ສີຫວິກ຺ກີຬິຕນຍວວຓ຺ຓນາ

ອາຆາຕານນ຺ທນາທີນໍ ອກຣຓວຈເນນ ສຕິສິທ຺ຘິ. ສຕິຍາ ຫິ ສາວຊ຺ຊານວຊ຺ເຊ, ຕຕ຺ຖ ຈ ອາທີນວານິສໍເສ ສລ຺ລກ຺ເຂຕ຺ວາ ສາວຊ຺ຊໍ ປຫາຍ ອນວຊ຺ຊໍ ສມາທາຍ ວຕ຺ຕຕີຕິ. ຕຖາ ມິຈ຺ຉາຊີວາ ປຏິວິຣຕິວຈເນນ ວີຣິຍສິທ຺ຘິ. ວີຣິເຍນ ຫິ ກາມພ຺ຍາປາທວິຫິໍສາວິຕກ຺ເກ ວິໂນເທຕິ, ວີຣິຍສາຘນຎ຺ຈ ອາຊີວປາຣິສຸທ຺ຘິສີລນ຺ຕິ. ປາຓາຕິປາຕາທີຫິ ປຏິວິຣຕິວຈເນນ ສຕິສິທ຺ຘິ. ສຕິຍາ ຫິ ສາວຊ຺ຊານວຊ຺ເຊ, ຕຕ຺ຖ ຈ ອາທີນວານິສໍເສ ສລ຺ລກ຺ເຂຕ຺ວາ ສາວຊ຺ຊໍ ປຫາຍ ອນວຊ຺ຊໍ ສມາທາຍ ວຕ຺ຕຕິ. ຕຖາ ຫິ ສາ ‘‘ວິສຍາຠິມຸຂຠາວປຈ຺ຈຸປຏ຺ຐານາ’’ຕິ ຈ ວຸຈ຺ຈຕິ. ‘‘ຕຍິທໍ ຠິກ຺ຂເວ ຕຖາຄໂຕ ປຊານາຕີ’’ຕິອາທິນາ ສມາຘິປຎ຺ຎາສິທ຺ຘິ. ປຎ຺ຎາຍ ຫິ ຍຖາຠູຕາວໂພໂຘ, ສມາຫິໂຕ ຈ ຍຖາຠູຕໍ ປຊານາຕີຕິ. ຕຖາ ‘‘ນິຈ຺ໂຈ ຘຸໂວ’’ຕິອາທິນາ ອນິຈ຺ເຈ ‘‘ນິຈ຺ຈ’’ນ຺ຕິ ວິປລ຺ລາໂສ, ‘‘ອໂຣໂຄ ປຣໍ ມຣຓາ, ເອກນ຺ຕສຸຂີ ອຕ຺ຕາ ທິຏ຺ຐຘມ຺ມນິພ຺ພານປ຺ປຕ຺ໂຕ’’ຕິ ຈ ເອວມາທີຫິ ອສຸເຂ ‘‘ສຸຂ’’ນ຺ຕິ ວິປລ຺ລາໂສ, ‘‘ປຎ຺ຈຫິ ກາມຄຸເຓຫິ ສມປ຺ປິໂຕ’’ຕິອາທິນາ ອສຸເຠ ‘‘ສຸຠ’’ນ຺ຕິ ວິປລ຺ລາໂສ, ສພ຺ເພເຫວ ຈ ທິຏ຺ຐິທີປກປເທຫິ ອນຕ຺ຕນິ ‘‘ອຕ຺ຕາ’’ຕິ ວິປລ຺ລາໂສຕິ ເອວເມຕ຺ຖ ຈຕ຺ຕາໂຣ ວິປລ຺ລາສາ ສິທ຺ຘາ ໂຫນ຺ຕິ, ເຕສໍ ປຏິປກ຺ຂໂຕ ຈຕ຺ຕາຣິ ສຕິປຏ຺ຐານານິ ສິທ຺ຘາເນວ ໂຫນ຺ຕິ. ຕຕ຺ຖ ຈຕູຫິ ອິນ຺ທ຺ຣິເຍຫິ ຈຕ຺ຕາໂຣ ປຸຄ຺ຄລາ ນິທ຺ທິສິຕພ຺ພາ.

