ວິຎ຺ຎາຓປທນິທ຺ເທສວຓ຺ຓນາ
໒໒໗. ຍຖາວຸຕ຺ຕສງ຺ຂາຣປຈ຺ຈຍາ ອຸປ຺ປຊ຺ຊມານໍ ຕໍກມ຺ມນິພ຺ພຕ຺ຕເມວ ວິຎ຺ຎາຓໍ ຠວິຕຸໍ ອຣຫຕີຕິ ‘‘ພາຕ຺ຕິໍສ ໂລກິຍວິປາກວິຎ຺ຎາຓານິ ສງ຺ຄຫິຕານິ ໂຫນ຺ຕີ’’ຕິ ອາຫ. ຘາຕຸກຖາຍໍ (ຘາຕຸ. ໔໖໖) ປນ ວິປ຺ປຍຸຕ຺ເຕນສງ຺ຄຫິຕາສງ຺ຄຫິຕປທນິທ຺ເທເສ –
‘‘ສງ຺ຂາຣປຈ຺ຈຍາ ວິຎ຺ຎາເຓນ ເຍ ຘມ຺ມາ…ເປ… ສຬາຍຕນປຈ຺ຈຍາ ຜສ຺ເສນ, ຜສ຺ສປຈ຺ຈຍາ ເວທນາຍ ເຍ ຘມ຺ມາ ວິປ຺ປຍຸຕ຺ຕາ, ເຕ ຘມ຺ມາ ກຕິຫິ ຂນ຺ເຘຫິ…ເປ… ສງ຺ຄຫິຕາ? ເຕ ຘມ຺ມາ ອສງ຺ຂຕໍ ຂນ຺ຘໂຕ ຐເປຕ຺ວາ ເອເກນ ຂນ຺ເຘນ ເອກາທສຫາຍຕເນຫິ ເອກາທສຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ຈຕູຫິ ຂນ຺ເຘຫິ ເອເກນາຍຕເນນ ສຕ຺ຕຫິ ຘາຕູຫິ ອສງ຺ຄຫິຕາ’’ຕິ –
ວຈນໂຕ ສພ຺ພວິຎ຺ຎາຓຜສ຺ສເວທນາປຣິຄ຺ຄໂຫ ກໂຕ. ຍທິ ຫິ ເອຕ຺ຖ ວິຎ຺ຎາຓຜສ຺ສເວທນາ ສປ຺ປເທສາ ສິຍຸໍ, ‘‘ວິປາກາ ຘມ຺ມາ’’ຕິ ອິມສ຺ສ ວິຍ ວິສ຺ສຊ຺ຊນໍ ສິຍາ, ຕສ຺ມາ ຕຕ຺ຖ ອຠິຘມ຺ມຠາຊນີຍວເສນ ສງ຺ຂາຣປຈ຺ຈຍາ ວິຎ຺ຎາຓາທໂຍ ຄຫິຕາຕິ ເວທິຕພ຺ພາ. ອວິຊ຺ຊາປຈ຺ຈຍາ ສງ຺ຂາຣາ ຈ ອຠິຘມ຺ມຠາຊນີເຍ ຈຕຸຠູມກກຸສລສງ຺ຂາໂຣ ອກຸສລສງ຺ຂາໂຣ ຈ ວຸຕ຺ໂຕຕິ ໂສ ເອວ ຘາຕຸກຖາຍໍ ຄຫິໂຕຕິ ທຏ຺ຐພ຺ໂພ. ຠໂວ ປນ ຘາຕຸກຖາຍໍ ກມ຺ມຸປປຕ຺ຕິຠວວິເສສທສ຺ສນຕ຺ຖໍ ນ ອຠິຘມ຺ມຠາຊນີຍວເສນ ຄຫິໂຕ. ເອວຎ຺ຈ ກຕ຺ວາ ຕຕ຺ຖ ‘‘ອຸປາທານປຈ຺ຈຍາ ຠໂວ’’ຕິ ອນຸທ຺ຘຣິຕ຺ວາ ‘‘ກມ຺ມຠໂວ’’ຕິອາທິນາວ ນເຍນ ຠໂວ ອຸທ຺ຘໂຏ. ວິປາກຎ຺ເຫຕນ຺ຕິ ວິຎ຺ຎາຓສ຺ສ ວິປາກຕ຺ຕາ ສງ຺ຂາຣປຈ຺ຈຍຕ຺ຕໍ ສາເຘຕິ, ຕສ຺ສ ປນ ສາຘນຕ຺ຖໍ ‘‘ອຸປຈິຕກມ຺ມາຠາເວ ວິປາກາຠາວໂຕ’’ຕິ ວຸຕ຺ຕນ຺ຕິ ຕໍ ວິວຣນ຺ໂຕ ‘‘ວິປາກຎ຺ຈາ’’ຕິອາທິມາຫ.
ເຍຠຸຍ຺ເຍນ ໂລຠສມ຺ປຍຸຕ຺ຕຊວນາວສາເນຕິ ຊວເນນ ຕທາຣມ຺ມຓນິຍເມ ໂສມນສ຺ສສຫຄຕານນ຺ຕຣໍ ໂສມນສ຺ສສຫຄຕຕທາຣມ຺ມຓສ຺ສ ວຸຕ຺ຕຕ຺ຕາ ໂສມນສ຺ສສຫຄຕາເນວ ສນ຺ຘາຍ ວຸຕ຺ຕນ຺ຕິ ເວທິຕພ຺ພໍ. ຍສ຺ມາ ປນ ຕິເຫຕຸກຊວນາວສາເນ ຈ ກທາຈິ ອເຫຕຸກໍ ຕທາຣມ຺ມຓໍ ໂຫຕິ, ຕສ຺ມາ ‘‘ເຍຠຸຍ຺ເຍນາ’’ຕິ ອາຫ. ສກິໍ ວາຕິ ‘‘ທິຣຕ຺ຕຕິຣຕ຺ຕາ’’ທີສຸ ວິຍ ເວທິຕພ຺ພໍ. ທ຺ວິກ຺ຂຕ຺ຕຸເມວ ປນ ອຸປ຺ປຊ຺ຊນ຺ຕີຕິ ວທນ຺ຕິ. ‘‘ທິຣຕ຺ຕຕິຣຕ຺ຕ’’ນ຺ຕິ ເອຕ຺ຖ ປນ ວາ-ສທ຺ທສ຺ສ ອຠາວາ ວຈນສິລິຏ຺ຐຕາມຕ຺ເຕນ ທິຣຕ຺ຕຄ຺ຄຫຓໍ ກຕນ຺ຕິ ຍຸຊ຺ຊຕິ, ‘‘ນິຣນ຺ຕຣຕິຣຕ຺ຕທສ຺ສນຕ຺ຖໍ ວາ’’ຕິ. ອິຘ ປນ ວາ-ສທ຺ໂທ ວິກປ຺ປນຕ຺ໂຖ ວຸຕ຺ໂຕຕິ ສກິໍ ເອວ ຈ ກທາຈິ ປວຕ຺ຕິໍ ສນ຺ຘາຍ ‘‘ສກິໍ ວາ’’ຕິ ວຸຕ຺ຕນ຺ຕິ ທຏ຺ຐພ຺ພໍ. ເຕເນວ ຫິ ສກິໍ ຕທາຣມ຺ມຓປ຺ປວຕ຺ຕິຍາ ວິຈາເຣຕພ຺ພຕໍ ທສ຺ເສນ຺ໂຕ ‘‘ຈິຕ຺ຕປ຺ປວຕ຺ຕິຄຓນາຍໍ ປນາ’’ຕິອາທິມາຫ. ຕຕ຺ຖ ຈິຕ຺ຕປ຺ປວຕ຺ຕິຄຓນາຍນ຺ຕິ ວິປາກກຖາຍໍ ພລວຣູປາທິເກ ອາຣມ຺ມເຓ ວຸຕ຺ຕໍ ຈິຕ຺ຕປ຺ປວຕ຺ຕິຄຓນໍ ສນ຺ຘາຍາຫ. ຕຕ຺ຖ ຫິ ທ຺ເວວ ຕທາຣມ຺ມຓຸປ຺ປຕ຺ຕິວາຣາ ອາຄຕາ. ຊວນວິສຍານຸຠວນຎ຺ຫິ ຕທາຣມ຺ມຓໍ ອາສນ຺ນເຠເທ ຕສ຺ມິໍ ວິສເຍ ເອກຈິຕ຺ຕກ຺ຂຓາວສິຏ຺ຐາຍຸເກ ນ ອຸປ຺ປຊ຺ເຊຍ຺ຍາຕິ ອຘິປ຺ປາໂຍ. ອນຸຣູປາຍ ປຏິສນ຺ຘິຍາຕິ ອກຸສລວິປາກສ຺ສ ອປາຍປຏິສນ຺ຘິ, ກາມາວຈຣາທິກຸສລວິປາການໍ ກາມຣູປາຣູປສຸຄຕິປຏິສນ຺ຘິໂຍ ຍຖາກມ຺ມໍ ອນຸຣູປາ.
ປຏິສນ຺ຘິກຖາ ມຫາວິສຍາຕິ ກຕ຺ວາ ປວຕ຺ຕິເມວ ຕາວ ທສ຺ເສນ຺ໂຕ ‘‘ປວຕ຺ຕິຍໍ ປນາ’’ຕິອາທິມາຫ. ອເຫຕຸກທ຺ວຍາທີນໍ ທ຺ວາຣນິຍມານິຍມາວຈນໍ ຠວງ຺ຄຠູຕານໍ ສຍເມວ ທ຺ວາຣຕ຺ຕາ ຈຸຕິປຏິສນ຺ຘິຠູຕານຎ຺ຈ ຠວງ຺ຄສງ຺ຂາເຕນ ອຎ຺ເຎນ ຈ ທ຺ວາເຣນ ອນຸປ຺ປຕ຺ຕິໂຕ ນິຍຕໍ ອນິຍຕໍ ວາ ທ຺ວາຣໍ ເອເຕສນ຺ຕິ ວຕ຺ຕຸໍ ອສກ຺ກຸເຓຍ຺ຍຕ຺ຕາ. ເອກສ຺ສ ສຕ຺ຕສ຺ສ ປວຕ຺ຕຣູປາວຈຣວິປາໂກ ປຖວີກສິຓາທີສຸ ຍສ຺ມິໍ ອາຣມ຺ມເຓ ປວຕ຺ໂຕ, ຕໂຕ ອຎ຺ຎສ຺ມິໍ ຕສ຺ສ ປວຕ຺ຕິ ນຕ຺ຖີຕິ ຣູປາວຈຣານໍ ນິຍຕາຣມ຺ມຓຕາ ວຸຕ຺ຕາ. ຕຕ຺ຣສ຺ສາຕິ ປວຕ຺ຕິຍໍ ພາຕ຺ຕິໍສວິຘສ຺ສ.
