ອວິຊ຺ຊາປທນິທ຺ເທສວຓ຺ຓນາ

໒໒໖. ‘‘ອວິຊ຺ຊາປຈ຺ຈຍາ ໙໒ ສງ຺ຂາຣາ’’ຕິ ຫິ ວຸຕ຺ຕນ຺ຕິ ເອເຕນ ອວິຊ຺ຊາຍ ວິເສສນຠາເວນ ສງ຺ຂາຣານຎ຺ຈ ປຘານຠາເວນ ວຸຕ຺ຕຕ຺ຕາ ສງ຺ຂາຣານໍ ນິທ຺ທິສິຕພ຺ພຠາວສ຺ສ ກາຣຓໍ ທສ຺ເສຕິ. ປິຕາ ກຖີຍຕິ ‘‘ທີໂຆ ສາໂມ, ມິຕ຺ໂຕ ຣສ຺ໂສ, ໂອທາໂຕ ທຕ຺ໂຕ’’ຕິ.

ຣສິຕພ຺ໂພ ປຏິວິຊ຺ຌິຕພ຺ໂພ ສຠາໂວ ຣໂສ, ອຕ຺ຕໂນ ຣໂສ ສຣໂສ, ຍາຖາໂວ ສຣໂສ ຍາຖາວສຣໂສ, ໂສ ເອວ ລກ຺ຂິຕພ຺ພຕ຺ຕາ ລກ຺ຂຓນ຺ຕິ ຍາຖາວສຣສລກ຺ຂຓໍ. ‘‘ກຕມາ ຈ, ຠິກ຺ຂເວ, ອວິຊ຺ຊາ? ທຸກ຺ເຂ ອຎ຺ຎາຓ’’ນ຺ຕິອາທິນາ (ສໍ. ນິ. ໒.໒; ມ. ນິ. ໑.໑໐໓) ສຸຕ຺ເຕ ຈຕ຺ຕາເຣວ ວຸຕ຺ຕານີຕິ ‘‘ສຸຕ຺ຕນ຺ຕິກປຣິຍາເຍນາ’’ຕິ ອາຫ. ນິກ຺ເຂປກຓ຺ເຑ ປນາຕິອາທິນາ ອິຘ ຈຕູສຸ ຐາເນສຸ ກຖິຕາຍ ເອວ ອວິຊ຺ຊາຍ ນິກ຺ເຂປກຓ຺ເຑ ອຏ຺ຐສຸ ຐາເນສຸ ກິຈ຺ຈຊາຕິໂຕ ປຎ຺ຈວີສຕິຍາ ປເທຫິ ລກ຺ຂຓໂຕ ຈ ກຖິຕຕ຺ຕາ ຕທຕ຺ຖສໍວຓ຺ຓນາວເສນ ວິຠາວນໍ ກໂຣຕິ. ອຫາເປຕ຺ວາ ວິຠຊິຕພ຺ພວິຠຊນຎ຺ຫິ ອຠິຘມ຺ມປຣິຍາໂຍ.

ຊາຍຕິ ເອຕ຺ຖາຕິ ຊາຕິ, ອຸປ຺ປຕ຺ຕິຏ຺ຐານໍ. ຍທິປິ ນິໂຣຘມຄ຺ເຄ ອວິຊ຺ຊາ ອາຣມ຺ມຓໍ ນ ກໂຣຕິ, ເຕ ປນ ຊານິຕຸກາມສ຺ສ ຕປ຺ປຏິຈ຺ຉາທນວເສນ ອນິໂຣຘມຄ຺ເຄສຸ ນິໂຣຘມຄ຺ຄຄ຺ຄຫຓກອາຣຓວເສນ ຈ ປວຕ຺ຕມານາ ຕຕ຺ຖ ອຸປ຺ປຊ຺ຊຕີຕິ ວຸຈ຺ຈຕີຕິ ເຕສມ຺ປິ ອວິຊ຺ຊາຍ ອຸປ຺ປຕ຺ຕິຏ຺ຐານຕາ ໂຫຕິ, ອິຕເຣສໍ ອາຣມ຺ມຓຠາເວນ ຈາຕິ. ສງ຺ຆິກພລເທວໂຄຓາທີນໍ ສງ຺ຆາຏິນງ຺ຄລາທີນິ ວິຍ ອຎ຺ຎເສຕາທີນໍ ອວິຊ຺ຊາຍ ທຸກ຺ຂາທິວິສຍານໍ ອນ຺ຘຕ຺ຕກຣານໍ ໂລຠາທີນໍ ນິວຕ຺ຕໂກ ອຎ຺ຎາຓາທິສຠາໂວ ລກ຺ຂຓນ຺ຕິ ທຏ຺ຐພ຺ພໍ.

