໕. ຈິຕ຺ຕາຄາຣວຄ຺ໂຄ

໑. ຣາຊາຄາຣສິກ຺ຂາປທວຓ຺ຓນາ

ຈິຕ຺ຕາຄາຣວຄ຺ຄສ຺ສ ປຐເມ ຣາຊາຄາຣນ຺ຕິ ຣຎ຺ໂຎ ກີຬນຆຣໍ. ຈິຕ຺ຕາຄາຣນ຺ຕິ ກີຬນຈິຕ຺ຕສາລໍ. ອາຣາມນ຺ຕິ ກີຬນອຸປວນໍ. ອຸຍ຺ຍານນ຺ຕິ ກີຬນຸຍ຺ຍານໍ. ໂປກ຺ຂຣຓິນ຺ຕິ ກີຬນໂປກ຺ຂຣຓິໍ. ທສ຺ສນາຍາຕິ ‘‘ເອເຕສຸ ຍໍກິຎ຺ຈິ ປສ຺ສິສ຺ສາມີ’’ຕິ ຄຈ຺ຉນ຺ຕິຍາ ປເທ ປເທ ທຸກ຺ກຏໍ, ຍຕ຺ຖ ຐຕ຺ວາ ປສ຺ສຕິ, ຕຕ຺ຖ ປທໍ ອນຸທ຺ຘຣິຕ຺ວາ ປຎ຺ຈາປິ ປສ຺ສນ຺ຕິຍາ ເອກາວ ອາປຕ຺ຕິ. ສເຈ ປນ ຕໍ ຕໍ ວິໂລເກຕ຺ວາ ປສ຺ສຕິ, ຄີວໍ ປຣິວຕ຺ຕນປ຺ປໂຍຄຄຓນາຍ ອາປຕ຺ຕິໂຍ, ນ ອຸມ຺ມີລນຄຓນາຍ.

ສາວຕ຺ຖິຍໍ ຉພ຺ພຄ຺ຄິຍາ ຠິກ຺ຂຸນິໂຍ ອາຣພ຺ຠ ຈິຕ຺ຕາຄາຣໍ ທສ຺ສນາຍ ຄມນວຕ຺ຖຸສ຺ມິໍ ປຎ຺ຎຕ຺ຕໍ, ຠິກ຺ຂຸສ຺ສ ສພ຺ພຕ຺ຖ ທຸກ຺ກຏໍ, ອວເສໂສ ວິນິຈ຺ຉໂຍ ນຈ຺ຈທສ຺ສນສິກ຺ຂາປເທ ວຸຕ຺ຕນເຍເນວ ເວທິຕພ຺ໂພຕິ.

ຣາຊາຄາຣສິກ຺ຂາປທວຓ຺ຓນາ ນິຏ຺ຐິຕາ.

໒. ອາສນ຺ທິປຣິຠຸຎ຺ຊນສິກ຺ຂາປທວຓ຺ຓນາ

ທຸຕິເຍ ອາສນ຺ທີ ນາມ ອຕິກ຺ກນ຺ຕປ຺ປມາຓາ ວຸຈ຺ຈຕິ. ປລ຺ລງ຺ໂກ ນາມ ສໍຫາຣິເມນ ວາເຬນ ກໂຕຕິ ວຸຕ຺ໂຕ. ປຣິຠຸຎ຺ເຊຍ຺ຍາຕິ ເອຕ຺ຖ ປນ ນິສີທນນິປຊ຺ຊນປ຺ປໂຍຄຄຓນາຍ ປາຈິຕ຺ຕິຍໍ ເວທິຕພ຺ພໍ.

ສາວຕ຺ຖິຍໍ ສມ຺ພຫຸລາ ຠິກ຺ຂຸນິໂຍ ອາຣພ຺ຠ ອາສນ຺ທິປລ຺ລງ຺ກປຣິໂຠຄວຕ຺ຖຸສ຺ມິໍ ປຎ຺ຎຕ຺ຕໍ, ອາສນ຺ທິຍາ ປາເທ ຉິນ຺ທິຕ຺ວາ, ປລ຺ລງ຺ກສ຺ສ ວາເຬ ຠິນ຺ທິຕ຺ວາ ປຣິຠຸຎ຺ຊນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອາສນ຺ທິປລ຺ລງ຺ກຕາ, ນິສີທນໍ ນິປຊ຺ຊນໍ ວາຕິ ອິມາເນຕ຺ຖ ທ຺ເວ ອງ຺ຄານິ. ສມຸຏ຺ຐານາທີນິ ເອຬກໂລມສທິສານີຕິ.