ອິນ຺ທ຺ຣິຍປ຺ປວຕ຺ຕິອານຸຠາວໂຕ ເອວ ຈກ຺ຂຸໂສຕທ຺ວາຣເຠເທນ, ຕສ຺ສ ຈ ວິຎ຺ຎາຓວີຖິເຠທາຍຕ຺ຕຕ຺ຕາ ວີຖິເຠເທນ ຈ ຠວິຕພ຺ພໍ, ຕສ຺ມິຎ຺ຈ ສຕິ ‘‘ອາວຊ຺ຊນານນ຺ຕຣໍ ທສ຺ສນໍ ສວນໍ ວາ ຕທນນ຺ຕຣໍ ສມ຺ປຏິຈ຺ຉນ’’ນ຺ຕິອາທິນາ ຈິຕ຺ຕນິຍເມນ ຠວິຕພ຺ພໍ. ຕຖາ ຈ ສຕິ ສມ຺ປຏິຈ຺ຉນສນ຺ຕີຣຓານມ຺ປິ ຠາໂວ ສິທ຺ໂຘ ໂຫຕິ, ນ ອິນ຺ທ຺ຣິຍປ຺ປວຕ຺ຕິອານຸຠາເວນ ທສ຺ສນສວນມຕ຺ຕສ຺ເສວ, ນາປິ ອິນ຺ທ຺ຣິຍານໍ ເອວ ທສ຺ສນສວນກິຈ຺ຈຕາຕິ ອິມມຕ຺ຖໍ ທສ຺ເສນ຺ໂຕ ອາຫ ‘‘ທ຺ວາຣວີຖິເຠເທ ຈິຕ຺ຕນິຍມໂຕ ຈາ’’ຕິ. ປຐມກຸສເລນ ເຈ ຕທາຣມ຺ມຓສ຺ສ ອຸປ຺ປຕ຺ຕິ ໂຫຕິ, ຕໍ ປຐມກຸສລານນ຺ຕຣໍ ອຸປ຺ປຊ຺ຊມານໍ ຊນກໍ ອນຸພນ຺ຘຕິ ນາມ, ທຸຕິຍກຸສລາທິອນນ຺ຕຣໍ ອຸປ຺ປຊ຺ຊມານໍ ຊນກສທິສໍ ອນຸພນ຺ຘຕິ ນາມ, ອກຸສລານນ຺ຕຣໍ ອຸປ຺ປຊ຺ຊມານຎ຺ຈ ກາມາວຈຣຕາຍ ຊນກສທິສນ຺ຕິ.
ເອກາທສ ຕທາຣມ຺ມຓຈິຕ຺ຕານິ…ເປ… ຕທາຣມ຺ມຓໍ ນ ຄຓ຺ຫນ຺ຕີຕິ ຕທາຣມ຺ມຓຠາວຕາຍ ‘‘ຕທາຣມ຺ມຓ’’ນ຺ຕິ ລທ຺ຘນາມານິ ຕທາຣມ຺ມຓຠາວໍ ນ ຄຓ຺ຫນ຺ຕິ, ຕທາຣມ຺ມຓຠາເວນ ນປ຺ປວຕ຺ຕນ຺ຕີຕິ ອຕ຺ໂຖ. ອຖ ວາ ນາມໂຄຕ຺ຕໍ ອາຣພ຺ຠ ຊວເນ ຊວິເຕ ຕທາຣມ຺ມຓໍ ຕສ຺ສ ຊວນສ຺ສ ອາຣມ຺ມຓໍ ນ ຄຓ຺ຫນ຺ຕິ, ນາລມ຺ພນ຺ຕີຕິ ອຕ຺ໂຖ. ຣູປາຣູປຘມ຺ເມຕິ ຣູປາຣູປາວຈເຣ ຘມ຺ເມ. ອິທໍ ປນ ວຕ຺ວາ ‘‘ອຠິຎ຺ຎາຎາຓໍ ອາຣພ຺ຠາ’’ຕິ ວິເສສນໍ ປຣິຕ຺ຕາທິອາຣມ຺ມຓຕາຍ ກາມາວຈຣສທິເສສຸ ເຈວ ຕທາຣມ຺ມຓານຸປ຺ປຕ຺ຕິທສ຺ສນຕ຺ຖໍ. ມິຈ຺ຉຕ຺ຕນິຍຕາ ຘມ຺ມາ ມຄ຺ໂຄ ວິຍ ຠາວນາຍ ສິທ຺ຘາ ມຫາພລາ ຈາຕິ ຕຕ຺ຖ ຊວເນນ ປວຕ຺ຕມາເນນ ສານຸພນ຺ຘເນນ ນ ຠວິຕພ຺ພນ຺ຕິ ເຕສຸ ຕທາຣມ຺ມຓໍ ປຏິກ຺ຂິຕ຺ຕໍ. ໂລກຸຕ຺ຕຣຘມ຺ເມ ອາຣພ຺ຠາຕິ ເອເຕເນວ ສິທ຺ເຘ ‘‘ສມ຺ມຕ຺ຕນິຍຕຘມ຺ເມສູ’’ຕິ ວິສຸໍ ອຸທ຺ຘຣຓໍ ສມ຺ມຕ຺ຕມິຈ຺ຉຕ຺ຕນິຍຕຘມ຺ມານໍ ອຎ຺ຎມຎ຺ຎປຏິປກ຺ຂາຕິ ພລວຠາເວນ ຕທາຣມ຺ມຓສ຺ສ ອວຕ຺ຖຸຠາວທສ຺ສນຕ຺ຖໍ.
ເອວໍ ປວຕ຺ຕິຍໍ ວິຎ຺ຎາຓປ຺ປວຕ຺ຕິໍ ທສ຺ເສຕ຺ວາ ປຏິສນ຺ຘິຍໍ ທສ຺ເສຕຸໍ ‘‘ຍໍ ປນ ວຸຕ຺ຕ’’ນ຺ຕິອາທິມາຫ. ເກນ ກຕ຺ຖາຕິ ເກນ ຈິຕ຺ເຕນ ກສ຺ມິໍ ຠເວ. ເອກູນວີສຕິ ປຏິສນ຺ຘິໂຍ ເຕນ ເຕນ ຈິຕ຺ເຕນ ປວຕ຺ຕມານາ ປຏິສນ຺ຘິກ຺ຂເຓ ຣູປາຣູປຘມ຺ມາຕິ ເຕນ ເຕນ ຈິຕ຺ເຕນ ສາ ສາ ຕຕ຺ຖ ຕຕ຺ຖ ປຏິສນ຺ຘິ ໂຫຕີຕິ ວຸຕ຺ຕາ. ຕສ຺ສາຕິ ຈິຕ຺ຕສ຺ສ.
ອາຄນ຺ຕ຺ວາຕິ ອາຄຕໍ ວິຍ ຫຸຕ຺ວາ. ໂຄປກສີວລີຕິ ຣຎ຺ໂຎ ຫິຕາຣກ຺ເຂ ໂຄປກກຸເລ ຊາໂຕ ສີວລິນາມໂກ. ກມ຺ມາທິອນຸສ຺ສຣຓພ຺ຍາປາຣຣຫິຕຕ຺ຕາ ‘‘ສມ຺ມູຬ຺ຫກາລກິຣິຍາ’’ຕິ ວຸຕ຺ຕາ. ອພ຺ຍາປາເຣເນວ ຫິ ຕຕ຺ຖ ກມ຺ມາທິອຸປຏ຺ຐານໍ ໂຫຕີຕິ. ‘‘ປິສິຍມານາຍ ມກ຺ຂິກາຍ ປຐມໍ ກາຍທ຺ວາຣາວຊ຺ຊນໍ ຠວງ຺ຄໍ ນາວຏ຺ເຏຕິ ອຕ຺ຕນາ ຈິນ຺ຕິຍມານສ຺ສ ກສ຺ສຈິ ອຕ຺ຖິຕາຍາ’’ຕິ ເກຈິ ກາຣຓໍ ວທນ຺ຕິ, ຕເທຕໍ ອກາຣຓໍ ຠວງ຺ຄວິສຍໂຕ ອຎ຺ຎສ຺ສ ຈິນ຺ຕິຍມານສ຺ສ ອຠາວາ ອຎ຺ຎຈິຕ຺ຕປ຺ປວຕ຺ຕກາເລ ຈ ຠວງ຺ຄາວຏ຺ຏນສ຺ເສວ ອສມ຺ຠວໂຕ. ອິທໍ ປເນຕ຺ຖ ກາຣຓໍ ສິຍາ – ‘‘ຕານິສ຺ສ ຕມ຺ຫິ ສມເຍ ໂອລມ຺ພນ຺ຕິ ອຊ຺ໂຌລມ຺ພນ຺ຕິ ອຠິປ຺ປລມ຺ພນ຺ຕີ’’ຕິ (ມ. ນິ. ໓.໒໔໘) ວຈນໂຕ ຕີສຸ ຊວນວາເຣສຸ ອປ຺ປວຕ຺ເຕສ຺ເວວ ກມ຺ມາທິອຸປຏ຺ຐາເນນ ຠວິຕພ຺ພໍ. ອເນກຊວນວາຣປ຺ປວຕ຺ຕິຍາ ຫິ ອຊ຺ໂຌລມ຺ພນໍ ອຠິປ຺ປລມ຺ພນຎ຺ຈ ໂຫຕີຕິ. ຕສ຺ມາ ກາຍທ຺ວາຣາວຊ຺ຊນໍ ອນາວຏ຺ເຏຕ຺ວາ ມໂນທ຺ວາຣາວຊ຺ຊນເມວ ກມ຺ມາທິອາລມ຺ພຓໍ ປຐມໍ ຠວງ຺ຄໍ ອາວຏ຺ເຏຕິ, ຕໂຕ ໂຜຏ຺ຐພ຺ພສ຺ສ ພລວຕ຺ຕາ ທຸຕິຍວາເຣ ກາຍວິຎ຺ຎາຓວີຖິ ປຈ຺ຈຸປ຺ປນ຺ເນ ໂຜຏ຺ຐພ຺ເພ ປວຕ຺ຕຕິ, ຕໂຕ ປຸຣິມຊວນວາຣຄຫິເຕສ຺ເວວ ກມ຺ມາທີສຸ ກເມນ ມໂນທ຺ວາຣຊວນໍ ຊວິຕ຺ວາ ມູລຠວງ຺ຄສງ຺ຂາຕໍ ອາຄນ຺ຕຸກຠວງ຺ຄສງ຺ຂາຕໍ ວາ ຕທາຣມ຺ມຓໍ ຠວງ຺ຄໍ ໂອຕຣຕິ, ຕທາຣມ຺ມຓາຠາເວ ວາ ຠວງ຺ຄເມວ. ເອຕສ຺ມິໍ ຐາເນ ກາລໍ ກໂຣຕີຕິ ຕທາຣມ຺ມຓານນ຺ຕເຣນ ຈຸຕິຈິຕ຺ເຕນ, ຕທາຣມ຺ມຓາຠາເວ ວາ ຠວງ຺ຄສງ຺ຂາເຕເນວ ຈຸຕິຈິຕ຺ເຕນ ຈວຕີຕິ ອຕ຺ໂຖ. ຠວງ຺ຄເມວ ຫິ ຈຸຕິຈິຕ຺ຕໍ ຫຸຕ຺ວາ ປວຕ຺ຕຕີຕິ ຈຸຕິຈິຕ຺ຕໍ ອິຘ ‘‘ຠວງ຺ຄ’’ນ຺ຕິ ວຸຕ຺ຕນ຺ຕິ. ມໂນທ຺ວາຣວິສໂຍ ລຫຸໂກຕິ ລຫຸກປຈ຺ຈຸປຏ຺ຐານໍ ສນ຺ຘາຍ ວຸຕ຺ຕໍ ‘‘ອຣູປຘມ຺ມານໍ…ເປ… ລຫຸໂກ’’ຕິ. ອຣູປຘມ຺ມສ຺ສ ຫິ ມໂນທ຺ວາຣສ຺ສ ວິສໂຍ ລຫຸກປຈ຺ຈຸປຏ຺ຐາໂນຕິ. ພລວຕິ ຈ ຣູປຘມ຺ມສ຺ສ ກາຍທ຺ວາຣສ຺ສ ວິສເຍ ອປ຺ປວຕ຺ຕິຕ຺ວາ ມໂນທ຺ວາຣວິສເຍ ກມ຺ມາທິມ຺ຫິ ປຐມໍ ຈິຕ຺ຕປ຺ປວຕ຺ຕິທສ຺ສເນນ ອຣູປຘມ຺ມານໍ ວິສຍສ຺ສ ລຫຸກຕາ ທີປິຕາຕິ. ຣູປານໍ ວິສຍາຠາເວປິ ວາ ‘‘ອຣູປຘມ຺ມານ’’ນ຺ຕິ ວຈນໍ ເຍສໍ ວິສໂຍ ອຕ຺ຖິ, ຕໍທສ຺ສນຕ຺ຖເມວາຕິ ທຏ຺ຐພ຺ພໍ. ເຕນ ລຫຸກມ຺ມາທີສຸ ຈິຕ຺ຕປ຺ປວຕ຺ຕິໂຕ ລຫຸຄຫຓີຍຕາ ວິສຍສ຺ສ ລຫຸກຕາ.
