໑໕. ປຏິສມ຺ຠິທາວິຠງ຺ໂຄ

໑. ສຸຕ຺ຕນ຺ຕຠາຊນີຍໍ

໑. ສງ຺ຄຫວາຣວຓ຺ຓນາ

໗໑໘. ເອເສວ ນໂຍຕິ ສງ຺ເຂເປນ ທສ຺ເສຕ຺ວາ ຕເມວ ນຍໍ ວິຕ຺ຖາຣໂຕ ທສ຺ເສຕຸໍ ‘‘ຘມ຺ມປ຺ປເຠທສ຺ສ ຫີ’’ຕິອາທິມາຫ. ນິຣຸຕ຺ຕິປຏິຠານປ຺ປເຠທາ ຕພ຺ພິສຍານໍ ອຕ຺ຖາທີນໍ ປຈ຺ຈຍຸປ຺ປນ຺ນາທິເຠເທຫິ ຠິນ຺ທິຕ຺ວາ ເວທິຕພ຺ພາ.

‘‘ຍໍ ກິຎ຺ຈິ ປຈ຺ຈຍສມຸປ຺ປນ຺ນ’’ນ຺ຕິ ເອເຕນ ສຈ຺ຈເຫຕຸຘມ຺ມປຈ຺ຈຍາກາຣວາເຣສຸ ອາຄຕານິ ທຸກ຺ຂາທີນິ ຄຫິຕານິ. ສຈ຺ຈປຈ຺ຈຍາກາຣວາເຣສຸ ນິພ຺ພານໍ, ປຣິຍຕ຺ຕິວາເຣ ຠາສິຕຕ຺ໂຖ, ອຠິຘມ຺ມຠາຊນີເຍ ວິປາໂກ ກິຣິຍຎ຺ຈາຕິ ເອວໍ ປາຬິຍໍ ວຸຕ຺ຕານເມວ ວເສນ ປຎ຺ຈ ອຕ຺ຖາ ເວທິຕພ຺ພາ, ຕຖາ ຘມ຺ມາ ຈ.

ວິທຫຕີຕິ ນິພ຺ພຕ຺ຕກເຫຕຸອາທີນໍ ສາຘາຣຓໍ ນິພ຺ພຈນໍ, ຕທຕ຺ຖໍ ປນ ວິຠາເວຕຸມາຫ ‘‘ປວຕ຺ເຕຕິ ເຈວ ປາເປຕິ ຈາ’’ຕິ. ເຕສຸ ປຸຣິໂມ ອຕ຺ໂຖ ມຄ຺ຄວຊ຺ເຊສຸ ທຏ຺ຐພ຺ໂພ. ຠາສິຕມ຺ປິ ຫິ ອວໂພຘນວເສນ ອຕ຺ຖໍ ປວຕ຺ເຕຕີຕິ. ມຄ຺ໂຄ ປນ ນິພ຺ພານໍ ປາເປຕີຕິ ຕສ຺ມິໍ ປຈ຺ຉິໂມ.

ຘມ຺ມນິຣຸຕ຺ຕາຠິລາເປຕິ ເອຕ຺ຖ ຘມ຺ມ-ສທ຺ໂທ ສຠາວວາຈໂກຕິ ກຕ຺ວາ ອາຫ ‘‘ຍາ ສຠາວນິຣຸຕ຺ຕີ’’ຕິ, ອວິປຣີຕນິຣຸຕ຺ຕີຕິ ອຕ຺ໂຖ. ຕສ຺ສາ ອຠິລາເປຕິ ຕສ຺ສາ ນິຣຸຕ຺ຕິຍາ ອວຈນຠູຕາຍ ປຎ຺ຎຕ຺ຕິຍາ ອຠິລາເປຕິ ເກຈິ ວຓ຺ຓຍນ຺ຕິ. ເອວໍ ສຕິ ປຎ຺ຎຕ຺ຕິ ອຠິລປິຕພ຺ພາ, ນ ວຈນນ຺ຕິ ອາປຊ຺ຊຕິ, ນ ຈ ວຈນໂຕ ອຎ຺ຎໍ ອຠິລປິຕພ຺ພໍ ອຸຈ຺ຈາເຣຕພ຺ພໍ ອຕ຺ຖິ, ອຖາປິ ຜສ຺ສາທິວຈເນຫິ ໂພເຘຕພ຺ພໍ ອຠິລປິຕພ຺ພໍ ສິຍາ, ເອວໍ ສຕິ ອຕ຺ຖຘມ຺ມວຊ຺ຊໍ ເຕຫິ ໂພເຘຕພ຺ພໍ ນ ວິຊ຺ຊຕີຕິ ເຕສໍ ນິຣຸຕ຺ຕິຠາໂວ ອາປຊ຺ຊຕິ. ‘‘ຜສ຺ໂສຕິ ຈ ສຠາວນິຣຸຕ຺ຕິ, ຜສ຺ສໍ ຜສ຺ສາຕິ ນ ສຠາວນິຣຸຕ຺ຕີ’’ຕິ ທສ຺ສິໂຕວາຍມຕ຺ໂຖ, ນ ຈ ອວຈນໍ ເອວໍປກາຣໍ ອຕ຺ຖິ, ຕສ຺ມາ ວຈນຠູຕາຍ ເອວ ຕສ຺ສາ ສຠາວນິຣຸຕ຺ຕິຍາ ອຠິລາເປ ອຸຈ຺ຈາຣເຓຕິ ອຕ຺ໂຖ ທຏ຺ຐພ຺ໂພ.

