ອສາຘາຣຓປາຣາຊິກໍ

໕. ອຸພ຺ຠຊາຓຸມຓ຺ຑລິກາສິກ຺ຂາປທວຓ຺ຓນາ

ອສາຘາຣເຓສຸ ປນ ຈຕຸນ຺ນໍ ຕາວ ປາຣາຊິການໍ ປຐເມ ອວສ຺ສຸຕາຕິ ກາຍສໍສຄ຺ຄຣາເຄນ ຕິນ຺ຕາ, ກິລິນ຺ນາຕິ ອຕ຺ໂຖ. ທຸຕິຍປເທປິ ເອເສວ ນໂຍ. ປຸຣິສປຸຄ຺ຄລສ຺ສາຕິ ກາຍສໍສຄ຺ຄໍ ສມາປຊ຺ຊິຕຸໍ ວິຎ຺ຎຸສ຺ສ ມນຸສ຺ສຊາຕິກສ຺ສ ປຸຣິສສງ຺ຂາຕສ຺ສ ປຸຄ຺ຄລສ຺ສ. ອຘກ຺ຂກນ຺ຕິ ອຕ຺ຕໂນ ອກ຺ຂການໍ ອໂຘ. ອຸພ຺ຠຊາຓຸມຓ຺ຑລນ຺ຕິ ຊາຓຸມຓ຺ຑລານໍ ອຸປຣິ, ເອຕ຺ຖ ຈ ອຸພ຺ຠກປ຺ປຣມ຺ປິ ອຸພ຺ຠຊາຓຸມຓ຺ຑເລເນວ ສງ຺ຄຫິຕໍ. ອາມສນນ຺ຕິ ອາມຊ຺ຊນໍ ຜຸຏ຺ໂຐກາສໍ ອນຕິກ຺ກມິຕ຺ວາ ຕຕ຺ເຖວ ສງ຺ຆຏ຺ຏນໍ. ປຣາມສນນ຺ຕິ ອິໂຕ ຈິໂຕ ຈ ສຎ຺ຈຣຓໍ. ຄຫຓນ຺ຕິ ຄຫິຕມຕ຺ຕໍ. ຉຸປນນ຺ຕິ ອສງ຺ຆຏ຺ເຏຕ຺ວາ ຜຸຏ຺ຐມຕ຺ຕໍ. ປຏິປີຬນນ຺ຕິ ອງ຺ເຄ ຄເຫຕ຺ວາ ນິປ຺ປີຬນໍ. ສາທິເຍຍ຺ຍາຕິ ຍາ ຠິກ຺ຂຸນີ ອຕ຺ຕໂນ ຍຖາປຣິຈ຺ຉິນ຺ເນ ກາເຍ ປຸຣິສສ຺ສ ເອຕໍ ອາມສນາທິໍ ສາທິຍຕິ, ສຍໍ ວາ ປນ ເຕນ ກາເຍນ ປຸຣິສສ຺ສ ຍໍກິຎ຺ຈິ ກາຍປ຺ປເທສໍ ສາທຍມານາ ຉຸປຕິ, ອຍໍ ອຸພ຺ຠຊາຓຸມຓ຺ຑລິກາ ນາມ ປາຣາຊິກາຕິ ອຍເມຕ຺ຖ ສງ຺ເຂໂປ.

‘‘ນິທານໍ ປຸຄ຺ຄລໍ ວຕ຺ຖຸ’’ນ຺ຕິອາທິເກ (ກງ຺ຂາ. ອຏ຺ຐ. ປຐມປາຣາຊິກວຓ຺ຓນາ) ເຕນ ວິຕ຺ຖາຣວິນິຈ຺ຉເຍ ຍສ຺ມາ ສພ຺ພາເນວ ອສາຘາຣຓປຎ຺ຎຕ຺ຕິໂຍ ໂຫນ຺ຕິ, ຕສ຺ມາ ອິໂຕ ປຏ຺ຐາຍ ສນ຺ຕິໍ ອນຸປຎ຺ຎຕ຺ຕິໍ ວຕ຺ວາ ສາຘາຣຓປຎ຺ຎຕ຺ຕີຕິ ວາ ອສາຘາຣຓປຎ຺ຎຕ຺ຕີຕິ ວາ ນ ວກ຺ຂາມ, ອາຓຕ຺ຕິຍໍ ຍຕ຺ຖ ອາຓຕ຺ຕິ ນຕ຺ຖິ, ຕຕ຺ຖ ກິຎ຺ຈິ ອວຕ຺ວາ ຍຕ຺ຖ ອຕ຺ຖິ, ຕຕ຺ເຖວ ວກ຺ຂາມ, ວິປຕ຺ຕິວິຈາຣຓາ ວຸຕ຺ຕາເຍວ.

