໗. ຊາລິຍສຸຕ຺ຕວຓ຺ຓນາ

ທ຺ເວປພ຺ພຊິຕວຕ຺ຖຸວຓ຺ຓນາ

໓໗໘. ‘‘ໂຆສິເຕນ ເສຏ຺ຐິນາ ກເຕ ອາຣາເມ’’ຕິ ວຕ຺ວາ ຕຕ຺ຖ ໂກຍໍ ໂຆສິຕເສຏ຺ຐິ ນາມ, ກຖຎ຺ຈາເນນ ອາຣາໂມ ກາຣິໂຕ, ກຖໍ ວາ ຕຕ຺ຖ ຠຄວາ ວິຫາສີຕິ ຕໍ ສພ຺ພໍ ສມຸທາຄມໂຕ ປຏ຺ຐາຍ ສງ຺ເຂປໂຕວ ທສ຺ເສຕຸໍ ‘‘ປຸພ຺ເພ ກິຣາ’’ຕິອາທິ ວຸຕ຺ຕໍ. ຕໂຕຕິ ອລ຺ລກປ຺ປຣຏ຺ຐໂຕ. ຕທາຕິ ເຕສໍ ຕໍ ຄາມໍ ປວິຏ຺ຐທິວເສ. ພລວປາຍາສນ຺ຕິ ຄຣຸຕຣໍ ພຫຸປາຍາສໍ. ອສນ຺ນິຫິເຕຕິ ເຄຫໂຕ ພຫິ ຄເຕ. ຠຸສ຺ສຕີຕິ ຣວຕິ. ໂຆສກເທວປຸຕ຺ໂຕຕ຺ເວວ ນາມໍ ອໂຫສິ ສຣໂຆສສມ຺ປຕ຺ຕິຍາ. ເວຍ຺ຍຕ຺ຕິເຍນາຕິ ປຎ຺ຎາເວຍ຺ຍຕ຺ຕິເຍນ. ໂຆສິຕເສຏ຺ຐິ ນາມ ຊາໂຕ ຕາຍ ເອວ ຈສ຺ສ ສຣສມ຺ປຕ຺ຕິຍາ ໂຆສິຕນາມຕາ.

ສຣີຣສນ຺ຕປ຺ປນຕ຺ຖນ຺ຕິ ຫິມວນ຺ເຕ ຜລມູລາຫາຣຕາຍ ກິລນ຺ຕສຣີຣາ ໂລຓມ຺ພິລເສວເນນ ຕສ຺ສ ສນ຺ຕປ຺ປນຕ຺ຖໍ ປີນນຕ຺ຖໍ. ຕສິຕາຕິ ປິປາສິຕາ. ກິລນ຺ຕາຕິ ປຣິສ຺ສນ຺ຕກາຍາ. ເຕ ກິຣ ຕໍ ວຏຣຸກ຺ຂໍ ປຕ຺ວາ ຕສ຺ສ ໂສຠາສມ຺ປຕ຺ຕິໍ ທິສ຺ວາ ມຫານຸຠາວາ ມຎ຺ເຎ ເອຕ຺ຖ ອຘິວຕ຺ຖາ ເທວຕາ, ‘‘ສາຘຸ ວຕາຍໍ ເທວຕາ ອມ຺ຫາກໍ ອທ຺ຘານປຣິສ຺ສມໍ ວິໂນເທຍ຺ຍາ’’ຕິ ຈິນ຺ເຕສຸໍ, ເຕນ ວຸຕ຺ຕໍ ‘‘ຕຕ຺ຖ ອຘິວຕ຺ຖາ…ເປ… ນິສີທິໍສູ’’ຕິ. ໂສຕິ ອນາຖປິຓ຺ຑິໂກ ຄຫປຕິ. ຠຕການນ຺ຕິ ຠຕິຍາ ເວຍ຺ຍາວຈ຺ຈໍ ກໂຣນ຺ຕານໍ ທາສເປສກມ຺ມກຣານໍ. ປກຕິຠຕ຺ຕເວຕນນ຺ຕິ ປກຕິຍາ ທາຕພ຺ພຠຕ຺ຕເວຕນໍ, ຕທາ ອຸໂປສຖິກຕ຺ຕາ ກມ຺ມໍ ອກໂຣນ຺ຕານມ຺ປິ ກມ຺ມກຣຓທິວເສນ ທາຕພ຺ພຠຕ຺ຕເວຕນເມວາຕິ ອຕ຺ໂຖ. ກຎ຺ຈີຕິ ກຎ຺ຈິປິ ຠຕກໍ.

