໗. ຄຓກໂມຄ຺ຄລ຺ລານສຸຕ຺ຕວຓ຺ຓນາ

໗໔. ຍຖາ ເຫຏ຺ຐິມໂສປານຜລກໍ ໂອໂຣຫນ຺ຕສ຺ສ ປຈ຺ຉິມໍ ນາມ ໂຫຕິ, ເອວໍ ອາໂຣຫນ຺ຕສ຺ສ ປຐມໍ ນາມ ໂຫຕີຕິ ວຸຕ຺ຕໍ – ‘‘ຍາວ ປຈ຺ຉິມໂສປານກເຬວຣາຕິ ຍາວ ປຐມໂສປານຜລກາ’’ຕິ. ວຕ຺ຖຸໍ ໂສເຘຕ຺ວາຕິ ວຕ຺ຖຸວິຊ຺ຊາຈຣິເຍນ ວຸຕ຺ຕວິຘິນາ ປາສາທວຕ຺ຖຸໂນ ໂສຘນວິຘິໍ ກຕ຺ວາ. ເອຕ຺ຖາຕິ ປາສາທກຣເຓ. ສຕ຺ຕຘາ ຠິນ຺ນສ຺ສ ວາລຄ຺ຄສ຺ສ ອໍສຸໂກຏິເວຘໂກ ວາລເວຘິ ນາມ. ຐານສມ຺ປາທນນ຺ຕິ ເວສາຂມຓ຺ຑລາທີນໍ ສມ຺ປາທນໍ. ມຸຏ຺ຐິກຣຓາທີຫີຕິ ອຸສຸມຸຏ຺ຐິກຣຓຊິຍາຄາຫຊິຍາວິຊ຺ຌາທີຫິ. ເອວໍ ຄຓາເປມາຕິ ເອກໍ ນາມ ເອກເມວ, ທ຺ເວ ທຸກາ ຈຕ຺ຕາຣິ, ຕີຓິ ຕິການິ ນວ, ຈຕ຺ຕາຣິ ຈຕຸກ຺ການິ ໂສຬສາຕິອາທິນາ ເອວໍ ຄຓນໍ ສິກ຺ຂາເປມ.

໗໕. ເກຣາຏິກາ ໂຫນ຺ຕີຕິ ສມຍສ຺ສ ອນຸປກ຺ກິລິຏ຺ຐກຣຓມາຍາສາເຐຍ຺ເຍນ ສມນ຺ນາຄຕາ ໂຫນ຺ຕິ. ຕໍ ທມນໍ ຊີວິຕເຫຕຸປິ ນາຕິກ຺ກມຕິ, ອຍມສ຺ສ ຊາຕິໂທສາຠາໂວ.

໗໖. ສຕິສມ຺ປຊຎ຺ຎາຫິ ສມງ຺ຄິຠາວຕ຺ຖາຍາຕິ ສຕຕວິຫາຣິຠາວສາຘເນຫິ ສຕິສມ຺ປຊຎ຺ເຎຫິ ສມນ຺ນາຄມຕ຺ຖາຍ. ນນຸ ຈ ຂີຓາສວາ ສຕິເວປຸລ຺ລປ຺ປຕ຺ຕາ ປຎ຺ຎາເວປຸລ຺ລປ຺ປຕ຺ຕາ ຈ, ກຖໍ ຕສ຺ສ ສຕິສມ຺ປຊຎ຺ຎໍ ປໂຍຄສາຘນີຍໍ ປວຕ຺ຕນ຺ຕິ ອາຫ ‘‘ທ຺ເວ ຫີ’’ຕິອາທິ. ສຕຕວິຫາຣີຕິ ສຕຕໍ ສມາປຕ຺ຕິວິຫາຣິພຫຸລາ, ຕສ຺ມາ ເຕ ອິຈ຺ຉິຕິຈ຺ຉິຕກ຺ຂເຓ ຜລສມາປຕ຺ຕິໍ ສມາປຊ຺ຊນ຺ຕິ. ວຸຕ຺ຕວິປຣິຍາເຍນ ໂນສຕຕວິຫາຣິໂນ ທຏ຺ຐພ຺ພາ. ເຕນາຫ ‘‘ຕຕ຺ຖາ’’ຕິອາທິ. ອປ຺ເປຕຸໍ ນ ສກ຺ໂກຕິ ອນາຈິຓ຺ຓຠາວໂຕ.

ຕໍ ວິຕກ຺ເກນ຺ໂຕຕິ ‘‘ສາມເຓຣສ຺ສ ເສນາສນໍ ນຕ຺ຖິ, ອຣຎ຺ຎຎ຺ຈ ສີຫາທີຫິ ສປຣິສ຺ສຍໍ, ກິໍ ນຸ ໂຂ ຕສ຺ສ ຠວິສ຺ສຕີ’’ຕິ ຕໍ ວິຕກ຺ເກນ຺ໂຕ. ເອວຣູໂປຕິ ເອທິໂສ ຍຖາວຸຕ຺ຕສາມເຓຣສທິໂສ ຂີຓາສໂວ. ອິເມ ຘມ຺ເມຕິ ອິມສ຺ມິໍ ສຸຕ຺ເຕ ອາຄເຕ ສີລາທິຘມ຺ເມ. ອາວຊ຺ຊິຕ຺ວາວາຕິ ອຕ຺ຕໂນ ປຣິສຸທ຺ຘສີລຕາທິອາວຊ຺ຊນເຫຕຸ ເອວ ສມາປຊ຺ຊິຕຸໍ ສກ຺ຂິສ຺ສຕິ.

໗໘. ‘‘ເຍເມ, ໂຠ ໂຄຕມາ’’ຕິ ວຈນສ຺ສ ສມ຺ພນ຺ຘໍ ທສ຺ເສຕຸໍ, ‘‘ຕຖາຄເຕ ກິຣາ’’ຕິອາທິ ວຸຕ຺ຕໍ. ເອວນ຺ຕິ ‘‘ເຍເມ, ໂຠ ໂຄຕມາ’’ຕິອາທິອາກາເຣຫິ ວຕ຺ຕຸມາຣທ຺ໂຘ.

ອຊ຺ຊຘມ຺ເມສູຕິ ອປຸຣາຕນຘມ຺ເມສຸ. ຕກ຺ກນມຕ຺ຕານິ ຫິ ເຕຫິ ກປ຺ເປຕ຺ວາ ສຍໍປຏິຠານໍ ວິຣຈິຕານິ. ປຸຣາຕນຕາຍ ປຣິປຸຓ຺ຓຕາຍ ເອກນ຺ຕນິຍ຺ຍານິກຕາຍ ຈ ປຣໂມ ອຸຕ຺ຕໂມ. ເຕນາຫ – ‘‘ເຕສຸ…ເປ… ອຸຕ຺ຕໂມຕິ ອຕ຺ໂຖ’’ຕິ. ເສສໍ ສຸວິຎ຺ເຎຍ຺ຍເມວ.

ຄຓກໂມຄ຺ຄລ຺ລານສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.