໔໒. ເທສນານິທ຺ເທໂສ

ເທສນາຕິ –

໓໘໒. ຈາໂຄ ໂຍ ຠິກ຺ຂຸຠາວສ຺ສ, ສາ ປາຣາຊິກເທສນາ;

ຍຖາວຸຕ຺ເຕນ ວຸຏ຺ຐານໍ, ຄຣຸກາປຕ຺ຕິເທສນາ.

໓໘໓. ອຸກ຺ກຸຏິກໍ ນິສີທິຕ຺ວາ, ປຄ຺ຄຓ຺ຫິຕ຺ວານ ອຎ຺ຊລິໍ;

ຖຸລ຺ລຈ຺ຈຍາທິໍ ເທເສຍ຺ຍ, ເອວເມກສ຺ສ ສນ຺ຕິເກ.

໓໘໔. ‘‘ອຫໍ, ຠນ຺ເຕ, ເອກໍ ຖຸລ຺ລຈ຺ຈຍາປຕ຺ຕິໍ ອາປຊ຺ຊິໍ, ຕໍ ຕຸມ຺ຫມູເລ ປຏິເທເສມີ’’ຕິ ວຕ຺ວາ ເຕນ ‘‘ປສ຺ສສິ, ອາວຸໂສ, ຕໍ ອາປຕ຺ຕິ’’ນ຺ຕິ ວຸຕ຺ເຕ ‘‘ອາມ, ຠນ຺ເຕ, ປສ຺ສາມີ’’ຕິ ວຕ຺ວາ ປຸນ ເຕນ ‘‘ອາຍຕິໍ, ອາວຸໂສ, ສໍວເຣຍ຺ຍາສີ’’ຕິ ວຸຕ຺ເຕ ‘‘ສາຘຸ ສຸຏ຺ຐຸ, ຠນ຺ເຕ, ສໍວຣິສ຺ສາມີ’’ຕິ ວຕ຺ຕພ຺ພໍ. ‘‘ອຫໍ, ຠນ຺ເຕ, ທ຺ເວ ຖຸລ຺ລຈ຺ຈຍາປຕ຺ຕິໂຍ ອາປຊ຺ຊິໍ, ອຫໍ ຠນ຺ເຕ ສມ຺ພຫຸລາ ຖຸລ຺ລຈ຺ຈຍາປຕ຺ຕິໂຍ ອາປຊ຺ຊິໍ, ຕາ ຕຸມ຺ຫມູເລ ປຏິເທເສມີ’’ຕິ ວຕ຺ຕພ຺ພໍ.

ນິສ຺ສຄ຺ຄິເຍສຸ ປນ ‘‘ອິທໍ ເມ, ຠນ຺ເຕ, ຈີວຣໍ ທສາຫາຕິກ຺ກນ຺ຕໍ ນິສ຺ສຄ຺ຄິຍໍ, ອິມາຫໍ ອາຍສ຺ມໂຕ ນິສ຺ສຊ຺ຊາມີ’’ຕິ. ‘‘ອິມານິ ເມ, ຠນ຺ເຕ, ຈີວຣານິ…ເປ… ເອຕໍ ເມ, ຠນ຺ເຕ, ຈີວຣໍ…ເປ… ເອຕານິ ເມ, ຠນ຺ເຕ, ຈີວຣານິ ທສາຫາຕິກ຺ກນ຺ຕານິ ນິສ຺ສຄ຺ຄິຍານິ, ເອຕານາຫໍ ອາຍສ຺ມໂຕ ນິສ຺ສຊ຺ຊາມີ’’ຕິ.

໓໘໕. ນິສ຺ສຊ຺ຊິຕ຺ວານ ເທເສຍ຺ຍ, ອາປຕ຺ຕິໍ ເຕນ ຠິກ຺ຂຸນາ;

ປຏິຄ຺ຄເຫຕ຺ວາ ອາປຕ຺ຕິໍ, ເທຍ຺ຍໍ ນິສ຺ສຏ຺ຐຈີວຣໍ.

‘‘ອິມໍ, ອິມານິ, ເອຕໍ, ເອຕານິ ຈີວຣານິ ອາຍສ຺ມໂຕ ທມ຺ມີ’’ຕິ.