ອຸເປຈ຺ຈ ປຣສ຺ສ ວາຈາຍ ອາຣມ຺ຠນໍ ພາຘນໍ ອຸປາຣມ຺ໂຠ, ໂທສທສ຺ສນວເສນ ຆຏ຺ຏນນ຺ຕິ ອຕ຺ໂຖ, ເຕນາຫ ‘‘ອຸປາຣມ຺ຠາຘິປ຺ປາເຍນ ວາທໍ ອາໂຣເປຕຸກາມາ ຫຸຕ຺ວາ’’ຕິ. ວທນ຺ຕິ ນິນ຺ທນວເສນ ກເຖນ຺ຕິ ເອເຕນາຕິ ຫິ ວາໂທ, ໂທໂສ. ຕໍ ອາໂຣເປຕຸກາມາ, ປຕິຏ຺ຐາເປຕຸກາມາ ຫຸຕ຺ວາຕິ ອຕ຺ໂຖ. ‘‘ຕໍ ຊີວໍ ຕໍ ສຣີຣ’’ນ຺ຕິ, ອິຘ ຍໍ ວຕ຺ຖຸໍ ຊີວສຎ຺ຎິຕໍ, ຕເທວ ສຣີຣສຎ຺ຎິຕນ຺ຕິ ‘‘ຣູປໍ ອຕ຺ຕໂຕ ສມນຸປສ຺ສຕີ’’ຕິ ວາທໍ ຄເຫຕ຺ວາ ວທນ຺ຕິ. ຣູປຎ຺ຈ ອຕ຺ຕານຎ຺ຈ ອທ຺ວຍໍ ກຕ຺ວາ ສມນຸປສ຺ສນວເສນ ‘‘ສຕ຺ໂຕ’’ຕິ ວາ ພາຫິຣກປຣິກປ຺ປິຕໍ ອຕ຺ຕານໍ ສນ຺ຘາຍ ວທນ຺ຕິ. ຠິຊ຺ຊຕີຕິ ນິຣຸທຍວິນາສວເສນ ວິນສ຺ສຕິ. ເຕນ ຊີວສຣີຣານໍ ອນຎ຺ຎຕ຺ຕານຸຊານນໂຕ, ສຣີຣສ຺ສ ຈ ເຠທທສ຺ສນໂຕ. ນ ເຫຕ຺ຖ ຍຖາ ເຠທວຕາ ສຣີຣໂຕ ອນຎ຺ຎຕ຺ຕາ ອທິຏ຺ໂຐປິ ຊີວສ຺ສ ເຠໂທ ວຸຕ຺ໂຕ, ເອວໍ ອທິຏ຺ຐເຠທໂຕ ອນຎ຺ຎຕ຺ຕາ ສຣີຣສ຺ສາປິ ອເຠໂທຕິ ສກ຺ກາ ວິຎ຺ຎາຕຸໍ ຕສ຺ສ ເຠທສ຺ສ ປຈ຺ຈກ຺ຂສິທ຺ຘຕ຺ຕາ, ຠູຕຸປາທາຍຣູປວິນິມຸຕ຺ຕສ຺ສ ຈ ສຣີຣສ຺ສ ອຠາວໂຕຕິ ອາຫ ‘‘ອຸຈ຺ເຉທວາໂທ ໂຫຕີ’’ຕິ.

‘‘ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ ອຎ຺ຎເທວ ວຕ຺ຖຸໍ ຊີວສຎ຺ຎິຕໍ, ອຎ຺ຎໍ ວຕ຺ຖຸໍ ສຣີຣສຎ຺ຎິຕນ຺ຕິ ‘‘ຣູປວນ຺ຕໍ ອຕ຺ຕານໍ ສມນຸປສ຺ສຕີ’’ຕິອາທິນຍປ຺ປວຕ຺ຕໍ ວາທໍ ຄເຫຕ຺ວາ ວທນ຺ຕິ. ຣູເປ ເຠທສ຺ສ ທິຏ຺ຐຕ຺ຕາ, ອຕ຺ຕນິ ຈ ຕທຠາວໂຕ ອຕ຺ຕາ ນິຈ຺ໂຈຕິ ອາປນ຺ນເມວາຕິ ອາຫ ‘‘ຕຸມ຺ຫາກໍ…ເປ… ອາປຊ຺ຊຕີ’’ຕິ.

໓໗໙-໓໘໐. ຕຍິທໍ ເນສໍ ວຎ຺ຌາສຸຕສ຺ສ ທີຆຣສ຺ສຕາປຣິກປ຺ປນສທິສນ຺ຕິ ກຕ຺ວາ ຐປນີໂຍຍໍ ປຎ຺ໂຫຕິ ຕຕ຺ຖ ຣາຊນິມີລນໍ ກຕ຺ວາ ສຕ຺ຖາ ອຸປຣິ ເນສໍ ‘‘ເຕນ ຫາວຸໂສ ສຸຓາຖາ’’ຕິອາທິນາ ຘມ຺ມເທສນໍ ອາຣຠີຕິ ອາຫ ‘‘ອຖ ຠຄວາ’’ຕິອາທິ. ຕສ຺ສາ ເຍວາຕິ ມຊ຺ຌິມາຍ ປຏິປທາຍ.