ອາສນ຺ທິປຣິຠຸຎ຺ຊນສິກ຺ຂາປທວຓ຺ຓນາ ນິຏ຺ຐິຕາ.

໓. ສຸຕ຺ຕກນ຺ຕນສິກ຺ຂາປທວຓ຺ຓນາ

ຕຕິເຍ ສຸຕ຺ຕນ຺ຕິ ຉນ຺ນໍ ອຎ຺ຎຕຣໍ. ກນ຺ເຕຍ຺ຍາຕິ ເອຕ຺ຖ ຍຕ຺ຕກໍ ຫຕ຺ເຖນ ອຎ຺ຉິຕໍ ໂຫຕິ, ຕສ຺ມິໍ ຕກ຺ກມ຺ຫິ ເວຐິເຕ ເອກາ ອາປຕ຺ຕິ. ອິທຎ຺ຫິ ສນ຺ຘາຍ ປທຠາຊນີເຍ (ປາຈິ. ໙໘໘) ‘‘ອຸຊ຺ຊວຸຊ຺ຊເວ’’ຕິ ວຸຕ຺ຕໍ.

ສາວຕ຺ຖິຍໍ ຉພ຺ພຄ຺ຄິຍາ ຠິກ຺ຂຸນິໂຍ ອາຣພ຺ຠ ສຸຕ຺ຕໍ ກນ຺ຕນວຕ຺ຖຸສ຺ມິໍ ປຎ຺ຎຕ຺ຕໍ, ກນ຺ຕນໂຕ ປຸພ຺ເພ ກປ຺ປາສວິຈິນນໍ ອາທິໍ ກຕ຺ວາ ສພ຺ພປ຺ປໂຍເຄສຸ ຫຕ຺ຖວາຣຄຓນາຍ ທຸກ຺ກຏໍ. ກນ຺ຕິຕສຸຕ຺ຕໍ ກນ຺ຕນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອກນ຺ຕິຕຕາ, ກນ຺ຕນນ຺ຕິ ອິມາເນຕ຺ຖ ທ຺ເວ ອງ຺ຄານິ. ສມຸຏ຺ຐານາທີນິ ເອຬກໂລມສທິສານີຕິ.

ສຸຕ຺ຕກນ຺ຕນສິກ຺ຂາປທວຓ຺ຓນາ ນິຏ຺ຐິຕາ.

໔. ຄິຫິເວຍ຺ຍາວຈ຺ຈສິກ຺ຂາປທວຓ຺ຓນາ

ຈຕຸຕ຺ເຖ ຄິຫິເວຍ຺ຍາວຈ຺ຈນ຺ຕິ ຄິຫີນໍ ເວຍ຺ຍາວຈ຺ຈໍ. ສເຈປິ ຫິ ມາຕາປິຕໂຣ ອຕ຺ຕໂນ ກິຎ຺ຈິ ກມ຺ມໍ ອກາຣາເປຕ຺ວາ ເຕສໍ ຍາຄຸປຈນາທີນິ ກໂຣນ຺ຕິ, ປຸພ຺ພປ຺ປໂຍເຄສຸ ປໂຍຄຄຓນາຍ ທຸກ຺ກຏານິ ອາປຊ຺ຊິຕ຺ວາ ຍາຄຸອາທີສຸ ຠາຊນຄຓນາຍ, ຂາທນີຍາທີສຸ ປູວຄຓນາຍ ປາຈິຕ຺ຕິຍໍ ອາປຊ຺ຊຕິ.

