໔໑. ປກິຓ຺ຓກນິທ຺ເທໂສ

ປກິຓ຺ຓກນ຺ຕິ –

໓໓໕. ສທ຺ວາຣພນ຺ຘເນ ຐາເນ, ໂສທຸກ຺ຂລກປາສເກ;

ສຍນ຺ເຕນ ທິວາ ທ຺ວາຣໍ, ພນ຺ເຘຍ຺ຍ ປຣິວຏ຺ຏກໍ.

໓໓໖. ສນ຺ເຕ ວິຎ຺ຎຸມ຺ຫິ ປຸຣິເສ, ອາໂຠໂຄ ຈາປິ ກປ຺ປຕິ;

ສວເສ ຕໍ ວິນາກາຣໍ, ສຍນ຺ໂຕ ທຸກ຺ກຏໍ ຜຸເສ.

໓໓໗. ຣຕນານິຕ຺ຖິຣູປານິ, ຘຎ຺ຎມິຕ຺ຖິປສາຘນໍ;

ຕູຣິຍາວຸຘຠຓ຺ຑານິ, ອາມສນ຺ຕສ຺ສ ທຸກ຺ກຏໍ.

໓໓໘. ສິຕ຺ຖເຕໂລທເຕເລຫິ, ຜຓຫຕ຺ຖຜເຓຫິ ວາ;

ໂກຈ຺ເຉນວາປິ ໂຍ ເກເສ, ໂອສຓ຺ເຐຍ຺ຍສ຺ສ ທຸກ຺ກຏໍ.

໓໓໙. ເນກປາວຸຣຓາ ເອກຕ຺ຖຣຓາ ວາ ຕຸວຏ຺ຏຍຸໍ;

ຕເຖກມຎ຺ເຈ ຠຸຎ຺ເຊຍ຺ຍຸໍ, ເອກສ຺ມິໍ ວາປິ ຠາຊເນ.

໓໔໐. ຈຕຸຣງ຺ຄຸລໂຕ ອູນມຘິກຏ຺ຐງ຺ຄຸລໍ ຕຖາ;

ທນ຺ຕກຏ຺ຐໍ ນ ຂາເທຍ຺ຍ, ລສຸຓໍ ນ ອກລ຺ລໂກ.

໓໔໑. ຫີນຸກ຺ກຏ຺ເຐຫິ ອຸກ຺ກຏ຺ຐໍ, ຫີນໍ ວາ ຊາຕິອາທິຫິ;

ອຸຊຸໍ ວາຎ຺ຎາປເທເສນ, ວເທ ທຸພ຺ຠາສິຕໍ ທວາ.

໓໔໒. ທີເຆ ນເຂ ຈ ເກເສ ຈ, ນາສໂລເມ ນ ຘາຣເຍ;

ນ ລພ຺ຠໍ ວີສຕິມຏ຺ຐໍ, ສມ຺ພາເຘ ໂລມຫາຣຓໍ.

໓໔໓. ຍຖາວຸຑ຺ຒໍ ນ ພາເຘຍ຺ຍ, ສງ຺ຆຸທ຺ທິຏ຺ຐໍວ ສງ຺ຆິກໍ;

ອໂຘຕອລ຺ລປາເທຫິ, ນກ຺ກເມ ສຍນາສນໍ;

ສຸໂຘຕປາທກໍ ວາປິ, ຕເຖວ ສອຸປາຫໂນ.

໓໔໔. ສງ຺ຆາຏິຍາ ນ ປລ຺ລຕ຺ເຖ, ຠິຕ຺ຕາທິໍ ນ ອປສ຺ສເຍ;

ປຣິກມ຺ມກຕໍ ສນ຺ເຕ, ອຸທເກ ໂນ ນ ອາຈເມ.

໓໔໕. ອກປ຺ປິຍສມາທາເນ, ທວາ ສິລາປວິຊ຺ຌເນ;

ເທສນາຍ ສຠາຄາຍ, ອາວິກມ຺ເມ ຈ ທຸກ຺ກຏໍ.

໓໔໖. ປຏິສ຺ສວວິສໍວາເທ, ສຸທ຺ຘຈິຕ຺ຕສ຺ສ ທຸກ຺ກຏໍ;

ປຏິສ຺ສວກ຺ຂເຓ ເອວ, ປາຈິຕ຺ຕິ ອິຕຣສ຺ສ ຕຸ.

໓໔໗. ນ ຣຸກ຺ຂມຠິຣູເຫຍ຺ຍ, ສຕິ ກິຈ຺ເຈວ ໂປຣິສໍ;

ອາປທາສຸ ຍຖາກາມໍ, ກປ຺ປຕີ ອຠິຣູຫິຕຸໍ.