ກມ຺ມາທີນໍ ຠູມິຈິຕ຺ຕຸປາທາທິວເສນ ວິຕ຺ຖາຣໂຕ ອນນ຺ໂຕ ປເຠໂທຕິ ‘‘ສງ຺ເຂປໂຕ’’ຕິ ອາຫ.
ອວິຊ຺ຊາຕຓ຺ຫາທິກິເລເສສຸ ອນຸປຈ຺ຉິນ຺ເນສ຺ເວວ ກມ຺ມາທິໂນ ອຸປຏ຺ຐານໍ, ຕຎ຺ຈາຣພ຺ຠ ຈິຕ຺ຕສນ຺ຕານສ຺ສ ຠວນ຺ຕຣນິນ຺ນໂປຓປພ຺ຠາຣຕາ ໂຫຕີຕິ ອາຫ ‘‘ອນຸປຈ຺ຉິນ຺ນກິເລສພລວິນາມິຕ’’ນ຺ຕິ. ສນ຺ຕາເນ ຫິ ວິນາມິເຕ ຕເທກເທສຠູຕໍ ປຏິສນ຺ຘິຈິຕ຺ຕຎ຺ຈ ວິນາມິຕເມວ ໂຫຕິ, ນ ຈ ເອກເທສວິນາມິຕຠາເວນ ວິນາ ສນ຺ຕານວິນາມິຕຕາ ອຕ຺ຖີຕິ. ສພ຺ພຕ຺ຖ ປນ ‘‘ທຸຄ຺ຄຕິປຏິສນ຺ຘິນິນ຺ນາຍ ຈຸຕິຍາ ປຸຣິມຊວນານິ ອກຸສລານິ, ອິຕຣາຍ ຈ ກຸສລານີ’’ຕິ ນິຈ຺ຉິນນ຺ຕິ. ‘‘ນິມິຕ຺ຕສ຺ສາທຄຘິຕໍ ວາ, ຠິກ຺ຂເວ, ວິຎ຺ຎາຓໍ ຕິຏ຺ຐມານໍ ຕິຏ຺ຐຕິ ອນຸພ຺ຍຎ຺ຊນສ຺ສາທຄຘິຕໍ ວາ. ຕສ຺ມິໍ ເຈ ສມເຍ ກາລໍ ກໂຣຕິ, ຐານເມຕໍ ວິຊ຺ຊຕິ, ຍໍ ທ຺ວິນ຺ນໍ ຄຕີນໍ ອຎ຺ຎຕຣໍ ຄຕິໍ ອຸປປຊ຺ເຊຍ຺ຍ ນິຣຍໍ ວາ ຕິຣຈ຺ຉານໂຍນິໍ ວາ’’ຕິ (ສໍ. ນິ. ໔.໒໓໕) ວຸຕ຺ຕໍ. ຕສ຺ມາ ອາສນ຺ນໍ ອກຸສລໍ ທຸຄ຺ຄຕິຍໍ, ກຸສລຎ຺ຈ ສຸຄຕິຍໍ ປຏິສນ຺ຘິຍາ ອຸປນິສ຺ສໂຍ ໂຫຕີຕິ.
ຣາຄາທິເຫຕຸຠູຕໍ ຫີນມາຣມ຺ມຓນ຺ຕິ ອກຸສລວິປາກສ຺ສ ອາຣມ຺ມຓໍ ຠວິຕຸໍ ຍຸຕ຺ຕໍ ອນິຏ຺ຐາຣມ຺ມຓໍ ອາຫ. ຕມ຺ປິ ຫິ ສງ຺ກປ຺ປວເສນ ຣາຄສ຺ສປິ ເຫຕຸ ໂຫຕີຕິ. ອກຸສລວິປາກຊນກກມ຺ມສຫຊາຕານໍ ວາ ຕໍສທິສາສນ຺ນຈຸຕິຊວນເຈຕນາສຫຊາຕານຎ຺ຈ ຣາຄາທີນໍ ເຫຕຸຠາໂວ ເອວ ຫີນຕາ. ຕຎ຺ຫິ ປຈ຺ຉານຸຕາປຊນກກມ຺ມານມາຣມ຺ມຓໍ ກມ຺ມວເສນ ອນິຏ຺ຐໍ ອກຸສລວິປາກສ຺ສ ອາຣມ຺ມຓໍ ຠເວຍ຺ຍ, ອຎ຺ຎຖາ ຈ ອິຏ຺ຐາຣມ຺ມເຓ ປວຕ຺ຕສ຺ສ ອກຸສລກມ຺ມສ຺ສ ວິປາໂກ ກມ຺ມນິມິຕ຺ຕາຣມ຺ມໂຓ ນ ຠເວຍ຺ຍ. ນ ຫິ ອກຸສລວິປາໂກ ອິຏ຺ຐາຣມ຺ມໂຓ ຠວິຕຸມຣຫຕີຕິ. ປຎ຺ຈທ຺ວາເຣ ຈ ອາປາຖມາຄຈ຺ຉນ຺ຕໍ ປຈ຺ຈຸປ຺ປນ຺ນໍ ກມ຺ມນິມິຕ຺ຕໍ ອາສນ຺ນກຕກມ຺ມາຣມ຺ມຓສນ຺ຕຕິຍໍ ອຸປ຺ປນ຺ນໍ ຕໍສທິສຎ຺ຈ ທຏ຺ຐພ຺ພໍ, ອຎ຺ຎຖາ ຕເທວ ປຏິສນ຺ຘິອາຣມ຺ມຓູປຏ຺ຐາປກໍ ຕເທວ ຈ ປຏິສນ຺ຘິຊນກໍ ຠເວຍ຺ຍ, ນ ຈ ປຏິສນ຺ຘິຍາ ອຸປຈາຣຠູຕານິ ວິຍ ‘‘ເອຕສ຺ມິໍ ຕຍາ ປວຕ຺ຕິຕພ຺ພ’’ນ຺ຕິ ປຏິສນ຺ຘິຍາ ອາຣມ຺ມຓໍ ອນຸປາເທນ຺ຕານິ ວິຍ ຈ ປວຕ຺ຕານິ ຈຸຕິອາສນ຺ນານິ ຊວນານິ ປຏິສນ຺ຘິຊນການິ ຠເວຍ຺ຍຸໍ. ‘‘ກຕຕ຺ຕາ ອຸປຈິຕຕ຺ຕາ’’ຕິ (ຘ. ສ. ໔໓໑) ຫິ ວຸຕ຺ຕໍ. ຕທາ ຈ ຕໍສມານວີຖິຍໍ ວິຍ ປວຕ຺ຕມານານິ ກຖໍ ກຕູປຈິຕານິ ສິຍຸໍ, ນ ຈ ອສ຺ສາທິຕານິ ຕທາ, ນ ຈ ໂລກິຍານິ ໂລກຸຕ຺ຕຣານິ ວິຍ ສມານວີຖິຜລານິ ໂຫນ຺ຕິ.
‘‘ປຸພ຺ເພ ວາສ຺ສ ຕໍ ກຕໍ ໂຫຕິ ປາປກມ຺ມໍ ທຸກ຺ຂເວທນີຍໍ, ປຈ຺ຉາ ວາສ຺ສ ຕໍ ກຕໍ ໂຫຕິ ປາປກມ຺ມໍ ທຸກ຺ຂເວທນີຍໍ, ມຣຓກາເລ ວາສ຺ສ ໂຫຕິ ມິຈ຺ຉາທິຏ຺ຐິ ສມຕ຺ຕາ ສມາທິນ຺ນາ, ເຕນ ໂສ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕີ’’ຕິ (ມ. ນິ. ໓.໓໐໓) –
ອາທິນາ ສຸຕ຺ເຕ ມຣຓກາເລ ສມຕ຺ຕາຍ ສມາທິນ຺ນາຍ ມິຈ຺ຉາທິຏ຺ຐິຍາ ສມ຺ມາທິຏ຺ຐິຍາ ຈ ສຫຊາຕເຈຕນາຍ ປຏິສນ຺ຘິທານໍ ວຸຕ຺ຕໍ, ນ ຈ ທຸພ຺ພເລຫິ ປຎ຺ຈທ຺ວາຣິກຊວເນຫິ ມິຈ຺ຉາທິຏ຺ຐິ ສມ຺ມາທິຏ຺ຐິ ວາ ສມຕ຺ຕາ ໂຫຕິ ສມາທິນ຺ນາ. ວກ຺ຂຕິ ຈ –
‘‘ສພ຺ພມ຺ປິ ເຫຕໍ ກຸສລາກຸສລຘມ຺ມປຏິວິຊານນາທິຈວນປຣິໂຍສານໍ ກິຈ຺ຈໍ ມໂນທ຺ວາຣິກຈິຕ຺ເຕເນວ ໂຫຕິ, ນ ປຎ຺ຈທ຺ວາຣິເກນາຕິ ສພ຺ພສ຺ສເປຕສ຺ສ ກິຈ຺ຈສ຺ສ ກຣເຓ ສຫຊວນການິ ວີຖິຈິຕ຺ຕານິ ປຏິກ຺ຂິຕ຺ຕານີ’’ຕິ (ວິຠ. ອຏ຺ຐ. ໗໖໖).
