ອສຎ຺ຎີ ເນວສຎ຺ຎີນາສຎ຺ຎີວາທວຓ຺ຓນາ

໗໘-໘໓. ອສຎ຺ຎີວາເທ ອສຎ຺ຎຠເວ ນິພ຺ພຕ຺ຕສຕ຺ຕວເສນ ປຐມວາໂທ, ‘‘ສຎ຺ຎໍ ອຕ຺ຕໂຕ ສມນຸປສ຺ສຕີ’’ຕິ ເອຕ຺ຖ ວຸຕ຺ຕນເຍນ ສຎ຺ຎໍເຍວ ‘‘ອຕ຺ຕາ’’ຕິ ຄເຫຕ຺ວາ ຕສ຺ສ ກິຎ຺ຈນຠາເວນ ຐິຕາຍ ອຎ຺ຎາຍ ສຎ຺ຎາຍ ອຠາວໂຕ ‘‘ອສຎ຺ຎີ’’ຕິ ປວຕ຺ໂຕ ທຸຕິຍວາໂທ, ຕຖາ ສຎ຺ຎາຍ ສຫ ຣູປຘມ຺ເມ, ສພ຺ເພ ເອວ ວາ ຣູປາຣູປຘມ຺ເມ ‘‘ອຕ຺ຕາ’’ຕິ ຄເຫຕ຺ວາ ປວຕ຺ໂຕ ຕຕິຍວາໂທ, ຕກ຺ກຄາຫວເສເນວ ຈຕຸຕ຺ຖວາໂທ ປວຕ຺ໂຕ. ຕສ຺ສ ປຸພ຺ເພ ວຸຕ຺ຕນເຍເນວ ອຕ຺ໂຖ ເວທິຕພ຺ໂພ. ທຸຕິຍຈຕຸກ຺ເກປິ ກສິຓຣູປສ຺ສ ອສຎ຺ຊານນສຠາວຕາຍ ອສຎ຺ຎີຕິ ກຕ຺ວາ ອນ຺ຕານນ຺ຕິກວາເທ ວຸຕ຺ຕນເຍເນວ ຈຕ຺ຕາໂຣປິ ເວທິຕພ຺ພາ. ຕຖາ ເນວສຎ຺ຎີນາສຎ຺ຎີວາເທປິ ເນວສຎ຺ຎີນາສຎ຺ຎີຠເວ ນິພ຺ພຕ຺ຕສຕ຺ຕສ຺ເສວ ຈຸຕິປຏິສນ຺ຘີສຸ, ສພ຺ພຕ຺ຖ ວາ ປຏຸສຎ຺ຎາກິຈ຺ຈໍ ກາຕຸໍ ອສມຕ຺ຖາຍ ສຸຂຸມາຍ ສຎ຺ຎາຍ ອຕ຺ຖິຠາວປຏິຊານນວເສນ ປຐມວາໂທ, ອສຎ຺ຎີວາເທ ວຸຕ຺ຕນເຍນ ສຸຂຸມາຍ ສຎ຺ຎາຍ ວເສນ, ສຎ຺ຊານນສຠາວຕາປຏິຊາເນນ ຈ ທຸຕິຍວາທາທໂຍ ປວຕ຺ຕາຕິ ເອວໍ ເອເກນ ປກາເຣນ ສຕິປິ ກາຣຓປຣິເຍສນສ຺ສ ສມ຺ຠເວ ທິຏ຺ຐິຄຕິກວາທານໍ ອນາທຣຓີຍຠາວທສ຺ສນຕ຺ຖໍ ‘‘ຕຕ຺ຖ ນ ເອກນ຺ເຕນ ກາຣຓໍ ປຣິເຍສິຕພ຺ພ’’ນ຺ຕິ ວຸຕ຺ຕນ຺ຕິ ທຏ຺ຐພ຺ພໍ. ເອເຕສຎ຺ຈ ສຎ຺ຎີອສຎ຺ຎີເນວສຎ຺ຎີນາສຎ຺ຎີວາທານໍ ‘‘ອໂຣໂຄ ປຣໍ ມຣຓາ’’ຕິ ວຈນໂຕ ສສ຺ສຕທິຏ຺ຐິສງ຺ຄໂຫ ປາກໂຏເຍວ.