໓໘. ກຸລທູສນນິທ຺ເທໂສ

ທູສນນ຺ຕິ –

໒໙໗. ປຸປ຺ຜໍ ເວຬຸໍ ຜລໍ ຈຸຓ຺ຓໍ, ທນ຺ຕກຏ຺ຐຎ຺ຈ ມຕ຺ຕິກໍ;

ສງ຺ຄຫຓຕ຺ຖໍ ທທໂຕ, ກຸລທູສນທຸກ຺ກຏໍ.

໒໙໘. ຖຸລ຺ລຈ຺ຈຍໍ ຄຣຸຠຓ຺ຑໍ, ອິສ຺ສເຣເນຕ຺ຖ ສງ຺ຆິກໍ;

ເທນ຺ຕສ຺ສ ທຸກ຺ກຏາທີນິ, ເຖຍ຺ຍາ ສງ຺ຆຎ຺ຎ ສນ຺ຕກໍ.

໒໙໙. ກຸລສງ຺ຄຫາ ໂຣເປຕຸໍ, ໂຣປາເປຕຸຎ຺ຈ ສພ຺ພຖາ;

ຜລປຸປ຺ຜູປຄໍ ຣຸກ຺ຂໍ, ຊຄ຺ຄິຕຸຎ຺ຈ ນ ວຏ຺ຏຕິ.

໓໐໐. ນິມິຕ຺ໂຕຠາສໂຕ ກປ຺ປໂວຫາຣປຣິຍາຍໂຕ;

ອຕ຺ຕໂນ ປຣິໂຠຄຕ຺ຖໍ, ໂຣປນາທີນິ ລພ຺ຠເຣ.

໓໐໑. ວຸຕ຺ຕາວ ເວຊ຺ຊິກາ ຊງ຺ຆເປສເນ ຄິຫິກມ຺ມສຸ;

ຐເປຕ຺ວາ ປິຕໂຣ ຠຓ຺ຑຸໍ, ເວຍ຺ຍາວຈ຺ຈກຣໍ ສກໍ.

໓໐໒. ທຸກ຺ກຏໍ ປທວາເຣນ, ຫຣເຓ ທູຕສາສນໍ;

ສາສນໍ ອຄ຺ຄເຫຕ຺ວາປິ, ປຐມໍ ວທໂຕ ປຸນ.

໓໐໓. ອຸປ຺ປນ຺ນປຈ຺ຈຍາ ເອວໍ, ປຎ຺ຈນ຺ນມ຺ປິ ອກປ຺ປິຍາ;

ອຠູຕາໂຣຈນາຣູປ-ສໍໂວຫາຣຸຄ຺ຄຫາທິສາ.

໓໐໔. ຫຣາເປຕ຺ວາ ຫຣິຕ຺ວາປິ, ປິຕູນໍ ເສສຎາຕິນໍ;

ປຕ຺ຕານໍ ວຕ຺ຖຸປູຊຕ຺ຖໍ, ທາຕຸໍ ປຸປ຺ຜານິ ລພ຺ຠຕິ;

ມຓ຺ຑນຕ຺ຖຎ຺ຈ ລິງ຺ຄາທິ-ປູຊຕ຺ຖຎ຺ຈ ນ ລພ຺ຠຕິ.

໓໐໕. ຕຖາ ຜລໍ ຄິລານານໍ, ສມ຺ປຕ຺ຕິສ຺ສຣິຍສ຺ສ ຈ;

ປຣິພ຺ພຍວິຫີນານໍ, ທາຕຸໍ ສປຣສນ຺ຕກໍ.

໓໐໖. ຠາເຊນ຺ເຕ ຜລປຸປ຺ຜມ຺ຫິ, ເທຍ຺ຍໍ ປຕ຺ຕສ຺ສ ກສ຺ສຈິ;

ສມ຺ມເຕນາປໂລເກຕ຺ວາ, ທາຕພ຺ພມິຕເຣນ ຕຸ.

໓໐໗. ວິຫາເຣ ວາ ປຣິຈ຺ຉິຊ຺ຊ, ກຕ຺ວານ ກຕິກໍ ຕໂຕ;

ເທຍ຺ຍໍ ຍຖາປຣິຈ຺ເຉທໍ, ຄິລານສ຺ເສຕຣສ຺ສ ວາ;

ຍາຈມານສ຺ສ ກຕິກໍ, ວຕ຺ວາ ຣຸກ຺ຂາວ ທສ຺ສິຍາ.

໓໐໘. ສິຣີສກສວາທີນໍ, ຈຸຓ຺ເຓ ເສເສ ຈ ນິຈ຺ຉໂຍ;

ຍຖາວຸຕ຺ຕນໂຍ ເອວ, ປຓ຺ຓມ຺ເປຕ຺ຖ ປເວສເຍຕິ.