໓໘໖. (ກ) ອິທໍ ເມ, ຠນ຺ເຕ, ຈີວຣໍ ຣຕ຺ຕິວິປ຺ປວຸຕ຺ຖໍ ອຎ຺ຎຕ຺ຣ ຠິກ຺ຂຸສມ຺ມຸຕິຍາ ນິສ຺ສຄ຺ຄິຍໍ.

(ຂ) ອິທໍ ເມ, ຠນ຺ເຕ, ອກາລຈີວຣໍ ມາສາຕິກ຺ກນ຺ຕໍ ນິສ຺ສຄ຺ຄິຍໍ.

(ຄ) ອິທໍ ເມ, ຠນ຺ເຕ, ປຸຣາຓຈີວຣໍ ອຎ຺ຎາຕິກາຍ ຠິກ຺ຂຸນິຍາ ໂຘວາປິຕໍ ນິສ຺ສຄ຺ຄິຍໍ.

(ຆ) ອິທໍ ເມ, ຠນ຺ເຕ, ຈີວຣໍ ອຎ຺ຎາຕິກາຍ ຠິກ຺ຂຸນິຍາ ຫຕ຺ຖໂຕ ປຏິຄ຺ຄຫິຕໍ ອຎ຺ຎຕ຺ຣ ປາຣິວຕ຺ຕກາ ນິສ຺ສຄ຺ຄິຍໍ.

(ງ) ອິທໍ ເມ, ຠນ຺ເຕ, ຈີວຣໍ ອຎ຺ຎາຕກໍ ຄຫປຕິກໍ ອຎ຺ຎຕ຺ຣ ສມຍາ ວິຎ຺ຎາປິຕໍ ນິສ຺ສຄ຺ຄິຍໍ.

(ຈ) ອິທໍ ເມ, ຠນ຺ເຕ, ຈີວຣໍ ອຎ຺ຎາຕກໍ ຄຫປຕິກໍ ຕຕຸຕ຺ຕຣິ ວິຎ຺ຎາປິຕໍ ນິສ຺ສຄ຺ຄິຍໍ.

(ຉ) ອິທໍ ເມ, ຠນ຺ເຕ, ຈີວຣໍ ປຸພ຺ເພ ອປ຺ປວາຣິໂຕ ອຎ຺ຎາຕກໍ ຄຫປຕິກໍ ອຸປສງ຺ກມິຕ຺ວາ ວິກປ຺ປໍ ອາປນ຺ນໍ ນິສ຺ສຄ຺ຄິຍໍ.

(ຊ) ອິທໍ ເມ, ຠນ຺ເຕ, ຈີວຣໍ ປຸພ຺ເພ ອປ຺ປວາຣິໂຕ ອຎ຺ຎາຕເກ ຄຫປຕິເກ ອຸປສງ຺ກມິຕ຺ວາ ວິກປ຺ປໍ ອາປນ຺ນໍ ນິສ຺ສຄ຺ຄິຍໍ.

(ຌ) ອິທໍ ເມ, ຠນ຺ເຕ, ຈີວຣໍ ອຕິເຣກຕິກ຺ຂຕ຺ຕຸໍ ໂຈທນາຍ ອຕິເຣກຉກ຺ຂຕ຺ຕຸໍ ຐາເນນ ອຠິນິປ຺ຜາທິຕໍ ນິສ຺ສຄ຺ຄິຍໍ.

(ຎ) ອິທໍ ເມ, ຠນ຺ເຕ, ໂກສິຍມິສ຺ສກໍ ສນ຺ຖຕໍ ກາຣາປິຕໍ ນິສ຺ສຄ຺ຄິຍໍ.

(ຏ) ອິທໍ ເມ, ຠນ຺ເຕ, ສຸທ຺ຘກາຬການໍ ເອຬກໂລມານໍ ສນ຺ຖຕໍ ກາຣາປິຕໍ ນິສ຺ສຄ຺ຄິຍໍ.

(ຐ) ອິທໍ ເມ, ຠນ຺ເຕ, ສນ຺ຖຕໍ ອນາທິຍິຕ຺ວາ ຕຸລໍ ໂອທາຕານໍ ຕຸລໍ ໂຄຈຣິຍານໍ ກາຣາປິຕໍ ນິສ຺ສຄ຺ຄິຍໍ.

