໕. ໂຠຊນປ຺ປຏິຄ຺ຄຫຓປຐມສິກ຺ຂາປທວຓ຺ຓນາ

ປຎ຺ຈເມ ອວສ຺ສຸຕາຕິ ຉນ຺ທຣາເຄນ ຕິນ຺ຕາ. ອວສ຺ສຸຕສ຺ສາຕິ ຕາທິສສ຺ເສວ. ຂາເທຍ຺ຍ ວາ ຠຸຎ຺ເຊຍ຺ຍ ວາຕິ ເອຕ຺ຖ ປຏິຄ຺ຄຫເຓ ຖຸລ຺ລຈ຺ຈຍໍ, ອຊ຺ໂຌຫາເຣ ອຊ຺ໂຌຫາເຣ ສງ຺ຆາທິເສໂສ.

ສາວຕ຺ຖິຍໍ ສຸນ຺ທຣີນນ຺ທໍ ອາຣພ຺ຠ ອວສ຺ສຸຕາຍ ອວສ຺ສຸຕສ຺ສ ຫຕ຺ຖໂຕ ອາມິສປ຺ປຏິຄ຺ຄຫຓວຕ຺ຖຸສ຺ມິໍ ປຎ຺ຎຕ຺ຕໍ, ເອກໂຕອວສ຺ສຸເຕ ປຏິຄ຺ຄຫເຓ ທຸກ຺ກຏໍ, ອຊ຺ໂຌຫາເຣ ອຊ຺ໂຌຫາເຣ ຖຸລ຺ລຈ຺ຈຍໍ, ຍກ຺ຂເປຕປຓ຺ຑກຕິຣຈ຺ຉານຄຕມນຸສ຺ສວິຄ຺ຄຫານໍ ຫຕ຺ຖໂຕ ອຸຠໂຕອວສ຺ສຸເຕປິ ສຕິ ເອເສວ ນໂຍ. ຕຕ຺ຖ ປນ ເອກໂຕອວສ຺ສຸເຕ ສຕິ ທຸກ຺ກຏໍ, ສພ຺ພຕ຺ຖ ອຸທກທນ຺ຕໂປນຄ຺ຄຫເຓປິ ປຣິໂຠເຄປິ ທຸກ຺ກຏເມວ. ອຸໂຠສຸ ອນວສ຺ສຸເຕສຸ, ‘‘ອນວສ຺ສຸໂຕ’’ຕິ ວາ ຎຕ຺ວາ ຄຓ຺ຫນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອຸທກທນ຺ຕໂປນໂຕ ອຎ຺ຎໍ ອຊ຺ໂຌຫຣຓີຍໍ, ອຸຠໂຕອວສ຺ສຸຕຕາ, ສຫຕ຺ຖາ ຄຫຓໍ, ອຊ຺ໂຌຫຣຓນ຺ຕິ ອິມາເນຕ຺ຖ ຈຕ຺ຕາຣິ ອງ຺ຄານິ. ສມຸຏ຺ຐານາທີນິ ປຐມປາຣາຊິກສທິສານີຕິ.

ໂຠຊນປ຺ປຏິຄ຺ຄຫຓປຐມສິກ຺ຂາປທວຓ຺ຓນາ ນິຏ຺ຐິຕາ.