ທິຏ຺ຐຘມ຺ມນິພ຺ພານວາທວຓ຺ຓນາ

໙໓. ທິຏ຺ຐຘມ຺ໂມຕິ ທສ຺ສນຠູເຕນ ຎາເຓນ ອຸປລທ຺ຘຘມ຺ໂມ. ຕຕ຺ຖ ໂຍ ອນິນ຺ທ຺ຣິຍວິສໂຍ, ໂສປິ ສຸປາກຏຠາເວນ ອິນ຺ທ຺ຣິຍວິສໂຍ ວິຍ ໂຫຕີຕິ ອາຫ ‘‘ທິຏ຺ຐຘມ຺ໂມຕິ ປຈ຺ຈກ຺ຂຘມ຺ໂມ ວຸຈ຺ຈຕີ’’ຕິ. ເຕເນວ ຈ ‘‘ຕຕ຺ຖ ຕຕ຺ຖ ປຏິລທ຺ຘຕ຺ຕຠາວສ຺ເສຕໍ ອຘິວຈນ’’ນ຺ຕິ ວຸຕ຺ຕໍ.

໙໕. ອນ຺ໂຕນິຊ຺ຌາຍນລກ຺ຂໂຓຕິ ຎາຕິໂຠຄໂຣຄສີລທິຏ຺ຐິພ຺ຍສເນຫິ ຜຸຏ຺ຐສ຺ສ ເຈຕໂສ ອນ຺ໂຕ ອພ຺ຠນ຺ຕຣໍ ນິຊ຺ຌາຍນໍ ໂສຈນໍ ອນ຺ໂຕນິຊ຺ຌາຍນໍ, ຕໍ ລກ຺ຂຓໍ ເອຕສ຺ສາຕິ ອນ຺ໂຕນິຊ຺ຌາຍນລກ຺ຂໂຓ. ຕນ຺ນິສ຺ສິຕລາລປ຺ປນລກ຺ຂໂຓຕິ ຕໍ ໂສກໍ ສມຸຏ຺ຐານເຫຕຸໍ ນິສ຺ສິຕໍ ຕນ຺ນິສ຺ສິຕໍ, ຠຸສໍ ວິລາປນໍ ລາລປ຺ປນໍ, ຕນ຺ນິສ຺ສິຕຎ຺ຈ ລາລປ຺ປນຎ຺ຈ ຕນ຺ນິສ຺ສິຕລາລປ຺ປນໍ, ຕໍ ລກ຺ຂຓໍ ເອຕສ຺ສາຕິ ຕນ຺ນິສ຺ສິຕລາລປ຺ປນລກ຺ຂໂຓ. ຎາຕິພ຺ຍສນາທິນາ ຜຸຏ຺ຐສ຺ສ ປຣິເທເວນາປິ ອສກ຺ກຸຓນ຺ຕສ຺ສ ອນ຺ໂຕຄຕໂສກສມຸຏ຺ຐິໂຕ ຠຸໂສ ອາຍາໂສ ອຸປາຍາໂສ. ໂສ ປນ ຍສ຺ມາ ເຈຕໂສ ອປ຺ປສນ຺ນາກາໂຣ ໂຫຕິ, ຕສ຺ມາ ‘‘ວິສາທລກ຺ຂໂຓ’’ຕິ ວຸຕ຺ໂຕ.

໙໖. ວິຕກ຺ກນໍ ວິຕກ຺ກິຕໍ, ຕໍ ປນ ອຠິນິໂຣປນສຠາໂວ ວິຕກ຺ໂກເຍວາຕິ ອາຫ ‘‘ອຠິ…ເປ… ວິຕກ຺ໂກ’’ຕິ. ເອສ ນໂຍ ວິຈາຣິຕນ຺ຕິ ເອຕ຺ຖາປິ. ໂຂຠກຣສຠາວຕ຺ຕາ ວິຕກ຺ກວິຈາຣານໍ ຕໍສຫິຕໍ ຌານໍ ສອຸພ຺ພິລນໍ ວິຍ ໂຫຕີຕິ ວຸຕ຺ຕໍ ‘‘ສກຓ຺ຑກໍ ວິຍ ຂາຍຕີ’’ຕິ.