ສາວຕ຺ຖິຍໍ ສມ຺ພຫຸລາ ຠິກ຺ຂຸນິໂຍ ອາຣພ຺ຠ ຄິຫີນໍ ເວຍ຺ຍາວຈ຺ຈກຣຓວຕ຺ຖຸສ຺ມິໍ ປຎ຺ຎຕ຺ຕໍ, ມນຸສ຺ເສຫິ ສງ຺ຆສ຺ສ ຍາຄຸປາເນ ວາ ຠຕ຺ເຕ ວາ ເຈຕິຍປູຊາຍ ວາ ກຣີຍມານາຍ ເຕສໍ ສຫາຍຠາເວນ ຍາຄຸປຈນາທີນິ, ອຕ຺ຕໂນ ເວຍ຺ຍາວຈ຺ຈກຣສ຺ສ ຈ ຕານິເຍວ ກໂຣນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ຄິຫິເວຍ຺ຍາວຈ຺ຈກຣຓໍ, ອນຸຎ຺ຎາຕກາຣຓາຠາໂວຕິ ອິມາເນຕ຺ຖ ທ຺ເວ ອງ຺ຄານິ. ສມຸຏ຺ຐານາທີນິ ເອຬກໂລມສທິສາເນວາຕິ.

ຄິຫິເວຍ຺ຍາວຈ຺ຈສິກ຺ຂາປທວຓ຺ຓນາ ນິຏ຺ຐິຕາ.

໕. ອຘິກຣຓສິກ຺ຂາປທວຓ຺ຓນາ

ປຎ຺ຈເມ ອຘິກຣຓນ຺ຕິ ຈຕຸນ຺ນໍ ອຎ຺ຎຕຣໍ. ປາຈິຕ຺ຕິຍນ຺ຕິ ອິຘ ຈີວຣສິພ຺ພເນ ວິຍ ຘຸຣໍ ນິກ຺ຂິຕ຺ຕມຕ຺ເຕ ປາຈິຕ຺ຕິຍໍ, ເອກາຫມ຺ປິ ປຣິຫາໂຣ ນຕ຺ຖິ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ອຘິກຣຓໍ ນວູປສມນວຕ຺ຖຸສ຺ມິໍ ປຎ຺ຎຕ຺ຕໍ, ເສສເມຕ຺ຖ ຈີວຣສິພ຺ພນສິກ຺ຂາປເທ ວຸຕ຺ຕນເຍເນວ ເວທິຕພ຺ພນ຺ຕິ.

ອຘິກຣຓສິກ຺ຂາປທວຓ຺ຓນາ ນິຏ຺ຐິຕາ.

໖. ໂຠຊນທານສິກ຺ຂາປທວຓ຺ຓນາ

ຉຏ຺ເຐ ສຫຕ຺ຖາຕິ ກາເຍນ ວາ ກາຍປ຺ປຏິພທ຺ເຘນ ວາ ນິສ຺ສຄ຺ຄິເຍນ ວາ ຐເປຕ຺ວາ ປຎ຺ຈສຫຘມ຺ມິເກ ອວເສສານໍ ອຎ຺ຎຕ຺ຣ ອຸທກທນ຺ຕໂປນາ ຍໍກິຎ຺ຈິ ອຊ຺ໂຌຫຣຓີຍໍ ທທນ຺ຕິຍາ ປາຈິຕ຺ຕິຍໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ອຄາຣິກສ຺ສ ຂາທນີຍໂຠຊນີຍທານວຕ຺ຖຸສ຺ມິໍ ປຎ຺ຎຕ຺ຕໍ, ອຸທກທນ຺ຕໂປເນ ທຸກ຺ກຏໍ. ຍາ ປນ ທາເປຕິ ນ ເທຕິ, ອຸປນິກ຺ຂິປິຕ຺ວາ ເທຕິ, ພາຫິຣເລປໍ ເທຕິ, ຕສ຺ສາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອຎ຺ຎຕ຺ຣ ອຸທກທນ຺ຕໂປນາ ອຊ຺ໂຌຫຣຓິຍໍ, ຐເປຕ຺ວາ ປຎ຺ຈ ສຫຘມ຺ມິເກ ອຎ຺ຎສ຺ສ ສຫຕ຺ຖາ ທານນ຺ຕິ ອິມາເນຕ຺ຖ ທ຺ເວ ອງ຺ຄານິ. ສມຸຏ຺ຐານາທີນິ ເອຬກໂລມສທິສານີຕິ.

ໂຠຊນທານສິກ຺ຂາປທວຓ຺ຓນາ ນິຏ຺ຐິຕາ.