ຕຕ຺ຖ ຫິ ‘‘ນ ກິຎ຺ຈິ ຘມ຺ມໍ ປຏິວິຊານາຕີຕິ ‘ມໂນປຸພ຺ພງ຺ຄມາ ຘມ຺ມາ’ຕິ (ຘ. ປ. ໑-໒) ເອວໍ ວຸຕ຺ຕໍ ເອກມ຺ປິ ກຸສລໍ ວາ ອກຸສລໍ ວາ ນ ປຏິວິຊານາຕີ’’ຕິ (ວິຠ. ອຏ຺ຐ. ໗໖໖) ຈ ວຸຕ຺ຕໍ. ເຍສໍ ປຏິວິຠາວນປ຺ປວຕ຺ຕິຍາ ສຸຂໍ ວາ ທຸກ຺ຂໍ ວາ ອນ຺ເວຕິ, ເຕສໍ ສາ ປວຕ຺ຕິ ປຎ຺ຈທ຺ວາເຣ ປຏິກ຺ຂິຕ຺ຕາ, ກຸສລາກຸສລກມ຺ມສມາທານຎ຺ຈ ຕາທິສເມວາຕິ. ຕທາຣມ຺ມຓານນ຺ຕຣໍ ປນ ຈວນໍ, ຕທນນ຺ຕຣາ ຈ ອຸປປຕ຺ຕິ ມໂນທ຺ວາຣິກາ ເອວ ໂຫຕິ, ນ ສຫຊວນກວີຖິຈິຕ຺ເຕ ປຣິຍາປນ຺ນາຕິ ອິມິນາ ອຘິປ຺ປາເຍນ ອິຘ ປຎ຺ຈທ຺ວາຣິກຕທາຣມ຺ມຓານນ຺ຕຣໍ ຈຸຕິ, ຕທນນ຺ຕຣໍ ປຏິສນ຺ຘິ ຈ ວຸຕ຺ຕາຕິ ທຏ຺ຐພ຺ພໍ. ຕຕ຺ຖ ອວເສສປຎ຺ຈຈິຕ຺ຕກ຺ຂຓາຍຸເກ ຣູປາທິມ຺ຫິ ອຸປ຺ປນ຺ນໍ ປຏິສນ຺ຘິໍ ສນ຺ຘາເຍວ ‘‘ປຈ຺ຈຸປ຺ປນ຺ນາຣມ຺ມຓໍ ອຸປປຕ຺ຕິຈິຕ຺ຕໍ ປຈ຺ຈຸປ຺ປນ຺ນາຣມ຺ມຓສ຺ສ ຠວງ຺ຄສ຺ສ ອນນ຺ຕຣປຈ຺ຈເຍນ ປຈ຺ຈໂຍ’’ຕິ, ອວເສເສກຈິຕ຺ຕກ຺ຂຓາຍຸເກ ຈ ອຸປ຺ປນ຺ນໍ ສນ຺ຘາຍ ‘‘ປຈ຺ຈຸປ຺ປນ຺ນາຣມ຺ມຓໍ ອຸປປຕ຺ຕິຈິຕ຺ຕໍ ອຕີຕາຣມ຺ມຓສ຺ສ ຠວງ຺ຄສ຺ສ ອນນ຺ຕຣປຈ຺ຈເຍນ ປຈ຺ຈໂຍ’’ຕິ (ປຏ຺ຐາ. ໒.໑໙.໒໘) ວຸຕ຺ຕນ຺ຕິ ເວທິຕພ຺ພໍ.
ສຸທ຺ຘາຍ ວາຕິ ມຫຄ຺ຄຕກມ຺ມນິມິຕ຺ຕາຣມ຺ມຓາຍ ຊວນວີຖິຍາ ຕທາຣມ຺ມຓຣຫິຕາຍາຕິ ອຕ຺ໂຖ. ສາ ປນ ຊວນວີຖິ ມຫຄ຺ຄຕວິປາກສ຺ສ ອຸປຈາໂຣ ວິຍ ທຏ຺ຐພ຺ພາ. ເກຈິ ປນ ຕໍ ວີຖິໍ ມຫຄ຺ຄຕາວສານໍ ວທນ຺ຕິ. ອຕີຕາຣມ຺ມຓາ ເອກາທສວິຘາ, ນວຕ຺ຕພ຺ພາຣມ຺ມຓາ ສຕ຺ຕວິຘາ.
ເອເຕນານຸສາເຣນ ອາຣຸປ຺ປຈຸຕິຍາປິ ອນນ຺ຕຣາ ປຏິສນ຺ຘິ ເວທິຕພ຺ພາຕິ ອິທໍ ກສ຺ມາ ວຸຕ຺ຕໍ, ນນຸ ‘‘ປຖວີກສິຓຊ຺ຌານາທິວເສນ ປຏິລທ຺ຘມຫຄ຺ຄຕສຸຄຕິຍໍ ຐິຕສ຺ສາ’’ຕິ ເອວມາທິເກ ເອວ ນເຍ ອຍມ຺ປິ ປຏິສນ຺ຘິ ອວຣຸທ຺ຘາຕິ? ນ, ຕຕ຺ຖ ຣູປາວຈຣຈຸຕິອນນ຺ຕຣາຍ ເອວ ປຏິສນ຺ຘິຍາ ວຸຕ຺ຕຕ຺ຕາ. ຕຕ຺ຖ ຫິ ‘‘ປຖວີກສິຓາທິກໍ ວາ ນິມິຕ຺ຕໍ ມຫຄ຺ຄຕຈິຕ຺ຕໍ ວາ ມໂນທ຺ວາເຣ ອາປາຖມາຄຈ຺ຉຕິ. ຈກ຺ຂຸໂສຕານໍ ວາ’’ຕິອາທິເກນ ຣູປາວຈຣຈຸຕິຍາ ເອວ ອນນ຺ຕຣາ ປຏິສນ຺ຘິ ວຸຕ຺ຕາຕິ ວິຎ຺ຎາຍຕິ. ອຖາປິ ຍຖາສມ຺ຠວໂຍຊນາຍ ອຍມ຺ປິ ປຏິສນ຺ຘິ ຕຕ຺ເຖວ ອວຣຸທ຺ຘາ, ອຣູປາວຈຣຈຸຕິອນນ຺ຕຣາ ປນ ຣູປາວຈຣປຏິສນ຺ຘິ ນຕ຺ຖິ, ອຣູປາວຈເຣ ຈ ອຸປຣູປຣິຈຸຕິຍາ ເຫຏ຺ຐິມາ ເຫຏ຺ຐິມາ ປຏິສນ຺ຘີຕິ ຈຕຸຕ຺ຖາຣຸປ຺ປຈຸຕິຍາ ນວຕ຺ຕພ຺ພາຣມ຺ມຓາ ປຏິສນ຺ຘິ ນຕ຺ຖິ. ເຕນ ຕໂຕ ຕຕ຺ເຖວ ອຕີຕາຣມ຺ມຓາ ກາມາວຈເຣ ຈ ອຕີຕປຈ຺ຈຸປ຺ປນ຺ນາຣມ຺ມຓາ ປຏິສນ຺ຘິ ອິຕຣາຫິ ຈ ຍຖາສມ຺ຠວໍ ອຕີຕນວຕ຺ຕພ຺ພາຣມ຺ມຓາ ອາຣຸປ຺ປປຏິສນ຺ຘິ, ອຕີຕປຈ຺ຈຸປ຺ປນ຺ນາຣມ຺ມຓາ ຈ ກາມາວຈຣປຏິສນ຺ຘິ ໂຍເຊຕພ຺ພາຕິ ອິມສ຺ສ ວິເສສສ຺ສ ທສ຺ສນຕ຺ຖໍ ວິສຸໍ ອຸທ຺ຘຣຓໍ ກຕໍ.
ເອວໍ ອາຣມ຺ມຓວເສນ ເອກວິຘາຍ ກາມາວຈຣສຸຄຕິຈຸຕິຍາ ທຸວິຘາ ທຸຄ຺ຄຕິປຏິສນ຺ຘິ, ທຸຄ຺ຄຕິຈຸຕິຍາ ທຸວິຘາ ສຸຄຕິປຏິສນ຺ຘິ, ກາມາວຈຣສຸຄຕິຈຸຕິຍາ ທ຺ວິເອກທ຺ວິປ຺ປກາຣານໍ ກາມຣູປາຣຸປ຺ປານໍ ວເສນ ປຎ຺ຈວິຘາ ສຸຄຕິປຏິສນ຺ຘິ, ຣູປາວຈຣຈຸຕິຍາ ຈ ຕເຖວ ປຎ຺ຈວິຘາ, ທຸວິຘາຍ ອາຣຸປ຺ປຈຸຕິຍາ ປຈ຺ເຈກໍ ທ຺ວິນ຺ນໍ ທ຺ວິນ຺ນໍ ກາມາຣຸປ຺ປານໍ ວເສນ ອຏ຺ຐວິຘາ ຈ ປຏິສນ຺ຘິ ທສ຺ສິຕາ, ທຸຄ຺ຄຕິຈຸຕິຍາ ປນ ເອກວິຘາຍ ທຸຄ຺ຄຕິປຏິສນ຺ຘິ ທຸວິຘາ ນ ທສ຺ສິຕາ, ຕໍ ທສ຺ເສຕຸໍ ‘‘ທຸຄ຺ຄຕິຍໍ ຐິຕສ຺ສ ປນາ’’ຕິອາທິມາຫ. ຍຖາວຸຕ຺ຕາ ປນ –
ທ຺ວິທ຺ວິປຎ຺ຈປ຺ປກາຣາ ຈ, ປຎ຺ຈາຏ຺ຐທຸວິຘາປິ ຈ;
ຈຕຸວີສຕິ ສພ຺ພາປິ, ຕາ ໂຫນ຺ຕິ ປຏິສນ຺ຘິໂຍ.
‘‘ກາມາວຈຣສ຺ສ ກຸສລສ຺ສ ກມ຺ມສ຺ສ ກຕຕ຺ຕາ’’ຕິອາທິນາ (ຘ. ສ. ໔໓໑, ໔໕໕, ໔໙໘) ນານາກ຺ຂຓິກກມ຺ມປຈ຺ຈຍຠາໂວ ທສ຺ສິຕປ຺ປກາໂຣຕິ ອຸປນິສ຺ສຍປຈ຺ຈຍຠາວເມວ ທສ຺ເສນ຺ໂຕ ‘‘ວຸຕ຺ຕຎ຺ເຫຕ’’ນ຺ຕິອາທິມາຫ.