໙໗. ຍາຍ ອຸພ຺ພິລາປນປີຕິຍາ ອຸປ຺ປນ຺ນາຍ ຈິຕ຺ຕໍ ‘‘ອຸພ຺ພິລາວິຕ’’ນ຺ຕິ ວຸຈ຺ຈຕິ, ສາ ປີຕິ ອຸພ຺ພິລາວິຕຕ຺ຕໍ ຍສ຺ມາ ປນ ຈິຕ຺ຕສ຺ສ ອຸພ຺ພິລຠາໂວ ຕສ຺ສາ ປີຕິຍາ ສຕິ ໂຫຕິ, ນາສຕິ, ຕສ຺ມາ ສາ ‘‘ອຸພ຺ພິລຠາວກາຣຓ’’ນ຺ຕິ ວຸຕ຺ຕາ.

໙໘. ອາໂຠໂຄຕິ ວາ ຈິຕ຺ຕສ຺ສ ອາຠຸຄ຺ຄຠາໂວ, ອາຣມ຺ມເຓ ໂອຓຕຠາໂວຕິ ອຕ຺ໂຖ. ສຸເຂນ ຫິ ຈິຕ຺ຕໍ ອາຣມ຺ມເຓ ອຠິນຕໍ ໂຫຕິ, ນ ທຸກ຺ເຂນ ວິຍ ອປນຕໍ, ນາປິ ອທຸກ຺ຂມສຸເຂນ ວິຍ ອນຠິນຕໍ ອນປນຕຎ຺ຈ. ຕຕ຺ຖ ‘‘ຂຸປ຺ປິປາສາທິອຠິຠູຕສ຺ສ ວິຍ ມນຸຎ຺ຎໂຠຊນາທີສຸ ກາເມຫິ ວິເວຈິຍມານສ຺ສຸປາທາຣມ຺ມຓປຕ຺ຖນາ ວິເສສໂຕ ອຠິວຑ຺ຒຕິ, ອຸຬາຣສ຺ສ ປນ ກາມຣສສ຺ສ ຍາວທຕ຺ຖໍ ຕິຕ຺ຕສ຺ສ ມນຸຎ຺ຎຣສໂຠຊນໍ ຠຸຕ຺ຕາວິໂນ ວິຍ ສຸຫິຕສ຺ສ ໂຠຕ຺ຕຸກາມຕາ ກາເມສຸ ປາຕພ຺ຍຕາ ນ ໂຫຕິ, ວິສຍສ຺ສາຄິທ຺ຘຕາຍ ວິສເຍຫິ ທຸມ຺ໂມຈິເຍຫິປິ ຊລູກາ ວິຍ ສຍເມວ ມຸຎ຺ຈຕີ’’ຕິ ຈ ອໂຍນິໂສ ອຸມ຺ມຸຊ຺ຊິຕ຺ວາ ກາມຄຸຓສນ຺ຕປ຺ປິຕຕາຍ ສໍສາຣທຸກ຺ຂວູປສມໍ ພ຺ຍາກາສິ ປຐມວາທີ. ກາມາທີນໍ ອາທີນວທສ຺ສິຕາຍ, ປຐມາທິຊ຺ຌານສຸຂສ຺ສ ສນ຺ຕຠາວທສ຺ສິຕາຍ ຈ ປຐມາທິຊ຺ຌານສຸຂຕິຕ຺ຕິຍາ ສໍສາຣທຸກ຺ຂຸປຈ຺ເຉທໍ ພ຺ຍາກໍສຸ ທຸຕິຍາທິວາທິໂນ, ອິຘາປິ ອຸຈ຺ເຉທວາເທ ວຸຕ຺ຕປ຺ປກາໂຣ ວິຈາໂຣ ຍຖາສມ຺ຠວໍ ອາເນຕ຺ວາ ວຕ຺ຕພ຺ໂພ. ອຍໍ ປເນຕ຺ຖ ວິເສໂສ – ເອກສ຺ມິຎ຺ຫິ ອຕ຺ຕຠາເວ ປຎ຺ຈ ວາທາ ລພ຺ຠນ຺ຕິ. ເຕເນວ ຫິ ປາຬິຍໍ ‘‘ອຎ຺ໂຎ ອຕ຺ຕາ’’ຕິ ອຎ຺ຎຄ຺ຄຫຓໍ ນ ກຕໍ. ກຖໍ ປເນຕ຺ຖ ອຈ຺ຈນ຺ຕນິພ຺ພານປຎ຺ຎາປກສ຺ສ ອຕ຺ຕໂນ ທິຏ຺ຐຘມ຺ມນິພ຺ພານວາທສ຺ສ ສສ຺ສຕທິຏ຺ຐິຍາ ສງ຺ຄໂຫ, ນ ປນ ອຸຈ຺ເຉທທິຏ຺ຐິຍາຕິ? ຕໍຕໍສຸຂວິເສສສມງ຺ຄິຕາປຏິລທ຺ເຘນ ພນ຺ຘວິໂມກ຺ເຂນ ສຸທ຺ຘສ຺ສ ອຕ຺ຕໂນ ສກຣູເປ ອວຏ຺ຐານທີປນໂຕ.