ອຕ຺ຖຕ຺ຖນ຺ຕິ ຜລຜລໍ. ອາເມຑິຕວຈນຎ຺ຫິ ສພ຺ເພສໍ ອຕ຺ຖານໍ ວິສຸໍ ວິສຸໍ ປາກຏກຣຓຠາວປ຺ປກາສນຕ຺ຖໍ. ອຕ຺ໂຖ ເອວ ວາ ອຕ຺ໂຖ ອຕ຺ຖຕ຺ໂຖຕິ ອຕ຺ຖສ຺ສ ອວິປຣີຕຕາທສ຺ສນຕ຺ຖໍ ອຕ຺ເຖເນວຕ຺ຖໍ ວິເສສຍຕິ. ນ ຫິ ຎາຓໍ ອນຕ຺ຖໍ ອຕ຺ໂຖຕິ ຄຓ຺ຫາຕີຕິ. ເອວໍ ກາຣຓກາຣຓນ຺ຕິ ເອຕ຺ຖາປິ ທຏ຺ຐພ຺ພໍ. ຕໍ ອາກາຣນ຺ຕິ ອຕ຺ຖຕ຺ຖາທິອາກາຣໍ. ຄເຫຕ຺ວາຕິ ຈິຕ຺ເຕ ປເວເສຕ຺ວາ, ຈິຕ຺ເຕນ ປຸຄ຺ຄເລນ ວາ ຄຫິຕໍ ກຕ຺ວາ. ປຏິວິທ຺ຘສ຺ສ ປຸນ ອເວກ຺ຂຓາ ປຈ຺ຈເວກ຺ຂຓາ. ທຸຈ຺ຈິນ຺ຕິຕຈິນ຺ຕິຕາທິລກ຺ຂຓສ຺ສ ພາລສ຺ສ ຠາໂວ ພາລ຺ຍໍ. ປຊານາຕີຕິ ປກາເຣຫິ ຊານາຕິ. ພລວໂມຫນໍ ປໂມໂຫ. ສມນ຺ຕໂຕ ໂມຫນໍ ສມ຺ໂມໂຫ.

ທຸກ຺ຂາຣມ຺ມຓຕາຕິ ທຸກ຺ຂາຣມ຺ມຓຕາຍ, ຍາຍ ວາ ອວິຊ຺ຊາຍ ຉາເທນ຺ຕິຍາ ທຸກ຺ຂາຣມ຺ມຓາ ຕໍສມ຺ປຍຸຕ຺ຕຘມ຺ມາ, ສາ ເຕສໍ ຠາໂວຕິ ທຸກ຺ຂາຣມ຺ມຓຕາ, ອາຣມ຺ມຓເມວ ວາ ອາຣມ຺ມຓຕາ, ທຸກ຺ຂໍ ອາຣມ຺ມຓຕາ ເອຕິສ຺ສາຕິ ທຸກ຺ຂາຣມ຺ມຓຕາ.

ທຸທ຺ທສຕ຺ຕາ ຄມ຺ຠີຣາ ນ ສຠາວໂຕ, ຕສ຺ມາ ຕທາຣມ຺ມຓຕາ ອວິຊ຺ຊາ ອຸປ຺ປຊ຺ຊຕິ, ອິຕເຣສໍ ສຠາວໂຕ ຄມ຺ຠີຣຕ຺ຕາ ຕທາຣມ຺ມຓຕາ ນຸປ຺ປຊ຺ຊຕີຕິ ອຘິປ຺ປາໂຍ. ອປິຈ ໂຂ ປນາຕິ ມຄ຺ຄສ຺ສ ສງ຺ຂຕສຠາວຕ຺ຕາ ຕໂຕປິ ນິໂຣຘສ຺ສ ຄມ຺ຠີຣຕຣຕໍ ທສ຺ເສຕິ.

ອວິຊ຺ຊາປທນິທ຺ເທສວຓ຺ຓນາ ນິຏ຺ຐິຕາ.