ຕິປຸກ຺ຂລນຍວຓ຺ຓນາ

ອາຆາຕາທີນໍ ອກຣຓວຈເນນ ອໂທສສິທ຺ຘິ, ຕຖາ ປາຓາຕິປາຕຜຣຸສວາຈາຫິ ປຏິວິຣຕິວຈເນນ. ອານນ຺ທາທີນໍ ອກຣຓວຈເນນ ອໂລຠສິທ຺ຘິ, ຕຖາ ອພ຺ຣຫ຺ມຈຣິຍໂຕ ປຏິວິຣຕິວຈເນນ. ອທິນ຺ນາທານາທີຫິ ປນ ປຏິວິຣຕິວຈເນນ ອຸຠຍສິທ຺ຘິ. ‘‘ຕຍິທໍ ຠິກ຺ຂເວ ຕຖາຄໂຕ ປຊານາຕີ’’ຕິອາທິນາ ອໂມຫສິທ຺ຘິ. ອິຕິ ຕີຫິ ອກຸສລມູເລຫິ ຄຫິເຕຫິ ຕປ຺ປຏິປກ຺ຂໂຕ, ອາຆາຕາທິອກຣຓວຈເນນ ຈ ຕີຓິ ກຸສລມູລານິ ສິທ຺ຘານິເຍວ ໂຫນ຺ຕິ. ຕຕ຺ຖ ຕີຫິ ອກຸສລມູເລຫິ ຕິວິຘທຸຈ຺ຈຣິຕສໍກິເລສມລວິສມາກຸສລສຎ຺ຎາວິຕກ຺ກາສທ຺ຘມ຺ມາທິວເສນ ສພ຺ໂພ ອກຸສລປກ຺ໂຂ ວິຕ຺ຖາເຣຕພ຺ໂພ. ຕຖາ ຕີຫິ ກຸສລມູເລຫິ ຕິວິຘສຸຈຣິຕໂວທານສມກຸສລສຎ຺ຎາວິຕກ຺ກປຎ຺ຎາສທ຺ຘມ຺ມສມາຘິ- ວິໂມກ຺ຂມຸຂວິໂມກ຺ຂາທິວເສນ ສພ຺ໂພ ກຸສລປກ຺ໂຂ ວິຠາເວຕພ຺ໂພ. ເອຕ຺ຖາປິ ຈ ສຈ຺ຈໂຍຊນາ ເວທິຕພ຺ພາ. ກຖໍ? ໂລໂຠ ສພ຺ພານິ ວາ ກຸສລາກຸສລມູລານິ ສມຸທຍສຈ຺ຈໍ, ເຕຫິ ປນ ນິພ຺ພຕ຺ຕາ ເຕສໍ ອຘິຏ຺ຐານໂຄຈຣຠູຕາ ອຸປາທານກ຺ຂນ຺ຘາ ທຸກ຺ຂສຈ຺ຈນ຺ຕິອາທິນາ ນເຍນ ສຈ຺ຈໂຍຊນາ ເວທິຕພ຺ພາຕິ ອຍໍ ຕິປຸກ຺ຂລສ຺ສ ນຍສ຺ສ ຠູມິ.