ປຎ຺ຎຕ຺ຕິຫາຣວຓ຺ຓນາ

ອາຆາໂຕ ວຕ຺ຖຸວເສນ ທສວິເຘນ ເອກູນວີສຕິວິເຘນ ວາ ປຎ຺ຎຕ຺ໂຕ. ອປ຺ປຈ຺ຈໂຍ ອຸປວິຈາຣວເສນ ຉຘາ ປຎ຺ຎຕ຺ໂຕ. ອານນ຺ໂທປີຕິອາທິວເສນ ນວຘາ ປຎ຺ຎຕ຺ໂຕ. ປີຕິ ສາມຎ຺ຎໂຕ ຂຸທ຺ທິກາທິວເສນ ປຎ຺ຈຘາ ປຎ຺ຎຕ຺ຕາ. ໂສມນສ຺ສໍ ອຸປວິຈາຣວເສນ ຉຘາ ປຎ຺ຎຕ຺ຕໍ. ສີລໍ ວາຣິຕ຺ຕຈາຣິຕ຺ຕາທິວເສນ ອເນກຘາ ປຎ຺ຎຕ຺ຕໍ. ຄມ຺ຠີຣຕາທິວິເສສຍຸຕ຺ຕໍ ຎາຓໍ ຈິຕ຺ຕຸປ຺ປາທວເສນ ຈຕຸຘາ, ທ຺ວາທສວິເຘນ ວາ, ວິສຍເຠທໂຕ ອເນກຘາ ຈ ປຎ຺ຎຕ຺ຕໍ. ທິຏ຺ຐິສສ຺ສຕາທິວເສນ ທ຺ວາສຏ຺ຐິຍາ ເຠເທຫິ, ຕທນ຺ໂຕຄຘວິຠາເຄນ ອເນກຘາ ຈ ປຎ຺ຎຕ຺ຕາ. ເວທນາ ຉຘາ ອຏ຺ຐສຕຘາ ອເນກຘາ ຈ ປຎ຺ຎຕ຺ຕາ. ຕສ຺ສາ ສມຸທໂຍ ປຎ຺ຈຘາ ປຎ຺ຎຕ຺ໂຕ, ຕຖາ ອຕ຺ຖງ຺ຄໂມ. ອສ຺ສາໂທ ທຸວິເຘນ ປຎ຺ຎຕ຺ໂຕ. ອາທີນໂວ ຕິວິເຘນ ປຎ຺ຎຕ຺ໂຕ. ນິສ຺ສຣຓໍ ເອກຘາ ຈຕຸຘາ ຈ ປຎ຺ຎຕ຺ຕໍ…ເປ… ອນຸປາທາວິມຸຕ຺ຕິ ທຸວິເຘນ ປຎ຺ຎຕ຺ຕາ.

‘‘ອຊານຕໍ ອປສ຺ສຕ’’ນ຺ຕິ ວຸຕ຺ຕາ ອວິຊ຺ຊາ ວິສຍເຠເທນ ຈຕຸຘາ ອຏ຺ຐຘາ ຈ ປຎ຺ຎຕ຺ຕາ. ‘‘ຕຓ຺ຫາຄຕານ’’ນ຺ຕິອາທິນາ ວຸຕ຺ຕາ ຕຓ຺ຫາ ຉຘາ ອຏ຺ຐສຕຘາ ອເນກຘາ ຈ ປຎ຺ຎຕ຺ຕາ. ຜສ຺ໂສ ນິສ຺ສຍວເສນ ຉຘາ ປຎ຺ຎຕ຺ໂຕ. ອຸປາທານໍ ຈຕຸຘາ ປຎ຺ຎຕ຺ຕໍ. ຠໂວ ທ຺ວິຘາ ອເນກຘາ ຈ ປຎ຺ຎຕ຺ໂຕ. ຊາຕິ ເວວຈນວເສນ ຉຘາ ປຎ຺ຎຕ຺ຕາ. ຕຖາ ຊຣາ ສຕ຺ຕຘາ ປຎ຺ຎຕ຺ຕາ. ມຣຓໍ ອຏ຺ຐຘາ ນວຘາ ຈ ປຎ຺ຎຕ຺ຕໍ. ໂສໂກ ປຎ຺ຈຘາ ປຎ຺ຎຕ຺ໂຕ. ປຣິເທໂວ ຉຘາ ປຎ຺ຎຕ຺ໂຕ. ທຸກ຺ຂໍ ຈຕຸຘາ ປຎ຺ຎຕ຺ຕໍ, ຕຖາ ໂທມນສ຺ສໍ. ອຸປາຍາໂສ ຈຕຸຘາ ປຎ຺ຎຕ຺ໂຕ. ‘‘ສມຸທໂຍ ໂຫຕີ’’ຕິ ປຠວປຎ຺ຎຕ຺ຕິ, ‘‘ຍຖາຠູຕໍ ປຊານາຕີ’’ຕິ ທຸກ຺ຂສ຺ສ ປຣິຎ຺ຎາປຎ຺ຎຕ຺ຕິ, ສມຸທຍສ຺ສ ປຫານປຎ຺ຎຕ຺ຕິ, ນິໂຣຘສ຺ສ ສຈ຺ຉິກິຣິຍາປຎ຺ຎຕ຺ຕິ, ມຄ຺ຄສ຺ສ ຠາວນາປຎ຺ຎຕ຺ຕິ.

‘‘ອນ຺ໂຕຊາລີກຕາ’’ຕິອາທິ ສພ຺ພທິຏ຺ຐີນໍ ສງ຺ຄຫປຎ຺ຎຕ຺ຕິ. ‘‘ອຸຈ຺ຉິນ຺ນຠວເນຕ຺ຕິໂກ’’ຕິອາທິ ທຸວິເຘນ ປຣິນິພ຺ພານປຎ຺ຎຕ຺ຕິ. ເອວໍ ອາຆາຕາທີນໍ ອກຸສລກຸສລາທິຘມ຺ມານໍ ຍຖາປຠວປຎ຺ຎຕ຺ຕິອາທິວເສນ, ຕຖາ ‘‘ອາຆາໂຕ’’ຕິ ພ຺ຍາປາທສ຺ສ ເວວຈນປຎ຺ຎຕ຺ຕິ, ‘‘ອປ຺ປຈ຺ຈໂຍ’’ຕິ ໂທມນສ຺ສສ຺ສ ເວວຈນປຎ຺ຎຕ຺ຕີຕິອາທິນາ ນເຍນ ປຎ຺ຎຕ຺ຕິເຠໂທ ວິຠຊິຕພ຺ໂພຕິ ອຍໍ ປຎ຺ຎຕ຺ຕິຫາໂຣ.