໕. ອູນວີສຕິວສ຺ສສິກ຺ຂາປທວຓ຺ຓນາ

ປຎ຺ຈເມ ອູນວີສຕິວສ຺ສນ຺ຕິ ປຏິສນ຺ຘິຄ຺ຄຫຓໂຕ ປຏ຺ຐາຍ ອປຣິປຸຓ຺ຓວີສຕິວສ຺ສໍ. ອຸປສມ຺ປາເທຍ຺ຍາຕິ ອຸປຊ຺ຌາໂຍ ຫຸຕ຺ວາ ອຸປສມ຺ປາເທຍ຺ຍ. ໂສ ຈ ປຸຄ຺ຄໂລ ອນຸປສມ຺ປນ຺ໂນຕິ ຊານນ຺ເຕນາປິ ອຊານນ຺ເຕນາປິ ອຸປສມ຺ປາທິໂຕ ອນຸປສມ຺ປນ຺ໂນວ. ສເຈ ປນ ໂສ ທສວສ຺ສຈ຺ຈເຍນ ອຎ຺ຎໍ ອຸປສມ຺ປາເທຕິ, ຕຎ຺ເຈ ມຸຎ຺ຈິຕ຺ວາ ຄໂຓ ປູຣຕິ, ສູປສມ຺ປນ຺ໂນ. ໂສປິ ຍາວ ນ ຊານາຕິ, ຕາວ ຕສ຺ສ ເນວ ສຄ຺ຄນ຺ຕຣາໂຍ ນ ໂມກ຺ຂນ຺ຕຣາໂຍ, ຎຕ຺ວາ ປນ ປຸນ ອຸປສມ຺ປຊ຺ຊິຕພ຺ພໍ. ເຕ ຈ ຠິກ຺ຂູ ຄາຣຍ຺ຫາຕິ ຐເປຕ຺ວາ ອຸປຊ຺ຌາຍໍ ອວເສສາ ຄາຣຍ຺ຫາ ໂຫນ຺ຕິ, ສພ຺ເພ ທຸກ຺ກຏໍ ອາປຊ຺ຊນ຺ຕິ. ອິທໍ ຕສ຺ມິໍ ປາຈິຕ຺ຕິຍນ຺ຕິ ໂຍ ປນ ອຸປຊ຺ຌາໂຍ ຫຸຕ຺ວາ ອຸປສມ຺ປາເທຕິ, ຕສ຺ມິໍເຍວ ປຸຄ຺ຄເລ ອິທໍ ປາຈິຕ຺ຕິຍໍ ເວທິຕພ຺ພໍ. ຕສ຺ມາ ໂຍ ‘‘ເອວໍ ອຸປສມ຺ປາເທສ຺ສາມີ’’ຕິ ຄຓໍ ວາ ອາຈຣິຍໍ ວາ ປຕ຺ຕໍ ວາ ຈີວຣໍ ວາ ປຣິເຍສຕິ, ສີມໍ ວາ ສມ຺ມນ຺ນຕິ (ປາຈິ. ໔໐໔), ອຸທກຸກ຺ເຂປໍ ວາ ປຣິຈ຺ຉິນ຺ທຕິ, ໂສ ເອເຕສຸ ສພ຺ພກິຈ຺ເຈສຸ ຎຕ຺ຕິຍາ, ທ຺ວີສຸ ຈ ກມ຺ມວາຈາສຸ ທຸກ຺ກຏານິ ອາປຊ຺ຊິຕ຺ວາ ກມ຺ມວາຈາປຣິໂຍສາເນ ປາຈິຕ຺ຕິຍໍ ອາປຊ຺ຊຕິ.

ຣາຊຄເຫ ສມ຺ພຫຸເລ ຠິກ຺ຂູ ອາຣພ຺ຠ ອູນວີສຕິວສ຺ສໍ ອຸປສມ຺ປາທນວຕ຺ຖຸສ຺ມິໍ ປຎ຺ຎຕ຺ຕໍ, ອສາຘາຣຓປຎ຺ຎຕ຺ຕິ, ອນາຓຕ຺ຕິກໍ, ອູນວີສຕິວສ຺ເສ ເວມຕິກສ຺ສ, ປຣິປຸຓ຺ຓວີສຕິວສ຺ເສ ອູນກສຎ຺ຎິໂນ, ເວມຕິກສ຺ສ ຈ ທຸກ຺ກຏໍ. ອຸຠຍຕ຺ຖ ປຣິປຸຓ຺ຓສຎ຺ຎິສ຺ສ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ອູນວີສຕິວສ຺ສຕາ, ອູນກສຎ຺ຎິຕາ, ອຸປສມ຺ປາທນນ຺ຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ອທິນ຺ນາທານສທິສານິ, ອິທໍ ປນ ປຓ຺ຓຕ຺ຕິວຊ຺ຊໍ, ຕິຈິຕ຺ຕໍ, ຕິເວທນນ຺ຕິ.

ອູນວີສຕິວສ຺ສສິກ຺ຂາປທວຓ຺ຓນາ ນິຏ຺ຐິຕາ.