໓໓. ກາຍພນ຺ຘນນິທ຺ເທໂສ

ກາຍພນ຺ຘນນ຺ຕິ –

໒໓໕. ອກາຍພນ຺ຘໂນ ຄາມໍ, ທຸກ຺ກຏໍ ປວິເສຍ຺ຍ ເຈ;

ພນ຺ເຘຍ຺ຍ ຍຕ຺ຖ ສຣຕິ, ຕຕ຺ເຖວາສຕິຍາ ຄໂຕ.

໒໓໖. ປຏ຺ຏິກາ ສູກຣນ຺ຕນ຺ຕິ, ທຸວິຘໍ ກາຍພນ຺ຘນໍ;

ທຸສ຺ສປຏ຺ໂຏ ຈ ຣຊ຺ຊຸ ຈ, ເອກາ ຕທນຸໂລມິກາ.

໒໓໗. ມຈ຺ຉກຓ຺ຏກຂຊ຺ຊູຣີ-ປຕ຺ຕາ ມຏ຺ຐາ ຈ ປຏ຺ຏິກາ;

ລພ຺ຠາ ທສາ ຈຕສ຺ໂສປິ, ອນ຺ເຕ ທິຄຸຓສຸຕ຺ຕກໍ.

໒໓໘. ມາລາທິໍ ກກ຺ກຏຈ຺ຉາທິໍ, ທສ຺ເສຕ຺ວາ ຄຸຓສຸຕ຺ຕກ;

ໂກຏ຺ຏິຕາ ກຸຎ຺ຊຣຈ຺ຉາທິໍ, ປຏ຺ຏິກາ ນ ຈ ກປ຺ປຕິ.

໒໓໙. ຆຏກໍ ມກຣມຸຂາທິໍ, ນ ກປ຺ປນ຺ຕິ ທສາມຸເຂ;

ອຸຠນ຺ເຕ ຆຏກາ ເລຂາ, ວິເຘ ອຎ຺ຎຎ຺ຈ ຈິຕ຺ຕກໍ.

໒໔໐. ເທຑ຺ຑຸຠກຎ຺ຈ ມຸຣຊໍ, ມທ຺ທວີຓໍ ກລາພຸກໍ;

ນ ກປ຺ປນ຺ຕິ ທສາສຸ ທ຺ເວ, ມຊ຺ຌິມາເຍວ ກປ຺ປເຣ.

໒໔໑. ເວຬຸທນ຺ຕວິສາຓຏ຺ຐິກຏ຺ຐລາຂາຜລາມຍາ;

ສງ຺ຂນາຠິມຍາ ສຸຕ຺ຕນຬໂລຫມຍາປິ ຈ;

ວິຘາ ກປ຺ປນ຺ຕິ ກປ຺ປິຍາ, ຄຓ຺ຐິໂຍ ຈາປິ ຕມ຺ມຍາຕິ.

ປຐມຠາຓວາຣໍ ນິຏ຺ຐິຕໍ.