ອາທິນາ ສຫາຕິອາທິນາ ວິມິສ຺ສວິຎ຺ຎາເຓນ ສຫ. ໂອມໂຕ ທ຺ເວ ວາ ຕໂຍ ວາ ທສກາ ອຸປ຺ປຊ຺ຊນ຺ຕີຕິ ຄພ຺ຠເສຍ຺ຍການໍ ວເສນ ວຸຕ຺ຕໍ. ອຎ຺ຎຕ຺ຖ ຫິ ອເນເກ ກລາປາ ສຫ ອຸປ຺ປຊ຺ຊນ຺ຕິ. ພ຺ຣຫ຺ມຕ຺ຕຠາເວປິ ຫິ ອເນກຄາວຸຕປ຺ປມາເຓ ອເນເກ ກລາປາ ສຫຸປ຺ປຊ຺ຊນ຺ຕີຕິ ຕິໍສໂຕ ອຘິກາເນວ ຣູປານິ ໂຫນ຺ຕິ ຄນ຺ຘຣສາຫາຣານໍ ປຏິກ຺ຂິຕ຺ຕຕ຺ຕາ ຈກ຺ຂຸໂສຕວຕ຺ຖຸສຕ຺ຕກຊີວິຕຉກ຺ກຠາເວປິ ເຕສໍ ພຫຸຕ຺ຕາ. ອຏ຺ຐກຖາຍໍ ປນ ຕຕ຺ຖປິ ຈກ຺ຂຸໂສຕວຕ຺ຖຸທສການໍ ຊີວິຕນວກສ຺ສ ຈ ອຸປ຺ປຕ຺ຕິ ວຸຕ຺ຕາ, ປາຬິຍໍ ປນ ‘‘ຣູປຘາຕຸຍາ ອຸປປຕ຺ຕິກ຺ຂເຓ ຐເປຕ຺ວາ ອສຎ຺ຎສຕ຺ຕານໍ ເທວານໍ ປຎ຺ຈາຍຕນານິ ປາຕຸຠວນ຺ຕິ, ປຎ຺ຈ ຘາຕຸໂຍ ປາຕຸຠວນ຺ຕີ’’ຕິ ວຸຕ຺ຕໍ, ຕຖາ ‘‘ຣູປຘາຕຸຍາ ຉ ອາຍຕນານິ ນວ ຘາຕຸໂຍ’’ຕິ ສພ຺ພສງ຺ຄຫວເສນ ຕຕ຺ຖ ວິຊ຺ຊມານາຍຕນຘາຕຸໂຍ ທສ຺ເສຕຸໍ ວຸຕ຺ຕໍ. ກຖາວຕ຺ຖຸມ຺ຫິ ຈ ຆານາຍຕນາທີນໍ ວິຍ ຄນ຺ຘາຍຕນາທີນຎ຺ຈ ຕຕ຺ຖ ຠາໂວ ປຏິກ຺ຂິຕ຺ໂຕ ‘‘ອຕ຺ຖິ ຕຕ຺ຖ ຆານາຍຕນນ຺ຕິ? ອາມນ຺ຕາ, ອຕ຺ຖິ ຕຕ຺ຖ ຄນ຺ຘາຍຕນນ຺ຕິ? ນ ເຫວໍ ວຕ຺ຕພ຺ເພ’’ຕິອາທິນາ (ກຖາ. ໕໑໙), ນ ຈ ອໂຜຏ຺ຐພ຺ພາຍຕນານໍ ປຖວີຘາຕຸອາທີນໍ ວິຍ ອຄນ຺ຘຣສາຍຕນານໍ ຄນ຺ຘຣສານໍ ຕຕ຺ຖ ຠາໂວ ສກ຺ກາ ວຕ຺ຕຸໍ ຜຸສິຕຸໍ ອສກ຺ກຸເຓຍ຺ຍຕາວິນິມຸຕ຺ຕສ຺ສ ປຖວີອາທິສຠາວສ຺ສ ວິຍ ຄນ຺ຘຣສຠາວວິນິມຸຕ຺ຕສ຺ສ ຄນ຺ຘຣສສຠາວສ຺ສ ອຠາວາ.
ຍທິ ຈ ຆານສມ຺ຜສ຺ສາທີນໍ ກາຣຓຠາໂວ ນຕ຺ຖີຕິ ອາຍຕນານີຕິ ເຕນ ວຸຈ຺ເຈຍ຺ຍຸໍ, ຘາຕຸ-ສທ຺ໂທ ປນ ນິສ຺ສຕ຺ຕນິຊ຺ຊີວວາຈໂກຕິ ຄນ຺ຘຘາຕຸຣສຘາຕູຕິ ອວຈເນ ນຕ຺ຖິ ກາຣຓໍ, ຘມ຺ມຠາໂວ ຈ ເຕສໍ ເອກນ຺ເຕນ ອິຈ຺ຉິຕພ຺ໂພ ສຠາວຘາຣຓາທິລກ຺ຂຓໂຕ ອຎ຺ຎສ຺ສ ອຠາວາ, ຘມ຺ມານຎ຺ຈ ອາຍຕນຠາໂວ ເອກນ຺ຕໂຕ ຍມເກ (ຍມ. ໑. ອາຍຕນຍມກ.໑໓) ວຸຕ຺ໂຕ ‘‘ຘມ຺ໂມ ອາຍຕນນ຺ຕິ? ອາມນ຺ຕາ’’ຕິ. ຕສ຺ມາ ເຕສໍ ຄນ຺ຘຣສາຍຕນຠາວາຠາເວປິ ໂກຈິ ອາຍຕນສຠາໂວ ວຕ຺ຕພ຺ໂພ. ຍທິ ຈ ໂຜຏ຺ຐພ຺ພຠາວໂຕ ອຎ຺ໂຎ ປຖວີຘາຕຸອາທິຠາໂວ ວິຍ ຄນ຺ຘຣສຠາວໂຕ ອຎ຺ໂຎ ເຕສໍ ໂກຈິ ສຠາໂວ ສິຍາ, ເຕສໍ ຘມ຺ມາຍຕເນ ສງ຺ຄໂຫ. ຄນ຺ຘຣສຠາເວ ປນ ອາຍຕນຠາເວ ຈ ສຕິ ຄນ຺ໂຘ ຈ ໂສ ອາຍຕນຎ຺ຈ ຄນ຺ຘາຍຕນໍ, ຣໂສ ຈ ໂສ ອາຍຕນຎ຺ຈ ຣສາຍຕນນ຺ຕິ ອິທມາປນ຺ນເມວາຕິ ຄນ຺ຘຣສາຍຕນຠາໂວ ຈ ນ ສກ຺ກາ ນິວາເຣຕຸໍ, ‘‘ຕໂຍ ອາຫາຣາ’’ຕິ (ວິຠ. ໙໙໓) ຈ ວຈນໂຕ ກພຬີກາຣາຫາຣສ຺ສ ຕຕ຺ຖ ອຠາໂວ ວິຎ຺ຎາຍຕິ. ຕສ຺ມາ ຍຖາ ປາຬິຍາ ອວິໂຣໂຘ ໂຫຕິ, ຕຖາ ຣູປຄຓນາ ກາຕພ຺ພາ. ເອວຎ຺ຫິ ຘມ຺ມຕາ ນ ວິໂລມິຕາ ໂຫຕີຕິ.
ຊາຕິອຸຓ຺ຓາຍາຕິ ຄພ຺ຠໍ ຜາເລຕ຺ວາ ຄຫິຕອຸຓ຺ຓາຍາຕິປິ ວທນ຺ຕິ. ສມ຺ຠວເຠໂທຕິ ອຕ຺ຖິຕາເຠໂທ. ນິຊ຺ຌາມຕຓ຺ຫິກາ ກິຣ ນິຈ຺ຈໍ ທຸກ຺ຂາຕຸຣຕາຍ ກາມໍ ເສວິຕ຺ວາ ຄພ຺ຠໍ ນ ຄຓ຺ຫນ຺ຕິ.
ຣູປີພ຺ຣຫ຺ເມສຸ ຕາວ ໂອປປາຕິກໂຍນິເກສູຕິ ໂອປປາຕິກໂຍນິເກຫິ ຣູປີພ຺ຣຫ຺ເມ ນິທ຺ຘາເຣຕິ. ‘‘ສໍເສທໂຊປປາຕີສຸ ອວກໍສໂຕ ຕິໍສາ’’ຕິ ເອຕໍ ວິວຣນ຺ໂຕ ອາຫ ‘‘ອວກໍສໂຕ ປນາ’’ຕິອາທິ, ຕໍ ປເນຕໍ ປາຬິຍາ ນ ສເມຕິ. ນ ຫິ ປາຬິຍໍ ກາມາວຈຣານໍ ສໍເສທໂຊປປາຕິການໍ ອຆານການໍ ອຸປປຕ຺ຕິ ວຸຕ຺ຕາ. ຘມ຺ມຫທຍວິຠງ຺ເຄ (ວິຠ. ໑໐໐໗) ຫິ –
‘‘ກາມຘາຕຸຍາ ອຸປປຕ຺ຕິກ຺ຂເຓ ກສ຺ສຈິ ເອກາທສາຍຕນານິ ປາຕຸຠວນ຺ຕິ, ກສ຺ສຈິ ທສາຍຕນານິ, ກສ຺ສຈິ ອປຣານິ ທສາຍຕນານິ, ກສ຺ສຈິ ນວາຍຕນານິ, ກສ຺ສຈິ ສຕ຺ຕາຍຕນານິ ປາຕຸຠວນ຺ຕີ’’ຕິ –
ວຸຕ຺ຕໍ, ນ ວຸຕ຺ຕໍ ‘‘ອຏ຺ຐາຍຕນານິ ປາຕຸຠວນ຺ຕີ’’ຕິ. ຕຖາ ‘‘ທສາຍຕນານິ ປາຕຸຠວນ຺ຕີ’’ຕິ ຕິກ຺ຂຕ຺ຕຸໍ ວຕ຺ຕພ຺ພໍ ສິຍາ, ອຆານກອຸປປຕ຺ຕິຍາ ວິຊ຺ຊມານາຍ ຕິກ຺ຂຕ຺ຕຸຎ຺ຈ ‘‘ນວາຍຕນານິ ປາຕຸຠວນ຺ຕີ’’ຕິ, ນ ຈ ຕໍ ວຸຕ຺ຕໍ. ເອວໍ ຘາຕຸປາຕຸຠາວາທິປຎ຺ເຫສຸ ຍມເກປິ ຆານຊິວ຺ຫາກາຍານໍ ສຫຈາຣິຕາ ວຸຕ຺ຕາຕິ.
