໑໐. ຈາຣິກນປກ຺ກມນສິກ຺ຂາປທວຓ຺ຓນາ

ທສເມ ວສ຺ສໍວຸຏ຺ຐາຕິ ປຸຣິມໍ ວາ ເຕມາສໍ, ປຈ຺ຉິມໍ ວາ ເຕມາສໍ ວຸຏ຺ຐາ. ຉປ຺ປຎ຺ຈໂຍຊນານີຕິ ເອຕ຺ຖ ປວາເຣຕ຺ວາ ປຎ຺ຈ ໂຍຊນານິ ຄນ຺ຕຸມ຺ປິ ວຏ຺ຏຕິ, ຉສຸ ວຕ຺ຕພ຺ພເມວ ນຕ຺ຖິ. ສເຈ ປນ ຕີຓິ ຄນ຺ຕ຺ວາ ເຕເນວ ມຄ຺ເຄນ ປຈ຺ຈາຄຈ຺ຉຕິ, ນ ວຏ຺ຏຕິ, ອຎ຺ເຎນ ອາຄນ຺ຕຸໍ ວຏ຺ຏຕິ. ‘‘ວຸຕ຺ຕປ຺ປມາຓໍ ອທ຺ຘານໍ ນ ຄຈ຺ຉິສ຺ສາມີ’’ຕິ ຘຸເຣ ນິກ຺ຂິຕ຺ຕມຕ຺ເຕ ປາຈິຕ຺ຕິຍໍ.

ຣາຊຄເຫ ສມ຺ພຫຸລາ ຠິກ຺ຂຸນິໂຍ ອາຣພ຺ຠ ວສ຺ສໍ ວສິຕ຺ວາ ຈາຣິກໍ ອປກ຺ກມນວຕ຺ຖຸສ຺ມິໍ ປຎ຺ຎຕ຺ຕໍ. ອນ຺ຕຣາເຍ ສຕິ, ປຣິເຍສິຕ຺ວາ ທຸຕິຍິກໍ ຠິກ຺ຂຸນິໍ ອລຠນ຺ຕິຍາ, ຄິລານາຍ, ອາປທາສຸ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ວສ຺ສໍວຸຏ຺ຐຕາ, ອນຸຎ຺ຎາຕກາຣຓາຠາໂວ, ປຎ຺ຈໂຍຊນານຕິກ຺ກໂມຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ປຐມປາຣາຊິກສທິສານິ, ອິທໍ ປນ ອກິຣິຍໍ, ທຸກ຺ຂເວທນນ຺ຕິ.

ຈາຣິກນປກ຺ກມນສິກ຺ຂາປທວຓ຺ຓນາ ນິຏ຺ຐິຕາ.

ຕຸວຏ຺ຏວຄ຺ໂຄ ຈຕຸຕ຺ໂຖ.