໑໖. ວຈ຺ຈປ຺ປສ຺ສາວຏ຺ຐານິກນິທ຺ເທສວຓ຺ຓນາ

໑໕໖. ຍຖາວຸຑ຺ຒໍ ນ ກເຣຍ຺ຍ ວຈ຺ຈນ຺ຕິ ສມ຺ພນ຺ໂຘ. ຍຖານຸປຸພ຺ພິຍາ ລພ຺ຠຕີຕິ ສມ຺ພນ຺ໂຘ. ອິເມສຸ ປນ ຕີສຸ ຐາເນສຸ ໂຍ ໂຍ ປຐມໍ ອາຄຈ຺ຉຕິ ວຸຑ຺ໂຒ ວາ ນໂວ ວາ, ໂສ ໂສ ອາຄຕປຏິປາຏິຍາ ກາຕຸຎ຺ຈ ນຫາຍິຕຸຎ຺ຈ ລພ຺ຠຕີຕິ ອຘິປ຺ປາໂຍ.

໑໕໗. ອຸພ຺ຠຊິຕ຺ວາຕິ (ຈູຬວ. ໓໗໓, ໓໗໔) ນິວາສນໍ ທູຣໂຕວ ອຸກ຺ຂິປິຕ຺ວາ ໂນ ປວິເສຍ຺ຍ. ສຫສາ ຈ ໂນ ປວິເສຍ຺ຍາຕິ ສມ຺ພນ຺ໂຘ. ‘‘ພຫິ ຐິເຕນ ອຸກ຺ກາສິຕພ຺ພ’’ນ຺ຕິ ຈ ‘‘ສາຘຸກໍ ອຕຣມາເນນ ວຈ຺ຈກຸຏິ ປວິສິຕພ຺ພາ’’ຕິ ຈ ວຸຕ຺ຕຕ຺ຕາ ອຸກ຺ກາສິຕ຺ວາວ ອຕຣມາໂນ ປວິເສຍ຺ຍາຕິ ອຕ຺ໂຖ. ‘‘ນ ອຸພ຺ຠຊິຕ຺ວາ ປວິສິຕພ຺ພາ, ວຈ຺ຈປາທຸກາຍ ຐິເຕນ ອຸພ຺ຠຊິຕພ຺ພ’’ນ຺ຕິ (ຈູຬວ. ໓໗໔) ວຈນໂຕ ‘‘ອຸພ຺ຠເຊຍ຺ຍ ປາທຸກາສ຺ເວວ ສຓ຺ຐິໂຕ’’ຕິ ວຸຕ຺ຕໍ.

໑໕໘. ນ ກເຣຍ຺ຍ ອຸຠຍໍ ນ ກເຣຍ຺ຍຸຠຍໍ.

໑໕໙. ກູເປຕິ (ຈູຬວ. ໓໗໔) ວຈ຺ຈກູເປ. ກຏ຺ຐນ຺ຕິ ອວເລຂນກຏ຺ຐໍ. ປສ຺ສາວໂທຓິຍາ ເຂຬໍ ນ ກາຕພ຺ພນ຺ຕິ ອຕ຺ໂຖ. ນາວເລເຂຍ຺ຍ ຜຣຸເສນາຕິ ຜາລິຕກຏ຺ເຐນ ວາ ຂເຣນ ວາ ຄຓ຺ຐິເກນ ວາ ກຓ຺ຏເກນ ວາ ສຸສິເຣນ ວາ ປູຕິນາ ວາ ນາວເລຂິຕພ຺ພນ຺ຕິ ອຕ຺ໂຖ. ອຸຫຕຎ຺ຈາປີຕິ ຄູຖມກ຺ຂິຕມ຺ປິ ໂຘວເຍ ອຕ຺ຕນາ ວາ ປເຣນ ວາ ກຕນ຺ຕິ ອຘິປ຺ປາໂຍ.

໑໖໐. ອຸພ຺ຠຊິຕ຺ວາ ນ ນິກ຺ຂເມຕິ ເອຕ຺ຖ ‘‘ວຈ຺ຈປາທຸກາຍ ຐິເຕນ ປຏິຈ຺ຉາເທຕພ຺ພ’’ນ຺ຕິ (ຈູຬວ. ໓໗໔) ຫິ ວຸຕ຺ຕໍ, ປຸນ ‘‘ອາຈມນປາທຸກາຍໍ ຐິເຕນ ອຸພ຺ຠຊິຕພ຺ພ’’ນ຺ຕິ (ຈູຬວ. ໓໗໔) ຈ ວຸຕ຺ຕໍ. ‘‘ຈປຸ ຈປູ’’ຕິ ສທ຺ທໍ ກຕ຺ວາ ນາຈເມຍ຺ຍາຕິ ອຕ຺ໂຖ. ວຈ຺ຈປ຺ປສ຺ສາວຏ຺ຐານິກວິນິຈ຺ຉໂຍ.

ວຈ຺ຈປ຺ປສ຺ສາວຏ຺ຐານິກນິທ຺ເທສວຓ຺ຓນາ ນິຏ຺ຐິຕາ.