ອວເສສໍ ປນ ສພ຺ພຕ຺ຖ ວຕ຺ຕພ຺ພໍ, ຕຍິທໍ ວຸຈ຺ຈຕິ, ອິທໍ ຕາວ ສິກ຺ຂາປທໍ ສາວຕ຺ຖິຍໍ ສຸນ຺ທຣີນນ຺ທໍ ອາຣພ຺ຠ ກາຍສໍສຄ຺ຄໍ ສມາປຊ຺ຊນວຕ຺ຖຸສ຺ມິໍ ປຎ຺ຎຕ຺ຕໍ, ເອກໂຕອວສ຺ສຸເຕ ຍຖາປຣິຈ຺ຉິນ຺ເນນ ກາເຍນ ປຸຣິສສ຺ສ ກາຍໍ, ອຸຠໂຕອວສ຺ສຸເຕປິ ກາເຍນ ກາຍປ຺ປຏິພທ຺ຘໍ, ຍຖາປຣິຈ຺ຉິນ຺ນກາຍປ຺ປຏິພທ຺ເຘນ ວາ ອວເສສກາເຍນ ວາ ຕສ຺ສ ກາຍໍ ອາມສນ຺ຕິຍາ ຖຸລ຺ລຈ຺ຈຍໍ, ຍກ຺ຂເປຕປຓ຺ຑກຕິຣຈ຺ຉານຄຕມນຸສ຺ສວິຄ຺ຄຫານໍ ອຸຠໂຕອວສ຺ສຸເຕ ຍຖາປຣິຈ຺ຉິນ຺ເນນ ກາເຍນ ກາຍໍ ອາມສນ຺ຕິຍາປິ ຖຸລ຺ລຈ຺ຈຍໍ, ສເຈ ປນ ປຸຣິສສ຺ສ ກາຍສໍສຄ຺ຄຣາໂຄ ນຕ຺ຖິ, ປາຣາຊິກກ຺ເຂຕ຺ເຕປິ ຖຸລ຺ລຈ຺ຈຍເມວ. ອວເສເສ ປນ ກາຍປ຺ປຏິພທ຺ເຘນ ກາຍປ຺ປຏິພທ຺ຘາທິເຠເທ, ເມຖຸນຣາຄເຄຫສິຕເປເມສຸ ຈ ສພ຺ພຕ຺ຖ ທຸກ຺ກຏໍ. ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕິຍາ, ອສາທິຍນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອງ຺ຄານິ ສມຸຏ຺ຐານາທີນິ ຈ ຠິກ຺ຂຸປາຕິໂມກ຺ເຂ ກາຍສໍສຄ຺ເຄ ວຸຕ຺ຕນເຍເນວ ເວທິຕພ຺ພານີຕິ.

ອຸພ຺ຠຊາຓຸມຓ຺ຑລິກາສິກ຺ຂາປທວຓ຺ຓນາ ນິຏ຺ຐິຕາ.

