໔໔. ອຸໂປສຖນິທ຺ເທໂສ

ອຸໂປສໂຖຕິ –

໔໑໐. ທຸເວ ອຸໂປສຖາ ຈາຕຸ-ທ຺ທໂສ ປນ຺ນຣໂສ ອິຕິ;

ສຸຕ຺ຕຸທ຺ເທສມຘິຏ຺ຐານ-ປາຣິສຸທ຺ຘິວສາ ຕໂຍ.

໔໑໑. ສຸຕ຺ຕຸທ຺ເທໂສວ ສງ຺ຆສ຺ສ, ອຘິຏ຺ຐານອຸໂປສໂຖ;

ປຸຄ຺ຄລສ຺ເສວ ເສສານໍ, ປາຣິສຸທ຺ຘິອຸໂປສໂຖ.

໔໑໒. ປຸພ຺ພກິຈ຺ເຈ ຈ ກຣເຓ, ປຕ຺ຕກລ຺ເລ ສມານິເຕ;

ສຸຕ຺ຕໍ ອຸທ຺ທິສຕິ ສງ຺ໂຆ, ປຎ຺ຈຘາ ໂສ ວິຠາວິໂຕ.

໔໑໓. ວິນານ຺ຕຣາຍໍ ສງ຺ເຂເປ-ນຸທ຺ເທໂສ ວິນິວາຣິໂຕ;

‘‘ເຖໂຣວ ອິສ຺ສໂຣ ທ຺ວີສຸ, ອຸທ຺ເທເສສ຺ເວຕ຺ຖ ຕີສຸ ວາ;

ວິສເທສູ’’ຕິ ວຸຕ຺ຕຕ຺ຕາ, ອວຕ຺ຕນ຺ເຕປິ ວຏ຺ຏຕິ.

໔໑໔. ອາຄຈ຺ເຉຍ຺ຍຸໍ ຍທິ ສມາ, ອຸທ຺ທິສນ຺ເຕ ວ ໂຖກິກາ;

ອຸທ຺ທິຏ຺ຐໍ ຍໍ ສຸອຸທ຺ທິຏ຺ຐໍ, ໂສຕພ຺ພມວເສສກໍ.

໔໑໕. ອຸທ຺ທິຏ຺ຐມຕ຺ເຕ ສກລາ-ເຍກຈ຺ຈາຍຸຏ຺ຐິຕາຍ ວາ;

ປາຣິສຸທ຺ຘິໍ ກເຣຍ຺ເຍສໍ, ສນ຺ຕິເກ ພຫຸກາຖ ເຈ;

ກຕ຺ວາ ສພ຺ພວິກປ຺ເປສຸ, ປຸພ຺ພກິຈ຺ຈໍ ປຸນຸທ຺ທິເສ.

໔໑໖. ປນ຺ນຣໂສວາສິການໍ, ອິຕຣານໍ ສເຈຕໂຣ;

ສມາເນຕເຣນຸວຕ຺ຕນ຺ຕຸ, ປຸຣິມານໍ ສເຈຘິກາ;

ປຸຣິມາ ອນຸວຕ຺ຕນ຺ຕຸ, ເຕສໍ ເສເສປ຺ຍຍໍ ນໂຍ.

໔໑໗. ປາຏິປໂທວາສິການໍ, ອິຕຣານໍ ອຸໂປສໂຖ;

ສມໂຖການໍ ສາມຄ຺ຄິໍ, ມູລຏ຺ຐາ ເທນ຺ຕຸ ກາມໂຕ.

໔໑໘. ພຫິ ຄນ຺ຕ຺ວານ ກາຕພ຺ໂພ, ໂນ ເຈ ເທນ຺ຕິ ອຸໂປສໂຖ;

ເທຍ຺ຍານິຈ຺ຉາຍ ສາມຄ຺ຄີ, ພຫູສຸ ພຫິ ວາ ວເຊ.

໔໑໙. ປາຏິປເທຄນ຺ຕຸການໍ, ເອວເມວ ອຍໍ ນໂຍ;

ສາເວຍ຺ຍ ສຸຕ຺ຕໍ ສຎ຺ຈິຈ຺ຈ, ອສ຺ສາເວນ຺ຕສ຺ສ ທຸກ຺ກຏໍ.

໔໒໐. ສມ຺ມຊ຺ຊິຕຸໍ ປທີເປຕຸໍ, ປຎ຺ຎາເປຕຸໍ ທກາສນໍ;

ນ ກເຣຍ຺ຍ ຕຖາ ກລ຺ໂລ, ມຫາເຖເຣນ ເປສິໂຕ.

໔໒໑. ສມ຺ມຊ຺ຊິຕ຺ວາ ປທີເປຕ຺ວາ, ປຏ຺ຐເປຕ຺ວາ ທກາສນໍ. ຄຓຎຕ຺ຕິໍ ຐເປຕ຺ເວວໍ, ກຕ຺ຕພ຺ໂພ ຕີຫຸໂປສໂຖ. ‘‘ສຸຓນ຺ຕຸ ເມ ອາຍສ຺ມນ຺ຕາ, ອຊ຺ຊຸໂປສໂຖ ປນ຺ນຣໂສ, ຍທາຍສ຺ມນ຺ຕານໍ ປຕ຺ຕກລ຺ລໍ, ມຍໍ ອຎ຺ຎມຎ຺ຎໍ ປາຣິສຸທ຺ຘິອຸໂປສຖໍ ກເຣຍ຺ຍາມາ’’ຕິ.