(ຑ) ອິທໍ ເມ, ຠນ຺ເຕ, ສນ຺ຖຕໍ ອູນກຉພ຺ພສ຺ສານິ ກາຣາປິຕໍ ອຎ຺ຎຕ຺ຣ ຠິກ຺ຂຸສມ຺ມຸຕິຍາ ນິສ຺ສຄ຺ຄິຍໍ.

(ຒ) ອິທໍ ເມ, ຠນ຺ເຕ, ນິສີທນສນ຺ຖຕໍ ອນາທິຍິຕ຺ວາ ປຸຣາຓສນ຺ຖຕສ຺ສ ສາມນ຺ຕາ ສຸຄຕວິທຕ຺ຖິໍ ກາຣາປິຕໍ ນິສ຺ສຄ຺ຄິຍໍ.

(ຓ) ອິມານິ ເມ, ຠນ຺ເຕ, ເອຬກໂລມານິ ຕິໂຍຊນປຣມໍ ອຕິກ຺ກາມິຕານິ ນິສ຺ສຄ຺ຄິຍານິ.

(ຕ) ອິມານິ ເມ, ຠນ຺ເຕ, ເອຬກໂລມານິ ອຎ຺ຎາຕິກາຍ ຠິກ຺ຂຸນິຍາ ໂຘວາປິຕານິ ນິສ຺ສຄ຺ຄິຍານິ.

(ຖ) ອຫໍ, ຠນ຺ເຕ, ຣູປິຍໍ ປຏິຄ຺ຄເຫສິໍ, ອິທໍ ເມ, ຠນ຺ເຕ, ນິສ຺ສຄ຺ຄິຍໍ, ອິມາຫໍ ສງ຺ຆສ຺ສ ນິສ຺ສຊ຺ຊາມິ.

(ທ) ອຫໍ, ຠນ຺ເຕ, ນານປ຺ປກາຣກໍ ຣູປິຍສໍໂວຫາຣໍ ສມາປຊ຺ຊິໍ, ອິທໍ ເມ, ຠນ຺ເຕ, ນິສ຺ສຄ຺ຄິຍໍ, ອິມາຫໍ ສງ຺ຆສ຺ສ ນິສ຺ສຊ຺ຊາມີຕິ.

໓໘໗. ນິສ຺ສຊ຺ຊິຕ຺ວານ ອາປຕ຺ຕິໍ, ເທເສຍ຺ຍາຖ ຄິຫິໍ ວເທ;

‘‘ຊານາຫິມ’’ນ຺ຕິ ອິມິນາ, ໂສ ວເທຍ຺ຍາຫຣາມິ ກິໍ.

໓໘໘. ອວຕ຺ວາມນ຺ຕິ ເຕລາທິໍ, ວເທ ຠິກ຺ຂູນ ກປ຺ປິຍໍ;

ຍໍ ອາຫຣຕິ ໂສ ເຕນ, ປຣິວຕ຺ເຕຕ຺ວານ ກປ຺ປິຍໍ.

໓໘໙. ລພ຺ຠໍ ຐເປຕ຺ວາ ທ຺ເວເປເຕ, ເສເສຫິ ປຣິຠຸຎ຺ຊິຕຸໍ;

ຕໂຕ ອຎ຺ເຎນ ລທ຺ໂຘປິ, ຠາໂຄ ເຕສໍ ນ ກປ຺ປຕິ.

໓໙໐. ຣຸກ຺ຂຈ຺ຉາຍາປ຺ຍນ຺ຕມໂສ, ຕນ຺ນິພ຺ພຕ຺ຕາ ນ ກປ຺ປຕິ;

ນິສ຺ສຏ຺ຐໍ ປຏິລທ຺ຘມ຺ປິ, ອາທິໂຕ ສນ຺ຖຕຕ຺ຕຍໍ.

໓໙໑. ໂນ ເຈ ລເຠຖ ເອວໍ ໂສ, ອິມໍ ຉຑ຺ເຑຫິ ສໍສິໂຍ;

ເອວມ຺ປິ ຠິກ຺ຂຸ ຉຑ຺ເຑຍ຺ຍ, ໂນ ເຈ ລເຠຖ ສມ຺ມໂຕ.