ຕໍ ສຠາວນິຣຸຕ຺ຕິໍ ສທ຺ທໍ ອາຣມ຺ມຓໍ ກຕ຺ວາ ປຈ຺ຈເວກ຺ຂນ຺ຕສ຺ສ ຕສ຺ມິໍ ສຠາວນິຣຸຕ຺ຕາຠິລາເປ ປເຠທຄຕໍ ຎາຓໍ ນິຣຸຕ຺ຕິປຏິສມ຺ຠິທາຕິ ວຸຕ຺ຕຕ຺ຕາ ນິຣຸຕ຺ຕິສທ຺ທາຣມ຺ມຓາຍ ໂສຕວິຎ຺ຎາຓວີຖິຍາ ປຣໂຕ ມໂນທ຺ວາເຣ ນິຣຸຕ຺ຕິປຏິສມ຺ຠິທາ ປວຕ຺ຕຕີຕິ ວທນ຺ຕິ. ‘‘ນິຣຸຕ຺ຕິປຏິສມ຺ຠິທາ ປຈ຺ຈຸປ຺ປນ຺ນາຣມ຺ມຓາ’’ຕິ ຈ ວຈນໍ ສທ຺ທໍ ຄເຫຕ຺ວາ ປຈ຺ຉາ ຊານນໍ ສນ຺ຘາຍ ວຸຕ຺ຕນ຺ຕິ. ເອວໍ ປນ ອຎ຺ຎສ຺ມິໍ ປຈ຺ຈຸປ຺ປນ຺ນາຣມ຺ມເຓ ອຎ຺ຎໍ ປຈ຺ຈຸປ຺ປນ຺ນາຣມ຺ມຓນ຺ຕິ ວຸຕ຺ຕນ຺ຕິ ອາປຊ຺ຊຕິ. ຍຖາ ປນ ທິພ຺ພໂສຕຎາຓໍ ມນຸສ຺ສາມນຸສ຺ສາທິສທ຺ທປ຺ປເຠທນິຈ຺ຉຍສ຺ສ ປຈ຺ຈຍຠູຕໍ ຕໍ ຕໍ ສທ຺ທວິຠາວກໍ, ເອວໍ ສຠາວາສຠາວນິຣຸຕ຺ຕິນິຈ຺ຉຍສ຺ສ ປຈ຺ຈຍຠູຕໍ ປຈ຺ຈຸປ຺ປນ຺ນສຠາວນິຣຸຕ຺ຕິສທ຺ທາຣມ຺ມຓໍ ຕໍວິຠາວກຎາຓໍ ນິຣຸຕ຺ຕິປຏິສມ຺ຠິທາຕິ ວຸຈ຺ຈມາເນ ນ ປາຬິວິໂຣໂຘ ໂຫຕິ. ຕໍ ສຠາວນິຣຸຕ຺ຕິໍ ສທ຺ທໍ ອາຣມ຺ມຓໍ ກຕ຺ວາ ປຈ຺ຈເວກ຺ຂນ຺ຕສ຺ສາຕິ ຈ ປຈ຺ຈຸປ຺ປນ຺ນສທ຺ທາຣມ຺ມຓໍ ປຈ຺ຈເວກ຺ຂຓໍ ປວຕ຺ຕຍນ຺ຕສ຺ສາຕິ ນ ນ ສກ຺ກາ ວຕ຺ຕຸໍ. ຕມ຺ປິ ຫິ ຎາຓໍ ສຠາວນິຣຸຕ຺ຕິໍ ວິຠາເວນ຺ຕໍເຍວ ຕໍຕໍສທ຺ທປຈ຺ຈເວກ຺ຂຓານນ຺ຕຣໍ ຕໍຕໍປເຠທນິຈ຺ຉຍເຫຕຸຕ຺ຕາ ນິຣຸຕ຺ຕິໍ ຠິນ຺ທນ຺ຕໍ ປຏິວິຊ຺ຌນ຺ຕເມວ ອຸປ຺ປຊ຺ຊຕີຕິ ຈ ປເຠທຄຕມ຺ປິ ໂຫຕີຕິ. ສຠາວນິຣຸຕ຺ຕີຕິ ມາຄຘຠາສາ ອຘິປ຺ເປຕາຕິ ຕໂຕ ອຎ຺ຎໍ ສກ຺ກຏນາມາທິສທ຺ທໍ ສນ຺ຘາຍ ‘‘ອຎ຺ຎໍ ປນາ’’ຕິ ອາຫ. ພ຺ຍຎ຺ຊນນ຺ຕິ ນິປາຕປທມາຫ.

