໔໕. ປວາຣຓານິທ຺ເທໂສ

ປວາຣຓາຕິ –

໔໓໓. ທ຺ວິນ຺ນໍ ຕິຓ຺ຓໍ ຈຕຸນ຺ນຎ຺ຈ, ອຎ຺ຎມຎ຺ຎປ຺ປວາຣຓາ;

ເອກສ຺ສ ຈ ອຘິຏ຺ຐານໍ, ເສສາ ສງ຺ຆປ຺ປວາຣຓາ.

໔໓໔. ປຸພ຺ພກິຈ຺ເຈ ຈ ກຣເຓ, ປຕ຺ຕກລ຺ເລ ສມານິເຕ;

ຐເປຕ຺ວາ ຎຕ຺ຕິໍ ສງ຺ເຆນ, ກຕ຺ຕພ຺ເພວໍ ປວາຣຓາ.

‘‘ສຸຓາຕຸ ເມ ຠນ຺ເຕ ສງ຺ໂຆ, ອຊ຺ຊ ປວາຣຓາ ປນ຺ນຣສີ, ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ປວາເຣຍ຺ຍາ’’ຕິ.

໔໓໕. ເອກໍສໍ ຈີວຣໍ ກຕ຺ວາ, ນິສີທິຕ຺ວາ ອຸກ຺ກຸຏິກໍ;

ເຖເຣນ ອຎ຺ຊລິໍ ສງ຺ໂຆ, ປຄ຺ຄຍ຺ຫ ສມຸທີຣິໂຍ.

໔໓໖. ‘‘ສງ຺ຆໍ, ອາວຸໂສ, ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ໂຕ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມິ. ທຸຕິຍມ຺ປິ…ເປ… ຕຕິຍມ຺ປິ, ອາວຸໂສ, ສງ຺ຆໍ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ໂຕ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມີ’’ຕິ.

໔໓໗. ປວາເຣນ຺ເຕສຸ ເຖເຣສຸ, ນິສຊ຺ຊຸກ຺ກຸຏິກໍ ນໂວ;

ປວາເຣຕິ ສຍໍ ຍາວ, ອຸກ຺ກຸຏິໂກວ ອຈ຺ຉຕຸ.

໔໓໘. ປຸພ຺ພາຣມ຺ຠໍ ສມາເປຕ຺ວາ, ນໂວ ສງ຺ຆມຸທີຣເຍ.

໔໓໙. ‘‘ສງ຺ຆໍ, ຠນ຺ເຕ, ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ໂຕ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມິ. ທຸຕິຍມ຺ປິ…ເປ… ຕຕິຍມ຺ປິ, ຠນ຺ເຕ, ສງ຺ຆໍ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ໂຕ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມີ’’ຕິ.

໔໔໐. ທາເນນ ຘມ຺ມສາກຈ຺ຉາ, ກລເຫຫິ ຈ ຣຕ຺ຕິຍາ;

ເຕວາຈິກາຍ ໂອກາເສ-ສຕິ ເຂປິຕຠາວໂຕ;

ອນ຺ຕຣາເຍ ທສວິເຘ, ຎຕ຺ຕິໍ ວຕ຺ວານຸຣູປໂຕ.

໔໔໑. ‘‘ສຸຓາຕຸ ເມ ຠນ຺ເຕ ສງ຺ໂຆ, ມນຸສ຺ເສຫິ ທານໍ ເທນ຺ເຕຫິ, ທ຺ວີຫິ ຠິກ຺ຂູຫິ ຘມ຺ມໍ ສາກຈ຺ຉນ຺ເຕຫິ, ກລຫໍ ກໂຣນ຺ເຕຫິ ເຍຠຸຍ຺ເຍນ ຣຕ຺ຕິ ເຂປິຕາ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ຣຕ຺ຕິ ວິຠາຍິສ຺ສຕິ. ອຍໍ ຣາຊນ຺ຕຣາໂຍ, ອຍໍ ໂຈຣນ຺ຕຣາໂຍ, ອຍໍ ອຄ຺ຍນ຺ຕຣາໂຍ, ອຍໍ ອຸທກນ຺ຕຣາໂຍ, ອຍໍ ມນຸສ຺ສນ຺ຕຣາໂຍ, ອຍໍ ອມນຸສ຺ສນ຺ຕຣາໂຍ, ອຍໍ ວາຬນ຺ຕຣາໂຍ, ອຍໍ ສຣີສປນ຺ຕຣາໂຍ, ອຍໍ ຊີວິຕນ຺ຕຣາໂຍ, ອຍໍ ພ຺ຣຫ຺ມຈຣິຍນ຺ຕຣາໂຍ. ສເຈ ສງ຺ໂຆ ເຕວາຈິກໍ ປວາເຣສ຺ສຕິ, ອປ຺ປວາຣິໂຕວ ສງ຺ໂຆ ຠວິສ຺ສຕິ, ອຖາຍໍ ພ຺ຣຫ຺ມຈຣິຍນ຺ຕຣາໂຍ ຠວິສ຺ສຕິ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ທ຺ເວວາຈິກໍ, ເອກວາຈິກໍ, ສມານວສ຺ສິກໍ ປວາເຣຍ຺ຍາ’’ຕິ.

