໑໙. ນ຺ຫານກປ຺ປນິທ຺ເທສວຓ຺ຓນາ

໑໖໘. ປຸຣໂຕຕິ (ຈູຬວ. ໓໗໒) ເຖຣານໍ ປຸຣໂຕ ອຸປຣິ ວາ ນ ຈ ນ຺ຫາເຍຍ຺ຍາຕິ ອຕ຺ໂຖ.

໑໖໙-໑໗໑. ກຸຏ຺ຏຕ຺ຖມ຺ຠຕຣຸຏ຺ຏາເນຕິ ເອຕ຺ຖ (ຈູຬວ. ໒໔໓; ຈູຬວ. ອຏ຺ຐ. ໒໔໓) ກຸຏ຺ເຏ ວາ ຖມ຺ເຠ ວາ ຕຣຸມ຺ຫິ ວາ ອຏ຺ຏານຜລເກ ວາ ກາຍໍ ນ ຆໍສເຍຕິ ອຕ຺ໂຖ. ຄນ຺ຘພ຺ພຫຕ຺ໂຖ ນາມ ມກ຺ກຏຫຕ຺ຖສທິໂສ ທາຣຸອາທິມໂຍ. ກຸຣຸວິນ຺ທກສຸຕ຺ຕິຍາຕິ ກຸຣຸວິນ຺ທສຸຕ຺ຕິຍາ. ມລ຺ລເກນ ວາ ອຎ຺ຎມຎ຺ຎໍ ວາ. ‘‘ນ ຠິກ຺ຂເວ ວິຄ຺ຄຍ຺ຫ ປຣິກມ຺ມໍ ກາຣາເປຕພ຺ພໍ. ໂຍ ກາຣາເປຍ຺ຍ, ອາປຕ຺ຕິ ທຸກ຺ກຏສ຺ສາ’’ຕິ (ຈູຬວ. ໒໔໓) ເອວໍ ວຸຕ຺ຕໍ ວິຄ຺ຄຫປຣິກມ຺ມໍ ສນ຺ຘາຍ ‘‘ອຎ຺ຎມຎ຺ຎໍ ວາ’’ຕິ ວຸຕ຺ຕໍ.

ອິທານິ ກປ຺ປິຍານິ ທສ຺ເສຕຸໍ ‘‘ກປາລິຏ຺ຐກຂຓ຺ຑານີ’’ຕິອາທິມາຫ. ສພ຺ເພສໍ ວຏ຺ຏຕີຕິ ສມ຺ພນ຺ໂຘ. ຄິລານສ຺ສປິ (ຈູຬວ. ອຏ຺ຐ. ໒໔໓) ອຄິລານສ຺ສປິ ອິມານິ ກປາລິຏ຺ຐກຂຓ຺ຑາທີນິ ກາຍຆໍສເນ ວຏ຺ຏນ຺ຕິ. ປຸຖຸປາຓີຕິ (ຈູຬວ. ໒໔໔) ຫຕ຺ຖປຣິກມ຺ມໍ ວຸຈ຺ຈຕິ. ຕສ຺ມາ ສພ຺ເພສໍ ຫຕ຺ເຖນ ປິຏ຺ຐິປຣິກມ຺ມໍ ກາຕຸໍ ວຏ຺ຏຕິ. ອກຕມລ຺ລກໍ ນາມ ເອກທາຐິມໍ ປຣິຈ຺ຉິນ຺ທິຕ຺ວາ ກຕໍ. ປາສາຓາທໂຍ ປາທຆໍສເນ ເອວ ກປ຺ປິຍາ. ນ຺ຫານກປ຺ປວິນິຈ຺ຉໂຍ.

ນ຺ຫານກປ຺ປນິທ຺ເທສວຓ຺ຓນາ ນິຏ຺ຐິຕາ.