ວິຠຕ຺ຕິຫາຣວຓ຺ຓນາ

ອາຆາຕານນ຺ທາທໂຍ ອກຸສລາ ຘມ຺ມາ, ເຕສໍ ອໂຍນິໂສມນສິກາຣາທິ ປທຏ຺ຐານໍ. ເຍຫິ ປນ ຘມ຺ເມຫິ ອາຆາຕານນ຺ທາທີນໍ ອກຣຓໍ ອປ຺ປວຕ຺ຕິ, ເຕ ອພ຺ຍາປາທາທໂຍ ກຸສລາ ຘມ຺ມາ, ເຕສໍ ໂຍນິໂສມນສິກາຣາທິ ປທຏ຺ຐານໍ. ເຕສຸ ອາຆາຕາທໂຍ ກາມາວຈຣາວ, ອພ຺ຍາປາທາທໂຍ ຈຕຸຠູມກາ. ຕຖາ ປາຓາຕິປາຕາທີຫິ ປຏິວິຣຕິ ກຸສລາ ວາ ອພ຺ຍາກຕາ ວາ, ຕສ຺ສາ ຫິໂຣຕ຺ຕປ຺ປາທໂຍ ຘມ຺ມາ ປທຏ຺ຐານໍ. ຕຕ຺ຖ ກຸສລາ ສິຍາ ກາມາວຈຣາ, ສິຍາ ໂລກຸຕ຺ຕຣາ, ອພ຺ຍາກຕາ ໂລກຸຕ຺ຕຣາວ. ‘‘ອຕ຺ຖິ ຠິກ຺ຂເວ ອຎ຺ເຎວ ຘມ຺ມາ ຄມ຺ຠີຣາ’’ຕິ ວຸຕ຺ຕຘມ຺ມາ ສິຍາ ກຸສລາ, ສິຍາ ອພ຺ຍາກຕາ, ຕຕ຺ຖ ກຸສລານໍ ວຸຏ຺ຐານຄາມິນິວິປສ຺ສນາ ປທຏ຺ຐານໍ. ອພ຺ຍາກຕານໍ ມຄ຺ຄຘມ຺ມາ, ວິປສ຺ສນາ, ອາວຊ຺ຊນາ ວາ ປທຏ຺ຐານໍ. ເຕສຸ ກຸສລາ ໂລກຸຕ຺ຕຣາ, ອພ຺ຍາກຕາ ສິຍາ ກາມາວຈຣາ, ສິຍາ ໂລກຸຕ຺ຕຣາ, ສພ຺ພາປິ ທິຏ຺ຐິໂຍ ອກຸສລາວ ກາມາວຈຣາວ, ຕາສໍ ອວິເສເສນ ມິຈ຺ຉາຠິນິເວເສ ອໂຍນິໂສມນສິກາໂຣ ປທຏ຺ຐານໍ. ວິເສສໂຕ ປນ ສນ຺ຕຕິຆນວິນິພ຺ໂຠຄາຠາວໂຕ ເອກຕ຺ຕນຍສ຺ສ ມິຈ຺ຉາຄາໂຫ ອຕີຕຊາຕິອນຸສ຺ສຣຓຕກ຺ກສຫິໂຕ ສສ຺ສຕທິຏ຺ຐິຍາ ປທຏ຺ຐານໍ. ເຫຕຸຜລຠາເວນ ສມ຺ພນ຺ຘຠາວສ຺ສ ອຄ຺ຄຫຓໂຕ ນານຕ຺ຕນຍສ຺ສ ມິຈ຺ຉາຄາໂຫ ຕຊ຺ຊາສມນ຺ນາຫາຣສຫິໂຕ ອຸຈ຺ເຉທທິຏ຺ຐິຍາ ປທຏ຺ຐານໍ. ເອວໍ ເສສທິຏ຺ຐີນມ຺ປິ ຍຖາສມ຺ຠວໍ ວຕ຺ຕພ຺ພໍ. ‘‘ເວທນານ’’ນ຺ຕິ ເອຕ຺ຖ ເວທນາ ສິຍາ ກຸສລາ, ສິຍາ ອພ຺ຍາກຕາ, ສິຍາ ກາມາວຈຣາ, ສິຍາ ຣູປາວຈຣາ, ສິຍາ ອຣູປາວຈຣາ, ຜສ຺ໂສ ຕາສໍ ປທຏ຺ຐານໍ. ເວທນານໍ ສມຸທຍາທິຍຖາຠູຕເວທນໍ ມຄ຺ຄຎາຓໍ, ອນຸປາທາວິມຸຕ຺ຕິ ຜລໍ, ເຕສໍ ‘‘ອຎ຺ເຎວ ຘມ຺ມາ ຄມ຺ຠີຣາ’’ຕິ ເອຕ຺ຖ ວຸຕ຺ຕນເຍນ ຘມ຺ມາທິວິຠາໂຄ ເນຕພ຺ໂພ. ‘‘ອຊານຕໍ ອປສ຺ສຕ’’ນ຺ຕິອາທີສຸ ອວິຊ຺ຊາ ຕຓ຺ຫາ ອກຸສລາ ກາມາວຈຣາ, ຕາສຸ ອວິຊ຺ຊາຍ ອາສວາ, ອໂຍນິໂສມນສິກາໂຣ ເອວ ວາ ປທຏ຺ຐານໍ. ຕຓ຺ຫາຍ ສໍໂຍຊນິເຍສຸ ຘມ຺ເມສຸ ອສ຺ສາທທສ຺ສນໍ ປທຏ຺ຐານໍ. ‘‘ຕທປິ ຜສ຺ສປຈ຺ຈຍາ’’ຕິ ເອຕ຺ຖ ຜສ຺ສສ຺ສ ເວທນາຍ ວິຍ ຘມ຺ມາທິວິຠາໂຄ ເວທິຕພ຺ໂພ. ອິມິນາ ນເຍນ ຜສ຺ສາຍຕນາທີນມ຺ປິ ຍຖາຣຫໍ ຘມ຺ມາທິວິຠາໂຄ ເນຕພ຺ໂພຕິ ອຍໍ ວິຠຕ຺ຕິຫາໂຣ.