ກຖິຕໍ ອຏ຺ຐກຖາຍໍ. ໂພຘິມຓ຺ຑ-ສທ຺ໂທ ປຐມາຠິສມ຺ພຸທ຺ຘຏ຺ຐາເນ ເອວ ທຏ຺ຐພ຺ໂພ, ນ ຍຕ຺ຖ ກຕ຺ຖຈິ ໂພຘິຣຸກ຺ຂສ຺ສ ປຕິຏ຺ຐິຕຏ຺ຐາເນ. ສຸວຓ຺ຓສລາກນ຺ຕິ ເສຏ຺ຐສລາກໍ, ຘມ຺ມເທສນຕ຺ຖໍ ສລາກໍ ຄເຫຕ຺ວາຕິ ອຕ຺ໂຖ, ນ ປຏິສມ຺ຠິທາຍໍ ຐິເຕນ ປວາຣິຕໍ, ຕສ຺ມາ ປຏິສມ຺ຠິທາໂຕ ອຎ຺ເຎເນວ ປກາເຣນ ຊານິຕພ຺ພໂຕ ນ ສກ຺ກຏຠາສາຊານນໍ ປຏິສມ຺ຠິທາກິຈ຺ຈນ຺ຕິ ອຘິປ຺ປາໂຍ.

ອິທໍ ກຖິຕນ຺ຕິ ມາຄຘຠາສາຍ ສຠາວນິຣຸຕ຺ຕິຕາຎາປນຕ຺ຖໍ ອິທໍ ອິທານິ ວຕ຺ຕພ຺ພໍ ກຖິຕນ຺ຕິ ອຕ຺ໂຖ. ຉທ຺ທນ຺ຕວາຣຓ (ຊາ. ໑.໑໖.໙໗ ອາທໂຍ) -ຕິຕ຺ຕິຣຊາຕກາທີສຸ (ຊາ. ໑.໔.໗໓ ອາທໂຍ) ຕິຣຈ຺ຉາເນສຸ ຈ ມາຄຘຠາສາ ອຸສ຺ສນ຺ນາ, ນ ໂອຏ຺ຏກາທິຠາສາ ສກ຺ກຏໍ ວາ.

ຕຕ຺ຖາຕິ ມາຄຘເສສຠາສາສຸ. ເສສາ ປຣິວຕ຺ຕນ຺ຕິ ເອກນ຺ເຕນ ກາລນ຺ຕເຣ ອຎ຺ຎຖາ ໂຫນ຺ຕິ ວິນສ຺ສນ຺ຕິ ຈ. ມາຄຘາ ປນ ກຕ຺ຖຈິ ກທາຈິ ປຣິວຕ຺ຕນ຺ຕີປິ ນ ສພ຺ພຕ຺ຖ ສພ຺ພທາ ສພ຺ພຖາ ຈ ປຣິວຕ຺ຕຕິ, ກປ຺ປວິນາເສປິ ຕິຏ຺ຐຕິເຍວາຕິ ‘‘ອຍເມເວກາ ນ ປຣິວຕ຺ຕຕີ’’ຕິ ອາຫ. ປປຎ຺ໂຈຕິ ຈິຣາຍນນ຺ຕິ ອຕ຺ໂຖ. ພຸທ຺ຘວຈນເມວ ເຈຕສ຺ສ ວິສໂຍ, ເຕເນວ ‘‘ເນລງ຺ໂຄ ເສຕປຈ຺ຉາໂທ’’ຕິ ຄາຖໍ ປຸຈ຺ຉິໂຕ ຈິຕ຺ໂຕ ຄຫປຕິ ‘‘‘ກິໍ ນຸ ໂຂ ເອຕໍ, ຠນ຺ເຕ, ຠຄວຕາ ຠາສິຕ’ນ຺ຕິ? ‘ເອວໍ ຄຫປຕີ’ຕິ. ‘ເຕນ ຫິ, ຠນ຺ເຕ, ມຸຫຸຕ຺ຕໍ ອາຄເມຖ, ຍາວສ຺ສ ອຕ຺ຖໍ ເປກ຺ຂາມີ’’’ຕິ (ສໍ. ນິ. ໔.໓໔໗) ອາຫາຕິ ວທນ຺ຕິ.

