໔໐. ອເວຠງ຺ຄິຍນິທ຺ເທໂສ

ອເວຠງ຺ຄິຍນ຺ຕິ –

໓໒໒. ອາຣາມາຣາມວຕ຺ຖູນິ, ວິຫາໂຣ ຕສ຺ສ ວຕ຺ຖຸ ຈ;

ມຎ຺ໂຈ ປີຐໍ ຠິສິ ພິພ຺ໂພ-ຫນາທິສຍນາສນໍ.

໓໒໓. ໂລຫກຸມ຺ຠີ ກຏາໂຫ ຈ,

ໂລຫຠາຓກວາຣໂກ;

ກຸຐາຣີ ວາສິ ຜຣສຸ,

ກຸທ຺ທາໂລ ຈ ນິຂາທນໍ.

໓໒໔. ວລ຺ລິ ເວຬຸ ຕິຓໍ ປຓ຺ຓໍ, ມຸຎ຺ຊປພ຺ພຊມຕ຺ຕິກາ;

ທາຣຸມຕ຺ຕິກຠຓ຺ຑານິ, ປຎ຺ເຈເຕ ອວິຠາຊິຍາ.

໓໒໕. ຖຸລ຺ລຈ຺ຈຍໍ ຠາຊຍໂຕ, ຠາຊິຕາປິ ອຠາຊິຕາ;

ຄຣຸຠຓ຺ຑານິ ວຸຈ຺ຈນ຺ຕິ, ເອເຕວິສ຺ສຊ຺ຊິຍານິ ຈ.

໓໒໖. ວລ຺ລິຑ຺ຒພາຫຸມຕ຺ຕາປິ, ເວຬຸ ອຏ຺ຐງ຺ຄຸລາຍໂຕ;

ຕິຓາທິ ມຸຏ຺ຐິມຕ຺ຕມ຺ປິ, ປຓ຺ຓໍ ເອກມ຺ປິ ມຕ຺ຕິກາ.

໓໒໗. ປາກຕາ ປຎ຺ຈວຓ຺ຓາ ວາ, ສຸຘາກງ຺ຄຸຏ຺ຐ ອາທິກາ;

ຕາລປກ຺ກປ຺ປມາຓາປິ, ທິນ຺ນາ ວາ ຕຕ຺ຖຊາຕກາ.

໓໒໘. ຣກ຺ຂິຕາ ສງ຺ຆິກາ ຣຊ຺ຊຸ-ໂຍຕ຺ຕາທີປິ ອຠາຊິຍາ;

ນິຏ຺ຐິເຕ ຠາຊິຍາ ກມ຺ເມ, ສງ຺ຆິເກ ເຈຕິຍສ຺ສ ວາ.

໓໒໙. ປຕ຺ຕາທິ ຠິກ຺ຂຸສາຣຸປ຺ປໍ, ຕຖາ ວິປ຺ປກຕາກຕໍ;

ຠາຊິຍໍ ໂລຫຠຓ຺ເຑສຸ, ວາຣກໍ ປາທຄຓ຺ຫກໍ.

໓໓໐. ເວຬຸມ຺ຫິ ຠາຊິຍາ ເຕລ-ນາຬິ ກຕ຺ຕຣທຓ຺ຑໂກ;

ຉຕ຺ຕທຓ຺ຑສລາກາໂຍ, ຕໂຖປາຫນທຓ຺ຑໂກ.

໓໓໑. ອນຸຎ຺ຎາຕວາສິທຓ຺ໂຑ, ກຣຓ຺ໂຑ ປາທຄຓ຺ຫໂກ;

ອຣຓຎ຺ຊນິສິງ຺ຄາທິ, ຠິກ຺ຂູປກຣຓໍ ຕຖາ.

໓໓໒. ຕຈ຺ຉິຕານິຏ຺ຐິຕໍ ທາຣຸຠຓ຺ຑໍ ທນ຺ຕຎ຺ຈ ຠາຊິຍໍ;

ຠິກ຺ຂູປກຣເຓ ປາທຆຏໂກ ມຕ຺ຕິກາມໂຍ.

໓໓໓. ຠາຊິຍໍ ກປ຺ປິຍໍ ຈມ຺ມໍ, ເອຬຈມ຺ມມຠາຊິຍໍ;

ຄຣຸນາ ຄຣຸຠຓ຺ຑຎ຺ຈ, ຖາວຣໍ ຖາວເຣນ ຈ.

໓໓໔. ຖາວຣໍ ປຣິວຕ຺ເຕຍ຺ຍ, ຕຖາ ກຕ຺ວາ ຈ ຠຸຎ຺ຊຕຸ;

ວລ຺ລາທິໍ ຜາຕິກມ຺ເມນ, ຄຓ຺ເຫ ເສສມຠາຊິຍນ຺ຕິ.