໔໔໒. ປວາເຣຍ຺ຍານຸຣູເປນ, ຍຖາຐປິຕຎຕ຺ຕິຍາ;

ອາຄຈ຺ເຉຍ຺ຍຸໍ ຍທິ ສມາ, ອາທິກາ ເຈຕ຺ຖ ອາຫເຣ.

໔໔໓. ເອວໍ ຕິຈຕຸວຄ຺ໂຄ ຈ, ຎຕ຺ຕິໍ ວຕ຺ວາ ປວາຣເຍ. ‘‘ສຸຓນ຺ຕຸ ເມ ອາຍສ຺ມນ຺ຕາ, ອຊ຺ຊ ປວາຣຓາ ປນ຺ນຣສີ, ຍທາຍສ຺ມນ຺ຕານໍ ປຕ຺ຕກລ຺ລໍ, ມຍໍ ອຎ຺ຎມຎ຺ຎໍ ປວາເຣຍ຺ຍາມາ’’ຕິ.

໔໔໔. ເອກໍສໍ ຈີວຣໍ ກຕ຺ວາ, ນິສີທິຕ຺ວາ ອຸກ຺ກຸຏິກໍ;

ເຖເຣນ ອຎ຺ຊລິໍ ເຕວໍ, ປຄ຺ຄຍ຺ຫ ສມຸທີຣິຍາ.

໔໔໕. ‘‘ອຫໍ, ອາວຸໂສ, ອາຍສ຺ມນ຺ເຕ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ຕາ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມິ. ທຸຕິຍມ຺ປິ…ເປ… ຕຕິຍມ຺ປິ ອຫໍ, ອາວຸໂສ, ອາຍສ຺ມນ຺ເຕ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ຕາ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມີ’’ຕິ.

ນເວນາປິ ‘‘ອຫໍ, ຠນ຺ເຕ, ອາຍສ຺ມນ຺ເຕ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ຕາ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມິ. ທຸຕິຍມ຺ປິ…ເປ… ຕຕິຍມ຺ປິ ອຫໍ, ຠນ຺ເຕ, ອາຍສ຺ມນ຺ເຕ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ຕາ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມີ’’ຕິ.

໔໔໖. ທ຺ວີສຸ ເຖເຣນ ກຕ຺ຕພ຺ພໍ, ນໂວ ກຕ຺ເວວມີຣິໂຍ.

໔໔໗. ‘‘ອຫໍ, ອາວຸໂສ, ອາຍສ຺ມນ຺ຕໍ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທຕຸ ມໍ ອາຍສ຺ມາ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມິ. ທຸຕິຍມ຺ປິ…ເປ… ຕຕິຍມ຺ປິ ອຫໍ, ອາວຸໂສ, ອາຍສ຺ມນ຺ຕໍ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທຕຸ ມໍ ອາຍສ຺ມາ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມີ’’ຕິ.

ນເວນາປິ ‘‘ອຫໍ, ຠນ຺ເຕ, ອາຍສ຺ມນ຺ຕໍ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທຕຸ ມໍ ອາຍສ຺ມາ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມິ. ທຸຕິຍມ຺ປິ…ເປ… ຕຕິຍມ຺ປິ ອຫໍ, ຠນ຺ເຕ, ອາຍສ຺ມນ຺ຕໍ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທຕຸ ມໍ ອາຍສ຺ມາ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມີ’’ຕິ.

໔໔໘. ປຸພ຺ພກິຈ຺ຈໍ ສມາເປຕ຺ວາ, ອຘິຏ຺ເຐຍ຺ເຍວເມກໂກ. ‘‘ອຊ຺ຊ ເມ ປວາຣຓາ ຈາຕຸທ຺ທສີຕິ ວາ ປນ຺ນຣສີຕິ ວາ ອຘິຏ຺ຐາມີ’’ຕິ ວຕ຺ຕພ຺ພໍ.

໔໔໙. ຍສ຺ມິໍ ວສນ຺ຕິ ວາ ປຎ຺ຈ, ຈຕ຺ຕາໂຣ ວາ ຕໂຍ ທຸເວ;

ປວາຣຓໍ ຫຣິຕ຺ວານ, ເອເກກສ຺ສິຕຣີຕເຣ.

໔໕໐. ຕໍ ຕໍ ປວາຣຓໍ ກຍິຣຸໍ,

ສິຍາ ອາປຕ຺ຕິ ທຸກ຺ກຏໍ;

ເສສາ ອຸໂປສເຖ ວຸຕ຺ຕາ,

ຄາຖາໂຍ ເຈຕ຺ຖ ອາຫເຣ.

໔໕໑. ປວາຣິເຕວ ສງ຺ຆມ຺ຫິ, ປາຣິສຸທ຺ຘິອຸໂປສຖໍ;

ກເຣຍ຺ຍ ຉິນ຺ນວສ຺ໂສ ວາ, ອວຸຕ຺ໂຖ ວານຸປຄໂຕ.

໔໕໒. ຈາຕຸມາສິນິຍາ ຈາປິ, ກເຕ ສງ຺ເຆນຸໂປສເຖ;

ວຸຕ຺ຖວສ຺ສາ ປວາເຣຍ຺ຍຸໍ, ສເຈ ອປ຺ປຕຣາ ສິຍຸນ຺ຕິ.