ເສສາຕິ ເສສາ ປຎ຺ຈປຎ຺ຎາສ ທິຏ຺ຐິໂຍ. ຕາສຸ ອນ຺ຕານນ຺ຕິກວາທາທີນໍ ສສ຺ສຕທິຏ຺ຐິຠາໂວ ຕຕ຺ຖ ຕຕ຺ຖ ປກາສິໂຕເຍວ.

໑໐໑-໓. ກິໍ ປນ ກາຣຓໍ ປຸພ຺ພນ຺ຕາປຣນ຺ຕາ ເອວ ທິຏ຺ຐາຠິນິເວສສ຺ສ ວິສຍຠາເວນ ທສ຺ສິຕາ, ນ ປນ ຕທຸຠຍເມກຊ຺ຌນ຺ຕິ? ອສມ຺ຠວໂຕ. ນ ຫິ ປຸພ຺ພນ຺ຕາປຣນ຺ເຕສຸ ວິຍ ຕທຸຠຍວິນິມຸຕ຺ເຕ ມຊ຺ຌນ຺ເຕ ທິຏ຺ຐິກປ຺ປນາ ສມ຺ຠວຕິ ອິຕ຺ຕຣກາລຕ຺ຕາ, ອຖ ປນ ປຈ຺ຈຸປ຺ປນ຺ນຠໂວ ຕທຸຠຍເວມຊ຺ຌໍ, ເອວໍ ສຕິ ທິຏ຺ຐິກປ຺ປນກ຺ຂໂມ ຕສ຺ສ ອຸຠຍສຠາໂວ ປຸພ຺ພນ຺ຕາປຣນ຺ເຕສຸເຍວ ອນ຺ໂຕຄໂຘຕິ ກຖມທສ຺ສິຕໍ. ອຖ ວາ ປຸພ຺ພນ຺ຕາປຣນ຺ຕວນ຺ຕຕາຍ ‘‘ປຸພ຺ພນ຺ຕາປຣນ຺ໂຕ’’ຕິ ມຊ຺ຌນ຺ໂຕ ວຸຈ຺ຈຕິ, ໂສ ຈ ‘‘ປຸພ຺ພນ຺ຕາປຣນ຺ຕກປ຺ປິກາ ວາ ປຸພ຺ພນ຺ຕາປຣນ຺ຕານຸທິຏ຺ຐິໂນ’’ຕິ ວທນ຺ເຕນ ປຸພ຺ພນ຺ຕາປຣນ຺ເຕຫິ ວິສຸໍ ກຕ຺ວາ ວຸຕ຺ໂຕເຍວາຕິ ທຏ຺ຐພ຺ໂພ. ອຏ຺ຐກຖາຍມ຺ປິ ‘‘ສພ຺ເພປິ ເຕ ອປຣນ຺ຕກປ຺ປິເກ ປຸພ຺ພນ຺ຕາປຣນ຺ຕກປ຺ປິເກ’’ຕິ ເອເຕນ ສາມຎ຺ຎນິທ຺ເທເສນ, ເອກເສເສນ ວາ ສງ຺ຄຫິຕາຕິ ທຏ຺ຐພ຺ພໍ, ອຎ຺ຎຖາ ສງ຺ກຑ຺ຒິຕ຺ວາ ວຸຕ຺ຕວຈນສ຺ສ ອນຕ຺ຖກຕາ ອາປຊ຺ເຊຍ຺ຍາຕິ. ເກ ປນ ເຕ ປຸພ຺ພນ຺ຕາປຣນ຺ຕກປ຺ປິກາ? ເຍ ອນ຺ຕານນ຺ຕິກາ ຫຸຕ຺ວາ ທິຏ຺ຐຘມ຺ມນິພ຺ພານວາທາຕິ ເອວໍ ປກາຣາ ເວທິຕພ຺ພາ.