ສພ຺ພຕ຺ຖກຎາຓນ຺ຕິ ອຕ຺ຖາທີສຸ ຎາຓໍ. ຕຎ຺ຫິ ສພ຺ເພສຸ ເຕສຸ ຕີສຸ ຈຕູສຸປິ ວາ ປວຕ຺ຕຕ຺ຕາ, ກຸສລກິຣິຍຠູຕາຍ ປຏິຠານປຏິສມ຺ຠິທາຍ ຘມ຺ມຕ຺ຖຠາວໂຕ ຕີສຸ ເອວ ວາ ປວຕ຺ຕຕ຺ຕາ ‘‘ສພ຺ພຕ຺ຖກຎາຓ’’ນ຺ຕິ ວຸຕ຺ຕໍ. ອິມານິ ຎາຓານິ ອິທມຕ຺ຖໂຊຕການີຕິ ສາຕ຺ຖການໍ ປຈ຺ຈເວກ຺ຂິຕພ຺ພຕ຺ຕາ ສພ຺ໂພ ອຕ຺ໂຖ ເອຕສ຺ສາຕິປິ ສພ຺ພຕ຺ຖກໍ, ສພ຺ພສ຺ມິໍ ຂິຕ຺ຕນ຺ຕິ ວາ. ເສກ຺ເຂ ປວຕ຺ຕາ ອຣຫຕ຺ຕປ຺ປຕ຺ຕິຍາ ວິສທາ ໂຫນ຺ຕີຕິ ວທນ຺ຕິ. ປຸພ຺ພໂຍໂຄ ວິຍ ປນ ອຣຫຕ຺ຕປ຺ປຕ຺ຕິ ອຣຫໂຕປິ ປຏິສມ຺ຠິທາວິສທຕາຍ ປຈ຺ຈໂຍ ນ ນ ໂຫຕີຕິ ປຎ຺ຈນ຺ນມ຺ປິ ຍຖາໂຍຄໍ ເສກ຺ຂາເສກ຺ຂປຏິສມ຺ຠິທາວິສທຕ຺ຕກາຣຓຕາ ໂຍເຊຕພ຺ພາ.

ປຸຈ຺ຉາຍ ປຣໂຕ ປວຕ຺ຕາ ກຖາຕິ ກຕ຺ວາ ອຏ຺ຐກຖາ ‘‘ປຣິປຸຈ຺ຉາ’’ຕິ ວຸຕ຺ຕາ. ປຏິປຕ຺ຕິໍ ປູເຣຕພ຺ພໍ ມຎ຺ຎິສ຺ສນ຺ຕີຕິ ປຏິປຕ຺ຕິຄຣຸຕາຍ ລາຠໍ ຫີເຬນ຺ເຕນ ສຕສຫສ຺ສຄ຺ຆນກມ຺ປິ ກມ຺ພລໍ ວາສິຍາ ໂກຏ຺ເຏຕ຺ວາ ປຣິຠຓ຺ຑກຣຓໍ ມຍາ ກຕໍ ອາວຊ຺ຊິຕ຺ວາ ລາຠຄຣຸໂນ ປຣິຍຕ຺ຕິຘຣາ ຘມ຺ມກຖິກາວ ຠວິຕຸໍ ນ ມຎ຺ຎິສ຺ສນ຺ຕີຕິ ວຸຕ຺ຕໍ ໂຫຕິ. ເອຕ຺ຖ ຈ ເຖຣສ຺ສ ກງ຺ຂຸປ຺ປຕ຺ຕິຍາ ປຸພ຺ເພ ອວິສທຕໍ ທສ຺ເສຕ຺ວາ ອຣຫຕ຺ຕປ຺ປຕ຺ຕສ຺ສ ປຎ຺ຫວິສ຺ສຊ຺ຊເນນ ອຣຫຕ຺ຕປ຺ປຕ຺ຕິຍາ ວິສທຕາ ທສ຺ສິຕາ. ຕິສ຺ສຕ຺ເຖໂຣ ອນນ຺ຕຣໍ ວຸຕ຺ໂຕ ຕິສ຺ສຕ຺ເຖໂຣ ເອວາຕິ ວທນ຺ຕິ.