໗. ອາວສຖຈີວຣສິກ຺ຂາປທວຓ຺ຓນາ

ສຕ຺ຕເມ ອາວສຖຈີວຣນ຺ຕິ ‘‘ອຸຕຸນິໂຍ ຠິກ຺ຂຸນິໂຍ ປຣິຠຸຎ຺ຊນ຺ຕູ’’ຕິ ທິນ຺ນຈີວຣໍ. ອນິສ຺ສຊ຺ຊິຕ຺ວາຕິ ຈຕຸຕ຺ເຖ ທິວເສ ໂຘວິຕ຺ວາ ອຎ຺ຎິສ຺ສາ ອນ຺ຕມໂສ ສາມເຓຣິຍາປິ ອຸຕຸນິຍາ ອທຕ຺ວາ. ປາຈິຕ຺ຕິຍນ຺ຕິ ເອວໍ ອນິສ຺ສຊ຺ຊິຕ຺ວາ ປຣິຠຸຎ຺ຊນ຺ຕິຍາ ປາຈິຕ຺ຕິຍໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ອາວສຖຈີວຣໍ ອນິສ຺ສຊ຺ຊິຕ຺ວາ ປຣິຠຸຎ຺ຊນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ນິສ຺ສຊ຺ຊິເຕ ທ຺ວິກທຸກ຺ກຏໍ. ຕສ຺ມິໍ ປນ ນິສ຺ສຊ຺ຊິຕສຎ຺ຎາຍ, ປຸນ ປຣິຍາເຍນ ວາ, ອຎ຺ຎາສໍ ອຸຕຸນີນໍ ອຠາເວນ ວາ, ອຈ຺ຉິນ຺ນນຏ຺ຐຈີວຣິກາຍ ວາ, ອາປທາສຸ ວາ ປຣິຠຸຎ຺ຊນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອາວສຖຈີວຣຕາ, ຈຕຸຕ຺ຖທິວສຕາ, ໂຘວິຕ຺ວາ ອນິສ຺ສຊ຺ຊນໍ, ອນຸຎ຺ຎາຕກາຣຓາຠາໂວຕິ ອິມາເນຕ຺ຖ ຈຕ຺ຕາຣິ ອງ຺ຄານິ. ສມຸຏ຺ຐານາທີນິ ກຖິນສທິສານິ, ອິທໍ ປນ ກິຣິຍາກິຣິຍນ຺ຕິ.

ອາວສຖຈີວຣສິກ຺ຂາປທວຓ຺ຓນາ ນິຏ຺ຐິຕາ.

໘. ອາວສຖວິຫາຣສິກ຺ຂາປທວຓ຺ຓນາ

ອຏ຺ຐເມ ອາວສຖນ຺ຕິ ກວາຏພທ຺ຘວິຫາຣໍ. ອນິສ຺ສຊ຺ຊິຕ຺ວາຕິ ຣກ຺ຂຓຕ຺ຖາຍ ອທຕ຺ວາ, ‘‘ອິທໍ ຊຄ຺ເຄຍ຺ຍາສີ’’ຕິ ເອວໍ ອນາປຸຈ຺ຉິຕ຺ວາຕິ ອຕ຺ໂຖ. ຈາຣິກໍ ປກ຺ກເມຍ຺ຍ ປາຈິຕ຺ຕິຍນ຺ຕິ ເອຕ຺ຖ ສກຄາມໂຕ ອຎ຺ຎໍ ຄາມໍ ເອກຣຕ຺ຕິວາສຕ຺ຖາຍປິ ປກ຺ກມນ຺ຕິຍາ ປຣິກ຺ຂິຕ຺ຕສ຺ສ ອາວສຖສ຺ສ ປຣິກ຺ເຂປໍ, ອປຣິກ຺ຂິຕ຺ຕສ຺ສ ອຸປຈາຣໍ ປຐມປາເທນ ອຕິກ຺ກນ຺ຕມຕ຺ເຕ ທຸກ຺ກຏໍ, ທຸຕິເຍນ ປາຈິຕ຺ຕິຍໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ອາວສຖໍ ອນິສ຺ສຊ຺ຊິຕ຺ວາ ຈາຣິກໍ ປກ຺ກມນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ອກວາຏພທ຺ເຘ ທຸກ຺ກຏໍ, ນິສ຺ສຊ຺ຊິເຕ ທ຺ວິກທຸກ຺ກຏໍ. ຕສ຺ມິໍ ປນ ນິສ຺ສຊ຺ຊິຕສຎ຺ຎາຍ, ສຕິ ອນ຺ຕຣາເຍ, ປຏິຊຄ຺ຄິກໍ ປຣິເຍສິຕ຺ວາ ອລຠນ຺ຕິຍາ, ຄິລານາຍ, ອາປທາສຸ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ສກວາຏພທ຺ຘຕາ, ວຸຕ຺ຕນເຍນ ປກ຺ກມນໍ, ອນຸຎ຺ຎາຕກາຣຓາຠາໂວຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ກຖິນສທິສານີຕິ, ອິທໍ ປນ ກິຣິຍາກິຣິຍນ຺ຕິ.