໓໙໒. ເອຕານິ ທຸຕິໂຍ ປຕ຺ໂຕ, ສງ຺ເຆ ເສສານິ ລພ຺ຠເຣ;

ສງ຺ເຆກສ຺ມິໍ ຄເຓ ວຕ຺ຕຸໍ, ລພ຺ຠໍ ຠາສນ຺ຕເຣນປິ.

໓໙໓. (ກ) ອຫໍ, ຠນ຺ເຕ, ນານປ຺ປກາຣກໍ ກຍວິກ຺ກຍໍ ສມາປຊ຺ຊິໍ, ອິທໍ ເມ, ຠນ຺ເຕ, ນິສ຺ສຄ຺ຄິຍໍ.

(ຂ) ອຍໍ ເມ, ຠນ຺ເຕ, ປຕ຺ໂຕ ທສາຫາຕິກ຺ກນ຺ໂຕ ນິສ຺ສຄ຺ຄິໂຍ.

(ຄ) ອຍໍ ເມ, ຠນ຺ເຕ, ປຕ຺ໂຕ ອູນປຎ຺ຈພນ຺ຘເນນ ປຕ຺ເຕນ ເຈຕາປິໂຕ ນິສ຺ສຄ຺ຄິໂຍ, ອິມາຫໍ ສງ຺ຆສ຺ສ ນິສ຺ສຊ຺ຊາມີຕິ.

໓໙໔. ນິສ຺ສຊ຺ຊິຕ຺ວານ ເທເສຍ຺ຍ, ອາປຕ຺ຕິໍ ປຕ຺ຕຄາຫກໍ;

ສມ຺ມນ຺ນິຕ຺ວານ ສງ຺ຆສ຺ສ, ປຕ຺ຕນ຺ຕໍ ຕສ຺ສ ທາປເຍ.

໓໙໕. (ກ) ອິທໍ ເມ, ຠນ຺ເຕ, ເຠສຊ຺ຊໍ ສຕ຺ຕາຫາຕິກ຺ກນ຺ຕໍ ນິສ຺ສຄ຺ຄິຍໍ.

(ຂ) ອິທໍ ເມ, ຠນ຺ເຕ, ວສ຺ສິກສາຏິກຈີວຣໍ ອຕິເຣກມາເສ ເສເສ ຄິມ຺ຫາເນ ປຣິຍິຏ຺ຐໍ, ອຕິເຣກຑ຺ຒມາເສ ເສເສ ຄິມ຺ຫາເນ ກຕ຺ວາ ປຣິທຫິຕໍ ນິສ຺ສຄ຺ຄິຍໍ.

(ຄ) ອິທໍ ເມ, ຠນ຺ເຕ, ຈີວຣໍ ຠິກ຺ຂຸສ຺ສ ສາມໍ ທຕ຺ວາ ອຈ຺ຉິນ຺ນໍ ນິສ຺ສຄ຺ຄິຍໍ.

(ຆ) ອິທໍ ເມ, ຠນ຺ເຕ, ຈີວຣໍ ສາມໍ ສຸຕ຺ຕໍ ວິຎ຺ຎາເປຕ຺ວາ ຕນ຺ຕວາເຍຫິ ວາຍາປິຕໍ ນິສ຺ສຄ຺ຄິຍໍ.

(ງ) ອິທໍ ເມ, ຠນ຺ເຕ, ຈີວຣໍ ປຸພ຺ເພ ອປ຺ປວາຣິໂຕ ອຎ຺ຎາຕກສ຺ສ ຄຫປຕິກສ຺ສ ຕນ຺ຕວາເຍ ອຸປສງ຺ກມິຕ຺ວາ ວິກປ຺ປໍ ອາປນ຺ນໍ ນິສ຺ສຄ຺ຄິຍໍ.

(ຈ) ອິທໍ ເມ, ຠນ຺ເຕ, ອຈ຺ເຈກຈີວຣໍ ຈີວຣກາລສມຍໍ ອຕິກ຺ກາມິຕໍ ນິສ຺ສຄ຺ຄິຍໍ.

(ຉ) ອິທໍ ເມ, ຠນ຺ເຕ, ຈີວຣໍ ອຕິເຣກຉາຣຕ຺ຕໍ ວິປ຺ປວຸຕ຺ຖໍ ອຎ຺ຎຕ຺ຣ ຠິກ຺ຂຸສມ຺ມຸຕິຍາ ນິສ຺ສຄ຺ຄິຍໍ.