ຈຸຕິປຏິສນ຺ຘີນໍ ຂນ຺ຘາທີຫິ ອຎ຺ຎມຎ຺ຎໍ ສມານຕາ ອເຠໂທ, ອສມານຕາ ເຠໂທ. ນຍມຸຂມຕ຺ຕໍ ທສ຺ເສຕ຺ວາ ວຸຕ຺ຕໍ ອວຸຕ຺ຕຎ຺ຈ ສພ຺ພໍ ສງ຺ຄຓ຺ຫິຕ຺ວາ ອາຫ ‘‘ອຍໍ ຕາວ ອຣູປຠູມີສຸເຍວ ນໂຍ’’ຕິ. ຣູປາຣູປາວຈຣານໍ ອຸປຈາຣສ຺ສ ພລວຕາຍ ຕໂຕ ຈວິຕ຺ວາ ທຸຄ຺ຄຕິຍໍ ອຸປປຕ຺ຕິ ນຕ຺ຖີຕິ ‘‘ເອກຈ຺ຈສຸຄຕິຈຸຕິຍາ’’ຕິ ອາຫ. ເອກຈ຺ຈທຸຄ຺ຄຕິປຏິສນ຺ຘີຕິ ເອຕ຺ຖ ເອກຈ຺ຈຄ຺ຄຫຓສ຺ສ ປໂຍຊນໍ ມຄ຺ຄິຕພ຺ພໍ. ອຍໍ ປເນຕ຺ຖາຘິປ຺ປາໂຍ ສິຍາ – ນານຕ຺ຕກາຍນານຕ຺ຕສຎ຺ຎີສຸ ວຸຕ຺ຕາ ເອກຈ຺ເຈ ວິນິປາຕິກາ ຕິເຫຕຸກາທິປຏິສນ຺ຘິກາ, ເຕສໍ ຕໍ ປຏິສນ຺ຘິໍ ວິນິປາຕຠາເວນ ທຸຄ຺ຄຕິປຏິສນ຺ຘີຕິ ຄເຫຕ຺ວາ ສພ຺ພສຸຄຕິຈຸຕິຍາວ ສາ ປຏິສນ຺ຘິ ໂຫຕິ, ນ ເອກຈ຺ຈສຸຄຕິຈຸຕິຍາ ເອວາຕິ ຕໍນິວຕ຺ຕນຕ຺ຖໍ ເອກຈ຺ຈທຸຄ຺ຄຕິຄ຺ຄຫຓໍ ກຕໍ. ອປາຍປຏິສນ຺ຘິ ເອວ ຫິ ເອກຈ຺ຈສຸຄຕິຈຸຕິຍາ ໂຫຕິ, ນ ສພ຺ພສຸຄຕິຈຸຕິຍາ. ອຖ ວາ ທຸຄ຺ຄຕິປຏິສນ຺ຘິ ທຸວິຘາ ເອກຈ຺ຈສຸຄຕິຈຸຕິຍາ ອນນ຺ຕຣາ ທຸຄ຺ຄຕິຈຸຕິຍາ ຈາຕິ. ຕຕ຺ຖ ປຈ຺ຉິມໍ ວຊ຺ເຊຕ຺ວາ ປຸຣິມໍ ເອວ ຄຓ຺ຫິຕຸໍ ອາຫ ‘‘ເອກຈ຺ຈທຸຄ຺ຄຕິປຏິສນ຺ຘີ’’ຕິ. ອເຫຕຸກຈຸຕິຍາ ສເຫຕຸກປຏິສນ຺ຘີຕິ ທຸເຫຕຸກາ ຕິເຫຕຸກາ ຈ ໂຍເຊຕພ຺ພາ. ມຓ຺ຑູກເທວປຸຕ຺ຕາທີນໍ ວິຍ ຫິ ອເຫຕຸກຈຸຕິຍາ ຕິເຫຕຸກປຏິສນ຺ຘິປິ ໂຫຕີຕິ.
ຕສ຺ສ ຕສ຺ສ ວິປຣີຕໂຕ ຈ ຍຖາໂຍຄໍ ໂຍເຊຕພ຺ພນ຺ຕິ ‘‘ເອກຈ຺ຈສຸຄຕິຈຸຕິຍາ ເອກຈ຺ຈທຸຄ຺ຄຕິປຏິສນ຺ຘີ’’ຕິອາທີສຸ ເຠທວິເສເສສຸ ‘‘ເອກຈ຺ຈທຸຄ຺ຄຕິຈຸຕິຍາ ເອກຈ຺ຈສຸຄຕິປຏິສນ຺ຘີ’’ຕິອາທິນາ ຍໍ ຍໍ ຍຸຊ຺ຊຕິ, ຕໍ ຕໍ ໂຍເຊຕພ຺ພນ຺ຕິ ອຕ຺ໂຖ. ຍຸຊ຺ຊມານມຕ຺ຕາເປກ຺ຂນວເສນ ນປຸໍສກນິທ຺ເທໂສ ກໂຕ, ໂຍເຊຕພ຺ພນ຺ຕິ ວາ ຠາວຕ຺ໂຖ ທຏ຺ຐພ຺ໂພ. ອມຫຄ຺ຄຕພຫິທ຺ຘາຣມ຺ມຓາຍ ມຫຄ຺ຄຕອຊ຺ຌຕ຺ຕາຣມ຺ມຓາຕິອາທີສຸ ປນ ວິປຣີຕໂຍຊນາ ນ ກາຕພ຺ພາ. ນ ຫິ ມຫຄ຺ຄຕອຊ຺ຌຕ຺ຕາຣມ຺ມຓາຍ ຈຸຕິຍາ ອຣູປຠູມີສຸ ອມຫຄ຺ຄຕພຫິທ຺ຘາຣມ຺ມຓາ ປຏິສນ຺ຘິ ອຕ຺ຖິ. ຈຕຸກ຺ຂນ຺ຘາຍ ອຣູປຈຸຕິຍາ ປຎ຺ຈກ຺ຂນ຺ຘາ ກາມາວຈຣປຏິສນ຺ຘີຕິ ເອຕສ຺ສ ວິປຣິຍາໂຍ ສຍເມວ ໂຍຊິໂຕ. ອຕີຕາຣມ຺ມຓຈຸຕິຍາ ປຈ຺ຈຸປ຺ປນ຺ນາຣມ຺ມຓາ ປຏິສນ຺ຘີຕິ ເອຕສ຺ສ ຈ ວິປຣິຍາໂຍ ນຕ຺ຖິ ເອວາຕິ. ເຠທວິເສໂສ ເອວ ຈ ເອວໍ ວິຕ຺ຖາເຣນ ທສ຺ສິໂຕ, ອເຠທວິເສໂສ ປນ ເອເກກສ຺ມິໍ ເຠເທ ຕຕ຺ຖ ຕຕ຺ເຖວ ຈຸຕິປຏິສນ຺ຘິໂຍຊນາວເສນ ໂຍເຊຕພ຺ໂພ ‘‘ປຎ຺ຈກ຺ຂນ຺ຘາຍ ກາມາວຈຣາຍ ປຎ຺ຈກ຺ຂນ຺ຘາ ກາມາວຈຣາ…ເປ… ອວິຕກ຺ກອວິຈາຣາຍ ອວິຕກ຺ກອວິຈາຣາ’’ຕິ, ຈຕຸກ຺ຂນ຺ຘາຍ ປນ ຈຕຸກ຺ຂນ຺ຘາ ສຍເມວ ໂຍຊິຕາ. ເອເຕເນວ ນເຍນ ສກ຺ກາ ຎາຕຸນ຺ຕິ ປຎ຺ຈກ຺ຂນ຺ຘາທີສຸ ອເຠທວິເສໂສ ນ ທສ຺ສິໂຕຕິ. ຕໂຕ ເຫຕຸໍ ວິນາຕິ ຕຕ຺ຖ ເຫຕຸໍ ວິນາ.
ອງ຺ຄປຈ຺ຈງ຺ຄສນ຺ຘີນໍ ພນ຺ຘນານິ ອງ຺ຄປຈ຺ຈງ຺ຄສນ຺ຘິພນ຺ຘນານິ, ເຕສໍ ເຉທການໍ. ນິຣຸທ຺ເຘສຸ ຈກ຺ຂາທີສູຕິ ອຕິມນ຺ທຠາວູປຄມນໍ ສນ຺ຘາຍ ວຸຕ຺ຕນ຺ຕິ ເວທິຕພ຺ພໍ. ປຎ຺ຈທ຺ວາຣິກວິຎ຺ຎາຓານນ຺ຕຣມ຺ປິ ຫິ ປຸພ຺ເພ ຈຸຕິ ທສ຺ສິຕາ. ຍມເກ ຈ (ຍມ. ໑.ອາຍຕນຍມກ.໑໒໐) –
‘‘ຍສ຺ສ ຈກ຺ຂາຍຕນໍ ນິຣຸຊ຺ຌຕິ, ຕສ຺ສ ມນາຍຕນໍ ນິຣຸຊ຺ຌຕີຕິ? ອາມນ຺ຕາ. ຍສ຺ສ ວາ ປນ ມນາຍຕນໍ ນິຣຸຊ຺ຌຕິ, ຕສ຺ສ ຈກ຺ຂາຍຕນໍ ນິຣຸຊ຺ຌຕີຕິ? ສຈິຕ຺ຕການໍ ອຈກ຺ຂຸການໍ ຈວນ຺ຕານໍ ເຕສໍ ມນາຍຕນໍ ນິຣຸຊ຺ຌຕິ, ໂນ ຈ ເຕສໍ ຈກ຺ຂາຍຕນໍ ນິຣຸຊ຺ຌຕິ. ສຈກ຺ຂຸການໍ ຈວນ຺ຕານໍ ເຕສໍ ມນາຍຕນຎ຺ຈ ນິຣຸຊ຺ຌຕິ, ຈກ຺ຂາຍຕນຎ຺ຈ ນິຣຸຊ຺ຌຕີ’’ຕິ –
ອາທິນາ ຈກ຺ຂາຍຕນາທີນໍ ຈຸຕິຈິຕ຺ເຕນ ສຫ ນິໂຣໂຘ ວຸຕ຺ໂຕຕິ. ລທ຺ໂຘ ອວເສໂສ ອວິຊ຺ຊາທິໂກ ວິຎ຺ຎາຓສ຺ສ ປຈ຺ຈໂຍ ເອເຕນາຕິ ລທ຺ຘາວເສສປຈ຺ຈໂຍ, ສງ຺ຂາໂຣ. ອວິຊ຺ຊາປຏິຈ຺ຉາທິຕາທີນເວ ຕສ຺ມິໍ ກມ຺ມາທິວິສເຍ ປຏິສນ຺ຘິວິຎ຺ຎາຓສ຺ສ ອາຣມ຺ມຓຠາເວນ ອຸປ຺ປຕ຺ຕິຏ຺ຐານຠູເຕ ຕຓ຺ຫາຍ ອປ຺ປຫີນຕ຺ຕາ ເອວ ປຸຣິມຸປ຺ປນ຺ນາຍ ຈ ສນ຺ຕຕິຍາ ປຣິຓຕຕ຺ຕາ ປຏິສນ຺ຘິຏ຺ຐານາຠິມຸຂໍ ວິຎ຺ຎາຓໍ ນິນ຺ນໂປຓປພ຺ຠາຣໍ ຫຸຕ຺ວາ ປວຕ຺ຕຕີຕິ ອາຫ ‘‘ຕຓ຺ຫາ ນາເມຕີ’’ຕິ. ສຫຊາຕສງ຺ຂາຣາຕິ ຈຸຕິອາສນ຺ນຊວນວິຎ຺ຎາຓສຫຊາຕເຈຕນາ, ສພ຺ເພປິ ວາ ຜສ຺ສາທໂຍ. ຕສ຺ມິໍ ປຏິສນ຺ຘິຏ຺ຐາເນ ກມ຺ມາທິວິສເຍ ວິຎ຺ຎາຓໍ ຂິປນ຺ຕິ, ຂິປນ຺ຕາ ວິຍ ຕສ຺ມິໍ ວິສເຍ ປຏິສນ຺ຘິວເສນ ວິຎ຺ຎາຓປຕິຏ຺ຐານສ຺ສ ເຫຕຸຠາເວນ ປວຕ຺ຕນ຺ຕີຕິ ອຕ຺ໂຖ.
