ປຣິວຕ຺ຕຫາຣວຓ຺ຓນາ

ອາຆາຕາທີນໍ ອກຣຓໍ ຂນ຺ຕິໂສຣຈ຺ຈານິ ອນຸພ຺ຣູເຫຕ຺ວາ ປຏິສງ຺ຂານຠາວນາພລສິທ຺ຘິຍາ ອຸຠຍຫິຕປຏິປຕ຺ຕິໍ ອາວຫຕິ. ອາຆາຕາທໂຍ ປນ ປວຕ຺ຕິຍມານາ ທຸພ຺ພຓ຺ຓຕໍ ທຸກ຺ຂເສຍ຺ຍໍ ໂຠຄຫານິໍ ອກິຕ຺ຕິໍ ປເຣຫິ ທຸຣຸປສງ຺ກມນຕຎ຺ຈ ນິປ຺ຜາເທນ຺ຕາ ນິຣຍາທີສຸ ມຫາທຸກ຺ຂໍ ອາວຫນ຺ຕິ. ປາຓາຕິປາຕາທີຫິ ປຏິວິຣຕິ ອວິປ຺ປຏິສາຣາທິກລ຺ຍາຓໍ ປຣມ຺ປຣໍ ອາວຫຕິ. ປາຓາຕິປາຕາທິ ປນ ວິປ຺ປຏິສາຣາທິອກລ຺ຍາຓໍ ປຣມ຺ປຣໍ, ຄມ຺ຠີຣຕາທິວິເສສຍຸຕ຺ຕໍ ຎາຓໍ ວິເນຍ຺ຍານໍ ຍຖາຣຫໍ ວິຊ຺ຊາຠິຎ຺ຎາທິຄຸຓວິເສສໍ ອາວຫຕິ ສພ຺ພເຎຍ຺ຍໍ ຍຖາສຠາວາວໂພຘໂຕ. ຕຖາ ຄມ຺ຠີຣຕາທິວິເສສຣຫິຕໍ ປນ ຎາຓໍ ເຎຍ຺ເຍສຸ ສາວຣຓໂຕ ຍຖາວຸຕ຺ຕຄຸຓວິເສສໍ ນາວຫຕິ. ສພ຺ພາປິ ເຈຕາ ທິຏ຺ຐິໂຍ ຍຖາຣຫໍ ສສ຺ສຕຸຈ຺ເຉທຠາວໂຕ ອນ຺ຕທ຺ວຍຠູຕາ ສກ຺ກາຍຕີຣໍ ນາຕິວຕ຺ຕນ຺ຕິ ອນິຍ຺ຍານິກສຠາວຕ຺ຕາ. ນິຍ຺ຍານິກສຠາວຕ຺ຕາ ປນ ສມ຺ມາທິຏ຺ຐິ ສປຣິກ຺ຂາຣາ ມຊ຺ຌິມປຏິປທາຠູຕາ ອຕິກ຺ກມ຺ມ ສກ຺ກາຍຕີຣໍ ປາຣໍ ອາຄຈ຺ຉຕິ. ເວທນານໍ ສມຸທຍາທິຍຖາຠູຕເວທນໍ ອນຸປາທາວິມຸຕ຺ຕິໍ ອາວຫຕິ ມຄ຺ຄຠາວໂຕ. ເວທນານໍ ສມຸທຍາທິອສມ຺ປຏິເວໂຘ ສໍສາຣຈາຣກາວໂຣຘໍ ອາວຫຕິ ສງ຺ຂາຣານໍ ປຈ຺ຈຍຠາວໂຕ. ເວທຍິຕສຠາວປຏິຈ຺ຉາທໂກ ສມ຺ໂມໂຫ ຕທຠິນນ຺ທນໍ ອາວຫຕິ. ຍຖາຠູຕາວໂພໂຘ ປນ ຕຕ຺ຖ ນິພ຺ເພທໍ ວິຣາຄຎ຺ຈ ອາວຫຕິ. ມິຈ຺ຉາຠິນິເວເສ ອໂຍນິໂສມນສິກາຣສຫິຕາ ຕຓ຺ຫາ ອເນກວິຫິຕໍ ທິຏ຺ຐິຊາລໍ ປສາເຣຕິ. ຍຖາວຸຕ຺ຕຕຓ຺ຫາສມຸຈ຺ເຉໂທ ປຐມມຄ຺ໂຄ ຕໍ ທິຏ຺ຐິຊາລໍ ສງ຺ໂກເຈຕິ. ສສ຺ສຕວາທາທິປຎ຺ຎາປນສ຺ສ ຜສ຺ໂສ ປຈ຺ຈໂຍ ໂຫຕິ ອສຕິ ຜສ຺ເສ ຕທຠາວໂຕ. ທິຏ຺ຐິພນ຺ຘນພນ຺ຘານໍ ຜສ຺ສາຍຕນາທີນໍ ອນິໂຣເຘນ ຜສ຺ສາທິອນິໂຣໂຘ ສໍສາຣທຸກ຺ຂສ຺ສ ອນິວຕ຺ຕິເຍວ, ຍາຖາວໂຕ ຜສ຺ສາຍຕນາທິປຣິຎ຺ຎາ ສພ຺ພທິຏ຺ຐິທສ຺ສນານິ ອຕິວຕ຺ຕຕິ, ຜສ຺ສາຍຕນາທິອປຣິຎ຺ຎາ ຕໍທິຏ຺ຐິຄຫນໍ ນາຕິວຕ຺ຕຕິ, ຠວເນຕ຺ຕິສມຸຈ຺ເຉໂທ ອາຍຕິໍ ອຕ຺ຕຠາວສ຺ສ ອນິພ຺ພຕ຺ຕິຍາ ສໍວຕ຺ຕຕິ, ອສມຸຈ຺ຉິນ຺ນາຍ ຠວເນຕ຺ຕິຍາ ອນາຄເຕ ຠວປ຺ປພນ຺ໂຘ ປຣິວຕ຺ຕຕິເຍວາຕິ ອຍໍ ປຣິວຕ຺ໂຕ ຫາໂຣ.