໓໔. ປຖວີນິທ຺ເທໂສ

ປຖວີ ຈາຕິ –

໒໔໒. ຊາຕາຊາຕາຕິ ທຸວິຘາ, ສຸທ຺ຘມຕ຺ຕິກປໍສຸກາ;

ຊາຕາທຑ຺ຒາ ຈ ປຖວີ, ພຫຸມຕ຺ຕິກປໍສຸກາ;

ຈາຕຸມາສາຘິໂກວຏ຺ຐປໍສຸມຕ຺ຕິກຣາສິ ຈ.

໒໔໓. ສຸທ຺ຘສກ຺ຂຣປາສາຓມຣຸມ຺ພກຖລວາລຸກາ;

ທຑ຺ຒາ ຈ ຠູມິ ເຍຠຸຍ຺ຍສກ຺ຂຣາທິມຫີປິ ຈ;

ທຸຕິຍາ ວຸຕ຺ຕຣາສິ ຈ, ຈາຕຸມາໂສມວຏ຺ຐໂກ.

໒໔໔. ທ຺ເວ ຠາຄາ ຕີສຸ ຠາເຄສຸ, ມຕ຺ຕິກາ ຍສ຺ສ ຠູມິຍາ;

ເຍຠຸຍ຺ຍມຕ຺ຕິກາ ເອສາ, ເສເສສຸປິ ອຍໍ ນໂຍ.

໒໔໕. ປາຈິຕ຺ຕິ ຂຓເນ ຊາເຕ, ຊາຕສຎ຺ຎິສ຺ສ ທຸກ຺ກຏໍ;

ທ຺ເວຬ຺ຫສ຺ສາຊາຕສຎ຺ຎິສ຺ສ, ນາປຕ຺ຕາຓາປເນ ຕຖາ.

໒໔໖. ປຫາເຣ ປຫາຣາປຕ຺ຕິ, ຂຓມານສ຺ສ ອຕ຺ຕນາ;

ເອກາຍາຓຕ຺ຕິຍາ ເອກາ, ນານາຓຕ຺ຕີສຸ ວາຈໂສ.

໒໔໗. ‘‘ອິມໍ ຐານມິມໍ ກນ຺ທມິຘ ວາປິໍ ຂເຓຕ຺ຖ ຈ;

ຊາເລຫຄ຺ຄິ’’ນ຺ຕິ ວາ ວຕ຺ຕຸໍ, ນິຍເມຕ຺ວາ ນ ວຏ຺ຏຕິ.

໒໔໘. ‘‘ຖມ຺ຠສ຺ສິມສ຺ສາວາຏໍ ວາ, ມຕ຺ຕິກໍ ຊານ ມາຫຣ;

ກໂຣຫິ ກປ຺ປິຍຎ຺ເຈ’’ຕິ, ວຈນໍ ວຏ຺ຏເຕທິສໍ.

໒໔໙. ອສມ຺ພທ຺ຘໍ ປຖວິຍາ, ສຸກ຺ຂກທ຺ທມອາທິກໍ;

ໂກເປຕຸໍ ຕນຸກໍ ລພ຺ຠມຸສ຺ສິຎ຺ຈນີຍກທ຺ທມໍ.

໒໕໐. ຄຓ຺ຑຸປ຺ປາທໍ ອຸປຈິກາມຕ຺ຕິກໍ ມູສິກຸກ຺ກິຣໍ;

ຈາຕຸມາສາຘິໂກວຏ຺ຐໍ, ເລຑ຺ຑາທິຎ຺ຈ ນ ໂກປເຍ.

໒໕໑. ປຕິເຕ ວາປິອາທີນໍ, ກູເລ ອຸທກສນ຺ຕິເກ;

ປາສາເຓ ຈ ຣເຊ ລຄ຺ເຄ, ປຕິເຕ ນວໂສຓ຺ຑິຍາ.

໒໕໒. ວມ຺ມິເກ ມຕ຺ຕິກາກຸຏ຺ເຏ, ອພ຺ໂຠກາສຸຏ຺ຐິເຕ ຕຖາ;

ເຍຠຸຍ຺ຍກຖລຏ຺ຐາເນ, ຕິຏ຺ຐຕິຏ຺ຐກກຸຏ຺ຏໂກ.

໒໕໓. ຖມ຺ຠາທິໍ ຄຓ຺ຫິຕຸໍ ຠູມິໍ, ສຎ຺ຈາເລຕ຺ວາ ວິໂກປຍໍ;

ຘາຣາຍ ຠິນ຺ທິຕຸໍ ຠູມິໍ, ກາຕຸໍ ວາ ວິສມໍ ສມໍ.

໒໕໔. ສມ຺ມຸຎ຺ຊນີຫິ ຆໍສິຕຸໍ, ກຓ຺ຏກາທິໍ ປເວສິຕຸໍ;

ທສ຺ເສສ຺ສາມີຕິ ຠິນ຺ທນ຺ໂຕ, ຠູມິໍ ຈງ຺ກມິຕຸໍ ປທໍ.

໒໕໕. ຆໍສິຕຸໍ ອງ຺ຄປຈ຺ຈງ຺ຄໍ, ກຓ຺ຑຸໂຣຄີ ຕຏາທິສຸ;

ຫຕ຺ຖໍ ວາ ໂຘວິຕຸໍ ຠູມິໍ, ຆໍສິຕຸໍ ນ ຈ ກປ຺ປຕິ.

໒໕໖. ຖມ຺ຠາທິອຸຊຸກຸທ຺ຘາໂຣ, ປາສາຓາທິປວຏ຺ຏນໍ;

ສາຂາທິກຑ຺ຒນໍ ຣຸກ຺ຂລຕາຈ຺ເຉທນຜາລນໍ.

໒໕໗. ເສໂກ ປສ຺ສາວອາທີນໍ, ສຸທ຺ຘຈິຕ຺ຕສ຺ສ ວຏ຺ຏຕິ;

ອລ຺ລຫຕ຺ຖໍ ຐເປຕ຺ວານ, ຣຊຄ຺ຄາໂຫ ຈ ຠູມິຍາ.

໒໕໘. ອຄ຺ຄິສ຺ສ ອນຸປາທາເນ, ກປາເລ ອິຏ຺ຐກາຍ ວາ;

ປາເຕຕຸໍ ລພ຺ຠເຕ ອຄ຺ຄິໍ, ຠູມິຍໍ ວາວເສ ສຕີຕິ.