໖. ວຊ຺ຊປ຺ປຏິຈ຺ຉາທິກາສິກ຺ຂາປທວຓ຺ຓນາ

ທຸຕິເຍ ຄຓສ຺ສາຕິ ອຎ຺ຎາສໍ ຠິກ຺ຂຸນີນໍ. ຐິຕາຕິ ສລິງ຺ເຄ ຐິຕາ. ຈຸຕາຕິ ກາລງ຺ກຕາ. ນາສິຕາຕິ ລິງ຺ຄນາສນາຍ ສຍໍ ວາ ນຏ຺ຐາ, ອຎ຺ເຎຫິ ວາ ນາສິຕາ. ອວສ຺ສຏາຕິ ຕິຕ຺ຖາຍຕນໍ ສງ຺ກນ຺ຕາ. ປຸພ຺ເພວາຫໍ ອຍ຺ເຍ ອຎ຺ຎາສິນ຺ຕິ ອິທໍ ຕສ຺ສາ ວຈນກາລທສ຺ສນໍ, ສລິງ຺ເຄ ຐິຕາຍ ປນ ປາຣາຊິກຠາວໍ ຎຕ຺ວາ ‘‘ນ ທານິ ນໍ ກສ຺ສຈິ ອາໂຣເຈສ຺ສາມີ’’ຕິ ຘຸເຣ ນິກ຺ຂິຕ຺ຕມຕ຺ເຕເຍວ ອຍໍ ວຊ຺ຊປ຺ປຏິຈ຺ຉາທິກາ ນາມ ປາຣາຊິກາ ໂຫຕີຕິ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ເນວອຕ຺ຕນາປຏິໂຈທນາ ນຄຓສ຺ສ ອາໂຣຈນວຕ຺ຖຸສ຺ມິໍ ປຎ຺ຎຕ຺ຕໍ, ເສສເມຕ຺ຖ ສປ຺ປາຓກວຄ຺ຄມ຺ຫິ ທຸຏ຺ຐຸລ຺ລາປຕ຺ຕິປ຺ປຏິຈ຺ຉາທນສິກ຺ຂາປເທ ວຸຕ຺ຕນເຍເນວ ເວທິຕພ຺ພໍ. ຕຕ຺ຣ ຫິ ປາຈິຕ຺ຕິຍໍ, ອິຘ ປາຣາຊິກນ຺ຕິ ອຍເມວ ວິເສໂສ, ເສສໍ ຕາທິສເມວາຕິ.

ວຊ຺ຊປ຺ປຏິຈ຺ຉາທິກາສິກ຺ຂາປທວຓ຺ຓນາ ນິຏ຺ຐິຕາ.