ສທ຺ຘາປພ຺ພຊິຕສ຺ສາຕິ ສທ຺ຘາຍ ປພ຺ພຊິຕສ຺ສ ‘‘ເອວມຫໍ ອິໂຕ ວຏ຺ຏທຸກ຺ຂໂຕ ນິສ຺ສຣິສ຺ສາມີ’’ຕິ ເອວໍ ປພ຺ພຊ຺ຊໍ ອຸປຄຕສ຺ສ ຕທນຸຣູປຎ຺ຈ ສີລໍ ປູເຣຕ຺ວາ ປຐມຊ຺ຌາເນນ ສມາຫິຕຈິຕ຺ຕສ຺ສ. ເອຕໍ ວຕ຺ຕຸນ຺ຕິ ເອຕໍ ກິເລສວຏ຺ຏປຣິພຸທ຺ຘິທີປນໍ ‘‘ຕໍ ຊີວໍ ຕໍ ສຣີຣ’’ນ຺ຕິອາທິກໍ ທິຏ຺ຐິສໍກິເລສນິສ຺ສິຕໍ ວຈນໍ ວຕ຺ຕຸນ຺ຕິ ອຕ຺ໂຖ. ນິພ຺ພິຈິກິຈ຺ໂຉ ນ ໂຫຕີຕິ ຘມ຺ເມສຸ ຕິຓ຺ຓວິຈິກິຈ຺ໂຉ ນ ໂຫຕິ, ຕຕ຺ຖ ຕຕ຺ຖ ອາສປ຺ປນປຣິສປ຺ປນວເສນ ປວຕ຺ຕຕີຕິ ອຕ຺ໂຖ.

ເອຕເມວໍ ຊານາມີຕິ ເຍນ ໂສ ຠິກ຺ຂຸ ປຐມໍ ຌານໍ ອຸປສມ຺ປຊ຺ຊ ວິຫຣຕິ, ເອຕໍ ສສມ຺ປຍຸຕ຺ຕຘມ຺ມໍ ຈິຕ຺ຕນ຺ຕິ ເອວໍ ຊານາມິ. ໂນ ຈ ເອວໍ ວທາມີຕິ ຍຖາ ທິຏ຺ຐິຄຕິກາ ຕໍ ຘມ຺ມຊາຕໍ ສນິສ຺ສຍໍ ອເຠທໂຕ ຄຓ຺ຫນ຺ຕາ ‘‘ຕໍ ຊີວໍ ຕໍ ສຣີຣ’’ນ຺ຕິ ວາ ຕທຸຠຍໍ ເຠທໂຕ ຄຓ຺ຫນ຺ຕາ ‘‘ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ ວາ ອຕ຺ຕໂນ ມິຈ຺ຉາຄາຫໍ ປເວເທນ຺ຕິ, ອຫໍ ປນ ນ ເອວໍ ວທາມິ ຕສ຺ສ ຘມ຺ມສ຺ສ ສຸປຣິຎ຺ຎາຕຕ຺ຕາ, ເຕນາຫ ‘‘ອຖ ໂຂ’’ຕິອາທິ. ພາຫິຣກາ ເຍຠຸຍ຺ເຍນ ກສິຓຊ຺ຌານານິ ເອວ ນິພ຺ພຕ຺ເຕນ຺ຕີຕິ ອາຫ ‘‘ກສິຓປຣິກມ຺ມໍ ຠາວນ຺ເຕສ຺ສາ’’ຕິ. ຍສ຺ມາ ຠາວນານຸຠາເວນ ຌານາຘິຄໂມ, ຠາວນາ ຈ ປຖວີກສິຓາທິສຎ຺ຊານນມຸເຂນ ໂຫຕີຕິ ສຎ຺ຎາສີເສນ ນິທ຺ທິສີຍຕິ, ຕສ຺ມາ ອາຫ ‘‘ສຎ຺ຎາພເລນ ອຸປ຺ປນ຺ນ’’ນ຺ຕິ. ເຕນາຫ – ‘‘ປຖວີກສິຓເມໂກ ສຎ຺ຊານາຕີ’’ຕິອາທິ. ‘‘ນ ກລ຺ລໍ ຕສ຺ເສຕ’’ນ຺ຕິ ອິທໍ ຍສ຺ມາ ຠຄວຕາ ຕຕ຺ຖ ຕຕ຺ຖ ‘‘ອຖ ຈ ປນາຫໍ ນ ວທາມີ’’ຕິ ວຸຕ຺ຕໍ, ຕສ຺ມາ ນ ວຕ຺ຕພ຺ພໍ ກິເຣຕໍ ເກວລິນາ ອຸຕ຺ຕມປຸຣິເສນາຕິ ອຘິປ຺ປາເຍນາຫ, ເຕນ ວຸຕ຺ຕໍ ‘‘ມຎ຺ຎມານາ ວທນ຺ຕີ’’ຕິ. ເສສໍ ສພ຺ພຕ຺ຖ ສຸວິຎ຺ເຎຍ຺ຍເມວ.

ຊາລິຍສຸຕ຺ຕວຓ຺ຓນາຍ ລີນຕ຺ຖປ຺ປກາສນາ.