ປຣິຕສ຺ສິຕວິປ຺ຜນ຺ທິຕວາຣວຓ຺ຓນາ

໑໐໕-໑໑໗. ມຣິຍາທວິຠາຄທສ຺ສນຕ຺ຖນ຺ຕິ ສສ຺ສຕາທິທິຏ຺ຐິທສ຺ສນສ຺ສ ສມ຺ມາທສ຺ສເນນ ສງ຺ກຣາຠາວວິຠາວນຕ຺ຖໍ. ຕທປິ ເວທຍິຕນ຺ຕິ ສມ຺ພນ຺ໂຘ. ອຊານຕໍ ອປສ຺ສຕນ຺ຕິ ‘‘ສສ຺ສໂຕ ອຕ຺ຕາ ຈ ໂລໂກ ຈາ’’ຕິ ‘‘ອິທໍ ທິຏ຺ຐິຏ຺ຐານໍ ເອວໍຄຫິກໍ ເອວໍປຣາມຏ຺ຐໍ ເອວໍຄຫິຕໍ ໂຫຕິ ເອວໍອຠິສມ຺ປຣາຍ’’ນ຺ຕິ ຍຖາຠູຕໍ ອຊານນ຺ຕານໍ ອປສ຺ສນ຺ຕານໍ. ຕຖາ ຍສ຺ມິໍ ເວທຍິເຕ ອວີຕຕຓ຺ຫຕາຍ ເອວໍ ທິຏ຺ຐິຄຕໍ ອຸປາທິຍນ຺ຕິ, ຕໍ ເວທຍິຕໍ ສມຸທຍາທິໂຕ ຍຖາຠູຕໍ ອຊານນ຺ຕານໍ ອປສ຺ສນ຺ຕານໍ, ເອເຕນ ອນາວຣຓຎາຓສມນ຺ຕຈກ຺ຂູຫິ ຍຖາ ຕຖາຄຕານໍ ຍຖາຠູຕເມຕ຺ຖ ຎາຓທສ຺ສນໍ, ນ ເອວໍ ທິຏ຺ຐິຄຕິການໍ, ອຖ ໂຂ ຕຓ຺ຫາທິຏ຺ຐິປຣາມາໂສເຍວາຕິ ທສ຺ເສຕິ. ເຕເນວ ຈາຍໍ ເທສນາ ມຣິຍາທວິຠາຄທສ຺ສນຕ຺ຖາ ຊາຕາ. ອຏ຺ຐກຖາຍໍ ປນ ‘‘ຍຖາຠູຕໍ ຘມ຺ມານໍ ສຠາວໍ ອຊານນ຺ຕານໍ ອປສ຺ສນ຺ຕານ’’ນ຺ຕິ ອວິເສເສນ ວຸຕ຺ຕໍ. ນ ຫິ ສງ຺ຂຕຘມ຺ມສຠາວໍ ອຊານນມຕ຺ເຕນ ມິຈ຺ຉາ ອຠິນິວິສນ຺ຕີຕິ. ສາມຎ຺ຎໂຊຕນາ ວິເສເສ ອວຕິຏ຺ຐຕີຕິ ອຍໍ ວິເສສໂຍຊນາ ກຕາ. ເວທຍິຕນ຺ຕິ ‘‘ສສ຺ສໂຕ ອຕ຺ຕາ ຈ ໂລໂກ ຈາ’’ຕິ ທິຏ຺ຐິປຎ຺ຎາປນວເສນ ປວຕ຺ຕໍ ທິຏ຺ຐິຍາ ອນຸຠູຕໍ ອນຸຠວນໍ. ຕຓ຺ຫາຄຕານນ຺ຕິ ຕຓ຺ຫາຍ ຄຕານໍ ອຸປຄຕານໍ, ປວຕ຺ຕານໍ ວາ. ຕຎ຺ຈ ໂຂ ປເນຕນ຺ຕິ ຈ ຍຖາວຸຕ຺ຕໍ ເວທຍິຕໍ ປຈ຺ຈາມສຕິ. ຕຎ຺ຫິ ວຏ຺ຏາມິສຠູຕໍ ທິຏ຺ຐິຕຓ຺ຫາສລ຺ລານຸວິທ຺ຘຕາຍ ສອຸພ຺ພິລຕ຺ຕາ ຈຎ຺ຈລໍ, ນ ມຄ຺ຄຜລສຸຂໍ ວິຍ ເອກຣູເປນ ອວຕິຏ຺ຐຕີຕິ. ເຕເນວາຫ ‘‘ປຣິຕສ຺ສິເຕນາ’’ຕິອາທິ.

ອຖ ວາ ເອວໍ ວິເສສກາຣຓໂຕ ທ຺ວາສຏ຺ຐິ ທິຏ຺ຐິຄຕານິ ວິຠຊິຕ຺ວາ ອິທານິ ອວິເສສກາຣຓໂຕ ຕານິ ທສ຺ເສຕຸໍ ‘‘ຕຕ຺ຣ ຠິກ຺ຂເວ’’ຕິອາທິກາ ເທສນາ ອາຣທ຺ຘາ. ສພ຺ເພສຎ຺ຫິ ທິຏ຺ຐິຄຕິການໍ ເວທນາ ອວິຊ຺ຊາ ຕຓ຺ຫາ ຈ ອວິສິຏ຺ຐກາຣນ຺ຕິ. ຕຕ຺ຖ ຕທປີຕິ ‘‘ສສ຺ສຕໍ ອຕ຺ຕານຎ຺ຈ ໂລກຎ຺ຈ ປຎ຺ຎເປນ຺ຕິ’’ຕິ ເອຕ຺ຖ ຍເທຕໍ ‘‘ສສ຺ສໂຕ ອຕ຺ຕາ ຈ ໂລໂກ ຈາ’’ຕິ ປຎ຺ຎາປນໍ, ຕທປິ. ສຸຂາທິເຠທໍ ຕິວິຘເວທຍິຕໍ ຍຖາກ຺ກມໍ ທຸກ຺ຂສລ຺ລານິຈ຺ຈໂຕ, ອວິເສເສນ ສມຸທຍຕ຺ຖງ຺ຄມສ຺ສາທາທີນວນິສ຺ສຣຓໂຕ ວາ ຍຖາຠູຕໍ ອຊານນ຺ຕານໍ ອປສ຺ສນ຺ຕານໍ, ຕໂຕ ເອວ ຈ ສຸຂາທິປຕ຺ຖນາສມ຺ຠວໂຕ ຕຓ຺ຫາຍ ອຸປຄຕຕ຺ຕາ ຕຓ຺ຫາຄຕານໍ ຕຓ຺ຫາປຣິຕສ຺ສິເຕນ ທິຏ຺ຐິວິປ຺ຜນ຺ທິຕເມວ ທິຏ຺ຐິຈລນເມວ, ‘‘ອສຕິ ອຕ຺ຕນິ ໂກ ເວທນໍ ອນຸຠວຕີ’’ຕິ ກາຍວຈີທ຺ວາເຣສຸ ທິຏ຺ຐິຍາ ໂຈປນປ຺ປຕ຺ຕິມຕ຺ຕເມວ ວາ, ນ ປນ ທິຏ຺ຐິຍາ ປຎ຺ຎາເປຕພ຺ໂພ ສສ຺ສໂຕ ໂກຈິ ຘມ຺ໂມ ອຕ຺ຖີຕິ ອຕ຺ໂຖ. ເອກຈ຺ຈສສ຺ສຕວາທາທີສຸປິ ເອເສວ ນໂຍ.