ຕນ຺ຕິ ຕໍ ວິຎ຺ຎາຓໍ, ຈຸຕິປຏິສນ຺ຘິຕທາສນ຺ນວິຎ຺ຎາຓານໍ ສນ຺ຕຕິວເສນ ວິຎ຺ຎາຓນ຺ຕິ ອຸປນີເຕກຕ຺ຕໍ. ຕຓ຺ຫາຍ ນາມິຍມານໍ…ເປ… ປວຕ຺ຕຕີຕິ ນມນຂິປນປຸຣິມນິສ຺ສຍຊຫນາປຣນິສ຺ສຍສ຺ສາທນນິສ຺ສຍຣຫິຕປວຕ຺ຕນານິ ສນ຺ຕຕິວເສນ ຕສ຺ເສເວກສ຺ສ ວິຎ຺ຎາຓສ຺ສ ໂຫນ຺ຕິ, ນ ອຎ຺ຎສ຺ສາຕິ ທສ຺ເສຕິ. ສນ຺ຕຕິວເສນາຕິ ຈ ວທນ຺ໂຕ ‘‘ຕເທວິທໍ ວິຎ຺ຎາຓໍ ສນ຺ຘາວຕິ ສໍສຣຕິ ອນຎ຺ຎ’’ນ຺ຕິ (ມ. ນິ. ໑.໓໙໖) ອິທຎ຺ຈ ມິຈ຺ຉາຄາຫໍ ປຏິກ຺ຂິປຕິ. ສຕິ ຫິ ນານຕ຺ຕນເຍ ສນ຺ຕຕິວເສນ ເອກຕ຺ຕນໂຍ ໂຫຕີຕິ. ໂອຣິມຕີຣຣຸກ຺ຂວິນິພທ຺ຘຣຊ຺ຊຸ ວິຍ ປຸຣິມຠວຕ຺ຕຠາວວິນິພນ຺ຘໍ ກມ຺ມາທິອາຣມ຺ມຓໍ ທຏ຺ຐພ຺ພໍ, ປຸຣິໂສ ວິຍ ວິຎ຺ຎາຓໍ, ຕສ຺ສ ມາຕິກາຕິກ຺ກມນິຈ຺ຉາ ວິຍ ຕຓ຺ຫາ, ອຕິກ຺ກມນປໂຍໂຄ ວິຍ ຂິປນກສງ຺ຂາຣາ. ຍຖາ ຈ ໂສ ປຸຣິໂສ ປຣຕີເຣ ປຕິຏ຺ຐຫມາໂນ ປຣຕີຣຣຸກ຺ຂວິນິພທ຺ຘໍ ກິຎ຺ຈິ ອສ຺ສາທຍມາໂນ ອນສ຺ສາທຍມາໂນ ວາ ເກວລໍ ປຖວິຍໍ ສພລປໂຍເຄເຫວ ປຕິຏ຺ຐາຕິ, ເອວມິທມ຺ປິ ຠວນ຺ຕຣຕ຺ຕຠາວວິນິພທ຺ຘໍ ຫທຍວຕ຺ຖຸນິສ຺ສຍໍ ປຎ຺ຈໂວກາຣຠເວ ອສ຺ສາທຍມານໍ ຈຕຸໂວກາຣຠເວ ອນສ຺ສາທຍມານໍ ວາ ເກວລໍ ອາຣມ຺ມຓສມ຺ປຍຸຕ຺ຕກມ຺ເມເຫວ ປວຕ຺ຕຕິ. ຕຕ຺ຖ ອສ຺ສາທຍມານນ຺ຕິ ປາປຸຓນ຺ຕໍ, ປຏິລຠມານນ຺ຕິ ອຕ຺ໂຖ.
ຠວນ຺ຕຣາທິປຏິສນ຺ຘານໂຕຕິ ຠວນ຺ຕຣສ຺ສ ອາທິສມ຺ພນ຺ຘນໂຕ, ຠວນ຺ຕຣາທໂຍ ວາ ຠວໂຍນິຄຕິວິຎ຺ຎາຓຏ຺ຐິຕິສຕ຺ຕາວາສນ຺ຕຣາ, ເຕສໍ ປຏິສນ຺ຘານໂຕຕິ ອຕ຺ໂຖ. ກມ຺ມນ຺ຕິ ປຏິສນ຺ຘິຊນກໍ ກມ຺ມໍ. ສງ຺ຂາຣາຕິ ຈຸຕິອາສນ຺ນຊວນວິຎ຺ຎາຓສຫຄຕາ ຂິປນກສງ຺ຂາຣາ.
ສທ຺ທາທິເຫຕຸກາຕິ ເອຕ຺ຖ ປຏິໂຆໂສ ສທ຺ທເຫຕຸໂກ, ປທີໂປ ປທີປນ຺ຕຣາທິເຫຕຸໂກ, ມຸທ຺ທາ ລຎ຺ຉນເຫຕຸກາ, ຉາຍາ ອາທາສາທິຄຕມຸຂາທິເຫຕຸກາ. ອຎ຺ຎຕ຺ຣ ອຄນ຺ຕ຺ວາ ໂຫນ຺ຕີຕິ ສທ຺ທາທິປຈ຺ຈຍເທສໍ ອຄນ຺ຕ຺ວາ ສທ຺ທາທິເຫຕຸກາ ໂຫນ຺ຕິ ຕໂຕ ປຸພ຺ເພ ອຠາວາ, ເອວມິທມ຺ປິ ປຏິສນ຺ຘິວິຎ຺ຎາຓໍ ນ ເຫຕຸເທສໍ ຄນ຺ຕ຺ວາ ຕໍເຫຕຸກໍ ໂຫຕິ ຕໂຕ ປຸພ຺ເພ ອຠາວາ, ຕສ຺ມາ ນ ອິທໍ ເຫຕຸເທສໂຕ ປຸຣິມຠວໂຕ ອາຄຕໍ ປຏິໂຆສາທໂຍ ວິຍ ສທ຺ທາທິເທສໂຕ, ນາປິ ຕຕ຺ຖ ເຫຕຸນາ ວິນາ ອຸປ຺ປນ຺ນໍ ສທ຺ທາທີຫິ ວິນາ ປຏິໂຆສາທໂຍ ວິຍາຕິ ອຕ຺ໂຖ. ອຖ ວາ ອຎ຺ຎຕ຺ຣ ອຄນ຺ຕ຺ວາ ໂຫນ຺ຕີຕິ ປຸພ຺ເພ ປຈ຺ຈຍເທເສ ສນ຺ນິຫິຕາ ຫຸຕ຺ວາ ຕໂຕ ອຎ຺ຎຕ຺ຣ ຄນ຺ຕ຺ວາ ຕປ຺ປຈ຺ຈຍາ ນ ໂຫນ຺ຕິ ອຸປ຺ປຕ຺ຕິໂຕ ປຸພ຺ເພ ອຠາວາ, ນາປິ ສທ຺ທາທິປຈ຺ຈຍາ ນ ໂຫນ຺ຕິ, ເອວມິທມ຺ປີຕິ ວຸຕ຺ຕນເຍນ ໂຍເຊຕພ຺ພໍ. ເອສ ນໂຍຕິ ພີຊງ຺ກຸຣາທີສຸ ສພ຺ພເຫຕຸເຫຕຸສມຸປ຺ປນ຺ເນສຸ ຍຖາສມ຺ຠວໍ ໂຍຊນາ ກາຕພ຺ພາຕິ ທສ຺ເສຕິ. ອິຘາປິ ຫິ ເຫຕຸເຫຕຸສມຸປ຺ປນ຺ນວິຎ຺ຎາຓານໍ ເອກນ຺ຕເມກຕ຺ເຕ ສຕິ ນ ມນຸສ຺ສຄຕິໂກ ເທວຄຕິຠູໂຕ ສິຍາ, ເອກນ຺ຕນານຕ຺ເຕ ນ ກມ຺ມວໂຕ ຜລໍ ສິຍາ. ຕໂຕ ‘‘ຣຕ຺ຕສ຺ສ ພີຊໍ, ຣຕ຺ຕສ຺ສ ຜລ’’ນ຺ຕິອາທິກສ຺ສ ວິຍ ‘‘ຠູຕປຸພ຺ພາຫໍ, ຠນ຺ເຕ, ໂຣຫິຕສ຺ໂສ ນາມ ອິສີ’’ຕິອາທິກສ຺ສ (ສໍ. ນິ. ໑.໑໐໗) ໂວຫາຣສ຺ສ ໂລໂປ ສິຍາ, ຕສ຺ມາ ເອຕ຺ຖ ສນ຺ຕານພນ຺ເຘ ສຕິ ເຫຕຸເຫຕຸສມຸປ຺ປນ຺ເນສຸ ນ ເອກນ຺ຕເມວ ເອກຕາ ວາ ນານຕາ ວາ ອຸປຄນ຺ຕພ຺ພາ. ເອຕ຺ຖ ຈ ເອກນ຺ຕເອກຕາປຏິເສເຘນ ‘‘ສຍໍກຕໍ ສຸຂໍ ທຸກ຺ຂ’’ນ຺ຕິ ອິມໍ ທິຏ຺ຐິໍ ນິວາເຣຕິ, ເອກນ຺ຕນານຕາປຏິເສເຘນ ‘‘ປຣໍກຕໍ ສຸຂໍ ທຸກ຺ຂ’’ນ຺ຕິ, ເຫຕຸເຫຕຸສມຸປ຺ປນ຺ນຠາວວຈເນນ ‘‘ອຘິຈ຺ຈສມຸປ຺ປນ຺ນ’’ນ຺ຕິ. ເອຕ຺ຖາຕິ ເອກສນ຺ຕາເນ.
ຈຕຸມຘຸຣອລຕ຺ຕກຣສາທິຠາວນາ ອມ຺ພມາຕຸລຸງ຺ຄາທິພີຊານໍ ອຠິສງ຺ຂາໂຣ. ເອຕ຺ຖ ພີຊໍ ວິຍ ກມ຺ມວາ ສຕ຺ໂຕ, ອຠິສງ຺ຂາໂຣ ວິຍ ກມ຺ມໍ, ພີຊສ຺ສ ອງ຺ກຸຣາທິປ຺ປພນ຺ໂຘ ວິຍ ສຕ຺ຕສ຺ສ ປຏິສນ຺ຘິວິຎ຺ຎາຓາທິປ຺ປພນ຺ໂຘ, ຕຕ຺ຖຸປ຺ປນ຺ນສ຺ສ ມຘຸຣສ຺ສ ຣຕ຺ຕເກສຣສ຺ສ ວາ ຜລສ຺ສ ວາ ຕສ຺ເສວ ພີຊສ຺ສ, ຕໂຕ ເອວ ຈ ອຠິສງ຺ຂາຣໂຕ ຠາໂວ ວິຍ ກມ຺ມກາຣກສ຺ເສວ ສຕ຺ຕສ຺ສ, ຕໍກມ຺ມໂຕ ເອວ ຈ ຜລສ຺ສ ຠາໂວ ເວທິຕພ຺ໂພ. ພາລສຣີເຣ ກຕໍ ວິຊ຺ຊາປຣິຍາປຸຓນໍ ສິປ຺ປສິກ຺ຂນໍ ໂອສຘປ຺ປໂຍໂຄ ຈ ນ ວຸຑ຺ຒສຣີຣໍ ຄຈ຺ຉນ຺ຕິ. ອຖ ຈ ຕໍນິມິຕ຺ຕໍ ວິຊ຺ຊາປາຏວໍ ສິປ຺ປຊານນໍ ອນາມຍຕາ ຈ ວຸຑ຺ຒສຣີເຣ ໂຫຕິ, ນ ຈ ຕໍ ອຎ຺ຎສ຺ສ ໂຫຕິ ຕໍສນ຺ຕຕິປຣິຍາປນ຺ເນ ເອວ ວຸຑ຺ຒສຣີເຣ ອຸປ຺ປຊ຺ຊນໂຕ, ນ ຈ ຍຖາປຍຸຕ຺ເຕນ ວິຊ຺ຊາປຣິຍາປຸຓນາທິນາ ວິນາ ອຎ຺ຎໂຕ ໂຫຕິ ຕທຠາເວ ອຠາວໂຕ. ເອວມິຘາປິ ສນ຺ຕາເນ ຍໍ ຜລໍ, ເອຕໍ ນາຎ຺ຎສ຺ສ, ນ ຈ ອຎ຺ຎໂຕຕິ ໂຍເຊຕພ຺ພໍ. ນ ອຎ຺ຎໂຕຕິ ເອເຕນ ຈ ສງ຺ຂາຣາຠາເວ ຜລາຠາວເມວ ທສ຺ເສຕິ, ນາຎ຺ຎປຈ຺ຈຍນິວາຣຓໍ ກໂຣຕິ.
