໑. ອຸສ຺ສຍວາທິກາສິກ຺ຂາປທວຓ຺ຓນາ

ສງ຺ຆາທິເສເສສຸ ປຐເມ ອຸສ຺ສຍວາທິກາຕິ ມານຸສ຺ສຍວເສນ ໂກຘຸສ຺ສຍວເສນ ອຑ຺ຑກຣຓຕ຺ຖາຍ ວິນິຈ຺ຉຍມຫາມຕ຺ຕານໍ ສນ຺ຕິເກ ວິວທມານາ. ຄຫປຕິນາ ວາຕິອາທີຫິ ຐເປຕ຺ວາ ປຎ຺ຈ ສຫຘມ຺ມິເກ ອວເສສາ ຄຫຏ຺ຐປພ຺ພຊິຕາ ສງ຺ຄຫິຕາ. ອຍໍ ຠິກ຺ຂຸນີ ປຐມາປຕ຺ຕິກນ຺ຕິ ອາທິມ຺ຫິ ປຐມໍ ອາປຕ຺ຕິ ເອຕສ຺ສາຕິ ປຐມາປຕ຺ຕິໂກ, ວີຕິກ຺ກມກ຺ຂເຓເຍວ ອາປຊ຺ຊິຕພ຺ໂພຕິ ອຕ຺ໂຖ, ຕໍ ປຐມາປຕ຺ຕິກໍ. ອາປນ຺ນາຕິ ອຑ຺ຑປຣິໂຍສາເນ ອາປນ຺ນາ. ຠິກ຺ຂຸນິໍ ສງ຺ຆໂຕ ນິສ຺ສາເຣຕີຕິ ນິສ຺ສາຣຓີໂຍ, ຕໍ ນິສ຺ສາຣຓີຍໍ. ສງ຺ຆາທິເສສນ຺ຕິ ເອວໍນາມກໍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ອຸສ຺ສຍວາທິກວຕ຺ຖຸສ຺ມິໍ ປຎ຺ຎຕ຺ຕໍ, ສາຓຕ຺ຕິກໍ, ‘‘ອຑ຺ຑໍ ກຣິສ຺ສາມີ’’ຕິ ຍໍກິຎ຺ຈິ ທຸຕິຍິກໍ ວາ ສກ຺ຂິໍ ວາ ສຫາຍໍ ວາ ປຣິເຍສນ຺ຕິຍາ ປຣິເຍສເນ ທຸກ຺ກຏໍ, ຍຕ຺ຖ ຐິຕາຍ ‘‘ອຑ຺ຑໍ ກາຕຸໍ ຄຈ຺ຉາມີ’’ຕິ ຈິຕ຺ຕໍ ອຸປ຺ປຊ຺ຊຕິ, ຕໂຕ ປຏ຺ຐາຍ ຄຈ຺ຉນ຺ຕິຍາ ປເທ ປເທ ທຸກ຺ກຏໍ, ຍຕ຺ຖກຕ຺ຖຈິ ອນ຺ຕມໂສ ຠິກ຺ຂຸນຸປສ຺ສຍໍ ອາຄເຕປິ ໂວຫາຣິເກ ທິສ຺ວາ ອຕ຺ຕໂນ ກຖໍ ອາໂຣເຈນ຺ຕິຍາ ທຸກ຺ກຏໍ. ອິຕເຣນ ອຕ຺ຕໂນ ກຖາຍ ອາໂຣຈິຕາຍ ຠິກ຺ຂຸນິຍາ ຖຸລ຺ລຈ຺ຈຍໍ, ປຐມໍ ອິຕເຣນ ປຈ຺ຉາ ຠິກ຺ຂຸນິຍາ ອາໂຣຈເນປິ ເອເສວ ນໂຍ. ສເຈ ປນ ຠິກ຺ຂຸນີ ຕໍ ວທຕິ ‘‘ມມ ຈ ຕວ ຈ ກຖໍ ຕ຺ວໍເຍວ ອາໂຣເຈຫີ’’ຕິ, ໂສ ອຕ຺ຕໂນ ວາ ກຖໍ ປຐມໍ ອາໂຣເຈຕຸ, ຕສ຺ສາ ວາ, ປຐມາໂຣຈເນ ຠິກ຺ຂຸນິຍາ ທຸກ຺ກຏໍ, ທຸຕິເຍ ຖຸລ຺ລຈ຺ຈຍໍ, ເຕນ ເອວໍ ວຸຕ຺ຕາຍ ຠິກ຺ຂຸນິຍາ ອາໂຣຈເນປິ ເອເສວ ນໂຍ. ສເຈ ປນ ຠິກ຺ຂຸນີ ອຎ຺ເຎນ ກຖາເປຕິ, ຕຕ຺ຣາປິ ເອເສວ ນໂຍ. ຍຖາ ວາ ຕຖາ ວາ ຫິ ອາໂຣຈິຍມາເນ ປຐມາໂຣຈເນ ຠິກ຺ຂຸນິຍາ ທຸກ຺ກຏໍ, ທຸຕິເຍ ຖຸລ຺ລຈ຺ຈຍໍ. ອຸຠິນ຺ນໍ ປນ ກຖໍ ສຸຕ຺ວາ ໂວຫາຣິເກຫິ ວິນິຈ຺ຉເຍ ກເຕ ອຑ຺ຑປຣິໂຍສານໍ ນາມ ໂຫຕິ, ຕສ຺ມິໍ ອຑ຺ຑປຣິໂຍສາເນ ຠິກ຺ຂຸນິຍາ ຊເຍປິ ປຣາຊເຍປິ ສງ຺ຆາທິເສໂສ.

ຍາ ປນ ປຈ຺ຈຕ຺ຖິກມນຸສ຺ເສຫິ ທູຕໍ ວາ ປຫິຓິຕ຺ວາ, ສຍໍ ວາ ອາຄນ຺ຕ຺ວາ ‘‘ເອຫິ, ອຍ຺ເຍ’’ຕິ ອາກຑ຺ຒິຍມານາ ຄຈ຺ຉຕິ, ຍາ ວາ ອຸປສ຺ສເຍ ອຎ຺ເຎຫິ ກຕໍ ອນາຈາຣໍ ອໂນທິສ຺ສ ອາຈິກ຺ຂນ຺ຕີ ຣກ຺ຂໍ ຍາຈຕິ, ຍາຍ ຈ ກິຎ຺ຈິ ອວຸຕ຺ຕາ ໂວຫາຣິກາ ອຎ຺ຎໂຕ ສຸຕ຺ວາ ສຍເມວ ອຑ຺ຑໍ ປຣິໂຍສາເປນ຺ຕິ, ຕສ຺ສາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອຎ຺ເຎຫິ ອນາກຑ຺ຒິຕາຍ ອຑ຺ຑກຣຓໍ, ອຑ຺ຑປຣິໂຍສານນ຺ຕິ ອິມາເນຕ຺ຖ ທ຺ເວ ອງ຺ຄານິ. ສມຸຏ຺ຐານາທີນິ ປຐມກຖິນສທິສານິ, ອິທໍ ປນ ກິຣິຍເມວາຕິ.

ອຸສ຺ສຍວາທິກາສິກ຺ຂາປທວຓ຺ຓນາ ນິຏ຺ຐິຕາ.