ປເຠໂທ ນາມ ມຄ຺ເຄຫິ ອຘິຄຕານໍ ປຏິສມ຺ຠິທານໍ ປເຠທຄມນໍ. ອຘິຄໂມ ເຕຫິ ປຏິລາໂຠ, ຕສ຺ມາ ໂສ ໂລກຸຕ຺ຕໂຣ, ປເຠໂທ ກາມາວຈໂຣ ທຏ຺ຐພ຺ໂພ. ນ ປນ ຕຖາຕິ ຍຖາ ອຘິຄມສ຺ສ ພລວປຈ຺ຈໂຍ ໂຫຕິ, ນ ຕຖາ ປເຠທສ຺ສາຕິ ອຕ຺ໂຖ. ອິທານິ ປຣິຍຕ຺ຕິຍາທີນໍ ອຘິຄມສ຺ສ ພລວປຈ຺ຈຍຕ຺ຕາຠາວໍ, ປຸພ຺ພໂຍຄສ຺ສ ຈ ພລວປຈ຺ຈຍຕ຺ຕໍ ທສ຺ເສນ຺ໂຕ ‘‘ປຣິຍຕ຺ຕິສວນປຣິປຸຈ຺ຉາ ຫີ’’ຕິອາທິມາຫ. ຕຕ຺ຖ ປຏິສມ຺ຠິທາ ນາມ ນຕ຺ຖີຕິ ປຏິສມ຺ຠິທາຘິຄໂມ ນຕ຺ຖີຕິ ອຘິປ຺ປາໂຍ. ອິທານິ ຍໍ ວຸຕ຺ຕໍ ໂຫຕິ, ຕໍ ທສ຺ເສນ຺ໂຕ ‘‘ອິເມ ປນາ’’ຕິອາທິມາຫ. ປຸພ຺ພໂຍຄາຘິຄມາ ຫິ ທ຺ເວປິ ວິສທກາຣຓາຕິ ‘‘ປຸພ຺ພໂຍໂຄ ປເຠທສ຺ສ ພລວປຈ຺ຈໂຍ ໂຫຕີ’’ຕິ ວຸຕ຺ຕນ຺ຕິ.

ສງ຺ຄຫວາຣວຓ຺ຓນາ ນິຏ຺ຐິຕາ.

໒. ສຈ຺ຈວາຣາທິວຓ຺ຓນາ

໗໑໙. ເຫຕຸວາເຣ ກາລຕ຺ຕເຍປິ ເຫຕຸຜລຘມ຺ມາ ‘‘ອຕ຺ຖາ’’ຕິ ວຸຕ຺ຕາ, ເຕສຎ຺ຈ ເຫຕຸຘມ຺ມາ ‘‘ຘມ຺ມາ’’ຕິ, ຘມ຺ມວາເຣ ເວເນຍ຺ຍວເສນ ອຕີຕານຎ຺ຈ ສງ຺ຄຫິຕຕ຺ຕາ ‘‘ອຸປ຺ປນ຺ນາ ສມຸປ຺ປນ຺ນາ’’ຕິອາທິ ນ ວຸຕ຺ຕນ຺ຕິ ອຕີຕປຈ຺ຈຸປ຺ປນ຺ນາ ‘‘ອຕ຺ຖາ’’ຕິ ວຸຕ຺ຕາ, ຕໍນິພ຺ພຕ຺ຕກາ ຈ ‘‘ຘມ຺ມາ’’ຕິ ອິທເມເຕສໍ ທ຺ວິນ຺ນມ຺ປິ ວາຣານໍ ນານຕ຺ຕໍ.

ສຈ຺ຈວາຣາທິວຓ຺ຓນາ ນິຏ຺ຐິຕາ.

ສຸຕ຺ຕນ຺ຕຠາຊນີຍວຓ຺ຓນາ ນິຏ຺ຐິຕາ.