໓໔໘. ວິນາທ຺ຘານໍ ວຊນ຺ຕສ຺ສ, ທຸກ຺ກຏໍ ປຣິສາວນໍ;

ຍາຈມານສ຺ສ ອທ຺ຘາເນ, ອທທນ຺ຕສ຺ສ ທຸກ຺ກຏໍ.

໓໔໙. ຖຸລ຺ລຈ຺ຈຍໍ ຜຸເສ ອງ຺ຄຊາຕຈ຺ເຉເທນ ທຸກ຺ກຏໍ;

ອາພາຘປ຺ປຈ຺ຈຍາຎ຺ຎຕ຺ຣ, ເສສງ຺ເຄ ອຕ຺ຕຆາຕເນ.

໓໕໐. ຈິຕ຺ຕໂປຕ຺ຖກຣູປານິ, ນ ກເຣ ນ ຈ ກາຣເຍ;

ນ ວຸຏ຺ຐາເປຍ຺ຍ ຠຸຎ຺ຊນ຺ຕໍ, ອາຣາມາຣຎ຺ຎເຄຫສຸ.

໓໕໑. ຍານານິ ປຸມຍຸຕ຺ຕານິ, ສິວິກໍ ຫຕ຺ຖວຏ຺ຏກໍ;

ປາຏງ຺ກິຎ຺ຈ ຄິລານສ຺ສ, ກປ຺ປຕີ ອຠິຣູຫິຕຸໍ.

໓໕໒. ພຸທ຺ຘໍ ຘມ຺ມຎ຺ຈ ສງ຺ຆຎ຺ຈ, ອາຣພ຺ຠ ກຣເຓ ທວໍ;

ທຸກ຺ກຏໍ ປຣິສໍ ວາປິ, ອຎ຺ຎສ຺ສ ອຸປລາຬເນ.

໓໕໓. ກາຍໍ ອູຣຸໍ ນິມິຕ຺ຕໍ ວາ, ຠິກ຺ຂຸນີນໍ ນ ທສ຺ສເຍ;

ວິວຣິຕ຺ວາ ນ ສິຎ຺ເຈຍ຺ຍ, ຕາ ກທ຺ທມຸທກາທິນາ.

໓໕໔. ນ ຄຓ຺ຫໂຕ ຈ ໂອວາທໍ, ນ ປຈ຺ຈາຫຣໂຕປິ ຈ;

ພາລໍ ຄິລານໍ ຄມິຍໍ, ວຊ຺ຊຍິຕ຺ວານ ທຸກ຺ກຏໍ.

໓໕໕. ໂລກາຍຕໍ ນ ວາເຈຍ຺ຍ, ປລິຕໍ ນ ຈ ຄາຫເຍ;

ເປຬາຍປິ ນ ຠຸຎ຺ເຊຍ຺ຍ, ນ ກີເຬ ກິຎ຺ຈິ ກີຬິຕໍ.

໓໕໖. ປາຣຸເປ ນ ນິວາເສຍ຺ຍ, ຄິຫິປາຣຸຕນິວາສນໍ;

ສໍເວລ຺ລິຍໍ ນິວາເສຍ຺ຍ, ທາຍໍ ນາລິມ຺ປເຍຍ຺ຍ ວາ.

໓໕໗. ວຑ຺ຒິໍ ປໂຍຊເຍ ຍາເຈ, ໂນຎ຺ຎາຕກປ຺ປວາຣິເຕ;

ອຕ຺ຕໂນ ປຣິໂຠຄຕ຺ຖໍ, ທິນ຺ນມຎ຺ຎສ຺ສ ໂນ ທເທ;

ອຄ຺ຄໍ ຄເຫຕ຺ວາ ຠຸຕ຺ວາ ວາ, ກຕິປາຫໍ ປຸໂນ ທເທ.

໓໕໘. ອຸທ຺ທິສ຺ສ ຍາຈເນ ຣກ຺ຂໍ, ຎຕ຺ວາຎຕ຺ວາ ວ ທຓ຺ຑິນໍ;

ຄີວາສ຺ສ ທຓ຺ຑິເຕ ທຓ຺ໂຑ, ສຍໍ ທຓ຺ຑາປເນ ປນ;

ທຓ຺ຑສ຺ສ ອຄ຺ຆເຠເທນ, ເຎຍ຺ຍາ ປາຣາຊິກາທິກາ.

໓໕໙. ຫຣນ຺ເຕສຸ ປຣິກ຺ຂາຣໍ, ‘‘ໂຈໂຣ ໂຈໂຣ’’ຕິ ຠາສິເຕ;

ອນຕ຺ຖາເຍສໍ ຄຓ຺ຫນ຺ເຕ, ທຓ຺ຑໍ ຄີວາສ຺ສ ຕຕ຺ຕກໍ.

