໑໔. ສິກ຺ຂາປທວິຠງ຺ໂຄ

໑. ອຠິຘມ຺ມຠາຊນີຍວຓ຺ຓນາ

໗໐໓. ສິກ຺ຂາສງ຺ຂາຕານໍ ກຸສລຘມ຺ມານໍ ປຎ຺ຈ ສີລງ຺ຄານິ ນິສ຺ສຍຠາເວນ ວາ ປຕິຏ຺ຐາ ສິຍຸໍ, ອຸປນິສ຺ສຍຠາເວນ ວາຕິ ຕທຸຠຍໍ ທສ຺ເສນ຺ໂຕ ອາຫ ‘‘ສມ຺ປໂຍຄວເສນ, ອຸປນິສ຺ສຍວເສນ ຈ ໂອກາສຠາເວນາ’’ຕິ.

໗໐໔. ‘‘ກມ຺ມປຖາ ເອວາ’’ຕິ ນິຍມສ຺ສ ກຕຕ຺ຕາ ວຸຕ຺ຕໍ ‘‘ອສພ຺ພສາຘາຣເຓສູ’’ຕິ. ນ ຫິ ສກ຺ກາ ອິນ຺ທ຺ຣິຍາທິສາຘາຣຓໂກຏ຺ຐາສວເສນ ນິຍມໍ ກາຕຸໍ. ກມ຺ມປຖໂກຏ຺ຐາສິກາ ເອວ, ນ ຌານາທິໂກຏ຺ຐາສິກາ. ກມ຺ມປຖຠາເວນ ອາຄຕນ຺ຕິ ວທນ຺ຕິ, ທຸຄ຺ຄຕິຍາ, ຕຕ຺ຖ ອຸປ຺ປຊ຺ຊນທຸກ຺ຂສ຺ສ ຈ ປວຕ຺ຕິອຸປາຍຠາວໂຕຕິ ອຘິປ຺ປາໂຍ. ອສ຺ສ ສຸຣາປານສ຺ສ. ອຸປກາຣກຕ຺ຕໍ ສພ຺ເພສໍ. ສຠາຄຕ຺ຕໍ ມິຈ຺ຉາຈາຣສ຺ສ.

ຕຖາຄຫິຕສງ຺ຂາຣາຣມ຺ມຓຕາຍາຕິ ‘‘ສຕ຺ຕໍ ອວຫຣາມິ, ສຕ຺ເຕ ວິປ຺ປຏິປຊ຺ຊາມີ’’ຕິອາທິນາ ສຕ຺ຕາກາເຣນ ຄຫິຕສງ຺ຂາຣາຣມ຺ມຓຕາຍ, ນ ປນ ສຕ຺ຕປຎ຺ຎຕ຺ຕິອາຣມ຺ມຓຕາຍາຕິ ອຘິປ຺ປາໂຍ. ‘‘ປຎ຺ຈ ສິກ຺ຂາປທາ’’ຕິອາທິນາ ຕເມວຕ຺ຖໍ ວິວຣຕິ.

ຕສ຺ສ ຕສ຺ສາຕິ ຍສ຺ສ ຍສ຺ສ ພ຺ຍສນຕ຺ຖາຍ. ສຍໍ ວາ ອຸສຸອາທິໍ ຂິປຕິ, ໂອປາຕຂຓນາທິໍ ກໂຣຕິ, ຕາທິສໍ ມນ຺ຕໍ ປຣິຊປ຺ປຕິ, ກມ຺ມຊອິທ຺ຘິໍ ວຬຎ຺ເຊຕິ, ອຎ຺ເຎນ ວາ ຕໍ ສພ຺ພໍ ກາເຣຕີຕິ ອາຫ ‘‘ນິສ຺ສຄ຺ຄິຍ…ເປ… ທ຺ເວ ເອວ ຄຫິຕາ’’ຕິ.