໒. ອຠິຘມ຺ມຠາຊນີຍວຓ຺ຓນາ

໗໒໕. ອວຸຕ຺ຕຕ຺ຕາຕິ ‘‘ເຕສໍ ວິປາເກ ຎາຓ’’ນ຺ຕິ ສາມຎ຺ເຎນ ວຕ຺ວາ ວິເສເສນ ອວຸຕ຺ຕຕ຺ຕາຕິ ອຘິປ຺ປາໂຍ. ເອຕ຺ຖ ຈ ກິຣິຍານໍ ອວິປາກຕ຺ຕາ ຘມ຺ມຠາໂວ ນ ວຸຕ຺ໂຕຕິ. ຍທິ ເອວໍ ວິປາກາ ນ ໂຫນ຺ຕີຕິ ອຕ຺ຖຠາໂວ ຈ ນ ວຕ຺ຕພ຺ໂພຕິ? ນ, ປຈ຺ຈຍຸປ຺ປນ຺ນຕ຺ຕາ. ເອວຎ຺ເຈ ກຸສລາກຸສລານມ຺ປິ ອຕ຺ຖຠາໂວ ອາປຊ຺ຊຕີຕິ. ນປ຺ປຏິສິທ຺ໂຘ, ວິປາກສ຺ສ ປນ ປຘານເຫຕຸຕາຍ ປາກຏຕ຺ຕາ ຘມ຺ມຠາໂວວ ເຕສໍ ວຸຕ຺ໂຕ. ກິຣິຍານໍ ປຈ຺ຈຍຕ຺ຕາ ຘມ຺ມຠາໂວ ອາປຊ຺ຊຕີຕິ ເຈ? ນາຍໍ ໂທໂສ ອປ຺ປຏິສິທ຺ຘຕ຺ຕາ, ກມ຺ມຜລສມ຺ພນ຺ຘສ຺ສ ປນ ອເຫຕຸຕ຺ຕາ ຘມ຺ມຠາໂວ ນ ວຸຕ຺ໂຕ. ອປິຈ ‘‘ອຍໍ ອິມສ຺ສ ປຈ຺ຈໂຍ, ອິທໍ ປຈ຺ຈຍຸປ຺ປນ຺ນ’’ນ຺ຕິ ເອວໍ ເຠທໍ ອກຕ຺ວາ ເກວລໍ ກຸສລາກຸສເລ ວິປາກກິຣິຍຘມ຺ເມ ຈ ສຠາວໂຕ ປຈ຺ຈເວກ຺ຂນ຺ຕສ຺ສ ຘມ຺ມປຏິສມ຺ຠິທາ ອຕ຺ຖປຏິສມ຺ຠິທາ ຈ ໂຫຕີຕິປິ ເຕສໍ ອຕ຺ຖຘມ຺ມຕາ ນ ວຸຕ຺ຕາຕິ ເວທິຕພ຺ພາ. ກຸສລາກຸສລວາເຣສຸ ຈ ຘມ຺ມປຏິສມ຺ຠິທາ ກຸສລາກຸສລານໍ ປຈ຺ຈຍຠາວໍ ສຕ຺ຕິວິເສສໍ ສນິປ຺ຜາເທຕພ຺ພຕໍ ປສ຺ສນ຺ຕີ ນິປ຺ຜາເທຕພ຺ພາເປກ຺ຂາ ໂຫຕີຕິ ຕໍສມ຺ພນ຺ເຘເນວ ‘‘ເຕສໍ ວິປາເກ ຎາຓໍ ອຕ຺ຖປຏິສມ຺ຠິທາ’’ຕິ ວຸຕ຺ຕໍ. ສຠາວທສ຺ສນມຕ຺ຕເມວ ປນ ອຕ຺ຖປຏິສມ຺ຠິທາຍ ກິຈ຺ຈໍ ນິປ຺ຜນ຺ນຜລມຕ຺ຕທສ຺ສນໂຕຕິ ຕສ຺ສາ ນິປ຺ຜາທການເປກ຺ຂຕ຺ຕາ ວິປາກວາເຣ ‘‘ເຕສໍ ວິປຈ຺ຈນເກ ຎາຓໍ ຘມ຺ມປຏິສມ຺ຠິທາ’’ຕິ ນ ວຸຕ຺ຕນ຺ຕິ ເວທິຕພ຺ພໍ.

ສຠາວປຎ຺ຎຕ຺ຕິຍາຕິ ນ ສຕ຺ຕາທິປຎ຺ຎຕ຺ຕິຍາ, ອວິປຣີຕປຎ຺ຎຕ຺ຕິຍາ ວາ. ໂຂເຠຕ຺ວາຕິ ໂລມຫໍສຊນນສາຘຸກາຣທານາທີຫິ ໂຂເຠຕ຺ວາ. ປຸນ ຘມ຺ມສ຺ສວເນ ຊານິສ຺ສຖາຕິ ອປ຺ປສ຺ສຸຕຕ຺ຕາ ທຸຕິຍວາຣໍ ກເຖນ຺ໂຕ ຕເທວ ກເຖສ຺ສຕີຕິ ອຘິປ຺ປາໂຍ.

