ນນ຺ທິຍາວຏ຺ຏນຍວຓ຺ຓນາ

ອາຆາຕາທີນໍ ອກຣຓວຈເນນ ຕຓ຺ຫາວິຊ຺ຊາສງ຺ໂກໂຈ ທສ຺ສິໂຕ ໂຫຕິ. ສຕິ ຫິ ອຕ຺ຕຕ຺ຕນິຍວຕ຺ຖູສຸ ສິເນເຫ ສມ຺ໂມເສ ຈ ‘‘ອນຕ຺ຖໍ ເມ ອຈຣີ’’ຕິອາທິນາ (ຘ. ສ. ໑໒໓໗, ວິຠ. ໙໐໙) ອາຆາໂຕ ຊາຍຕີຕິ, ຕຖາ ‘‘ປາຓາຕິປາຕາ ປຏິວິຣໂຕ’’ຕິອາທິວຈເນຫິ, ‘‘ປຈ຺ຈຕ຺ຕຎ຺ເຎວ ນິພ຺ພຸຕິ ວິທິຕາ, ອນຸປາທາວິມຸຕ຺ໂຕ, ຉນ຺ນໍ ຜສ຺ສາຍຕນານໍ…ເປ… ຍຖາຠູຕໍ ປຊານາຕີ’’ຕິອາທີຫິ ວຈເນຫິ ຈ ຕຓ຺ຫາວິຊ຺ຊານໍ ອຈ຺ຈນ຺ຕປ຺ປຫານໍ ທສ຺ສິຕໍ ໂຫຕິ. ຕາສໍ ປນ ປຸພ຺ພນ຺ຕກປ຺ປິກາທິປເທຫິ ‘‘ອຊານຕໍ ອປສ຺ສຕ’’ນ຺ຕິອາທິປເທຫິ ຈ ສຣູປໂຕ ທສ຺ສິຕານໍ ຕຓ຺ຫາວິຊ຺ຊານໍ ຣູປຘມ຺ມາ ອຣູປຘມ຺ມາ ຈ ອຘິຏ຺ຐານໍ. ຍຖາກ຺ກມໍ ສມໂຖ ຈ ວິປສ຺ສນາ ຈ ປຏິປກ຺ໂຂ. ເຕສໍ ເຈໂຕວິມຸຕ຺ຕິ ປຎ຺ຎາວິມຸຕ຺ຕິ ຈ ຜລໍ. ຕຕ຺ຖ ຕຓ຺ຫາ, ຕຓ຺ຫາວິຊ຺ຊາ ວາ ສມຸທຍສຈ຺ຈໍ, ຕທຘິຏ຺ຐານຠູຕາ ຣູປາຣູປຘມ຺ມາ ທຸກ຺ຂສຈ຺ຈໍ, ເຕສໍ ອປ຺ປວຕ຺ຕິ ນິໂຣຘສຈ຺ຈໍ, ນິໂຣຘປຊານນາ ສມຖວິປສ຺ສນາ ມຄ຺ຄສຈ຺ຈນ຺ຕິ ເອວໍ ຈຕຸສຈ຺ຈໂຍຊນາ ເວທິຕພ຺ພາ. ຕຓ຺ຫາຄ຺ຄຫເຓນ ເຈຕ຺ຖ ມາຍາສາເຐຍ຺ຍມານາຕິມານມທປ຺ປມາທປາປິຈ຺ຉຕາປາປມິຕ຺ຕຕາອຫິຣິກາໂນຕ຺ຕປ຺ປາທິວເສນ ສພ຺ໂພ ອກຸສລປກ຺ໂຂ ເນຕພ຺ໂພ. ຕຖາ ອວິຊ຺ຊາຄ຺ຄຫເຓນ ວິປຣີຕມນສິກາຣໂກຘຸປນາຫມກ຺ຂປລາສອິສ຺ສາມຈ຺ຉຣິຍສາຣມ຺ຠໂທວຈສ຺ສຕາ- ຠວທິຏ຺ຐິວິຠວທິຏ຺ຐາທິວເສນ ອກຸສລປກ຺ໂຂ ເນຕພ຺ໂພ. ວຸຕ຺ຕວິປຣິຍາເຍນ ອມາຍາອສາເຐຍ຺ຍາທິອວິປຣີຕມນສິກາຣາທິວເສນ, ຕຖາ ສມຖປກ຺ຂິຍານໍ ສທ຺ຘິນ຺ທ຺ຣິຍາທີນໍ, ວິປສ຺ສນາປກ຺ຂິຍານຎ຺ຈ ອນິຈ຺ຈສຎ຺ຎາທີນໍ ວເສນ ກຸສລປກ຺ໂຂ ເນຕພ຺ໂພຕິ. ອຍໍ ນນ຺ທິຍາວຏ຺ຏສ຺ສ ນຍສ຺ສ ຠູມິ.