ອນິຍຕກຓ຺ໂຑ

໑. ປຐມານິຍຕສິກ຺ຂາປທວຓ຺ຓນາ

ອນິຍຕຸທ຺ເທເສ ອິເມ ໂຂ ປນາຕິອາທິ ວຸຕ຺ຕນຍເມວ. ມາຕຸຄາເມນາຕິ ຕທຫຸຊາຕາຍປິ ຊີວມານກມນຸສ຺ສິຕ຺ຖິຍາ. ເອໂກ ເອກາຍາຕິ ເອໂກ ຠິກ຺ຂຸ ມາຕຸຄາມສງ຺ຂາຕາຍ ເອກາຍ ອິຕ຺ຖິຍາ ສທ຺ຘິໍ. ຣໂຫຕິ ຈກ຺ຂຸສ຺ສ ຣໂຫ. ກິຎ຺ຈາປິ ປາຬິຍໍ (ປາຣາ. ໔໔໕) ໂສຕສ຺ສ ຣໂຫ ອາຄໂຕ, ຈກ຺ຂຸສ຺ເສວ ປນ ຣໂຫ ‘‘ຣໂຫ’’ຕິ ອິຘ ອຘິປ຺ເປໂຕ. ສເຈປິ ຫິ ປິຫິຕກວາຏສ຺ສ ຄພ຺ຠສ຺ສ ທ຺ວາເຣ ນິສິນ຺ໂນ ວິຎ຺ຎູ ປຸຣິໂສ ໂຫຕິ, ເນວ ອນາປຕ຺ຕິໍ ກໂຣຕິ. ຍຕ຺ຖ ປນ ສກ຺ກາ ທຏ຺ຐຸໍ, ຕາທິເສ ອນ຺ໂຕທ຺ວາທສຫຕ຺ເຖປິ ໂອກາເສ ນິສິນ຺ໂນ ສຈກ຺ຂຸໂກ ວິກ຺ຂິຕ຺ຕຈິຕ຺ໂຕປິ ນິທ຺ທາຍນ຺ໂຕປິ ອນາປຕ຺ຕິໍ ກໂຣຕິ, ສມີເປ ຐິໂຕປິ ອນ຺ໂຘ ນ ກໂຣຕິ, ຈກ຺ຂຸມາປິ ນິປຊ຺ຊິຕ຺ວາ ນິທ຺ທາຍນ຺ໂຕປິ ນ ກໂຣຕິ, ອິຕ຺ຖີນໍ ປນ ສຕມ຺ປິ ນ ກໂຣຕິເຍວ, ເຕນ ວຸຕ຺ຕໍ ‘‘ຣໂຫຕິ ຈກ຺ຂຸສ຺ສ ຣໂຫ’’ຕິ. ປຏິຈ຺ຉນ຺ເນ ອາສເນຕິ ກຸຏ຺ຏາທີຫິ ປຏິຈ຺ຉນ຺ໂນກາເສ. ອລໍກມ຺ມນິເຍຕິ ກມ຺ມກ຺ຂມໍ ກມ຺ມໂຍຄ຺ຄນ຺ຕິ ກມ຺ມນິຍໍ, ອລໍ ປຣິຍຕ຺ຕໍ ກມ຺ມນິຍຠາວາຍາຕິ ອລໍກມ຺ມນິຍໍ, ຕສ຺ມິໍ ອລໍກມ຺ມນິເຍ. ຍຕ຺ຖ ອຊ຺ຌາຈາຣໍ ກໂຣນ຺ຕາ ສກ຺ໂກນ຺ຕິ ຕໍ ກມ຺ມໍ ກາຕຸໍ, ຕາທິເສຕິ ອຕ຺ໂຖ. ນິສຊ຺ຊໍ ກປ຺ເປຍ຺ຍາຕິ ນິສຊ຺ຊໍ ກເຣຍ຺ຍ, ນິສີເທຍ຺ຍາຕິ ອຕ຺ໂຖ. ເອຕ຺ຖ ຈ ສຍນມ຺ປິ ນິສຊ຺ຊາຍ ເອວ ສງ຺ຄຫິຕໍ. ສທ຺ເຘຍ຺ຍວຈສາຕິ ສທ຺ຘາຕພ຺ພວຈນາ, ອຣິຍສາວິກາຕິ ອຕ຺ໂຖ. ນິສຊ຺ຊໍ ຠິກ຺ຂຸ ປຏິຊານມາໂນຕິ ກິຎ຺ຈາປິ ເອວຣູປາ ອຸປາສິກາ ທິສ຺ວາ ວທຕິ, ອຖ ໂຂ ຠິກ຺ຂຸ ນິສຊ຺ຊໍ ປຏິຊານມາໂນວ ຕິຓ຺ຓໍ ຘມ຺ມານໍ ອຎ຺ຎຕເຣນ ກາເຣຕພ຺ໂພ, ນ ອປ຺ປຏິຊານມາໂນຕິ ອຕ຺ໂຖ. ເຍນ ວາ ສາຕິ ນິສຊ຺ຊາທີສຸ ອາກາເຣສຸ ເຍນ ວາ ອາກາເຣນ ສທ຺ຘິໍ ເມຖຸນາທີນິ ອາໂຣເປຕ຺ວາ ສາ ອຸປາສິກາ ວເທຍ຺ຍ, ປຏິຊານມາໂນວ ເຕນ ໂສ ຠິກ຺ຂຸ ກາເຣຕພ຺ໂພ, ເອວຣູປາຍປິ ຫິ ອຸປາສິກາຍ ວຈນມຕ຺ເຕນ ອາກາເຣນ ນ ກາເຣຕພ຺ໂພຕິ ອຕ຺ໂຖ. ກສ຺ມາ? ຍສ຺ມາ ທິຏ຺ຐໍ ນາມ ຕຖາປິ ໂຫຕິ, ອຎ຺ຎຖາປີຕິ. ອຍໍ ຘມ຺ໂມ ອນິຍໂຕຕິ ຕິຓ຺ຓໍ ອາປຕ຺ຕີນໍ ຍໍ ອາປຕ຺ຕິໍ ວາ ວຕ຺ຖຸໍ ວາ ປຏິຊານາຕິ, ຕສ຺ສ ວເສນ ກາເຣຕພ຺ພຕາຍ ອນິຍໂຕ.

