕໍ ອຘິວຈນ’’ນ຺ຕິ ວຸຕ຺ຕໍ. ປຎ຺ຈາຠິຎ຺ຎສ຺ສ ສໂຕຕິ ປຎ຺ຈາຠິຎ຺ຎສ຺ສ ສມານສ຺ສ ສາຄຕສ຺ສາຕິ ໂຍຊນາ.

໓໒໘. ‘‘ມຘຸກປຸປ຺ຜາທີນໍ ຣເສນ ກໂຕ’’ຕິອິມິນາ ປຸປ຺ຜານໍ ຣເສນ ກໂຕ ອາສໂວ ປຸປ຺ຜາສໂວຕິ ວຈນຕ຺ຖໍ ທສ຺ເສຕິ. ເອສ ນໂຍ ‘‘ຜລາສໂວ’’ຕິອາທີສຸປິ. ສຸຣາເມຣຍານໍ ວິເສສໍ ທສ຺ເສຕຸໍ ວຸຕ຺ຕໍ ‘‘ສຸຣາ ນາມາ’’ຕິອາທິ. ປິຏ຺ຐກິຓ຺ຓປກ຺ຂິຕ຺ຕາຕິ ປິຏ຺ເຐນ ຈ ກິຓ຺ເຓນ ຈ ປກ຺ຂິຕ຺ຕາ ກຕາ ວາຣຸຓີຕິ ສມ຺ພນ຺ໂຘ. ກິຓ຺ຓາຕິ ຈ ສຸຣາຍ ພີຊໍ. ຕຎ຺ຫິ ກິຣນ຺ຕິ ນານາສມ຺ຠາຣານິ ມິສ຺ສີຠວນ຺ຕິ ເອຕ຺ຖາຕິ ກິຓ຺ຓາຕິ ວຸຈ຺ຈຕິ. ຕສ຺ສາເຍວ ມຓ຺ເຑຕິ ໂຍຊນາ. ສຸຣນາມເກນ ເອເກນ ວນຈຣເກນ ກຕາຕິ ສຸຣາ. ມທໍ ຊເນຕີຕິ ເມຣຍໍ.

໓໒໙. ໂລຓໂສວີຣກນ຺ຕິ ເອວໍນາມກໍ ປານໍ. ສຸຕ຺ຕນ຺ຕິປິ ເອວເມວ. ຕສ຺ມິນ຺ຕິ ສູປສໍປາເກ. ເຕລໍ ປນ ປຈນ຺ຕີຕິ ສມ຺ພນ຺ໂຘ. ນຕ຺ຖິ ຕິຂິຓໍ ມຊ຺ຊໍ ເອຕ຺ຖາຕິ ອຕິຂິຓມຊ຺ຊໍ, ອຕິຂິຓມຊ຺ເຊ ຕສ຺ມິໍເຍວ ເຕເລຕິ ອຕ຺ໂຖ. ຍໍ ປນາຕິ ເຕລໍ ປນ. ຕິຂິຓໍ ມຊ຺ຊໍ ອິມສ຺ສ ເຕລສ຺ສາຕິ ຕິຂິຓມຊ຺ຊໍ. ຍຕ຺ຖາຕິ ເຕເລ. ອຣິຏ຺ໂຐຕິ ເອວໍນາມກໍ ເຠສຊ຺ຊໍ. ຕນ຺ຕິ ອຣິຏ຺ຐໍ, ‘‘ສນ຺ຘາຍາ’’ຕິປເທ ອວຸຕ຺ຕກມ຺ມໍ. ເອຕນ຺ຕິ ‘‘ອມຊ຺ຊໍ ອຣິຏ຺ຐ’’ນ຺ຕິວຈນໍ, ‘‘ວຸຕ຺ຕ’’ນ຺ຕິປເທ ວຸຕ຺ຕກມ຺ມນ຺ຕິ. ປຐມໍ.