ອາວສຖວິຫາຣສິກ຺ຂາປທວຓ຺ຓນາ ນິຏ຺ຐິຕາ.

໙. ຕິຣຈ຺ຉານວິຊ຺ຊາປຣິຍາປຸຓນສິກ຺ຂາປທວຓ຺ຓນາ

ນວເມ ຕິຣຈ຺ຉານວິຊ຺ຊນ຺ຕິ ຍໍກິຎ຺ຈິ ພາຫິຣກໍ ອນຕ຺ຖສໍຫິຕໍ ຫຕ຺ຖິອສ຺ສຣຖຘນຸຖຣຸສິປ຺ປອາຖພ຺ພຓຂິລນວສີກຣຓໂສສາປນມນ຺ຕາຄທປ຺ປໂຍຄາທິເຠທໍ ປຣູປຆາຕກຣໍ ວິຊ຺ຊໍ. ປຣິຍາປຸເຓຍ຺ຍາຕິ ເອຕ຺ຖ ຍສ຺ສ ກສ຺ສຈິ ສນ຺ຕິເກ ຕໍ ປທາທິວເສນ ປຣິຍາປຸຓນ຺ຕິຍາ ປທຄຓນາຍ ເຈວ ອກ຺ຂຣຄຓນາຍ ຈ ປາຈິຕ຺ຕິຍນ຺ຕິ.

ຕິຣຈ຺ຉານວິຊ຺ຊາປຣິຍາປຸຓນສິກ຺ຂາປທວຓ຺ຓນາ ນິຏ຺ຐິຕາ.

໑໐. ຕິຣຈ຺ຉານວິຊ຺ຊາວາຈນສິກ຺ຂາປທວຓ຺ຓນາ

ທສເມ ວາເຈຍ຺ຍາຕິ ປທໍ ວິເສໂສ. ອຸຠຍມ຺ປິ ສາວຕ຺ຖິຍໍ ຉພ຺ພຄ຺ຄິຍາ ເຈວ ສມ຺ພຫຸລາ ຠິກ຺ຂຸນິໂຍ ຈ ອາຣພ຺ຠ ຕິຣຈ຺ຉານວິຊ຺ຊໍ ປຣິຍາປຸຓນວາຈນວຕ຺ຖຸສ຺ມິໍ ປຎ຺ຎຕ຺ຕໍ. ເລເຂ, ຘາຣຓາຍ ຈ, ຄຸຕ຺ຕຕ຺ຖາຍ ຈ ຍກ຺ຂປຣິຕ຺ຕນາຄມຓ຺ຑລາທິເກ ສພ຺ພປຣິຕ຺ເຕ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ຕິຣຈ຺ຉານວິຊ຺ຊຕາ, ປຣິຍາປຸຓນວາຈນາ, ອນຸຎ຺ຎາຕກາຣຓາຠາໂວຕິ ອິມາເນຕ຺ຖ ທ຺ວີສຸປິ ຕີຓິ ອງ຺ຄານິ. ສມຸຏ຺ຐານາທີນິ ປທໂສຘມ຺ມສທິສານີຕິ.

ຕິຣຈ຺ຉານວິຊ຺ຊາວາຈນສິກ຺ຂາປທວຓ຺ຓນາ ນິຏ຺ຐິຕາ.

ຈິຕ຺ຕາຄາຣວຄ຺ໂຄ ປຎ຺ຈໂມ.