໓໕. ປຣິກ຺ຂາຣນິທ຺ເທໂສ

ປຣິກ຺ຂາໂຣຕິ –

໒໕໙. ປຎ຺ຈວຓ຺ເຓຫິ ສຸຕ຺ເຕຫິ, ອນ຺ໂຕ ພຫິ ຈ ສິພ຺ພິຕຸໍ;

ຄິຣິກູຏຑ຺ຒຈນ຺ທາທິໍ, ຉຕ຺ເຕ ປຓ຺ເຓ ຈ ຉິນ຺ທິຕຸໍ.

໒໖໐. ຆຏກໍ ວາຬຣູປໍ ວາ, ທຓ຺ເຑ ເລຂາ ນ ວຏ຺ຏຕິ;

ວຏ຺ຏຕີ ທຓ຺ຑພຸນ຺ທມ຺ຫິ, ອຫິຈ຺ຉຕ຺ຕກສາທິສໍ.

໒໖໑. ສິພ຺ພິຕຸໍ ເອກວຓ຺ເຓນ, ປຎ຺ຊຣໍ ວາ ວິນນ຺ຘິຕຸໍ;

ຖິຣຕ຺ຖໍ ວຏ຺ຏຕີ ຉຕ຺ເຕ, ທຓ຺ເຑ ເລຂາວ ພນ຺ຘິຕຸໍ.

໒໖໒. ອນ຺ເຕ ປຏ຺ຏມຸເຂ ວາປິ, ເວຓິ ສງ຺ຂລິກາປິ ວາ;

ສູຈິວິກາຣມຎ຺ຎໍ ວາ, ຈີວເຣ ນ ຈ ກປ຺ປຕິ;

ກປ຺ປພິນ຺ທຸວິກາຣມ຺ປິ, ປາຬິກຓ຺ຓິກອາທິກໍ.

໒໖໓. ຄຓ຺ຐິປາສກປຏ຺ຏາປິ, ຈຕຸກ຺ໂກຓາວ ອຄ຺ຆິຍໍ;

ມຸຄ຺ຄໂຣ ກກ຺ກຏຈ຺ຉາທິ-ວິກາຣໍ ເນຕ຺ຖ ວຏ຺ຏຕິ.

໒໖໔. ໂກຓສຸຕ຺ຕາ ຈ ປີຬກາ, ທຸວິຎ຺ເຎຍ຺ຍາວ ກປ຺ປເຣ;

ຄນ຺ຘໍ ເຕລໍ ວ ລາຂໍ ວາ, ຣຊເນ ນ ຈ ປກ຺ຂິເປ.

໒໖໕. ຣຕ຺ຕໍ ສງ຺ເຂນ ມຓິນາ, ຆຏ຺ເຏຍ຺ຍຎ຺ເຎນ ວາ ນ ຈ;

ຆໍເສຍ຺ຍ ໂທຓິຍໍ ກຕ຺ວາ, ປຫາເຣ ນ ຈ ມຸຏ຺ຐິນາ.

໒໖໖. ກຓ຺ຓໂກຓກສຸຕ຺ຕານິ, ຣຕ຺ເຕ ຉິນ຺ເທຍ຺ຍ ຈີວເຣ;

ເລຂາ ນ ວຏ຺ຏຕີ ຘມ຺ມ-ກຣເຓ ຉຕ຺ຕວຏ຺ຏິຍໍ.

໒໖໗. ເລຂໍ ຐເປຕ຺ວາ ມຓິກາ, ປີຬກາ ກຸຎ຺ຈິກາຍ ຈ;

ປິປ຺ຜເລ ຈ ປຣິຈ຺ເຉທ-ເລຂາ ທຓ຺ຑມ຺ຫິ ວຏ຺ຏຕິ.

໒໖໘. ມາລາທ຺ຍຣຓິຍໍ ປຕ຺ຕ-ມຓ຺ຑເລ ຠິຕ຺ຕິກມ຺ມ ຈ;

ເຫຏ຺ຐາ ເລຂາທ຺ວຍໍ ອຸທ຺ຘໍ, ອຫິຈ຺ຉຕ຺ຕກສາທິສໍ.

໒໖໙. ຫິຕ຺ວາ ກຕ຺ຕຣຍຏ຺ຐິມ຺ຫິ, ສູຈິສຓ຺ຑາສເກປິ ຈ;

ຍໍ ກິຎ຺ຈິ ຄິຣິກູຏາທິ-ວຓ຺ຓມຏ຺ຐໍ ນ ວຏ຺ຏຕິ.

໒໗໐. ພິມ຺ໂພຫເນ ຠິສິມຎ຺ຈ-ປີຐາທິສຍນາສເນ;

ສມ຺ມຸຎ຺ຊນິມ຺ຫິ ສງ຺ກາຣ-ຉຑ຺ຑເນ ຣງ຺ຄຠາຊເນ.

໒໗໑. ປານີຍຠາຊເນ ປາທ-ປີເຐ ກຖລິກາຍ ຈ;

ປຕ຺ຕາຘາຣປິຘາເນສຸ, ຕາລວຓ຺ເຏ ຈ ພີຊເນ;

ຍໍ ກິຎ຺ຈິ ມາລາກມ຺ມາທິ-ວຓ຺ຓມຏ຺ຐມວາຣິຕໍ.

໒໗໒. ເສນາສເນ ປນ ທ຺ວາຣກວາຏາທິປ຺ປເຠທເນ;

ໂສວຓ຺ຓມຍນຸຎ຺ຎາຕໍ, ວຓ຺ຓມຏ຺ຐມ຺ຫິ ກາ ກຖາ.

໒໗໓. ວິສາຓນາຬິລາພ຺ວາທິປ຺ປເຠເທ ເຕລຠາຊເນ;

ປຸມິຕ຺ຖິຣູປຣຫິຕໍ, ວຓ຺ຓມຏ຺ຐມວາຣິຕນ຺ຕິ.