໗໔໖. ຠູມິທສ຺ສນຕ຺ຖນ຺ຕິ ເອຕ຺ຖ ກາມາວຈຣາ ໂລກຸຕ຺ຕຣາ ຈ ຠູມິ ‘‘ຠູມີ’’ຕິ ເວທິຕພ຺ພາ, ຈິຕ຺ຕຸປ຺ປາທາ ວາຕິ.

ອຠິຘມ຺ມຠາຊນີຍວຓ຺ຓນາ ນິຏ຺ຐິຕາ.

໓. ປຎ຺ຫປຸຈ຺ຉກວຓ຺ຓນາ

໗໔໗. ປຈ຺ຈຍສມຸປ຺ປນ຺ນຎ຺ຈ ອຕ຺ຖໍ ປຈ຺ຈຍຘມ຺ມຎ຺ຈາຕິ ວຈເນຫິ ເຫຕາທິປຈ຺ຈຍສມຸປ຺ປນ຺ນານໍ ກຸສລາກຸສລຣູປານມ຺ປິ ອຕ຺ຖປຣິຍາຍໍ, ເຫຕາທິປຈ຺ຈຍຠູຕານໍ ວິປາກກິຣິຍຣູປານມ຺ປິ ຘມ຺ມປຣິຍາຍຎ຺ຈ ທສ຺ເສຕິ. ປຏິຠານປຏິສມ຺ຠິທາຍ ກາມາວຈຣວິປາກາຣມ຺ມຓຕາ ມຫຄ຺ຄຕາຣມ຺ມຓຕາ ຈ ປຏິສມ຺ຠິທາຎາຓາຣມ຺ມຓຕ຺ເຕ ນ ຍຸຊ຺ຊຕິ ປຏິສມ຺ຠິທາຎາຓານໍ ກາມາວຈຣໂລກຸຕ຺ຕຣກຸສເລສຸ ກາມາວຈຣກິຣິຍາໂລກຸຕ຺ຕຣວິປາເກສຸ ຈ ອຸປ຺ປຕ຺ຕິໂຕ. ສພ຺ພຎາຓາຣມ຺ມຓຕາຍ ສຕິ ຍຸຊ຺ເຊຍ຺ຍ, ‘‘ເຍນ ຎາເຓນ ຕານິ ຎາຓານິ ຊານາຕີ’’ຕິ (ວິຠ. ໗໒໖) ວຈນໂຕ ປນ ນ ສພ຺ພຎາຓາຣມ຺ມຓຕາຕິ ກຖຍນ຺ຕິ. ສຸຕ຺ຕນ຺ຕຠາຊນີເຍ ປນ ‘‘ຎາເຓສຸ ຎາຓໍ ປຏິຠານປຏິສມ຺ຠິທາ’’ຕິ ອວິເສເສນ ວຸຕ຺ຕຕ຺ຕາ ສພ຺ພຎາຓາຣມ຺ມຓຕາ ສິຍາ. ອຠິຘມ຺ມຠາຊນີເຍປິ ຈິຕ຺ຕຸປ຺ປາທວເສນ ກຖນໍ ນິຣວເສສກຖນນ຺ຕິ ຍຖາທສ຺ສິຕວິສຍວຈນວເສນ ‘‘ເຍນ ຎາເຓນ ຕານິ ຎາຓານິ ຊານາຕີ’’ຕິ ຍໍ ວຸຕ຺ຕໍ, ຕໍ ອຎ຺ຎາຣມ຺ມຓຕໍ ນ ປຏິເສເຘຕີຕິ. ຍຖາ ຈ ອຕ຺ຖປຏິສມ຺ຠິທາວິສຍານໍ ນ ນິຣວເສເສນ ກຖນໍ ອຠິຘມ຺ມຠາຊນີເຍ, ເອວໍ ປຏິຠານປຏິສມ຺ຠິທາວິສຍສ຺ສປີຕິ. ເອວໍ ປຏິຠານປຏິສມ຺ຠິທາຍ ສພ຺ພຎາຓວິສຍຕ຺ຕາ ‘‘ຕິສ຺ໂສ ປຏິສມ຺ຠິທາ ສິຍາ ປຣິຕ຺ຕາຣມ຺ມຓາ ສິຍາ ມຫຄ຺ຄຕາຣມ຺ມຓາ ສິຍາ ອປ຺ປມາຓາຣມ຺ມຓາ’’ຕິ (ວິຠ. ໗໔໙) ວຸຕ຺ຕາ.