໔໒໒. ເອກໍສໍ ຈີວຣໍ ກຕ຺ວາ, ນິສີທິຕ຺ວາ ອຸກ຺ກຸຏິກໍ,. ເຖເຣນ ອຎ຺ຊລິໍ ເຕວໍ, ປຄ຺ຄຍ຺ຫ ສມຸທີຣິຍາ. ‘‘ປຣິສຸທ຺ໂຘ ອຫໍ ອາວຸໂສ, ປຣິສຸທ຺ໂຘຕິ ມໍ ຘາເຣຖາ’’ຕິ, ວເທ ຍາວຕຕີຍກໍ.

໔໒໓. ສມຕ຺ຕປຸພ຺ພາຣມ຺ເຠນ, ເຕ ນເວເນວມີຣິຍາ. ‘‘ປຣິສຸທ຺ໂຘ ອຫໍ ຠນ຺ເຕ, ປຣິສຸທ຺ໂຘຕິ ມໍ ຘາເຣຖາ’’ຕິ, ວເທ ຍາວຕຕີຍກໍ.

໔໒໔. ທ຺ວີສຸ ເຖເຣນ ກຕ຺ຕພ຺ພໍ, ກຕ຺ເວວມີຣິໂຍ ນໂວ. ‘‘ປຣິສຸທ຺ໂຘ ອຫໍ ອາວຸໂສ, ປຣິສຸທ຺ໂຘຕິ ມໍ ຘາເຣຫີ’’ຕິ ຕິກ຺ຂຕ຺ຕຸໍ ວຕ຺ຕພ຺ໂພ.

໔໒໕. ນເວນ ເຖໂຣ ຕິກ຺ຂຕ຺ຕຸໍ, ເອວມສ຺ສ ອຸທີຣິໂຍ;

‘‘ປຣິສຸທ຺ໂຘ ອຫໍ ຠນ຺ເຕ, ປຣິສຸທ຺ໂຘຕິ ມໍ ຘາເຣຖາ’’ຕິ.

໔໒໖. ປຸພ຺ພກິຈ຺ຈໍ ສມາເປຕ຺ວາ, ອຘິຏ຺ເຐຍ຺ເຍວເມກໂກ. ‘‘ອຊ຺ຊ ເມ ອຸໂປສໂຖ ປນ຺ນຣໂສຕິ ວາ ຈາຕຸທ຺ທໂສຕິ ວາ ອຘິຏ຺ຐາມີ’’ຕິ ວຕ຺ຕພ຺ພໍ, ໂນ ເຈຘິຏ຺ເຐຍ຺ຍ ທຸກ຺ກຏໍ.

໔໒໗. ຍຕ຺ຖ ວສນ຺ຕິ ຈຕ຺ຕາໂຣ, ຕໂຍ ວາ ຍທິ ວາ ທຸເວ;

ປາຣິສຸທ຺ຘິໍ ຫຣິຕ຺ວານ, ເອເກກສ຺ສິຕຣີຕເຣ;

ຕໍ ຕໍ ອຸໂປສຖໍ ກຍິຣຸໍ, ສິຍາ ອາປຕ຺ຕິ ທຸກ຺ກຏໍ.

໔໒໘. ວຄ຺ເຄ ສມຄ຺ເຄ ວຄ຺ໂຄຕິ, ສຎ຺ຎິໂນ ວິມຕິສ຺ສ ວາ;

ທຸກ຺ກຏໍ ກໂຣໂຕ ເຠທາ-ຘິປ຺ປາເຍນ ຖຸລ຺ລຈ຺ຈຍໍ;

ວຄ຺ເຄ ສມຄ຺ເຄນາປຕ຺ຕິ, ສມຄ຺ໂຄ ອິຕິ ສຎ຺ຎິໂນ.

໔໒໙. ອຸກ຺ຂິຕ຺ຕສ຺ສ ຄຫຏ຺ຐສ຺ສ, ເສສານໍ ສຫຘມ຺ມິນໍ;

ປາຣາຊິກສ຺ສາຠພ຺ພສ຺ສ, ສິກ຺ຂານິກ຺ຂິຕ຺ຕກສ຺ສ ຈ.

໔໓໐. ນິສິນ຺ນປຣິສາຍຎ຺ຈ, ສຠາຄາປຕ຺ຕິໂກ ຕຖາ;

ຉນ຺ເທນ ປຣິວຸຕ຺ເຖນ, ປາຕິໂມກ຺ຂໍ ນ ອຸທ຺ທິເສ.

໔໓໑. ອເທສຍິຕ຺ວານາປນ຺ນໍ, ນາວິກຕ຺ວານ ເວມຕິໍ;

ນຸໂປສເຖປິ ວາ ກາຕຸໍ, ໂປສໂຖ ນ ຈ ກປ຺ປຕິ.

໔໓໒. ອຏ຺ຐິໂຕໂປສຖາວາສາ, ນ ວເຊ ຕທຫູ ວິນາ;

ອນ຺ຕຣາຍໍ ວ ສງ຺ຆໍ ວາ-ຘິຏ຺ຐາຕຸໍ ສີມເມວ ວາຕິ.