໗. ອຸກ຺ຂິຕ຺ຕານຸວຕ຺ຕິກາສິກ຺ຂາປທວຓ຺ຓນາ

ຕຕິເຍ ອຸກ຺ຂິຕ຺ຕນ຺ຕິ ອາປຕ຺ຕິຍາ ອທສ຺ສນາທີສຸ ອຸກ຺ຂິຕ຺ຕໍ. ຘມ຺ເມນາຕິ ຠູເຕນ ວຕ຺ຖຸນາ. ວິນເຍນາຕິ ໂຈເທຕ຺ວາ ສາເຣຕ຺ວາ. ສຕ຺ຖຸສາສເນນາຕິ ອິຘາປິ ໂຈເທຕ຺ວາ ສາເຣຕ຺ວາ ກຣຓເມວ ສຕ຺ຖຸສາສນໍ ນາມ. ອນາທຣນ຺ຕິ ເຍນ ສງ຺ເຆນ ອຸກ຺ເຂປນິຍກມ຺ມໍ ກຕໍ, ຕສ຺ມິໍ ວາ, ຕຕ຺ຖ ປຣິຍາປນ຺ນຄເຓ ວາ ເອກປຸຄ຺ຄເລ ວາ ຕສ຺ມິໍ ວາ ກມ຺ເມ ອາທຣວິຣຫິຕໍ, ສມ຺ມາວຕ຺ຕນາຍ ອວຕ຺ຕມານນ຺ຕິ ອຕ຺ໂຖ. ອປ຺ປຏິກາຣນ຺ຕິ ປຏິກາຣຣຫິຕໍ, ອໂນສາຣິຕນ຺ຕິ ອຕ຺ໂຖ. ອກຕສຫາຍນ຺ຕິ ເອກກມ຺ມາທິເກ ສໍວາເສ ສຫ ອຍນຠາເວນ ສມານສໍວາສກາ ຠິກ຺ຂູ ສຫາຍາ ນາມ, ຍສ຺ສ ປນ ໂສ ສໍວາໂສ ເຕຫິ ສທ຺ຘິໍ ນຕ຺ຖິ ນ ເຕນ ເຕ ສຫາຍາ ກຕາ ໂຫນ຺ຕິ, ອິຕິ ໂສ ອກຕສຫາໂຍ ນາມ, ຕໍ ອກຕສຫາຍໍ, ສມານສໍວາສກຠາວໍ ອນຸປຄຕນ຺ຕິ ອຕ຺ໂຖ. ຕມນຸວຕ຺ເຕຍ຺ຍາຕິ ຕໍ ອຸກ຺ຂິຕ຺ຕກໍ ອຸກ຺ຂິຕ຺ຕກຠາເວເຍວ ຐິຕໍ ຠິກ຺ຂຸໍ ຍາ ຠິກ຺ຂຸນີ ຍໍທິຏ຺ຐິໂກ ໂສ ໂຫຕິ, ຕາຍ ທິຏ຺ຐິຍາ ຄຫຓຠາເວນ ອນຸວຕ຺ເຕຍ຺ຍ. ສາ ຠິກ຺ຂຸນີ ຠິກ຺ຂຸນີຫິ ສງ຺ຆເຠທສິກ຺ຂາປທາທີສຸ ວຸຕ຺ຕນເຍນ ວິສຸໍ ສງ຺ຆມຊ຺ເຌ ຈ ວຸຈ຺ຈມານາ ຕໍ ວຕ຺ຖຸໍ ອປ຺ປຏິນິສ຺ສຊ຺ຊນ຺ຕີ ສມນຸຠາສນກມ຺ມປຣິໂຍສາເນ ອຸກ຺ຂິຕ຺ຕານຸວຕ຺ຕິກາ ນາມ ປາຣາຊິກາ ໂຫຕີຕິ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ອຸກ຺ຂິຕ຺ຕານຸວຕ຺ຕນວຕ຺ຖຸສ຺ມິໍ ປຎ຺ຎຕ຺ຕໍ, ຎຕ຺ຕິຍາ ທຸກ຺ກຏໍ, ທ຺ວີຫິ ກມ຺ມວາຈາຫິ ທ຺ເວ ຖຸລ຺ລຈ຺ຈຍາ, ‘‘ຍສ຺ສາ ນກ຺ຂມຕິ, ສາ ຠາເສຍ຺ຍາ’’ຕິ ເອວໍ ຍ຺ຍ-ກາຣປ຺ປຕ຺ຕາຍ ຕຕິຍກມ຺ມວາຈາຍ ປາຣາຊິກໍ, ອຘມ຺ມກມ຺ເມ ຕິກທຸກ຺ກຏໍ, ເສສໍ ສງ຺ຆເຠທສິກ຺ຂາປທາທີສຸ ວຸຕ຺ຕນເຍເນວ ເວທິຕພ຺ພໍ.

ອຸກ຺ຂິຕ຺ຕານຸວຕ຺ຕິກາສິກ຺ຂາປທວຓ຺ຓນາ ນິຏ຺ຐິຕາ.