໓໖໐. ວິຆາສຸຈ຺ຈາຣສງ຺ກາຣ-ມຸຕ຺ຕໍ ຉຑ຺ເຑຍ຺ຍ ທຸກ຺ກຏໍ;

ພຫິ ປາກາຣກຸຏ຺ຏານໍ, ວຬຎ຺ເຊ ນາວໂລກິຍ;

ຫຣິເຕ ວາປິ ວີຫາທິ-ນາຬິເກຣາທິໂຣປິເມ.

໓໖໑. ໂຍຊາເປຕຸໍ ປໂຍເຊຕຸໍ, ປຍຸຕ຺ຕານິ ຈ ປສ຺ສິຕຸໍ;

ນ ລພ຺ຠໍ ຘມ຺ມຍຸຕ຺ຕມ຺ປິ, ນຈ຺ຈໍ ຄີຕຎ຺ຈ ວາທິຕໍ;

‘‘ອຸປຫາຣໍ ກໂຣມາ’’ຕິ, ວຸຕ຺ເຕ ວາ ສມ຺ປຏິຈ຺ຉິຕຸໍ.

໓໖໒. ຣາຊາຄາຣໍ ໂປກ຺ຂຣຓິໍ, ອຸຍ຺ຍານໍ ຈິຕ຺ຕຄາຣກໍ;

ກີຬຕ຺ຖໍ ຄຈ຺ຉໂຕ ທຏ຺ຐຸໍ, ອາຣາມໍ ທຸກ຺ກຏໍ ກຕໍ.

໓໖໓. ນເວ ນ ປຏິພາເຫຍ຺ຍາ-ສເນນຸຓ຺ເຫ ນ ຈີວຣໍ;

ນິທເຫຍ຺ຍ ຂມາເປຍ຺ຍ, ຄຣຸນາ ຈ ປຓາມິໂຕ.

໓໖໔. ອກ຺ໂກສເນ ປຣມ຺ມຸຂາ, ອາປຕ຺ຕີຫິ ຈ ສຕ຺ຕຫິ;

ຠິກ຺ຂຸໍ ອຸປາສກໍ ວາປິ, ອຎ຺ເຎເນວ ຈ ທຸກ຺ກຏໍ.

໓໖໕. ນ ລພ຺ຠໍ ວິນິປາເຕຕຸໍ, ສທ຺ຘາເທຍ຺ຍຎ຺ຈ ຈີວຣໍ;

ລພ຺ຠໍ ປິຕູນໍ ເສສານໍ, ຎາຕີນມ຺ປິ ນ ລພ຺ຠຕິ.

໓໖໖. ວສ຺ສໍວຸຕ຺ໂຖຎ຺ຎໂຕຎ຺ຎຕ຺ຣ, ຠາຄໍ ຄຓ຺ເຫຍ຺ຍ ທຸກ຺ກຏໍ;

ປຏິເທຍ຺ຍ ນຏ຺ເຐ ຊິຓ຺ເຓ, ຄີວາ ໂນ ເທຍ຺ຍ ໂຈທິໂຕ;

ຘຸຣນິກ຺ເຂປໂຕ ເຕສໍ, ໂຫຕິ ຠຓ຺ຑຄ຺ຆກາຣິໂຍ.

໓໖໗. ນ ສນ຺ຕຣຸຕ຺ຕໂຣ ຄາມໍ, ກລ຺ໂລ ວາ ສອຸປາຫໂນ;

ປວິເສຍ຺ຍ ນ ຘາເຣຍ຺ຍ, ຈາມຣີມກສພີຊນິໍ.

໓໖໘. ອຄິລາໂນ ນ ຉິນ຺ເທຍ຺ຍ, ເກເສ ກຕ຺ຕຣິຍາ ພຫິ;

ອາຣາມໂຕ ນ ຘາເຣຍ຺ຍ, ຉຕ຺ຕໍ ລພ຺ຠຕິ ຄຸຕ຺ຕິຍາ.

໓໖໙. ຄາເຫຍ຺ຍ ນຸຠໂຕກາຊໍ, ເອກນ຺ຕຣິກກາຊກໍ;

ສີສກ຺ຂນ຺ຘກຏິຠາຣາ, ຫຕ຺ໂຖລມ຺ໂພ ຈ ລພ຺ຠຕິ.

໓໗໐. ອາປຕ຺ຕິຍາ ອໂນກາສ-ກຕໍ ໂຈເທຍ຺ຍ ທຸກ຺ກຏໍ;

ສຸທ຺ຘສ຺ສ ຈ ອວຕ຺ຖຸສ຺ມິໍ, ຕຖາ ໂອກາສກາຣເຓ.