ຍມ຺ປິ ວຸຕ຺ຕໍ, ຕຕ຺ຖ ວທາມາຕິ ວຈນເສໂສ. ຕຕ຺ຖ ວາ ອຸປຠຸຎ຺ຊເກ ອສຕິ ສິທ຺ຘາ ຠຸຎ຺ຊກສມ຺ມຸຕີຕິ ສມ຺ພນ຺ໂຘ. ຜລຕີຕິ ສມ຺ມຸຕິ ຜລຕິສມ຺ມຸຕິ.
ເອວໍ ສນ຺ເຕປີຕິ ອສງ຺ກນ຺ຕິປາຕຸຠາເວ, ຕຕ຺ຖ ຈ ຍຖາວຸຕ຺ຕໂທສປຣິຫຣເຓ ສຕິ ສິທ຺ເຘຕິ ອຕ຺ໂຖ. ປວຕ຺ຕິໂຕ ປຸພ຺ເພຕິ ກມ຺ມາຍູຫນກ຺ຂຓໂຕ ປຸພ຺ເພ. ປຈ຺ຉາ ຈາຕິ ວິປຈ຺ຈນປວຕ຺ຕິໂຕ ປຈ຺ຉາ ຈ. ອວິປກ຺ກວິປາກາ ກຕຕ຺ຕາ ເຈ ປຈ຺ຈຍາ, ວິປກ຺ກວິປາການມ຺ປິ ກຕຕ຺ຕໍ ສມານນ຺ຕິ ເຕສມ຺ປິ ຜລາວຫຕາ ສິຍາຕິ ອາສງ຺ການິວຕ຺ຕນຕ຺ຖໍ ອາຫ ‘‘ນ ຈ ນິຈ຺ຈໍ ຜລາວຫາ’’ຕິ. ນ ວິຊ຺ຊມານຕ຺ຕາ ວາ ອວິຊ຺ຊມານຕ຺ຕາ ວາຕິ ເອເຕນ ວິຊ຺ຊມານຕ຺ຕໍ ອວິຊ຺ຊມານຕ຺ຕຎ຺ຈ ນິສ຺ສາຍ ວຸຕ຺ຕໂທເສວ ປຣິຫຣຕິ.
ຕສ຺ສາ ປາຏິໂຠຄກິຣິຍາຍ, ຠຓ຺ຑກີຓນກິຣິຍາຍ, ອິຓຄຫຓາທິກິຣິຍາຍ ວາ ກຣຓມຕ຺ຕໍ ຕໍກິຣິຍາກຣຓມຕ຺ຕໍ. ຕເທວ ຕທຕ຺ຖນິຍ຺ຍາຕເນ ປຏິຠຓ຺ຑທາເນ ອິຓທາເນ ຈ ປຈ຺ຈໂຍ ໂຫຕິ, ອຜລິຕນິຍ຺ຍາຕນາທິຜລນ຺ຕິ ອຕ຺ໂຖ.
ອວິເສເສນາຕິ ‘‘ຕິເຫຕຸໂກ ຕິເຫຕຸກສ຺ສາ’’ຕິອາທິກໍ ເຠທໍ ອກຕ຺ວາວ ສາມຎ຺ຎໂຕ, ປິຓ຺ຑວເສນາຕິ ອຕ຺ໂຖ. ສພ຺ພຕ຺ຖ ອຸປນິສ຺ສຍປຈ຺ຈໂຍ ພລວກມ຺ມສ຺ສ ວເສນ ໂຍເຊຕພ຺ໂພ. ‘‘ທຸພ຺ພລຎ຺ຫິ ອຸປນິສ຺ສຍປຈ຺ຈໂຍ ນ ໂຫຕີ’’ຕິ ວກ຺ຂມານເມເວຕໍ ປຏ຺ຐານວຓ຺ຓນາຍນ຺ຕິ. ອວິເສເສນາຕິ ສພ຺ພປຸຎ຺ຎາຠິສງ຺ຂາຣໍ ສຫ ສງ຺ຄຓ຺ຫາຕິ. ທ຺ວາທສາກຸສລເຈຕນາເຠໂທຕິ ເອຕ຺ຖ ອຸທ຺ຘຈ຺ຈສຫຄຕາ ກສ຺ມາ ຄຫິຕາຕິ ວິຈາເຣຕພ຺ພເມຕໍ. ເອກສ຺ສ ວິຎ຺ຎາຓສ຺ສ ຕເຖວ ປຈ຺ຈໂຍ ປຏິສນ຺ຘິຍໍ, ໂນ ປວຕ຺ເຕຕິ ເອກສ຺ເສວ ປຈ຺ຈຍຠາວນິຍໂມ ປຏິສນ຺ຘິຍໍ, ໂນ ປວຕ຺ເຕ. ປວຕ຺ເຕ ຫິ ສຕ຺ຕນ຺ນມ຺ປິ ປຈ຺ຈໂຍຕິ ອຘິປ຺ປາໂຍ. ‘‘ຕຖາ ກາມາວຈຣເທວໂລເກປິ ອນິຏ຺ຐາ ຣູປາທໂຍ ນຕ຺ຖີ’’ຕິ ວຸຕ຺ຕໍ, ເທວານໍ ປນ ປຸພ຺ພນິມິຕ຺ຕປາຕຸຠາວກາເລ ມິລາຕມາລາທີນໍ ອນິຏ຺ຐຕາ ກຖໍ ນ ສິຍາ.
ສ຺ເວວ ທ຺ວີສຸ ຠເວສູຕິ ເອຕ຺ຖ ເອກູນຕິໍສເຈຕນາເຠທມ຺ປິ ຈິຕ຺ຕສງ຺ຂາຣໍ ຈິຕ຺ຕສງ຺ຂາຣຠາເວນ ເອກຕ຺ຕໍ ອຸປເນຕ຺ວາ ‘‘ສ຺ເວວາ’’ຕິ ວຸຕ຺ຕໍ. ຕເທກເທໂສ ປນ ກາມາວຈຣຈິຕ຺ຕສງ຺ຂາໂຣວ ເຕຣສນ຺ນໍ ນວນ຺ນຎ຺ຈ ປຈ຺ຈໂຍ ທຏ຺ຐພ຺ໂພ. ເອກເທສປຈ຺ຈຍຠາເວນ ຫິ ສມຸທາໂຍ ວຸຕ຺ໂຕຕິ.
ຍຕ຺ຖ ຈ ວິຕ຺ຖາຣປ຺ປກາສນໍ ກຕໍ, ຕໂຕ ຠວໂຕ ປຏ຺ຐາຍ ມຸຂມຕ຺ຕປ຺ປກາສນໍ ກາຕຸກາໂມ ອາຫ ‘‘ອາທິໂຕ ປຏ຺ຐາຍາ’’ຕິ. ເຕນ ‘‘ທ຺ວີສຸ ຠເວສູ’’ຕິອາທິ ວຸຕ຺ຕໍ. ຕຕິຍຊ຺ຌານຠູມິວເສນາຕິ ເອເຕນ ເອກຕ຺ຕກາຍເອກຕ຺ຕສຎ຺ຎີສາມຎ຺ເຎນ ຈຕຸຕ຺ຖຊ຺ຌານຠູມິ ຈ ອສຎ຺ຎາຣຸປ຺ປວຊ຺ຊາ ຄຫິຕາຕິ ເວທິຕພ຺ພາ. ຍຖາສມ຺ຠວນ຺ຕິ ເອກວີສຕິຍາ ກາມາວຈຣຣູປາວຈຣກຸສລວິປາເກສຸ ຈຸທ຺ທສນ຺ນໍ ປຏິສນ຺ຘິຍໍ ປວຕ຺ເຕ ຈ, ສຕ຺ຕນ຺ນໍ ປວຕ຺ເຕ ເອວ. ອຍໍ ຍຖາສມ຺ຠໂວ.
ຈຕຸນ຺ນໍ ວິຎ຺ຎາຓານນ຺ຕິ ຠວາທໂຍ ອເປກ຺ຂິຕ຺ວາ ວຸຕ຺ຕໍ, ຈຕູສຸ ອນ຺ໂຕຄຘານໍ ປນ ຕິຓ຺ຓໍ ວິຎ຺ຎາຓານໍ ຕີສຸ ວິຎ຺ຎາຓຏ຺ຐິຕີສຸ ຈ ປຈ຺ຈຍຠາໂວ ໂຍເຊຕພ຺ໂພ, ອວິຎ຺ຎາຓເກ ສຕ຺ຕາວາເສ ສງ຺ຂາຣປຈ຺ຈຍາ ວິຎ຺ຎາເຓ ອວິຊ຺ຊມາເນປິ ຕສ຺ສ ສງ຺ຂາຣເຫຕຸກຕ຺ຕໍ ທສ຺ເສຕຸໍ ‘‘ອປິຈາ’’ຕິອາທິມາຫ. ເອຕສ຺ມິຎ຺ຈ ມຸຂມຕ຺ຕປ຺ປກາສເນ ປຸຎ຺ຎາຠິສງ຺ຂາຣາທີນໍ ທຸຄ຺ຄຕິອາທີສຸ ປວຕ຺ຕິຍໍ ກຸສລວິປາກາທິວິຎ຺ຎາຓານໍ ປຈ຺ຈຍຠາໂວ ຠເວສຸ ວຸຕ຺ຕນເຍເນວ ວິຎ຺ຎາຍຕີຕິ ນ ວຸຕ຺ໂຕຕິ ເວທິຕພ຺ໂພ.
ວິຎ຺ຎາຓປທນິທ຺ເທສວຓ຺ຓນາ ນິຏ຺ຐິຕາ.