໘. ອຏ຺ຐວຕ຺ຖຸກາສິກ຺ຂາປທວຓ຺ຓນາ

ຈຕຸຕ຺ເຖ ອວສ຺ສຸຕາຕິ ໂລກສ຺ສາທມິຕ຺ຕສນ຺ຖວວເສນ ກາຍສໍສຄ຺ຄຣາເຄນ ຕິນ຺ຕາ. ອຍເມວ ຫິ ອຕ຺ໂຖ ສີຫຬມາຕິກາຏ຺ຐກຖາຍໍ ວຸຕ຺ໂຕ, ສມນ຺ຕປາສາທິກາຍໍ (ປາຈິ. ອຏ຺ຐ. ໖໗໕) ປນສ຺ສ ວິຈາຣຓາ ກຕາ, ທຸຕິຍປເທປິ ເອເສວ ນໂຍ. ປຸຣິສປຸຄ຺ຄລສ຺ສ ຫຕ຺ຖຄ຺ຄຫຓໍ ວາຕິອາທີສຸ ປນ ຍໍ ປຸຣິສປຸຄ຺ຄເລນ ຫຕ຺ເຖ ຄຫຓໍ ກຕໍ, ຕໍ ‘‘ປຸຣິສປຸຄ຺ຄລສ຺ສ ຫຕ຺ຖຄ຺ຄຫຓ’’ນ຺ຕິ ວຸຕ຺ຕໍ, ເອເສວ ນໂຍ ສງ຺ຆາຏິກຓ຺ຓຄ຺ຄຫເຓປິ. ຫຕ຺ຖຄ຺ຄຫຓນ຺ຕິ ເອຕ຺ຖ ຈ ຍສ຺ສ ກສ຺ສຈິ ອປາຣາຊິກກ຺ເຂຕ຺ຕຠູຕສ຺ສ ອງ຺ຄສ຺ສ ຄຫຓໍ ຫຕ຺ຖຄ຺ຄຫຓໍ, ຍສ຺ສ ກສ຺ສຈິ ນິວຕ຺ຖສ຺ສ ວາ ປາຣຸຕສ຺ສ ວາ ຄຫຓໍ ສງ຺ຆາຏິກຓ຺ຓຄ຺ຄຫຓໍ. ສນ຺ຕິຏ຺ເຐຍ຺ຍ ວາຕິອາທີສຸ ກາຍສໍສຄ຺ຄສງ຺ຂາຕສ຺ສ ອສທ຺ຘມ຺ມສ຺ສ ປຏິເສວນຕ຺ຖາຍ ປຸຣິສສ຺ສ ຫຕ຺ຖປາເສ ສນ຺ຕິຏ຺ເຐຍ຺ຍ ວາ, ຕຕ຺ຖ ຐິຕາ ສລ຺ລເປຍ຺ຍ ວາ, ປຸຣິເສນ ວາ ‘‘ອິຕ຺ຖນ຺ນາມໍ ຐານໍ ອາຄຈ຺ຉາ’’ຕິ ວຸຕ຺ຕາ ຕໍ ສງ຺ເກຕໍ ຄຈ຺ເຉຍ຺ຍ, ຕສ຺ສ ວາ ປຸຣິສສ຺ສ ອພ຺ຠາຄມນໍ ສາທິເຍຍ຺ຍ, ເຍນ ເກນຈິ ວາ ປຏິຈ຺ຉນ຺ນໍ ໂອກາສໍ ປວິເສຍ຺ຍ, ປຸຣິສສ຺ສ ຫຕ຺ຖປາເສ ຐຕ຺ວາ ກາຍໍ ອຸປສໍຫເຣຍ຺ຍາຕິ ເອວມຕ຺ໂຖ ທຏ຺ຐພ຺ໂພ. ອຍມ຺ປິ ປາຣາຊິກາຕິ ຍຖາ ປຸຣິມາໂຍ, ເອວໍ ອຍມ຺ປິ ຠິກ຺ຂຸນີ ເອຕສ຺ສ ກາຍສໍສຄ຺ຄສງ຺ຂາຕສ຺ສ ອສທ຺ຘມ຺ມສ຺ສ ປຏິເສວນຕ຺ຖາຍ ເອຕານິ ອຏ຺ຐ ວຕ຺ຖູນິ ປຏິປາຏິຍາ ວາ ອຸປ຺ປຏິປາຏິຍາ ວາ ປູເຣຕ຺ວາ ອຏ຺ຐວຕ຺ຖຸກາ ນາມ ປາຣາຊິກາ ໂຫຕີຕິ.

