ໂອຕຣຓຫາຣວຓ຺ຓນາ

ອາຆາຕຄ຺ຄຫເຓນ ສງ຺ຂາຣກ຺ຂນ຺ຘສງ຺ຄໂຫ, ຕຖາ ອນຠິຣທ຺ຘິຄຫເຓນ. ອປ຺ປຈ຺ຈຍຄ຺ຄຫເຓນ ເວທນາກ຺ຂນ຺ຘສງ຺ຄໂຫຕິ ອິທໍ ຂນ຺ຘມຸເຂນ ໂອຕຣຓໍ. ຕຖາ ອາຆາຕາທິຄ຺ຄຫເຓນ ຘມ຺ມາຍຕນໍ ຘມ຺ມຘາຕຸ ທຸກ຺ຂສຈ຺ຈໍ ສມຸທຍສຈ຺ຈໍ ວາ ຄຫິຕນ຺ຕິ ອິທໍ ອາຍຕນມຸເຂນ ຘາຕຸມຸເຂນ ສຈ຺ຈມຸເຂນ ຈ ໂອຕຣຓໍ. ຕຖາ ອາຆາຕາທີນໍ ສຫຊາຕາ ອວິຊ຺ຊາ ເຫຕຸສຫຊາຕອຎ຺ຎມຎ຺ຎນິສ຺ສຍສມ຺ປຍຸຕ຺ຕອຕ຺ຖິອວິຄຕປຈ຺ຈເຍຫິ ປຈ຺ຈໂຍ ໂຫຕິ, ອສຫຊາຕາ ປນ ອນນ຺ຕຣສມນນ຺ຕຣອນນ຺ຕຣູປນິສ຺ສຍນຕ຺ຖິວິຄຕາເສວນປຈ຺ຈເຍຫິ ປຈ຺ຈໂຍ ໂຫຕິ, ອນນ຺ຕຣາ ອຸປນິສ຺ສຍວເສເນວ ປຈ຺ຈໂຍ ໂຫຕິ. ຕຓ຺ຫາອຸປາທານາທີນໍ, ຜສ຺ສາທີນມ຺ປິ ເຕສໍ ສຫຊາຕານໍ ອສຫຊາຕານຎ຺ຈ ຍຖາຣຫໍ ປຈ຺ຈຍຠາໂວ ວຕ຺ຕພ຺ໂພ. ໂກຈິ ປເນຕ຺ຖ ອຘິປຕິວເສນ, ໂກຈິ ກມ຺ມວເສນ, ໂກຈິ ອາຫາຣວເສນ, ໂກຈິ ອິນ຺ທ຺ຣິຍວເສນ, ໂກຈິ ຌານວເສນ, ໂກຈິ ມຄ຺ຄວເສນປິ ປຈ຺ຈໂຍ ໂຫຕີຕິ. ອຍມ຺ປິ ວິເສໂສ ເວທິຕພ຺ໂພຕິ ອິທໍ ປຏິຈ຺ຈສມຸປ຺ປາທມຸເຂນ ໂອຕຣຓໍ. ອານນ຺ທາທີນມ຺ປິ ອິມິນາວ ນເຍນ ຂນ຺ຘາທິມຸເຂນ ໂອຕຣຓໍ ວິຠາເວຕພ຺ພໍ.

ຕຖາ ສີລໍ ປາຓາຕິປາຕາທີຫິ ວິຣຕິເຈຕນາ, ອພ຺ຍາປາທາທິເຈຕສິກຘມ຺ມາ ຈ, ປາຓາຕິປາຕາທໂຍ ເຈຕນາວ, ເຕສໍ ຕທຸປກາຣກຘມ຺ມານຎ຺ຈ ລຊ຺ຊາທຍາທີນໍ ສງ຺ຂາຣກ຺ຂນ຺ຘຘມ຺ມາຍຕນາທິສງ຺ຄໂຫ, ປຸຣິມນເຍເນວ ຂນ຺ຘາທິມຸເຂນ ຈ ໂອຕຣຓໍ ວິຠາເວຕພ຺ພໍ. ເອສ ນໂຍ ຎາຓທິຏ຺ຐິເວທນາອວິຊ຺ຊາຕຓ຺ຫາທິຄ຺ຄຫເຓສຸ. ນິສ຺ສຣຓອນຸປາທາວິມຸຕ຺ຕິຄຫເຓສຸ ອສງ຺ຂຕຘາຕຸວເສນປິ ຘາຕຸມຸເຂນ ໂອຕຣຓໍ ວິຠາເວຕພ຺ພໍ. ຕຖາ ‘‘ເວທນານໍ…ເປ… ອນຸປາທາວິມຸຕ຺ໂຕ’’ຕິ ເອເຕນ ຠຄວໂຕ ສີລາທໂຍ ປຎ຺ຈ ຘມ຺ມກ຺ຂນ຺ຘາ, ສຕິປຏ຺ຐານາທໂຍ ຈ ໂພຘິປກ຺ຂິຍຘມ຺ມາ ປກາສິຕາ ໂຫນ຺ຕີຕິ ຕໍ ມຸເຂນປິ ໂອຕຣຓໍ ເວທິຕພ຺ພໍ. ‘‘ຕທປິ ຜສ຺ສປຈ຺ຈຍາ’’ຕິ ທິຏ຺ຐິປຎ຺ຎາປນສ຺ສ ປຈ຺ຈຍາຘີນວຸຕ຺ຕິຕາທີປເນນ ອນິຈ຺ຈຕາມຸເຂນ ໂອຕຣຓໍ, ຕຖາ ເອວໍຘມ຺ມຕາຍ ປຏິຈ຺ຈສມຸປ຺ປາທມຸເຂນ ໂອຕຣຓໍ, ອນິຈ຺ຈສ຺ສ ທຸກ຺ຂານຕ຺ຕຠາວໂຕ ອປ຺ປຓິຫິຕມຸເຂນ ສຸຎ຺ຎຕາມຸເຂນ ຈ ໂອຕຣຓໍ. ເສສປເທສຸປິ ເອເສວ ນໂຍຕິ ອຍໍ ໂອຕຣໂຓ ຫາໂຣ.