໑. ນນ຺ທິຍາວຏ຺ຏນຍວຓ຺ຓນາ

‘‘ສພ຺ພຘມ຺ມມູລປຣິຍາຍ’’ນ຺ຕິອາທີສຸ ສພ຺ພຘມ຺ມມູລຄ຺ຄຫເຓນ ມຎ຺ຎນາຄຫເຓນ ຈ ຕຓ຺ຫາມານທິຏ຺ຐິໂຍ ຄຫິຕາ. ມຎ຺ຎນານມ຺ປິ ຫິ ມຎ຺ຎນາ ກາຣຓນ຺ຕິ ທສ຺ສິໂຕຍມຕ຺ໂຖ. ‘‘ອສ຺ສຸຕວາ’’ຕິອາທິນາ ອວິຊ຺ຊາມານທິຏ຺ຐິໂຍ ຄຫິຕາ, ສພ຺ເພປິ ວາ ສໍກິເລສຘມ຺ມາ, ຕຖາ ສຎ຺ຎາອປຣິຎ຺ຎາຕຄ຺ຄຫເຓນ. ‘‘ຂີຓາສໂວ ປຣິກ຺ຂີຓຠວສຎ຺ໂຎຊໂນ’’ຕິ ເອຕ຺ຖ ປນ ອາສວາ ສຎ຺ໂຎຊນານິ ຈ ສຣູປໂຕ ຄຫິຕານິ, ຕຖາ ນນ຺ທິຄ຺ຄຫເຓນ ຕຓ຺ຫາຄຫເຓນ ຈ ຕຓ຺ຫາ, ເອວມ຺ເປຕ຺ຖ ສຣູປໂຕ ປຣິຍາຍໂຕ ຈ ຕຓ຺ຫາ ອວິຊ຺ຊາ ຕປ຺ປກ຺ຂິຍຘມ຺ມາ ຈ ຄຫິຕາ. ຕຕ຺ຖ ຕຓ຺ຫາຍ ວິເສສໂຕ ຣູປຘມ຺ມາ ອຘິຏ຺ຐານໍ, ອວິຊ຺ຊາຍ ອຣູປຘມ຺ມາ, ເຕ ປນ ສພ຺ພຘມ຺ມຄ຺ຄຫເຓນ ປຖວີອາທິຄ຺ຄຫເຓນ ຈ ທສ຺ສິຕາ ເອວ. ຕາສໍ ສມໂຖ ວິປສ຺ສນາ ຈ ປຏິປກ຺ໂຂ, ເຕສເມຕ຺ຖ ຄເຫຕພ຺ພາກາໂຣ ເຫຏ຺ຐາ ທສ຺ສິໂຕ ເອວ. ສມຖສ຺ສ ເຈໂຕວິມຸຕ຺ຕິ ຜລໍ, ວິປສ຺ສນາຍ ປຎ຺ຎາວິມຸຕ຺ຕິ. ຕຖາ ຫິ ຕາ ‘‘ຣາຄວິຣາຄາ’’ຕິອາທິນາ ວິເສເສຕ຺ວາ ວຸຈ຺ຈນ຺ຕິ, ອິມາສເມຕ຺ຖ ຄຫຓໍ ສມ຺ມທຎ຺ຎາວິມຸຕ຺ຕວີຕຣາຄາທິວຈເນຫິ ເວທິຕພ຺ພໍ. ຕຕ຺ຖ ຕຓ຺ຫາວິຊ຺ຊາ ສມຸທຍສຈ຺ຈໍ, ຕປ຺ປກ຺ຂິຍຘມ຺ມາ ປນ ຕຄ຺ຄຫເຓເນວ ຄຫິຕາຕິ ເວທິຕພ຺ພາ. ເຕສໍ ອຘິຏ຺ຐານຠູຕາ ວຸຕ຺ຕປ຺ປເຠທາ ຣູປາຣູປຘມ຺ມາ ທຸກ຺ຂສຈ຺ຈໍ, ເຕສໍ ອປ຺ປວຕ຺ຕິ ນິໂຣຘສຈ຺ຈໍ, ນິໂຣຘປຊານນາ ປຏິປທາ ມຄ຺ຄສຈ຺ຈໍ. ຕຓ຺ຫາຄຫເຓນ ເຈຕ຺ຖ ມາຍາ-ສາເຐຍ຺ຍ-ມານາຕິມານ-ມທປ຺ປມາທ-ປາປິຈ຺ຉຕາ-ປາປມິຕ຺ຕຕາ-ອຫິຣິກາໂນຕ຺ຕປ຺ປາທິວເສນ ອກຸສລປກ຺ໂຂ ເນຕພ຺ໂພ, ອວິຊ຺ຊາຄຫເຓນ ວິປຣີຕມນສິກາຣ-ໂກຘູປນາຫ-ມກ຺ຂ-ປຬາສ-ອິສ຺ສາ-ມຈ຺ຉຣິຍ- ສາຣມ຺ຠໂທວຈສ຺ສຕາ-ຠວທິຏ຺ຐິ-ວິຠວທິຏ຺ຐິອາທິວເສນ ອກຸສລປກ຺ໂຂ ເນຕພ຺ໂພ, ວຸຕ຺ຕວິປຣິຍາເຍນ ອມາຍາອສາເຐຍ຺ຍາທິອວິປຣີຕມນສິກາຣາທິວເສນ, ຕຖາ ສມຖປກ຺ຂິຍານໍ ສທ຺ຘິນ຺ທ຺ຣິຍາທີນໍ ວິປສ຺ສນາປກ຺ຂິຍານໍ ອນິຈ຺ຈສຎ຺ຎາທີນຎ຺ຈ ວເສນ ໂວທານປກ຺ໂຂ ເນຕພ຺ໂພຕິ. ອຍໍ ນນ຺ທິຍາວຏ຺ຏສ຺ສ ນ ຍສ຺ສ ຠູມິ.