ຍທິປິ ‘‘ສິຍາ ອຕ຺ຖປຏິສມ຺ຠິທາ ນ ມຄ຺ຄາຣມ຺ມຓາ’’ຕິ (ວິຠ. ໗໔໙) ວຈນໂຕ ອຠິຘມ຺ມຠາຊນີເຍ ວຸຕ຺ຕປຏິສມ຺ຠິທາສ຺ເວວ ປຎ຺ຫປຸຈ຺ຉກນໂຍ ປວຕ຺ໂຕ. ນ ຫິ ມຄ຺ໂຄ ປຈ຺ຈຍຸປ຺ປນ຺ໂນ ນ ໂຫຕິ, ອຠິຘມ຺ມຠາຊນີເຍ ຈ ປຏິສມ຺ຠິທາຎາຓວິສຍາ ເອວ ປຏິຠານປຏິສມ຺ຠິທາ ວຸຕ຺ຕາຕິ ນ ຕສ຺ສາ ມຫຄ຺ຄຕາຣມ຺ມຓຕາຕິ. ເອວມປິ ທ຺ເວປິ ເອຕາ ປາຬິໂຍ ວິຣຸຊ຺ຌນ຺ຕິ, ຕາສຸ ພລວຕຣາຍ ຐຕ຺ວາ ອິຕຣາຍ ອຘິປ຺ປາໂຍ ມຄ຺ຄິຕພ຺ໂພ. ກຸສລາກຸສລານໍ ປນ ປຈ຺ຈຍຸປ຺ປນ຺ນຕ຺ຕປຏິເວໂຘປິ ກຸສລາກຸສລຠາວປຏິເວຘວິນິມຸຕ຺ໂຕ ນຕ຺ຖີຕິ ນິປ຺ປຣິຍາຍາ ຕຕ຺ຖ ຘມ຺ມປຏິສມ຺ຠິທາ ເອກນ຺ຕຘມ຺ມວິສຍຕ຺ຕາ, ຕຖາ ວິປາກກິຣິຍານໍ ປຈ຺ຈຍຠາວປຏິເວໂຘປິ ວິປາກກິຣິຍຠາວປຏິເວຘວິນິມຸຕ຺ໂຕ ນຕ຺ຖີຕິ ນິປ຺ປຣິຍາຍາ ຕຕ຺ຖ ອຕ຺ຖປຏິສມ຺ຠິທາ ເອກນ຺ຕິກອຕ຺ຖວິສຍຕ຺ຕາ. ກິຎ຺ຈິ ປນ ຎາຓໍ ອປ຺ປຏິຠານຠູຕໍ ນຕ຺ຖິ ເຎຍ຺ຍປ຺ປກາສນໂຕຕິ ສພ຺ພສ຺ມິມ຺ປິ ຎາເຓ ນິປ຺ປຣິຍາຍາ ປຏິຠານປຏິສມ຺ຠິທາ ຠວິຕຸໍ ອຣຫຕິ. ນິປ຺ປຣິຍາຍປຏິສມ຺ຠິທາສຸ ປຎ຺ຫປຸຈ຺ຉກສ຺ສ ປວຕ຺ຕິຍໍ ທ຺ເວປິ ປາຬິໂຍ ນ ວິຣຸຊ຺ຌນ຺ຕິ.

ສທ຺ທາຣມ຺ມຓຕ຺ຕາ ພຫິທ຺ຘາຣມ຺ມຓາຕິ ເອຕ຺ຖ ປຣສ຺ສ ອຠິລາປສທ຺ທາຣມ຺ມຓຕ຺ຕາຕິ ຠວິຕພ຺ພໍ. ນ ຫິ ສທ຺ທາຣມ຺ມຓຕາ ພຫິທ຺ຘາຣມ຺ມຓຕາຍ ກາຣຓໍ ສທ຺ທສ຺ສ ອຊ຺ຌຕ຺ຕສ຺ສ ຈ ສພ຺ຠາວາຕິ. ອນຸວຕ຺ຕມາໂນ ຈ ໂສ ເອວ ສທ຺ໂທຕິ ວິເສສນໍ ນ ກຕນ຺ຕິ ທຏ຺ຐພ຺ພໍ.

ປຎ຺ຫປຸຈ຺ຉກວຓ຺ຓນາ ນິຏ຺ຐິຕາ.

ປຏິສມ຺ຠິທາວິຠງ຺ຄວຓ຺ຓນາ ນິຏ຺ຐິຕາ.