ສາວຕ຺ຖິຍໍ ອຸທາຍິຕ຺ເຖຣໍ ອາຣພ຺ຠ ມາຕຸຄາເມນ ສທ຺ຘິໍ ວຸຕ຺ຕປ຺ປກາເຣ ອາສເນ ນິສຊ຺ຊກປ຺ປນວຕ຺ຖຸສ຺ມິໍ ປຎ຺ຎຕ຺ຕໍ, ອສາຘາຣຓປຎ຺ຎຕ຺ຕິ, ອນາຓຕ຺ຕິກໍ, ເມຖຸນຘມ຺ມສນ຺ນິສ຺ສິຕກິເລສສງ຺ຂາເຕນ ຣຫສ຺ສາເທນ ມາຕຸຄາມສ຺ສ ສນ຺ຕິກໍ ຄນ຺ຕຸກາມຕາຍ ອກ຺ຂິອຎ຺ຊນາທິໂຕ ປຏ຺ຐາຍ ສພ຺ພປໂຍເຄສຸ ທຸກ຺ກຏໍ. ຄນ຺ຕ຺ວາ ຕສ຺ມິໍ ວາ ນິສິນ຺ເນ ອິຕ຺ຖີ ນິສີທຕຸ, ຕສ຺ສາ ວາ ນິສິນ຺ນາຍ ໂສ ນິສີທຕຸ, ອປຈ຺ຉາ ອປຸຣິມໍເຍວ ອຸໂຠ ວາ ນິສີທນ຺ຕຸ, ອຸຠິນ຺ນໍ ນິສຊ຺ຊາຍ ປາຈິຕ຺ຕິຍໍ. ສເຈ ປນ ກາຍສໍສຄ຺ຄໍ ວາ ເມຖຸນໍ ວາ ສມາປຊ຺ຊຕິ, ເຕສໍ ວເສນ ກາເຣຕພ຺ໂພ. ນິປຊ຺ຊເນປິ ເອເສວ ນໂຍ. ວຸຕ຺ຕປ຺ປກາເຣ ປຸຣິເສ ນິປຊ຺ຊິຕ຺ວາ ອນິທ຺ທາຍນ຺ເຕ ອນນ຺ເຘ ວິຎ຺ຎຸປຸຣິເສ ອຸປຈາຣຄເຕ ສຕິ, ຐິຕສ຺ສ, ອຣໂຫເປກ຺ຂສ຺ສ, ອຎ຺ຎວິຫິຕສ຺ສ ຈ ນິສຊ຺ຊນປຈ຺ຈຍາ ອນາປຕ຺ຕິ. ອຸມ຺ມຕ຺ຕກາທີນໍ ປນ ຕີຫິປິ ອາປຕ຺ຕີຫິ ອນາປຕ຺ຕິ. ສິຍາ ສີລວິປຕ຺ຕິ, ສິຍາ ອາຈາຣວິປຕ຺ຕິ. ຍໍ ປນ ອາປຕ຺ຕິໍ ປຏິຊານາຕິ, ຕສ຺ສາ ວເສນ ອງ຺ຄເຠໂທ ຎາຕພ຺ໂພ. ສມຸຏ຺ຐານາທີນິ ປຐມປາຣາຊິກສທິສາເນວາຕິ.