ເອຕ຺ຖ ຈ ‘‘ສພ຺ເພ ເຕ ອິເມເຫວ ທ຺ວາສຏ຺ຐິຍາ ວຕ຺ຖູຫິ, ເອເຕສໍ ວາ ອຎ຺ຎຕເຣນ, ນຕ຺ຖິ ອິໂຕ ພຫິທ຺ຘາ’’ຕິ ວຈນໂຕ, ປຸພ຺ພນ຺ຕກປ຺ປິກາທິຕ຺ຕຍວິນິມຸຕ຺ຕສ຺ສ ຈ ກສ຺ສຈິ ທິຏ຺ຐິຄຕິກສ຺ສ ອຠາວໂຕ ຍານິ ຕານິ ສາມຎ຺ຎຜລາທິ (ທີ. ນິ. ໑.໑໖໖) ສຸຕ຺ຕນ຺ຕເຣສຸ ວຸຕ຺ຕປ຺ປກາຣານິ ອກິຣິຍາເຫຕຸກນຕ຺ຖິກວາທາທີນິ, ຍານິ ຈ ອິສ຺ສຣປຊາປຕິປຸຣິສກາລສຠາວນິຍຕິຍທິຈ຺ຉາວາທາທິປ຺ປເຠທານິ ທິຏ຺ຐິຄຕານິ (ວິສຸທ຺ຘິ. ຏີ. ໒.໕໖໓; ວິຠ. ອນຸຏີ. ໑໘໙ ປສ຺ສິຕພ຺ພໍ) ພຫິທ຺ຘາປິ ທິສ຺ສມານານິ, ເຕສໍ ເອຕ຺ເຖວ ສງ຺ຄໂຫ, ອນ຺ໂຕຄຘຕາ ຈ ເວທິຕພ຺ພາ. ກຖໍ? ອກິຣິຍວາໂທ ຕາວ ‘‘ວຎ຺ໂຌ ກູຏຏ຺ໂຐ’’ຕິອາທິນາ ກິຣິຍາຠາວທີປນໂຕ ສສ຺ສຕວາເທ ອນ຺ໂຕຄໂຘ, ຕຖາ ‘‘ສຕ຺ຕິເມ ກາຍາ’’ຕິອາທິ (ທີ. ນິ. ໑.໑໗໔) ນຍປ຺ປວຕ຺ໂຕ ປກຸຘວາໂທ, ‘‘ນຕ຺ຖິ ເຫຕຸ ນຕ຺ຖິ ປຈ຺ຈໂຍ ສຕ຺ຕານໍ ສໍກິເລສາຍາ’’ຕິອາທິ (ທີ. ນິ. ໑.໑໖໘) ວຈນໂຕ ອເຫຕຸກວາໂທ ອຘິຈ຺ຈສມຸປ຺ປນ຺ນິກວາເທ ອນ຺ໂຕຄໂຘ. ‘‘ນຕ຺ຖິ ປໂຣ ໂລໂກ’’ຕິອາທິ (ທີ. ນິ. ໑.໑໗໑) ວຈນໂຕ ນຕ຺ຖິກວາໂທ ອຸຈ຺ເຉທວາເທ ອນ຺ໂຕຄໂຘ. ຕຖາ ຫິ ຕຕ຺ຖ ‘‘ກາຍສ຺ສ ເຠທາ ອຸຈ຺ຉິຊ຺ຊຕີ’’ຕິອາທິ (ທີ. ນິ. ໑.໘໖) ວຸຕ຺ຕໍ. ປຐເມນ ອາທິ-ສທ຺ເທນ ນິຄຓ຺ຐວາທາທໂຍ ສງ຺ຄຫິຕາ.

