໖. ຈາຣິຕ຺ຕສິກ຺ຂາປທວຓ຺ຓນາ

ຉຏ຺ເຐ ນິມນ຺ຕິໂຕຕິ ປຎ຺ຈນ຺ນໍ ໂຠຊນານໍ ອຎ຺ຎຕເຣນ ນິມນ຺ຕິໂຕ. ສຠຕ຺ໂຕ ສມາໂນຕິ ເຕເນວ ນິມນ຺ຕນຠຕ຺ເຕນ ສຠຕ຺ໂຕ ສມາໂນ. ສນ຺ຕໍ ຠິກ຺ຂຸໍ ອນາປຸຈ຺ຉາຕິ ອນ຺ໂຕອຸປຈາຣສີມາຍ ທສ຺ສນູປຈາເຣ ຠິກ຺ຂຸໍ ທິສ຺ວາ ຍໍ ສກ຺ກາ ໂຫຕິ ປກຕິວຈເນນ ອາປຸຈ຺ຉິຕຸໍ, ຕາທິສໍ ‘‘ອຫໍ ອິຕ຺ຖນ຺ນາມສ຺ສ ຆຣໍ ຄຈ຺ຉາມີ’’ຕິ ວາ ‘‘ຈາຣິຕ຺ຕໍ ອາປຊ຺ຊາມີ’’ຕິ ວາ ອີທິເສນ ວຈເນນ ອນາປຸຈ຺ຉິຕ຺ວາ. ປຸເຣຠຕ຺ຕໍ ວາ ປຈ຺ຉາຠຕ຺ຕໍ ວາຕິ ເຍນ ຠຕ຺ເຕນ ນິມນ຺ຕິໂຕ, ຕສ຺ມິໍ ຠຸຕ຺ເຕ ວາ ອຠຸຕ຺ເຕ ວາ. ກຸເລສຸ ຈາຣິຕ຺ຕໍ ອາປຊ຺ເຊຍ຺ຍາຕິ ຍສ຺ມິໍ ກຸເລ ນິມນ຺ຕິໂຕ, ຕໂຕ ອຎ຺ຎານິ ກຸລານິ ປວິເສຍ຺ຍ. ອຎ຺ຎຕ຺ຣ ສມຍາ ປາຈິຕ຺ຕິຍນ຺ຕິ ສເຈ ໂສ ຠິກ຺ຂຸ ວຸຕ຺ຕລກ຺ຂຓໍ ທຸວິຘມ຺ປິ ສມຍໍ ຐເປຕ຺ວາ ອວີຕິວຕ຺ເຕ ມຊ຺ຌນ຺ຫິເກ ອຎ຺ຎໍ ກຸລໍ ປວິສຕິ, ອຖສ຺ສ ຆຣູປຈາໂຣກ຺ກມເນ ທຸກ຺ກຏໍ, ປຐມປາເທນ ອຸມ຺ມາຣໍ ອຕິກ຺ກມນ຺ຕສ຺ສ ອປຣມ຺ປິ ທຸກ຺ກຏໍ, ທຸຕິຍປາເທນ ອຕິກ຺ກເມ ປາຈິຕ຺ຕິຍໍ.

ຣາຊຄເຫ ອຸປນນ຺ທໍ ອາຣພ຺ຠ ຈາຣິຕ຺ຕາປຊ຺ຊນວຕ຺ຖຸສ຺ມິໍ ປຎ຺ຎຕ຺ຕໍ, ‘‘ສນ຺ຕໍ ຠິກ຺ຂຸໍ, ອນາປຸຈ຺ຉາ, ປຸເຣຠຕ຺ຕໍ ປຈ຺ຉາຠຕ຺ຕໍ, ອຎ຺ຎຕ຺ຣ ສມຍາ’’ຕິ ອຍເມຕ຺ຖ ຈຕຸພ຺ພິຘາ ອນຸປຎ຺ຎຕ຺ຕິ, ສາຘາຣຓປຎ຺ຎຕ຺ຕິ, ອນາຓຕ຺ຕິກໍ, ຕິກປາຈິຕ຺ຕິຍໍ, ອນິມນ຺ຕິເຕ ນິມນ຺ຕິຕສຎ຺ຎິສ຺ສ, ເວມຕິກສ຺ສ ວາ ທຸກ຺ກຏໍ. ຕສ຺ມິໍ ອນິມນ຺ຕິຕສຎ຺ຎິສ຺ສ, ສມເຍ ສນ຺ຕໍ ຠິກ຺ຂຸໍ ອາປຸຈ຺ຉິຕ຺ວາ, ອສນ຺ຕໍ ຠິກ຺ຂຸໍ ອນາປຸຈ຺ຉິຕ຺ວາ ປວິສໂຕ, ອຎ຺ຎສ຺ສ ຆເຣນ ວາ ຆຣູປຈາເຣນ ວາ ມຄ຺ໂຄ ໂຫຕິ, ເຕນ ຄຈ຺ຉໂຕ, ອນ຺ຕຣາຣາມຠິກ຺ຂຸນຸປສ຺ສຍຕິຕ຺ຖິຍເສຍ຺ຍປຏິກ຺ກມນຠຕ຺ຕິຍຆຣານິ ຄຈ຺ຉໂຕ, ອາປທາສຸ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ປຎ຺ຈນ຺ນໍ ໂຠຊນານໍ ອຎ຺ຎຕເຣນ ນິມນ຺ຕນສາທິຍນໍ, ສນ຺ຕໍ ຠິກ຺ຂຸໍ ອນາປຸຈ຺ຉນາ, ຠຕ຺ຕິຍຆຣໂຕ ອຎ຺ຎຆຣປ຺ປວິສນໍ, ມຊ຺ຌນ຺ຫິການຕິກ຺ກໂມ, ສມຍສ຺ສ ວາ ອາປທານໍ ວາ ອຠາໂວຕິ ອິມາເນຕ຺ຖ ປຎ຺ຈ ອງ຺ຄານິ. ສມຸຏ຺ຐານາທີນິ ປຐມກຖິນສທິສາເນວ, ອິທໍ ປນ ກິຣິຍາກິຣິຍນ຺ຕິ.

ຈາຣິຕ຺ຕສິກ຺ຂາປທວຓ຺ຓນາ ນິຏ຺ຐິຕາ.