ປຐມານິຍຕສິກ຺ຂາປທວຓ຺ຓນາ ນິຏ຺ຐິຕາ.

໒. ທຸຕິຍານິຍຕສິກ຺ຂາປທວຓ຺ຓນາ

ທຸຕິເຍ ອິຕ຺ຖີປິ ປຸຣິໂສປິ ໂຍ ໂກຈິ ວິຎ຺ຎູ ອນນ຺ໂຘ ອພຘິໂຣ ອນ຺ໂຕທ຺ວາທສຫຕ຺ເຖ ໂອກາເສ ຐິໂຕ ວາ ນິສິນ຺ໂນ ວາ ວິກ຺ຂິຕ຺ໂຕປິ ນິທ຺ທາຍນ຺ໂຕປິ ອນາປຕ຺ຕິໍ ກໂຣຕິ. ພຘິໂຣ ປນ ຈກ຺ຂຸມາປິ, ອນ຺ໂຘ ວາ ອພຘິໂຣປິ ນ ກໂຣຕິ. ປາຣາຊິກາປຕ຺ຕິຎ຺ຈ ປຣິຫາເປຕ຺ວາ ທຸຏ຺ຐຸລ຺ລວາຈາປຕ຺ຕິ ວຸຕ຺ຕາຕິ ອຍໍ ວິເສໂສ. ເສສໍ ປຸຣິມນເຍເນວ ເວທິຕພ຺ພໍ. ສມຸຏ຺ຐານາທີນິ ປເນຕ຺ຖ ອທິນ຺ນາທານສທິສາເນວາຕິ.

ທຸຕິຍານິຍຕສິກ຺ຂາປທວຓ຺ຓນາ ນິຏ຺ຐິຕາ.

ອຸທ຺ທິຏ຺ຐາ ໂຂຕິອາທິ ສພ຺ພຕ຺ຖ ວຸຕ຺ຕນເຍເນວ ເວທິຕພ຺ພໍ.

ກງ຺ຂາວິຕຣຓິຍາ ປາຕິໂມກ຺ຂວຓ຺ຓນາຍ

ອນິຍຕວຓ຺ຓນາ ນິຏ຺ຐິຕາ.