ຍທິປິ ປາຬິຍໍ ນາຏປຸຕ຺ຕວາທ (ທີ. ນິ. ໑.໑໗໘) ຠາເວນ ຈາຕຸຍາມສໍວໂຣ ອາຄໂຕ, ຕຖາປິ ສຕ຺ຕວຕາຕິກ຺ກເມນ ວິກ຺ເຂປວາທິຕາຍ ນາຏປຸຕ຺ຕວາໂທປິ ສຎ຺ຈຍວາໂທ ວິຍ ອມຣາວິກ຺ເຂປວາເທສຸ ອນ຺ໂຕຄໂຘ. ‘‘ຕໍ ຊີວໍ ຕໍ ສຣີຣໍ, ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ (ທີ. ນິ. ໑.໓໗໗; ມ. ນິ. ໒.໑໒໒; ສໍ. ນິ. ໒.໓໕) ເອວໍ ປກາຣາ ວາທາ ‘‘ຣູປີ ອຕ຺ຕາ ໂຫຕິ ອໂຣໂຄ ປຣໍ ມຣຓາ’’ຕິອາທິວາເທສຸ ສງ຺ຄຫໍ ຄຈ຺ຉນ຺ຕິ, ‘‘ໂຫຕິ ຕຖາຄໂຕ ປຣໍ ມຣຓາ, ‘‘ອຕ຺ຖິ ສຕ຺ຕາ ໂອປປາຕິກາ’’ຕິ ເອວໍ ປກາຣາ ສສ຺ສຕວາເທ. ‘‘ນ ໂຫຕິ ຕຖາຄໂຕ ປຣໍ ມຣຓາ, ນຕ຺ຖິ ສຕ຺ຕາ ໂອປປາຕິກາ’’ຕິ ເອວໍ ປກາຣາ ອຸຈ຺ເຉທວາເທນ ສງ຺ຄຫິຕາ. ‘‘ໂຫຕິ ຈ ນ ໂຫຕິ ຈ ຕຖາຄໂຕ ປຣໍ ມຣຓາ, ອຕ຺ຖິ ຈ ນຕ຺ຖິ ຈ ສຕ຺ຕາ ໂອປປາຕິກາ’’ຕິ ເອວໍ ປກາຣາ ເອກຈ຺ຈສສ຺ສຕວາເທ ອນ຺ໂຕຄຘາ. ‘‘ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ, ເນວຕ຺ຖິ ນ ນຕ຺ຖິ ສຕ຺ຕາ ໂອປປາຕິກາ’’ຕິ ຈ ເອວໍ ປກາຣາ ອມຣາວິກ຺ເຂປວາເທ ອນ຺ໂຕຄຘາ. ອິສ຺ສຣປຊາປຕິປຸຣິສກາລວາທາ ເອກຈ຺ຈສສ຺ສຕວາເທ ອນ຺ໂຕຄຘາ, ຕຖາ ກຓາທວາໂທ. ສຠາວນິຍຕິຍທິຈ຺ຉາວາທາ ອຘິຈ຺ຈສມຸປ຺ປນ຺ນິກວາເທນ ສງ຺ຄຫິຕາ. ອິມິນາ ນເຍນ ສຸຕ຺ຕນ຺ຕເຣສຸ, ພຫິທ຺ຘາ ຈ ທິສ຺ສມານານໍ ທິຏ຺ຐິຄຕານໍ ອິມາສຸ ທ຺ວາສຏ຺ຐິຍາ ທິຏ຺ຐີສຸ ອນ຺ໂຕຄຘຕາ ເວທິຕພ຺ພາ.

ອຊ຺ຌາສຍນ຺ຕິ ທິຏ຺ຐິຊ຺ຌາສຍໍ. ສສ຺ສຕຸຈ຺ເຉທທິຏ຺ຐິວເສນ ຫິ ສຕ຺ຕານໍ ສໍກິເລສປກ຺ເຂ ທຸວິໂຘ ອຊ຺ຌາສໂຍ, ຕຎ຺ຈ ຠຄວາ ອປຣິມາຓາສຸ ໂລກຘາຕູສຸ ອປຣິມາຓານໍ ສຕ຺ຕານໍ ອປຣິມາເຓ ເອວ ເຎຍ຺ຍວິເສເສ ອຸປ຺ປຊ຺ຊນວເສນ ອເນກເຠທຠິນ຺ນານມ຺ປິ ‘‘ຈຕ຺ຕາໂຣ ຊນາ ສສ຺ສຕວາທາ’’ຕິອາທິນາ ທ຺ວາສຏ຺ຐິຍາ ປເຠເທຫິ ສງ຺ຄຓ຺ຫນວເສນ ສພ຺ພຎ຺ຎຸຕຎ຺ຎາເຓນ ປຣິຈ຺ຉິນ຺ທິຕ຺ວາ ທສ຺ເສນ຺ໂຕ ປມາຓຠູຕາຍ ຕຸລາຍ ຘາຣຍມາໂນ ວິຍ ໂຫຕີຕິ ອາຫ ‘‘ຕຸລາຍ ຕຸລຍນ຺ໂຕ ວິຍາ’’ຕິ. ຕຖາ ຫິ ວກ຺ຂຕິ ‘‘ອນ຺ໂຕ ຊາລີກຕາ’’ຕິອາທິ (ທີ. ນິ. ໑.໑໔໖). ‘‘ສິເນຣຸປາທໂຕ ວາລຸກໍ ອຸທ຺ຘຣນ຺ໂຕ ວິຍາ’’ຕິ ເອເຕນ ສພ຺ພຎ຺ຎຸຕຎ຺ຎາຓໂຕ ອຎ຺ຎສ຺ສ ອິມິສ຺ສາ ເທສນາຍ ອສກ຺ກຸເຓຍ຺ຍຕໍ ທສ຺ເສຕິ.