໓໗໑. ອຏ຺ຐງ຺ຄຸລາຘິກໍ ມຎ຺ຈປຏິປາທໍ ນ ຘາຣເຍ;

ປກຕງ຺ຄຸເລນ ສຕ຺ຕານໍ, ມຎ຺ຈໍ ວາ ອຸຈ຺ຈປາທກໍ.

໓໗໒. ມູຄພ຺ພຕາທິໍ ຄຓ຺ເຫຍ຺ຍ, ທຸກ຺ກຏໍ ຕິຕ຺ຖິຍພ຺ພຕໍ;

ຂຸຣຠຓ຺ຑໍ ປຣິຫເຣ, ຕຖາ ນ຺ຫາປິຕປຸພ຺ພໂກ.

໓໗໓. ຍໍ ກິຎ຺ຈິ ຍາຈິຕຸໍ ຫຕ຺ຖກມ຺ມໍ ຕທນຸສາຣໂຕ;

ລທ຺ຘໍ ຄເຫຕຸໍ ນິກ຺ກມ຺ມມຍາຈິຕ຺ວາປິ ກປ຺ປຕິ;

ກາເຣຕຸມາຫຣາເປຕຸໍ, ຍໍ ກິຎ຺ຈິປຣສນ຺ຕກໍ.

໓໗໔. ຄິຫີນໍ ໂຄປເກ ເທນ຺ເຕ, ຄເຫຕຸໍ ເທຕິ ຍຕ຺ຕກໍ;

ລພ຺ຠໍ ຍຖາປຣິຈ຺ເຉທໍ, ສງ຺ຆເຈຕິຍສນ຺ຕເກ.

໓໗໕. ທ຺ວີຫາປຊ຺ເຊຍ຺ຍ ອາປຕ຺ຕິໍ, ກາຍວາຈາຫິ ວາ ຉຫິ;

ອລຊ຺ຊິຎ຺ຎາຓກຸກ຺ກຸຈ຺ຈປກຕຕ຺ຕາ ສຕິປ຺ລວາ;

ອກປ຺ປິເຍ ວາ ກປ຺ປິເຍ, ກປ຺ປາກປ຺ປິຍສຎ຺ຎິຕາ.

໓໗໖. ອລຊ຺ຊິຎ຺ຎາຓຕາປຕ຺ຕິໍ, ກາຍວາຈາຫິ ຉາທເຍ;

ລິງ຺ເຄ ສງ຺ເຆ ຄເຓກສ຺ມິໍ, ຈຕຸຘາປຕ຺ຕິວຸຏ຺ຐິຕິ.

໓໗໗. ປຣິກໂຖຠາສວິຎ຺ຎຕ຺ຕິ, ນ ລພ຺ຠາ ປຈ຺ຈຍທ຺ວເຍ;

ວິຎ຺ຎຕ຺ຕິເຍວ ຕຕິເຍ, ເສເສ ສພ຺ພມ຺ປິ ລພ຺ຠຕິ.

໓໗໘. ນ ຣູຫຕຈ຺ຈເຍ ທານໍ, ປຎ຺ຈນ຺ນໍ ສຫຘມ຺ມິນໍ;

ສງ຺ຆສ຺ເສວ ຈ ຕໍ ໂຫຕິ, ຄິຫີນໍ ປນ ຣູຫຕິ.

໓໗໙. ຠິກ຺ຂຸ ວາ ສາມເຓໂຣ ວາ, ກາລໍ ກຍິຣາຖູປສ຺ສເຍ;

ຠິກ຺ຂຸສງ຺ໂຆວ ທາຍຊ຺ໂຊ, ຕຕ຺ຖ ເສເສປ຺ຍຍໍນໂຍ.

໓໘໐. ປຸຣິມສ຺ເສວິມໍ ທິນ຺ນໍ, ເທຫິ ເນຕ຺ວາສຸກສ຺ສຕິ;

ປຈ຺ຉິມສ຺ເສວ ທມ຺ມີຕິ, ທິນ຺ນໍ ຎຕ຺ວາ ອິມໍ ວິຘິໍ;

ຄຓ຺ເຫ ວິສ຺ສາສຄາຫໍ ວາຘິຏ຺ເຐ ມຕກຈີວຣໍ.

໓໘໑. ໂລຫຠຓ຺ເຑ ປຫຣຓິໍ, ທາຣຸຠຓ຺ເຑ ຈ ທາຣຸຊໍ;

ປຕ຺ຕໍ ປາທຸກປລ຺ລງ຺ກໍ, ອາສນ຺ທິໍ ມຕ຺ຕິກາມເຍ;

ຐເປຕ຺ວາ ກປ຺ປຕິ ສພ຺ພໍ, ກຕກໍ ກຸມ຺ຠກາຣິກນ຺ຕິ.