ໂສຘນຫາຣວຓ຺ຓນາ

‘‘ມມໍ ວາ…ເປ… ຠາເສຍ຺ຍຸ’’ນ຺ຕິ ອາຣມ຺ໂຠ. ‘‘ຘມ຺ມສ຺ສ…ເປ… ສງ຺ຆສ຺ສ…ເປ… ຠາເສຍ຺ຍຸ’’ນ຺ຕິ ປທສຸທ຺ຘິ, ໂນ ອາຣມ຺ຠສຸທ຺ຘິ. ‘‘ຕຕ຺ຣ ຕຸມ຺ເຫຫິ…ເປ… ກຣຓີຍາ’’ຕິ ປທສຸທ຺ຘິ ເຈວ ອາຣມ຺ຠສຸທ຺ຘິ ຈ. ທຸຕິຍນຍາທີສຸປິ ເອເສວ ນໂຍ. ຕຖາ ‘‘ອປ຺ປມຕ຺ຕກໍ ໂຂ ປເນຕ’’ນ຺ຕິອາທິ ອາຣມ຺ໂຠ. ‘‘ກຕມ’’ນ຺ຕິອາທິ ປຸຈ຺ຉາ. ‘‘ປາຓາຕິປາຕໍ ປຫາຍາ’’ຕິອາທິ ປທສຸທ຺ຘິ, ໂນ ອາຣມ຺ຠສຸທ຺ຘິ, ໂນ ຈ ປຸຈ຺ຉາສຸທ຺ຘິ. ‘‘ອິທໍ ໂຂ’’ຕິອາທິ ປຸຈ຺ຉາສຸທ຺ຘິ ເຈວ ປທສຸທ຺ຘິ ຈ ອາຣມ຺ຠສຸທ຺ຘິ ຈ.

ຕຖາ ‘‘ອຕ຺ຖິ ຠິກ຺ຂເວ’’ຕິອາທິ ອາຣມ຺ໂຠ. ‘‘ກຕເມ ຈ ເຕ’’ຕິອາທິ ປຸຈ຺ຉາ. ‘‘ສນ຺ຕິ ຠິກ຺ຂເວ’’ຕິອາທິ ອາຣມ຺ໂຠ. ‘‘ກິ’’ນ຺ຕິອາທິ ອາຣມ຺ຠ ປຸຈ຺ຉາ. ‘‘ຍຖາສມາຫິເຕ’’ຕິອາທິ ປທສຸທ຺ຘິ, ໂນ ອາຣມ຺ຠສຸທ຺ຘິ ໂນ ຈ ປຸຈ຺ຉາສຸທ຺ຘິ. ‘‘ອິເມ ໂຂ ເຕ’’ຕິອາທິ ປທສຸທ຺ຘິ ເຈວ ປຸຈ຺ຉາສຸທ຺ຘິ ຈ ອາຣມ຺ຠສຸທ຺ຘິ ຈ. ອິມິນາ ນເຍນ ສພ຺ພຕ຺ຖ ອາຣມ຺ຠາທໂຍ ເວທິຕພ຺ພາຕິ. ອຍໍ ໂສຘໂນ ຫາໂຣ.