໓໗. ອຸຄ຺ຄຫນິທ຺ເທໂສ

ອຸຄ຺ຄໂຫຕິ –

໒໘໑. ກມ຺ມເຈຕິຍສງ຺ຆຎ຺ຎ-ປຸຄ຺ຄລຕ຺ຖໍ ຄຓສ຺ສ ຈ;

ທສເຠທມ຺ປິ ຣຕນໍ, ອຸຄ຺ຄຓ຺ຫນ຺ຕສ຺ສ ທຸກ຺ກຏໍ.

໒໘໒. ນິສ຺ສຄ຺ຄິ ເຕສຸ ອຕ຺ຕຕ຺ຖໍ, ທ຺ວີສຸ ເສເສສຸ ທຸກ຺ກຏໍ;

ອນາມສິຕ຺ວາ ວຸຕ຺ເຕ ຕຸ, ຄຓໍ ສງ຺ຆຎ຺ຈ ປຸຄ຺ຄລໍ.

໒໘໓. ‘‘ເຈຕ຺ຍສ຺ສ ນວກມ຺ມສ຺ສ, ທມ຺ມີ’’ຕິ ນ ປຏິກ຺ຂິເປ;

ວເທ ກປ຺ປິຍກາຣານໍ, ‘‘ວທນ຺ເຕວມິເມ’’ ອິຕິ.

໒໘໔. ເຂຕ຺ຕໍ ວຕ຺ຖຸໍ ຕຬາກໍ ວາ, ເທນ຺ເຕ ທາສປສ຺ວາທິກໍ;

ປຏິກ຺ຂິປິຕ຺ວາ ຄຓ຺ເຫຍ຺ຍ, ກປ຺ປິເຍນ ກເມນ ຈ;

ເຂຕ຺ຕາທີນິ ວິຫາຣສ຺ສ, ວຸຕ຺ເຕ ທມ຺ມີຕິ ວຏ຺ຏຕິ.

໒໘໕. ນວມາຕິກເກທາຣ-ຕຬາກກິຣິຍານເວ;

ມຕ຺ຕິກຸທ຺ຘຣຓໍ ພນ຺ໂຘ, ຖິຣກາໂຣ ຈ ອາຬິຍາ.

໒໘໖. ຕິເຣກຠາຄຄຫຓໍ, ເກທາເຣ ອນເວ ນເວ;

ອປຣິຈ຺ຉນ຺ນຠາເຄ ຈ, ສສ຺ເສ ‘‘ເທເຖຕ຺ຕເກ’’ ອິຕິ;

ກຫາປຓຸຏ຺ຐາປນຎ຺ຈ, ສພ຺ເພສມ຺ປິ ອກປ຺ປິຍໍ.

໒໘໗. ອວຕ຺ວາ ກສ ວປ຺ປິຈ຺ຈາເທຕ຺ຕິກາຍ ຈ ຠູມິຍາ;

ປຕິຏ຺ຐາເປຕິ ຠູມິໍ ວາ, ຠາໂຄ ເທຍ຺ໂຍຕິ ເອຕ຺ຕໂກ.

໒໘໘. ຠູມິຠາເຄ ກຕໍ ສສ຺ສໍ, ເອຕ຺ຕເກ ຄຓ຺ຫເຖຕ຺ຕກໍ;

ຄຓ຺ຫນຕ຺ຖໍ ວທນ຺ເຕວໍ, ປມາຓໍ ທຓ຺ຑຣຊ຺ຊຸຠິ.

໒໘໙. ມິນເນ ຣກ຺ຂເຓ ຐຕ຺ວາ, ຂເລ ຕໍນີຫຣາປເນ;

ໂກຏ຺ຐາທິປຏິສາມເນ, ຕສ຺ເສເວຕມກປ຺ປິຍໍ.

໒໙໐. ປຏິສາເມຍ຺ຍ ປາຈິຕ຺ຕິ, ຍໍ ກິຎ຺ຈິ ຄິຫິສນ຺ຕກໍ;

ຠຓ຺ຑາຄາຣິກສີເສນ, ສເຈປິ ປິຕຸສນ຺ຕກໍ.

໒໙໑. ປິຕູນໍ ກປ຺ປິຍໍ ວຕ຺ຖຸໍ, ອວສ຺ສໍ ປຏິສາມິຍໍ;

ອຕ຺ຕໂນ ສນ຺ຕກໍ ກຕ຺ວາ, ລພ຺ຠເຕ ປຏິສາມິຕຸໍ.

໒໙໒. ເທຫີຕິ ປຏິສາເມຕ຺ວາ, ວຸຕ຺ເຕ ຈາປິ ປຏິກ຺ຂິເປ;

ປາເຕຕ຺ວານ ຄເຕ ລພ຺ຠໍ, ປລິໂພໂຘຕິ ໂຄປິຕຸໍ.

໒໙໓. ກມ຺ມໍ ກໂຣນ຺ໂຕ ອາຣາເມ, ສກໍ ວຑ຺ຒກິອາທໂຍ;

ປຣິກ຺ຂາຣຎ຺ຈ ສຍນ-ຠຓ຺ຑໍ ວາ ຣາຊວລ຺ລຠາ.

໒໙໔. ເທຫີຕິ ປຏິສາເມຕ຺ວາ, ວທນ຺ຕິ ຍທິ ຉນ຺ທໂຕ;

ນ ກເຣຍ຺ຍ ຠຍາ ຐານໍ, ຄຸຕ຺ຕໍ ທສ຺ເສຕຸ ວຏ຺ຏຕິ.

໒໙໕. ພລກ຺ກາເຣນ ປາເຕຕ຺ວາ, ຄເຕສຸ ປຏິສາມິຕຸໍ;

ຠິກ຺ຂຸໍ ມນຸສ຺ສາ ສງ຺ກນ຺ຕິ, ນຏ຺ເຐ ວຕ຺ຖຸມ຺ຫິ ຕາທິເສ.

໒໙໖. ວິຫາຣາວສຖສ຺ສນ຺ໂຕ, ຣຕນໍ ຣຕ຺ນສມ຺ມຕໍ;

ນິກ຺ຂິເປຍ຺ຍ ຄເຫຕ຺ວານ, ມຄ຺ເຄຣຎ຺ເຎປິ ຕາທິເສ;

ສາມິການາຄມໍ ຎຕ຺ວາ, ປຕິຣູປໍ ກຣີຍຕີຕິ.