(ຊ) ອິທໍ ເມ, ຠນ຺ເຕ, ຊານໍ ສງ຺ຆິກໍ ລາຠໍ ປຣິຓຕໍ ອຕ຺ຕໂນ ປຣິຓາມິຕໍ ນິສ຺ສຄ຺ຄິຍໍ, ອິມາຫໍ ອາຍສ຺ມໂຕ ນິສ຺ສຊ຺ຊາມີຕິ.

໓໙໖. ເສສໍ ສພ຺ພໍ ຍຖາໂຍຄໍ, ອາທິມ຺ຫິ ວິຍ ໂຍຊເຍ.

໓໙໗. (ກ) ອຫໍ, ຠນ຺ເຕ, ເອກໍ ປາຈິຕ຺ຕິຍາປຕ຺ຕິໍ ອາປຊ຺ຊິໍ. ທ຺ເວ ສມ຺ພຫຸລາ ປາຈິຕ຺ຕິຍາປຕ຺ຕິໂຍ ອາປຊ຺ຊິໍ.

(ຂ) ຄາຣຍ຺ຫໍ, ຠນ຺ເຕ, ຘມ຺ມໍ ອາປຊ຺ຊິໍ ອສປ຺ປາຍໍ ປາຏິເທສນີຍໍ, ຕໍ ປຏິເທເສມີຕິ. ເຕນ ‘‘ປສ຺ສສິ, ອາວຸໂສ, ຕໍ ຘມ຺ມ’’ນ຺ຕິ ວຕ຺ຕພ຺ພໍ.

(ຄ) ອຫໍ, ຠນ຺ເຕ, ເອກໍ ທຸກ຺ກຏາປຕ຺ຕິໍ ອາປຊ຺ຊິໍ. ທ຺ເວ ສມ຺ພຫຸລາ ທຸກ຺ກຏາປຕ຺ຕິໂຍ ອາປຊ຺ຊິໍ.

(ຆ) ອຫໍ, ຠນ຺ເຕ, ເອກໍ ທຸພ຺ຠາສິຕາປຕ຺ຕິໍ ອາປຊ຺ຊິໍ. ທ຺ເວ ສມ຺ພຫຸລາ ທຸພ຺ຠາສິຕາປຕ຺ຕິໂຍ ອາປຊ຺ຊິໍ. ຕາ ຕຸມ຺ຫມູເລ ປຏິເທເສມີຕິ.

(ງ) ‘‘ອຫໍ, ຠນ຺ເຕ, ທ຺ເວ ນານາວຕ຺ຖຸກາ ຖຸລ຺ລຈ຺ຈຍາປຕ຺ຕິໂຍ ອາປຊ຺ຊິໍ. ສມ຺ພຫຸລາ ນານາວຕ຺ຖຸກາ ຖຸລ຺ລຈ຺ຈຍາປຕ຺ຕິໂຍ ອາປຊ຺ຊິໍ, ຕາ ຕຸມ຺ຫມູເລ ປຏິເທເສມີ’’ຕິ ວຕ຺ວາ ເຕນ ‘‘ປສ຺ສສິ, ອາວຸໂສ, ຕາ ອາປຕ຺ຕິໂຍ’’ຕິ ວຸຕ຺ເຕ ‘‘ອາມ, ຠນ຺ເຕ, ປສ຺ສາມີ’’ຕິ ວຕ຺ວາ ປຸນ ເຕນ ‘‘ອາຍຕິໍ, ອາວຸໂສ, ສໍວເຣຍ຺ຍາສີ’’ຕິ ວຸຕ຺ເຕ ‘‘ສາຘຸ ສຸຏ຺ຐຸ, ຠນ຺ເຕ, ສໍວຣິສ຺ສາມີ’’ຕິ ວຕ຺ຕພ຺ພໍ.

໓໙໘. ອເທສນາຄາມິນິຍໍ, ອນາປຕ຺ຕິຎ຺ຈ ເທສິຕໍ;

ນານາ ສໍວາສນິສ຺ສີມຏ຺ຐິຕານໍ ຈຕຸປຎ຺ຈຫິ;

ມນສາ ປກຕຕ຺ຕານໍ, ນາເນກາຕິ ນ ເທສເຍຕິ.