ອນຸສນ຺ຘານໍ ອນຸສນ຺ຘິ, ປຸຈ຺ຉາຍ ກໂຕ ອນຸສນ຺ຘິ ປຸຈ຺ຉານຸສນ຺ຘິ. ອຖ ວາ ອນຸສນ຺ຘຍຕີຕິ ອນຸສນ຺ຘິ, ປຸຈ຺ຉາ ອນຸສນ຺ຘິ ເອຕສ຺ສາຕິ ປຸຈ຺ຉານຸສນ຺ຘິ. ປຸຈ຺ຉາຍ ອນຸສນ຺ຘິຍຕີຕິ ວາ ປຸຈ຺ຉານຸສນ຺ຘິ. ອຊ຺ຌາສຍານຸສນ຺ຘິມ຺ຫິປິ ເອເສວ ນໂຍ. ຍຖານຸສນ຺ຘີຕິ ເອຕ຺ຖ ປນ ອນຸສນ຺ຘີຍຕີຕິ ອນຸສນ຺ຘິ, ຍາ ຍາ ອນຸສນ຺ຘິ ຍຖານຸສນ຺ຘິ, ອນຸສນ຺ຘິອນຸຣູປໍ ວາ ຍຖານຸສນ຺ຘີຕິ ສທ຺ທຕ຺ໂຖ ເວທິຕພ຺ໂພ, ໂສ ‘‘ເຍນ ປນ ຘມ຺ເມນ ອາທິມ຺ຫິ ເທສນາ ອຸຏ຺ຐິຕາ, ຕສ຺ສ ຘມ຺ມສ຺ສ ອນຸຣູປຘມ຺ມວເສນ ວາ ປຏິປກ຺ຂວເສນ ວາ ເຍສຸ ສຸຕ຺ເຕສຸ ອຸປຣິ ເທສນາ ອາຄຈ຺ຉຕິ, ເຕສໍ ວເສນ ຍຖານຸສນ຺ຘິ ເວທິຕພ຺ໂພ. ເສຍ຺ຍຖິທໍ? ອາກງ຺ເຂຍ຺ຍສຸຕ຺ເຕ (ມ. ນິ. ໑.໖໔-໖໙) ເຫຏ຺ຐາ ສີເລນ ເທສນາ ອຸຏ຺ຐິຕາ, ອຸປຣິ ຉ ອຠິຎ຺ຎາ ອາຄຕາ…ເປ… ກກຈູປເມ (ມ. ນິ. ໑.໒໒໒) ເຫຏ຺ຐາ ອກ຺ຂນ຺ຕິຍາ ອຸຏ຺ຐິຕາ, ອຸປຣິ ກກຈູປມາ ອາຄຕາ’’ຕິອາທິນາ ອຏ຺ຐກຖາຍໍ (ທີ. ນິ. ອຏ຺ຐ. ໑.໑໐໐-໑໐໔) ວຸຕ຺ໂຕ.