ຍທິປິ ໂກຏ຺ຐາສວາເຣ ວິຣຕິ ສຣູເປນ ນາຄຕາ ‘‘ເຍວາປນາ’’ຕ຺ເວວ ວຸຕ຺ຕາ, ຠຊາປິຍມານາ ປນ ມຄ຺ຄຠາວໍເຍວ ຠຊຕີຕິ ອາຫ ‘‘ວິຣຕິສີລໍ ປນ ມຄ຺ຄໂກຏ຺ຐາສິກ’’ນ຺ຕິ. ເສສສີລານນ຺ຕິ ເສສອວີຕິກ຺ກນ຺ຕສີລານໍ.

໗໑໒. ອຠພ຺ພຏ຺ຐານາຕິ ປາຓາຕິປາຕາທໂຍ. ຍຖາ ປາຓາຕິປາຕາທໂຍ ເວຣເຫຕຸຕາຍ ເວຣໍ, ເອວໍ ຕທຎ຺ເຎປິ ອກຸສລາຕິ ວຸຕ຺ຕໍ ‘‘ຕໍສຠາຄຕາຍ ເວຣຠູຕານ’’ນ຺ຕິ. ວິຣຕີນໍ ອຸປ຺ປຕ຺ຕິ ນ ນ ຠວິສ຺ສຕິ ເສກ຺ຂານນ຺ຕິ ໂຍຊນາ. ‘‘ອກຸສລສມຸຏ຺ຐິຕານິ ຈາ’’ຕິອາທິນາປິ ເສກ຺ຂານໍ ອຸຠເຍນ ວິຣຕິສພ຺ຠາວໍເຍວ ວິຠາເວຕິ. ຕສ຺ສຕ຺ໂຖ – ຍານິ ອກຸສລສມຸຏ຺ຐິຕານິ ກາຍກມ຺ມາທີນິ, ຕານິ ເຕສໍ ເສກ຺ຂານໍ ກາຍທຸຈ຺ຈຣິຕາທີນີຕິ ເວຣານິເຍວ, ເຕຫິ ເວເຣຫິ ເຕສໍ ເສກ຺ຂານໍ ວິຣຕິໂຍ ສມ຺ຠວນ຺ຕິເຍວ. ຍໂຕຕິ ຍສ຺ມາ ປາຓາຕິປາຕາທິວິຣມິຕພ຺ພນິປ຺ປຣິຍາຍເວຣາຠາເວປິ ກາຍທຸຈ຺ຈຣິຕາທິເວຣມຕ຺ຕໂຕ ເສກ຺ຂານໍ ວິຣຕິສມ຺ຠວໂຕ. ນຜລຠູຕສ຺ສາປີຕິ ຍຖາ ຜລສ຺ສ ມຄ຺ຄປຏິພິມ຺ພຠູຕຕ຺ຕາ ມຄ຺ຄສທິສໍ ສຕ຺ຕອຏ຺ຐງ຺ຄິກຕາ ສິຍາ, ເອວໍ ອຜລຠູຕສ຺ສາປິ ສກທາຄາມິມຄ຺ຄາທິກສ຺ສ ຍໂຕ ວິຣຕິສມ຺ຠວໂຕ ອຏ຺ຐງ຺ຄິກຕາ ໂຫຕິ, ອຎ຺ຎຖາ ປຎ຺ຈງ຺ຄິໂກ ເອວ ສິຍາຕິ ອຘິປ຺ປາໂຍ.

ອຠິຘມ຺ມຠາຊນີຍວຓ຺ຓນາ ນິຏ຺ຐິຕາ.

໒. ປຎ຺ຫປຸຈ຺ຉກວຓ຺ຓນາ

໗໑໔. ຍຖາວິຣມິຕພ຺ພໂຕຕິ ໂຍ ໂຍ ປາຓາຕິປາຕາທິ ວິຣມິຕພ຺ໂພ, ຕໂຕ ວິຣຕິວເສນ.

ປຎ຺ຫປຸຈ຺ຉກວຓ຺ຓນາ ນິຏ຺ຐິຕາ.

ສິກ຺ຂາປທວິຠງ຺ຄວຓ຺ຓນາ ນິຏ຺ຐິຕາ.