ອາວຕ຺ຕຫາຣວຓ຺ຓນາ

ອາຆາຕາທີນໍ ອກຣຓີຍຕາວຈເນນ ຂນ຺ຕິໂສຣຈ຺ຈານຸຏ຺ຐານໍ. ຕຕ຺ຖ ຂນ຺ຕິຍາ ສທ຺ຘາປຎ຺ຎາປຣາປກາຣທຸກ຺ຂສຫຄຕານໍ ສງ຺ຄໂຫ, ໂສຣຈ຺ເຈນ ສີລສ຺ສ. ສທ຺ຘາທິຄ຺ຄຫເຓນ ຈ ສທ຺ຘິນ຺ທ຺ຣິຍາທິສກລໂພຘິປກ຺ຂິຍຘມ຺ມາ ອາວຕ຺ຕນ຺ຕິ. ສີລຄ຺ຄຫເຓນ ອວິປ຺ປຏິສາຣາທໂຍ ສພ຺ເພປິ ສີລານິສໍສຘມ຺ມາ ອາວຕ຺ຕນ຺ຕິ. ປາຓາຕິປາຕາທີຫິ ປຏິວິຣຕິວຈເນນ ອປ຺ປມາທວິຫາໂຣ, ເຕນ ສກລໍ ສາສນພ຺ຣຫ຺ມຈຣິຍໍ ອາວຕ຺ຕຕິ. ຄມ຺ຠີຣຕາທິວິເສສຍຸຕ຺ຕຘມ຺ມຄ຺ຄຫເຓນ ມຫາໂພຘິປກິຕ຺ຕນໍ. ອນາວຣຓຎາຓປທຏ຺ຐານຎ຺ຫິ ອາສວກ຺ຂຍຎາຓໍ, ອາສວກ຺ຂຍຎາຓປທຏ຺ຐານຎ຺ຈ ອນາວຣຓຎາຓໍ ມຫາໂພຘິ, ເຕນ ທສພລາທໂຍ ສພ຺ເພ ພຸທ຺ຘຄຸຓາ ອາວຕ຺ຕນ຺ຕິ. ສສ຺ສຕາທິທິຏ຺ຐິຄ຺ຄຫເຓນ ຕຓ຺ຫາວິຊ຺ຊາຍ ສງ຺ຄໂຫ, ຕາຫິ ອນມຕຄ຺ຄສໍສາຣວຏ຺ຏໍ ອາວຕ຺ຕຕິ. ເວທນານໍ ສມຸທຍາທິຍຖາຠູຕເວທເນນ ຠຄວໂຕ ປຣິຎ຺ຎາຕ຺ຕຍວິສຸທ຺ຘິ, ຕາຍ ປຎ຺ຎາປາຣມິມຸເຂນ ສພ຺ພປາຣມິໂຍ ອາວຕ຺ຕນ຺ຕິ. ‘‘ອຊານຕໍ ອປສ຺ສຕ’’ນ຺ຕິ ອວິຊ຺ຊາຄ຺ຄຫເຓນ ອໂຍນິໂສມນສິກາຣປຣິຄ຺ຄໂຫ, ເຕນ ຈ ອໂຍນິໂສມນສິກາຣມູລກາ ຘມ຺ມາ ອາວຕ຺ຕນ຺ຕິ. ‘‘ຕຓ຺ຫາຄຕານໍ ປຣິຕສ຺ສິຕວິປ຺ຜນ຺ທິຕ’’ນ຺ຕິ ຕຓ຺ຫາຄ຺ຄຫເຓນ ນວ ຕຓ຺ຫາມູລກາ ຘມ຺ມາ ອາວຕ຺ຕນ຺ຕິ, ‘‘ຕທປິ ຜສ຺ສປຈ຺ຈຍາ’’ຕິອາທິ ສສ຺ສຕາທິປຎ຺ຎາປນສ຺ສ ປຈ຺ຈຍາຘີນວຸຕ຺ຕິທສ຺ສນໍ, ເຕນ ອນິຈ຺ຈຕາທິລກ຺ຂຓຕ຺ຕຍໍ ອາວຕ຺ຕຕິ. ຉນ຺ນໍ ຜສ຺ສາຍຕນານໍ ຍຖາຠູຕໍ ປຊານເນນ ວິມຸຕ຺ຕິສມ຺ປທານິທ຺ເທໂສ, ເຕນ ສຕ຺ຕປິ ວິສຸທ຺ຘິໂຍ ອາວຕ຺ຕນ຺ຕິ. ‘‘ອຸຈ຺ຉິນ຺ນຠວເນຕ຺ຕິໂກ ຕຖາຄຕສ຺ສ ກາໂຍ’’ຕິ ຕຓ຺ຫາປຫານໍ, ເຕນ ຠຄວໂຕ ສກລສໍກິເລສປ຺ປຫານໍ ອາວຕ຺ຕຕີຕິ ອຍໍ ອາວຕ຺ໂຕ ຫາໂຣ.