ສາວຕ຺ຖິຍໍ ຉພ຺ພຄ຺ຄິຍາ ຠິກ຺ຂຸນິໂຍ ອາຣພ຺ຠ ອຏ຺ຐມໍ ວຕ຺ຖຸໍ ປຣິປູຣຓວຕ຺ຖຸສ຺ມິໍ ປຎ຺ຎຕ຺ຕໍ, ສງ຺ເກຕຄມເນ ປເທ ປເທ ທຸກ຺ກຏໍ, ປຸຣິສສ຺ສ ຫຕ຺ຖປາສໍ ໂອກ຺ກນ຺ຕມຕ຺ເຕ ຖຸລ຺ລຈ຺ຈຍໍ, ປຸຣິສສ຺ສ ອພ຺ຠາຄມນສາທຍມາເນປິ ທຸກ຺ກຏໍ. ຫຕ຺ຖປາໂສກ຺ກມເນ ຖຸລ຺ລຈ຺ຈຍໍ, ເສເສສຸ ເອເກກສ຺ມິໍ ຖຸລ຺ລຈ຺ຈຍເມວ, ອຏ຺ຐເມ ປຣິປຸຓ຺ເຓ ປາຣາຊິກໍ. ເອເກກສ຺ມິໍ ປນ ວຕ຺ຖຸສ຺ມິໍ ສຕກ຺ຂຕ຺ຕຸມ຺ປິ ວີຕິກ຺ກນ຺ເຕ ຕາ ອາປຕ຺ຕິໂຍ ເທເສຕ຺ວາ ມຸຈ຺ຈຕິ, ອປິເຈຕ຺ຖ ຄຓນູປິກາ ອາປຕ຺ຕິ ເວທິຕພ຺ພາ, ‘‘ອິທານິ ນາປຊ຺ຊິສ຺ສາມີ’’ຕິ ຫິ ຘຸຣນິກ຺ເຂປໍ ກຕ຺ວາ ເທສິຕາ ຄຓນູປິກາ, ເທສິຕຄຓນໍ ອຸເປຕິ, ປາຣາຊິກສ຺ສ ອງ຺ຄໍ ນ ໂຫຕິ. ຕສ຺ມາ ຍາ ເອກໍ ອາປນ຺ນາ ຘຸຣນິກ຺ເຂປໍ ກຕ຺ວາ ເທເສຕ຺ວາ ປຸນ ກິເລສວເສນ ອາປຊ຺ຊຕິ, ປຸນປິ ເທເສຕິ, ເອວໍ ອຏ຺ຐມໍ ປຣິປູເຣນ຺ຕີປິ ປາຣາຊິກາ ນ ໂຫຕິ. ຍາ ປນ ອາປຊ຺ຊິຕ຺ວາ ‘‘ປຸນປິ ອຎ຺ຎໍ ວຕ຺ຖຸໍ ອາປຊ຺ຊິສ຺ສາມີ’’ຕິ ສອຸສ຺ສາຫາວ ເທເສຕິ, ຕສ຺ສາ ສາ ອາປຕ຺ຕິ ອຄຓນູປິກາ, ເທສິຕາປິ ອເທສິຕາ ໂຫຕິ, ປາຣາຊິກສ຺ສ ອງ຺ຄໍ ໂຫຕິ. ອສຎ຺ຈິຈ຺ຈ, ອສ຺ສຕິຍາ, ອຊານນ຺ຕິຍາ ອສາທິຍນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ກາຍສໍສຄ຺ຄຣາໂຄ, ສອຸສ຺ສາຫຕາ, ອຏ຺ຐມສ຺ສ ວຕ຺ຖຸສ຺ສ ປູຣຓນ຺ຕິ ອິມາເນຕ຺ຖ ຕີຓິ ອງ຺ຄານິ. ສມນຸຠາສນສມຸຏ຺ຐານໍ, ກິຣິຍາກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ທ຺ວິເວທນນ຺ຕິ.

ອຏ຺ຐວຕ຺ຖຸກາສິກ຺ຂາປທວຓ຺ຓນາ ນິຏ຺ຐິຕາ.

ອຸທ຺ທິຏ຺ຐາ ໂຂ ອຍ຺ຍາໂຍ ອຏ຺ຐ ປາຣາຊິກາ ຘມ຺ມາຕິ ຠິກ຺ຂູ ອາຣພ຺ຠ ປຎ຺ຎຕ຺ຕາ ສາຘາຣຓາ ຈຕ຺ຕາໂຣ, ອິເມ ຈຕ຺ຕາໂຣຕິ ເອວໍ ປາຕິໂມກ຺ຂຸທ຺ເທສມຄ຺ເຄນ ອຏ຺ຐ ປາຣາຊິກາ ຘມ຺ມາ ອຸທ຺ທິຏ຺ຐາຕິ ເອວເມຕ຺ຖ ອຕ຺ໂຖ ເວທິຕພ຺ໂພ, ເສສໍ ຠິກ຺ຂຸປາຕິໂມກ຺ຂວຓ຺ຓນາຍໍ ວຸຕ຺ຕນຍເມວາຕິ.

ກງ຺ຂາວິຕຣຓິຍາ ປາຕິໂມກ຺ຂວຓ຺ຓນາຍ

ຠິກ຺ຂຸນິປາຕິໂມກ຺ເຂ

ປາຣາຊິກວຓ຺ຓນາ ນິຏ຺ຐິຕາ.