ກຖໍ? ທຸວິໂຘ ຫິ ຕຓ຺ຫາຈຣິໂຕ ມຸທິນ຺ທ຺ຣິໂຍ ຈ ຕິກ຺ຂິນ຺ທ຺ຣິໂຍ ຈາຕິ, ຕຖາ ທິຏ຺ຐິຈຣິໂຕ. ເຕສຸ ປຐໂມ ອສຸເຠ ‘‘ສຸຠ’’ນ຺ຕິ ວິປລ຺ລຕ຺ຕທິຏ຺ຐິ ສຕິພເລນ ຍຖາຠູຕໍ ກາຍສຠາວໍ ສລ຺ລກ຺ເຂຕ຺ວາ ສມ຺ມຕ຺ຕນິຍາມໍ ໂອກ຺ກມຕິ. ທຸຕິໂຍ ອສຸເຂ ‘‘ສຸຂ’’ນ຺ຕິ ວິປລ຺ລຕ຺ຕທິຏ຺ຐິ ‘‘ອຸປ຺ປນ຺ນໍ ກາມວິຕກ຺ກໍ ນາຘິວາເສຕີ’’ຕິອາທິນາ (ມ. ນິ. ໑.໒໖; ອ. ນິ. ໔.໑໔; ໖.໕໘) ວຸຕ຺ເຕນ ວີຣິຍສໍວຣສງ຺ຂາເຕນ ວີຣິຍພເລນ ຕໍ ວິປລ຺ລາສໍ ວິຘມຕິ. ຕຕິໂຍ ອນິຈ຺ເຈ ‘‘ນິຈ຺ຈ’’ນ຺ຕິ ອຍາຖາວຄາຫີ ສມຖພເລນ ສມາຫິຕຠາວໂຕ ສງ຺ຂາຣານໍ ຂຓິກຠາວໍ ຍຖາຠູຕໍ ປຏິວິຊ຺ຌຕິ. ຈຕຸຕ຺ໂຖ ສນ຺ຕຕິສມູຫກິຈ຺ຈາຣມ຺ມຓຆນວິຈິຕ຺ຕຕ຺ຕາ ຜສ຺ສາທິຘມ຺ມປຸຎ຺ຊມຕ຺ເຕ ອນຕ຺ຕນິ ‘‘ອຕ຺ຕາ’’ຕິ ມິຈ຺ຉາຠິນິເວສີ ຈຕຸໂກຏິກສຸຎ຺ຎຕາມນສິກາເຣນ ຕໍ ມິຈ຺ຉາຠິນິເວສໍ ວິທ຺ຘໍເສຕິ. ຈຕູຫິ ເຈຕ຺ຖ ວິປລ຺ລາເສຫິ ຈຕຸຣາສໂວຆໂຍຄກາຍຄນ຺ຖອຄຕິຕຓ຺ຫຸປ຺ປາທຸປາທານສຕ຺ຕວິຎ຺ຎາຓຏ຺ຐິຕິອປຣິຎ຺ຎາທິວເສນ ສພ຺ໂພ ອກຸສລປກ຺ໂຂ ເນຕພ຺ໂພ. ຕຖາ ຈຕູຫິ ສຕິປຏ຺ຐາເນຫິ ຈຕຸພ຺ພິຘຌານວິຫາຣາຘິຏ຺ຐານສຸຂຠາຄິຍຘມ຺ມອປ຺ປມຎ຺ຎາສມ຺ມປ຺ປຘານອິທ຺ຘິປາທາທິວເສນ ສພ຺ໂພ ໂວທານປກ຺ໂຂ ເນຕພ຺ໂພຕິ ອຍໍ ສີຫວິກ຺ກີຬິຕສ຺ສ ນຍສ຺ສ ຠູມິ. ອິຘາປິ ສຸຠສຎ຺ຎາສຸຂສຎ຺ຎາຫິ, ຈຕູຫິປິ ວາ ວິປລ຺ລາເສຫິ ສມຸທຍສຈ຺ຈໍ, ເຕສໍ ອຘິຏ຺ຐານາຣມ຺ມຓຠູຕາ ປຎ຺ຈຸປາທານກ຺ຂນ຺ຘາ ທຸກ຺ຂສຈ຺ຈນ຺ຕິອາທິນາ ສຈ຺ຈໂຍຊນາ ເວທິຕພ຺ພາ.