ອິຕິ ກິຣາຕິ ຠຄວໂຕ ຍຖາເທສິຕາຍ ອຕ຺ຕສຸຎ຺ຎຕາຍ ອຕ຺ຕໂນ ອຣຸຈ຺ຈນຠາວທີປນໍ. ໂຠຕິ ຘມ຺ມາລປນໍ. ອນຕ຺ຕກຕານີຕິ ອຕ຺ຕນາ ນ ກຕານິ, ອນຕ຺ຕເກຫິ ວາ ຂນ຺ເຘຫິ ກຕານິ. ກມຕ຺ຕານໍ ຜຸສິສ຺ສນ຺ຕີຕິ ອສຕິ ອຕ຺ຕນິ ຂນ຺ຘານຎ຺ຈ ຂຓິກຕ຺ຕາ ກມ຺ມານິ ກໍ ອຕ຺ຕານໍ ອຕ຺ຕໂນ ຜເລນ ຜຸສິສ຺ສນ຺ຕິ, ໂກ ກມ຺ມຜລໍ ປຏິສໍເວເທຕີຕິ ອຕ຺ໂຖ. ອວິທ຺ວາຕິ ສຸຕາທິວິຣເຫນ ອຣິຍຘມ຺ມສ຺ສ ອໂກວິທຕາຍ ນ ວິທ຺ວາ. ອວິຊ຺ຊາຄໂຕຕິ ອວິຊ຺ຊາຍ ອຸປຄໂຕ, ອຣິຍຘມ຺ເມ ອວິນີຕຕາຍ ອປ຺ປຫີນາວິຊ຺ໂຊຕິ ອຕ຺ໂຖ. ຕຓ຺ຫາຘິປເຕຍ຺ເຍນ ເຈຕສາຕິ ‘‘ຍທິ ອຫໍ ນາມ ໂກຈິ ນຕ຺ຖິ, ມຍາ ກຕສ຺ສ ກມ຺ມສ຺ສ ໂກ ຜລໍ ປຏິສໍເວເທຕິ, ສຕິ ປນ ຕສ຺ມິໍ ສິຍາ ຜລູປໂຠໂຄ’’ຕິ ຕຓ຺ຫາຘິປຕິໂຕ ອາຄໂຕ ຕຓ຺ຫາຘິປເຕຍ຺ໂຍ, ເຕນ. ອຕ຺ຕວາທຸປາທານສຫຄຕ ເຈຕສາ. ອຕິຘາວິຕພ຺ພນ຺ຕິ ຂຓິກຕ຺ເຕປິ ສງ຺ຂາຣານໍ ຍສ຺ມິໍ ສນ຺ຕາເນ ກມ຺ມໍ ກຕໍ, ຕຕ຺ເຖວ ຜລຸປ຺ປຕ຺ຕິໂຕ ຘມ຺ມປຸຎ຺ຊມຕ຺ຕສ຺ເສວ ຈ ສິທ຺ເຘ ກມ຺ມຜລສມ຺ພນ຺ເຘ ເອກຕ຺ຕນຍໍ ມິຈ຺ຉາ ຄເຫຕ຺ວາ ເອເກນ ກາຣກເວທກຠູເຕນ ຠວິຕພ຺ພໍ, ອຎ຺ຎຖາ ‘‘ກມ຺ມຜລານໍ ສມ຺ພນ຺ໂຘ ນ ສິຍາ’’ຕິ ອຕ຺ຕຕ຺ຕນິຍສຸຎ຺ຎຕາປກາສນໍ ສຕ຺ຖຸສາສນໍ ອຕິກ຺ກມິຕພ຺ພໍ ມຎ຺ເຎຍ຺ຍາຕິ ອຕ຺ໂຖ.

‘‘ອຸປຣິ ຉ ອຠິຎ຺ຎາ ອາຄຕາ’’ຕິ ອນຸຣູປຘມ຺ມວເສນ ຍຖານຸສນ຺ຘິໍ ທສ຺ເສຕິ, ອິຕເຣຫິ ປຏິປກ຺ຂວເສນ. ກິເລເສນາຕິ ‘‘ໂລໂຠ ຈິຕ຺ຕສ຺ສ ອຸປກ຺ກິເລໂສ’’ຕິອາທິນາ ກິເລສວເສນ. ອິມສ຺ມິມ຺ປີຕິ ປິ-ສທ຺ເທນ ຍຖາ ວຸຕ຺ຕສຸຕ຺ຕາທີສຸ ປຏິປກ຺ຂວເສນ ຍຖານຸສນ຺ຘິ, ເອວໍ ອິມສ຺ມິມ຺ປິ ສຸຕ຺ເຕຕິ ທສ຺ເສຕິ. ຕຖາ ຫິ ນິຈ຺ຈສາຣາທິປຎ຺ຎາປການໍ ທິຏ຺ຐິຄຕານໍ ວເສນ ອຸຏ຺ຐິຕາ ອຍໍ ເທສນາ ນິຈ຺ຈສາຣາທິສຸຎ຺ຎຕາປກາສເນນ ນິຏ຺ຐາປິຕາຕິ.