໔໖. ສໍວຣນິທ຺ເທສວຓ຺ຓນາ

໔໕໓. ຈກ຺ຂຸໂສຕາທິເຠເທຫີຕິ (ທີ. ນິ. ໑.໒໑໓, ໔໕໔; ມ. ນິ. ໑.໔໑໑; ອ. ນິ. ໔.໑໙໘; ຘ. ສ. ໑໓໕໒-໑໓໕໔; ມຫານິ. ໑໙໖) ຈກ຺ຂຸໂສຕຆານຊິວ຺ຫາກາຍມນສງ຺ຂາເຕຫິ ຉຫິ ອິນ຺ທ຺ຣິເຍຫີຕິ ອຕ຺ໂຖ. ຣູປສທ຺ທາທິໂຄຈເຣຕິ ຣູປສທ຺ທຄນ຺ຘຣສໂຜຏ຺ຐພ຺ພຘມ຺ມສງ຺ຂາເຕສຸ ຉສຸ ໂຄຈເຣສູຕິ ອຕ຺ໂຖ. ເອຕ຺ຖ ປນ ຫຕ຺ຖປາທຫສິຕກຖິຕວິໂລກິຕາທິເຠທໍ ສຸຠາກາຣໍ ຄເຫຕ຺ວາ ອໂຍນິໂສ ມນສິ ກໂຣນ຺ຕສ຺ສ ອຠິຊ຺ຌາ ອຸປ຺ປຊ຺ຊຕິ. ‘‘ອນຕ຺ຖໍ ເມ ອຈຣິ, ຈຣຕິ, ຈຣິສ຺ສຕີ’’ຕິອາທິນາ (ປຣິ. ອຏ຺ຐ. ໓໒໙) ນເຍນ ປຏິຆນິມິຕ຺ຕໍ ຄເຫຕ຺ວາ ອໂຍນິໂສ ມນສິ ກໂຣນ຺ຕສ຺ສ ພ຺ຍາປາໂທ ອຸປ຺ປຊ຺ຊຕິ. ເອຕ຺ຖ ປນ ອິຕ຺ຖິປຸຣິສນິມິຕ຺ຕໍ ວາ ສຸຠນິມິຕ຺ຕາທິກໍ ກິເລສວຕ຺ຖຸຠູຕໍ ນິມິຕ຺ຕໍ ອຄ຺ຄຓ຺ຫິຕ຺ວາ ທິຏ຺ເຐ ທິຏ຺ຐມຕ຺ຕາທິນາ ປຏິປຊ຺ຊິຕ຺ວາ ອສຸຠນິມິຕ຺ເຕ ໂຍນິໂສ ມນສິກາຣໍ ພຫຸລີກໂຣນ຺ຕສ຺ສ ອຠິຊ຺ຌາຍ ປຫານໍ ໂຫຕິ. ‘‘ອນຕ຺ຖໍ ເມ ອຈຣິ, ຕໍ ກຸເຕຕ຺ຖ ລພ຺ຠາ’’ຕິອາທິນາ ວາ ເມຕ຺ຕາຠາວນາທິວເສນ ວາ ໂຍນິໂສ ມນສິ ກໂຣນ຺ຕສ຺ສ ພ຺ຍາປາທປ຺ປຫານໍ ໂຫຕິ. ເອວມິທໍ ສງ຺ເຂປໂຕ ຣູປາທີສຸ ກິເລສານຸພນ຺ຘນິມິຕ຺ຕາທິຄ຺ຄາຫປຣິວຊ຺ຊນລກ຺ຂຓໍ ອິນ຺ທ຺ຣິຍສໍວຣສີລນ຺ຕິ ເວທິຕພ຺ພໍ.

໔໕໔. ນິຄ຺ຄຓ຺ເຫຍ຺ຍາຕິ ນິວາເຣຍ຺ຍ;

‘‘ຍານິ ໂສຕານິ ໂລກສ຺ມິໍ; (ອຊິຕາຕິ ຠຄວາ,)

ສຕິ ເຕສໍ ນິວາຣຓໍ;

ໂສຕານໍ ສໍວຣໍ ພ຺ຣູມິ;

ປຎ຺ຎາເຍເຕ ປິຘິຍ຺ຍເຣ’’ຕິ –. (ສຸ. ນິ. ໑໐໔໑);

ວຸຕ຺ຕຕ຺ຕາ ‘‘ສຕິມາ ສມ຺ປຊາໂນ ວາ’’ຕິ ວຸຕ຺ຕໍ. ເອຕ຺ຖ ປນ ຈຕຸພ຺ພິຘໍ ສມ຺ປຊຎ຺ຎໍ ສາຕ຺ຖກສປ຺ປາຍໂຄຈຣອສມ຺ໂມຫວເສນ. ສໍວຣວິນິຈ຺ຉໂຍ.

ສໍວຣນິທ຺ເທສວຓ຺ຓນາ ນິຏ຺ຐິຕາ.